နားကိုက် တာ သက်သာစေဖို့ အိမ်တွင်းနည်းလမ်းများ

နားကိုက် တာ သွားကိုက်သလိုပါပဲ။ ကိုက်ကလည်းကိုက် ကုတ်မရ ဖဲ့မရ၊ အတွင်းထဲကဆို ပိုဆိုး ဘာလုပ်လို့ ဘာကိုင်ရမလဲ မသိပါဘူး။ လတ်တလောမှာ ဆေးခန်းမသွားဖြစ်ရင်တောင် ကိုယ်သိထားတဲ့ အိမ်တွင်းနည်းလမ်းလေးတွေနဲ့ သက်သာအောင် လုပ်ထားနိုင်ရင် အကိုက်သက်သာတာပေါ့။ ဒါပေမယ့် အိမ်တွင်းနည်းလမ်းတွေနဲ့ မသက်သာရင် ဆရာဝန်သွားပြဖို့ မမေ့ပါနဲ့နော်။ ပြီးတော့ နားကိုက်ရတဲ့ အကြောင်းရင်းတွေကို ရှာပြီး ကုရဦးမယ်မဟုတ်လား။

နားကိုက် တာ သက်သာစေမယ့် အိမ်တွင်းနည်းလမ်းများ

• သောက်ဆေးများ

ဆေးဆိုင်မှာ ဆရာဝန်ဆေးစာ မလိုဘဲ ဝယ်လို့ရတဲ့ over the counterအကိုက်အခဲပျောက်ဆေးတွေ ဝယ်သောက်လို့ရပါတယ်။ ဥပမာပြောရရင် ပါရာစီတမောတို့၊ ibuprofenတို့၊ အက်စပရင်တို့ပေါ့။ ကလေးငယ်တွေဆိုရင်တော့ အက်စပရင် မတိုက်ပါနဲ့။ အသက်၂နှစ်အောင် ကလေးတွေကို ကိုယ့်သဘောနဲ့ကိုယ် ဘာဆေးမှ မတိုက်တာ အကောင်းဆုံးပါပဲ။ လူကြီးတွေအနေနဲ့လည်း အကိုက်အခဲပျောက်ဆေးတွေကို ရေရှည်စွဲမသောက်ဖို့ အကြံပြုချင်ပါတယ်။

• ရေနွေးကပ်ခြင်း

ရေနွေးအိတ်လေးတွေ ကပ်ပေးတာကလည်း နားရောင်နေတာနဲ့ နာတာကို သက်သာစေပါတယ်။ ရေနွေးက ခံနိုင်လောက်အောင် နွေးရင်ရပါပြီ။ တစ်ခါကပ်ရင် မိနစ် ၂၀လောက်ကပ်ပေးပါ။ မြန်မြန်သက်သာဖို့ နားကိုပဲ မကပ်ဘဲနဲ့ ဇက်နဲ့ လည်ပင်းနား တစ်ဝိုက်ကိုပါ ကပ်ပေးပါ။ ရေနွေးအိတ်ပြီး အိပ်ပျော်သွားတာမျိုး၊ ကလေးတွေကို ရေနွေးအိတ်ကပ်ပြီး မကြည့်ဘဲ လွှတ်ထားတာမျိုးတော့ မလုပ်သင့်ပါဘူး။

• ရေခဲကပ်ခြင်း

ရေခဲကပ်တာကလည်း နားကိုက်တာကို အထိုက်အလျောက် သက်သာစေပါတယ်။ ရေခဲကို တိုက်ရိုက် မကပ်ဘဲ အဝတ်လေးနဲ့ ထုပ်ပြီး နားနဲ့ နားပတ်လည်ကို တစ်ခါကပ်ရင် မိနစ် ၂၀လောက် ကပ်ပေးပါ။ တချို့လူတွေကျတော့ ရေနွေးကပ်တာက ရေခဲကပ်တာထက် ပိုသက်သာတယ်လို့ ပြောကြပါတယ်။ တချို့တွေကျတော့လည်း ရေခဲတစ်လှည့် ရေနွေးတစ်လှည့် မိနစ် ၂၀ဆီကပ်တာက ပိုသက်သာတယ်လို့ ပြောကြပါတယ်။ ကိုယ်အဆင်ပြေတဲ့ နည်းလမ်းနဲ့ ကပ်နိုင်ပါတယ်။ သက်သာဖို့က အဓိကပါပဲ။

• နားတွင်း အစက်ချအရည်

နားထဲမှာ ဖိအားသက်သာဖို့၊ နားဖာချေးတွေ သက်သာဖို့ နားတွင်း အစက်ချ အရည်ကို သုံးနိုင်ပါတယ်။ ဒါပေမယ့် ဒါက ဆရာဝန်ညွှန်ကြားတဲ့ ဆေးနဲ့တော့ မတူနိုင်ပါဘူး။ နောက်ပြီးတော့ ကလေးတွေမှာ နားထဲကို အစက်ချအရည်တွေ မသုံးခင် ဆရာဝန်နဲ့ အရင်တိုင်ပင်တာ ပိုကောင်းပါတယ်။

• နှိပ်နယ်ပေးခြင်း

သွားကိုက်လို့ ဒါမှမဟုတ် မေးရိုးကိုက်လို့ ဖြစ်တဲ့ အနာကနေ နားထိပါ တက်ကိုက်တာကို နှိပ်နယ်ခြင်းနဲ့ သက်သာအောင် လုပ်လို့ရပါတယ်။ ဒီလို ကိုက်တာက သိပ်ပြင်းထန်ပြီး နားတင်မက ခေါင်းတွေပါ တင်းပြီး လိုက်ကိုက်လာတာပါ။ ဒါကြောင့် ကိုက်တဲ့နေရာနဲ့ သူ့ဘေးနားက ကြွက်သားတွေကိုပါ ညင်ညင်သာသာ နှိပ်နယ်ပေးပါ။ နားနောက်ကနေ စပြီး ဇက်ကြောတွေထိ နှိပ်ပေးပါ။ ပြီးရင် တဖြည်းဖြည်း နားရှေ့ရောက်တဲ့အထိ ပြန်နှိပ်ပေးပါ။ ဒီလိုနှိပ်နယ်ပေးတာက နားကိုက်တာကို သက်သာစေတဲ့အပြင် နားအတွင်းထဲက အရည်တွေကိုလည်း အပြင်ကို ထွက်စေပါတယ်။

• ကြက်သွန်ဖြူ

ကြက်သွန်ဖြူဟာ အရောင်ကျစေပြီး ပိုးသတ်နိုင်တယ်ဆိုတာ အရင်ကတည်းက သိထားပြီးသားပါ။ ပိုးသတ်ဆေးနေရာမှာ အစားထိုးသုံးဖို့ မဟုတ်ပေမယ့် နားပိုးဝင်တာကို ကုနေတဲ့အချိန်အတွင်းမှာ ကြက်သွန်ဖြူစားပေးမယ်ဆိုရင် ပိုပြီး မြန်မြန်သက်သာစေပါတယ်။ ကြက်သွန်ဖြူ ၂မြွှာ၊ ၃မြွှာကို မုန်ညင်းဆီ ဒါမှမဟုတ် နှမ်းဆီနဲ့ ညိုနေအောင် ချက်ပါ။ အရည်ညှစ်ပြီး နားထဲကို တစ်စက်၊ နှစ်စက်လောက် ထည့်ပေးနိုင်ပါတယ်။

• ကြက်သွန်နီ

ကြက်သွန်နီဟာလည်း ကြက်သွန်ဖြူလိုပဲ ပိုးသေစေပြီး အနာသက်သာစေပါတယ်။ ဒါပေမယ့် ခုနလိုပဲ ပိုးသတ်ဆေးနေရာမှာ အစားထိုး သုံးလို့မရပါဘူး။ ကြက်သွန်နီကို တစ်မိနစ်လောက် နှစ်မိနစ်လောက် မီးအပူပေးပါ။ ပြီးရင် အရည်ညှစ်ပြီး နားထဲကို ထည့်ပေးပါ။ ၁၀မိနစ်လောက် ဘေးစောင်းလှဲနေလိုက်ပါ။ နားထဲက အရည်တွေ ထွက်လာပါလိမ့်မယ်။

• တစ်ခုခုကို စို့ပါ။

ကလေးတွေအတွက် ပိုအဆင်ပြေပါတယ်။ ကလေးတွေ အမေနို့စို့တာ၊ ချိုလိမ်စို့တာ စတာတွေက နားစည်ပြွန်ကို ပွင့်စေပြီး နားထဲကာ ဖိအားကို လျော့ကျစေလို့ အကိုက်သက်သာပါတယ်။ ကလေးကြီးတွေနဲ့ လူကြီးတွေမှာဆိုလည်း စုပ်လုံးသကြားလုံးတွေ စုပ်နိုင်ပါတယ်။

• မိခင်နို့ရည်ထည့်ပါ။

မိခင်နို့ရည်မှာ ပိုးသေစေတဲ့ သတ္တိပါပါတယ်။ အမရဲ့ နို့က ကလေးထိတွေ့တဲ့ ပိုးတွေအပေါ်လိုက်ပြီး ပဋိပစ္စည်းတွေ ပြောင်းလဲထွက်တယ်လို့ လေ့လာချက်တချို့က ပြောထားပါတယ်။ ဒါကြောင့် ဒီနည်းလမ်းကို ကလေးတွေမှာ သုံးတာက ပိုကောင်းပါတယ်။ မိခင်နို့ရည်ကို နားထဲထည့်ပေထးတာက ကောင်းကျိုးမဖြစ်ရင်တောင် ဆိုးကျိုးတော့ မဖြစ်ဘူးလို့ ဆိုပါတယ်။

ဒီနည်းလမ်းတွေက အိမ်မှာ အလွယ်လုပ်လို့ရတဲ့ နည်းလမ်းတွေပါပဲ။ ဒါပေမယ့် ဒီနည်းလမ်းတွေနဲ့  မသက်သာရင် အချိန်မဆွဲဘဲ ဆရာဝန်နဲ့ ပြစေချင်ပါတယ်။ ကလေးက  ငယ်လွန်းရင်လည်း ကိုယ့်ဟာကိုယ် ကျိတ်မကုဘဲ ဆရာဝန်နဲ့ ပြတာ အကောင်းဆုံးပါပဲ။

[embed-health-tool-bmi]