ဆိုရီရေးစစ် (Psoriasis) အရေပြားပြဿနာ အတွက် ဆောင်ရန်ရှောင်ရန်

အရေပြားဆိုတာက ခန္ဓာကိုယ်ရဲ့ အကြီးဆုံး အစိတ်အပိုင်း တစ်ခုပါ။ ခန္ဓာကိုယ်ကို ပြင်ပနေ ဝင်ရောက်လာမယ့် ရောဂါပိုးတွေနဲ့ ရေတွေ စိမ့်ဝင်မှု မဖြစ်စေဖို့ ကာကွယ်ပေးထားတဲ့ ခံတပ်ဆိုလည်း မမှားပါဘူး။ ခန္ဓာကိုယ် ကျန်းမာဖို့ဆိုရင် အရေပြား ကျန်းမာဖို့ အတော်လေး အရေးကြီးပါတယ်။။ အရေပြားဆိုတာက အရွယ်အစားကြီးမားပြီး ခိုင်ခန့်တဲ့ ခံတပ်ဆိုပေမယ့် သူ့မှာလည်း ကျန်းမာရေး ပြဿနာ အမျိုးမျိုး ခံစားရနိုင်ပါတယ်။ ဒီတစ်ခေါက်တော့ အရေပြားမှာ ဖြစ်တဲ့ ကျန်းမာရေးပြဿနာတစ်ရပ်ဖြစ်တဲ့ ဆိုရီရေးစစ် (Psoriasis) အရေပြားပြဿနာ အတွက် ဆောင်ရန်ရှောင်ရန် တွေကို အတူတူ ဖတ်ကြည့်ရအောင်နော်။

ဆိုရီရေးစစ် (Psoriasis) အရေပြားပြဿနာ

ဆိုရီရေးစစ် (Psoriasis) အရေပြားပြဿနာက autoimmune disorder တစ်မျိုးပါ။ အရေပြားပေါ်မှာဖြစ်လို့ အရေပြားတစ်ထောက်စာကနေ စလာတဲ့ ရောဂါ မဟုတ်ပါဘူး။ ဒီရောဂါက ခန္ဓာကိုယ်ရဲ့ ကိုယ်ခံအားစနစ်ကနေ စလာတာပါ။ T ဆဲလ်လို့ ခေါ်တဲ့ သွေးဖြူဆဲလ်တွေက စဖြစ်ပေါ်လာတာပါ။

ဒီအရေပြားပြဿနာက နာတာရှည်ရောဂါတစ်မျိုးဖြစ်ပြီး အနေအထိုင်၊ အစားအသောက် တစ်ခုခု မှားယွင်းတာနဲ့ အချိန်မရွေး ပြန်ပေါ်လာနိုင်ပါတယ်။

ဘယ်လို လက္ခဏာတွေရှိလဲ။

မြင်သာတဲ့ လက္ခဏာ အနေနဲ့

• အရေပြားမှာ နီမြန်းတာ၊
• အရေပြားတွေ ထူလာတာ
• ယားယံတာ
• နာကျင်တာ
• စပ်ဖျဉ်းဖျဉ်းဖြစ်တာ
• အဖက်တွေ လန်တာမျိုး တွေ့ရနိုင်ပါတယ်။

ဒီအရေပြားပြဿနာက လက်မောင်း အပြင်ဘက်ခြမ်း၊ ဒူး၊ လက်ဖဝါး၊ ခြေဖဝါးစတာတွေမှာ ဖြစ်နိုင်သလို ဦးရေပြားနဲ့ လက်သည်းတွေမှာလည်း ဖြစ်နိုင်ပါတယ်။

ဘာတွေက ဆိုရီရေးစစ်ကိုပိုဆိုးစေနိုင်လဲ။

နာတာရှည်ဖြစ်တဲ့ ဆိုရီရေးစစ် အရေပြားပြဿနာဟာ အခုလို အခြေအနေတွေမှာ ပိုဆိုးလာနိုင်ပါတယ်။

• အသားခြောက်တာ
• စိတ်ဖိစီးတာ
• အိပ်ရေးပျက်တာ
• ရာသီဥတုအေးတာ
• အရေပြားထိခိုက်တာ
• ဆေးလိပ်သောက်တာ
• အရက်သောက်တာ
• ဆေးဝါးတွေကြောင့် အဖြစ်များပါတယ်။ အရွယ်ရောက်ပြီးသူတွေမှာ အဖြစ်များတဲ့ အရေပြားပြဿနာတစ်မျိုးပါ။

ဆိုရီရေးစစ် (Psoriasis) အရေပြားပြဿနာ အတွက် ဆောင်ရန်ရှောင်ရန်

ဆိုရီရေးစစ် အရေပြားပြဿနာ သက်သာစေဖို့ဆိုရင်

• အသားအရေ မခြောက်စေဖို့ ဂရုပြုပါ

အရေပြား ခြောက်သွေ့မှုက ဆိုရီးရေးစစ် အရေပြား ပြဿနာကို ပိုဆိုးစေနိုင်ပါတယ်။ ဒါကြောင့် ပုံမှန် အရေပြားကို အစိုဓာတ် ထိန်းဖို့ လိုပါမယ်။ လိုးရှင်းလိမ်းပါ။ အစိုဓာတ်ထိန်းစက် ဖွင့်ထားတာမျိုး လုပ်ပေးပါ။

• အမွှေးနံ့ပြင်းတာတွေ ရှောင်ပါ

ဆပ်ပြာတွေ အများစုမှာ အမွှေးနံ့တွေ ပါသလို ဆိုးဆေးတွေလည်း ပါပါတယ်။ ဒါတွေက အရေပြားကို မသက်မသာဖြစ်စေပါတယ်။ ဒီဆပ်ပြာတွေက အနံ့ကောင်းတာ မှန်ပေမယ့် ဆိုရီရေးစစ် ပြဿနာကို ပိုဆိုးစေနိုင်ပါတယ်။

ဒါကြောင့် ဆပ်ပြာ ရွေးချယ်တဲ့အခါ အမွှေးနံ့ ပြင်းလွန်းတာ၊ ဓာတုပစ္စည်းများလွန်းတာတွေကို ရှောင်ပါ။ “Sensitive skin” အတွက်လို့ ထုတ်ထားတာကို ရွေးပေးပါ။

• ကျန်းမာရေးနဲ့ ညီညွတ်အောင် စားပါ

ငါး၊ အစေ့အဆန်၊ အခွံမာသီး၊ omega-3 fatty acids ကြွယ်ဝတာတွေကို စားပေးပါ။ ဒီအစားအစာတွေက ဆိုရီရေးစစ်ကို သက်သာစေနိုင်ပါတယ်။

• သံလွင်ဆီ လိမ်းပါ

သံလွင်ဆီက အရေပြားကို ကျန်းမာစေနိုင်ပါတယ်။ သံလွင်ဆီကို အရေပြားပေါ်မှာ လိမ်းပြီး ခပ်ဖွဖွလေး နှိပ်နယ်ပေးတာက အရေပြားကို ကျန်းမာစေပြီး ဆိုရီရေးစစ် ပြဿနာကို သက်သာစေနိုင်ပါတယ်။

• စိတ်ဖိစီးမှုကို ဖြေလျှော့ပါ

ဆိုရီရေးစစ် အပါအဝင် ကျန်းမာရေး ပြဿနာ အများစုရဲ့ အရင်းခံက စိတ်ဖိစီးတာပါ။ စိတ်ဖိစီးတဲ့အခါ အရေပြားပြဿနာက ပိုဆိုးလာပါတယ်။ ဒါကြောင့် တရားထိုင်တာ၊ ယောဂလေ့ကျင့်တာမျိုး ပုံမှန် လုပ်ပြီး စိတ်ဖိစီးမှုကို ဖြေလျှော့ပါ။

• အရက် ရှောင်ပါ

အရက်ကလည်း ဆိုရီရေးစစ် ပြဿနာကို ပိုဆိုးစေနိုင်ပါတယ်။ ဒါကြောင့် ဆိုရီရေးစစ် ပြဿနာ ရှိမယ်ဆိုရင် အရက်မသောက်ပါနဲ့။ အယ်လ်ကိုဟောပါတဲ့ သောက်စရာကို ရှောင်ပါ။

• နနွင်း စားပါ