28 ပတ်

28 ပတ် အရွယ် ကလေးလေး ဘယ်လိုဖွံ့ဖြိုးလာမှာလဲ

နောက်တစ်ခေါက် ဆရာဝန်နဲ့ပြမယ့် ရက်ချိန်းကျရင် ဆရာဝန်က ကလေးလေး သားအိမ်ထဲမှာ ဘယ်လိုအနေအထားလဲဆိုတာ ပြောပြမှာပါ။ ကလေးလေးက များသောအားဖြင့် ခေါင်းအောက်စိုက်နေပြီး ခေါင်းနဲ့မွေးလေ့ရှိပါတယ်။

ကလေးလေးခေါင်းအပေါ်ပိုင်း ရောက်နေပြီး ဆုံပိုင်းဖြစ်နေလို့ စိတ်မပူပါနဲ့။ မွေးဖို့နှစ်လတောင် ကျန်သေးတာပဲ။ ကလေးတွေက သူတို့ဘာသာသူတို့ အနေအထားပြောင်းမှာပါ။ မပြောင်းရင်လည်း အပြင်ကနေ ဗိုက်လှည့်မလား၊ ဆုံနဲ့ပဲ မွေးမလားဆိုပြီး ဆရာဝန်နဲ့ တိုင်ပင်လို့ ရပါတယ်။

ဦးနှောက်က မြောင်းတွေ၊ အခေါက်တွေက ဆက်ဖွံ့ဖြိုးနေတုန်းပါပဲ။ အဆီလွှာတွေလည်း ထပ်တိုးလာသလို ဆံပင်တွေလည်း ဆက်ပေါက်နေမှာပါ။

ခန္ဓာကိုယ်နဲ့ အနေအထိုင်အပြောင်းအလဲလေးများ

ခန္ဓာကိုယ်မှာရော ဘာတွေဆက်ပြောင်းလဲဦးမှာပါလိမ့်

အရင်တုန်းက သွေးစစ်ထားတဲ့အဖြေတွေကို ဆရာဝန်က ပို့ပေးလောက်ရောပေါ့။ သွေးစစ်တာက လူတော်တော်များများရဲ့ သွေးနီဥတွေမှာတွေ့ရတဲ့ Rh factor ပါမပါစစ်တာပါ။ တကယ်လို့ အမေက Rh (-)၊ ကလေးက Rh (+) ဖြစ်နေရင် ကလေးမှာ သွေးနီဥတွေ ပျက်စီးပြီး အသည်းရောင်တာ၊ သွေးအားနည်းတာတွေ ဖြစ်နိုင်ပါတယ်။

ဒါကြောင့် သွေးနီဥတွေ မပျက်စီးအောင် ကာကွယ်ဆေးထိုးရပါမယ်။ ဒါကို Rh အင်မြူနိုဂလိုဗျူလင် လို့ခေါ်ပြီး ၂၈ ပတ်မှာတစ်ကြိမ်၊ လိုအပ်ရင် မွေးပြီးရင်တစ်ကြိမ် ထိုးရပါတယ်။

28 ပတ် မြောက်မှာ သိသင့်သိထိုက်တာလေးတွေ

ကိုယ်ဝန်ဆောင်ချိန်မှာ ဗိုက်တစ်ခုပဲ ကြီးလာတာ မဟုတ်ပါဘူး။ ညနေပိုင်းတွေဆို ခြေချင်းဝတ်တွေ၊ ခြေထောက်တွေ ရောင်လာတတ်ပါတယ်။ ဒီလိုရောင်တာက အန္တရာယ်မှမရှိပေမယ့် ဖိနပ်တွေ၊ နာရီတွေ ဝတ်ရခက်စေပါတယ်။ လက်စွပ်တွေလည်း ကျပ်လာမှာပါ။

နည်းနည်းပါးပါးယောင်တာက ဘာမှမဖြစ်ပါဘူး။ ကိုယ်ဝန်ဆောင်ချိန်မှာ လိုအပ်တဲ့အရည်လေးတွေ များလာလို့ပါ။ ၇၅%သော ကိုယ်ဝန်ဆောင်တွေက ၂၈ ပတ်မြောက်လောက်မှာ ဒီလိုရောင်တတ်ပါတယ်။

ရာသီဥတုက အိုက်စပ်စပ်ဖြစ်နေတဲ့အခါ အထိုင်များတာ၊ ရပ်တာများတဲ့အခါမျိုးတွေမှာ ပိုဆိုးပါတယ်။ နာရီအနည်းငယ်လောက်လှဲလိုက်ရင် သက်သာသွားမှာပါ။

ရောင်တာသက်သာအောင် အောက်ကနည်းလေးတွေအတိုင်း လိုက်လုပ်ကြည့်ကြနော်။

• ခြေထောက်နဲ့ တင်ပါးကို အနားပေးပါ။
• ထိုင်ရင်ခြေထောက်ကို အပေါ်တင်ထားပါ။
• တစ်စောင်းလှဲပြီးတော့ အနားမှန်မှန်ယူပါ။
• သက်သောင့်သက်သာရှိတဲ့ အဝတ်တွေကို ဝတ်ပါ။
• လေ့ကျင့်ခန်း မှန်မှန်လုပ်ပါ။
• ရေများများသောက်ပါ။ ဒါမှ ဆီးနဲ့အတူ ပိုနေတဲ့ အရည်တွေပါ ပါသွားမှာပါ။
• ရောင်တာသက်သာအောင် အသားကပ်ခြေအိတ်တွေ ဝတ်ပါ။

ဆရာဝန်ဆီသွားပြရအောင်

ဆရာဝန်နဲ့ ဘာတွေတိုင်ပင်ကြမလဲ

ရောင်တာမသက်သာဘူးဆို ဆရာဝန်ဆီ ချက်ချင်းသွားပါ။ ရောင်တာအပြင် တခြားလက္ခဏာတွေပါလာရင် ကိုယ်ဝန်ဆောင်သွေးတိုးတာ၊ ကိုယ်ဝန်ဆိပ်တက်တာ ဖြစ်နိုင်ချေများပါတယ်။ ဝိတ်တက်တာ၊ သွေးတိုးတာ၊ ဆီးထဲပရိုတင်းပါလာတာမျိုးတွေပေါ့။ သွေးပေါင်နဲ့ ဆီးကပုံမှန်ပဲဆို သိပ်ပူစရာမလိုပါဘူး။ ဒါပေမယ့် အပေါ်က လက္ခဏာတစ်ခုခုနဲ့ တွဲနေပြီဆိုရင်တော့ ဆရာဝန်ဆီ သွားပြကြတော့နော်။

ဘယ်လိုစစ်ဆေးမှုတွေ ထပ်လိုဦးမလဲဆက်လေ့လာရအောင်

ပုံမှန်စစ်ဆေးမှုတွေပါပဲနော်။

• ကိုယ်အလေးချိန်နဲ့ သွေးပေါင်တိုင်းခြင်း
• ဂလူးကိုးစ်နဲ့ ပရိုတင်းအတွက် ဆီးစစ်ခြင်း
• သန္ဓေသားနှလုံးခုန်နှုန်းစစ်ခြင်း
• မွေးမယ့်အချိန်တွက်ဖို့ သားအိမ်အခြေအနေကို အပြင်ဘက်ကနေစစ်ဆေးခြင်း
• သားအိမ်ထိပ် အမြင့်တိုင်းခြင်း
• ခြေလက်ရောင်မရောင်၊ သွေးပြန်ကြောတွေ ဖောင်းလားစစ်ခြင်း
• သွေးတွင်းဂလူးကိုးစ်စစ်ခြင်း
• သွေးအားနည်းနေလားသိအောင် သွေးစစ်ခြင်း
• လိုအပ်တဲ့ ကာကွယ်ဆေးထိုးခြင်း

တခြားမူမမှန်တဲ့ လက္ခဏာတွေ၊ မေးခွန်းတွေ၊ သိချင်တဲ့အကြောင်းတွေကို စာရင်းနဲ့မှတ်ပြီးဆရာဝန်ကို မေးနိုင်ပါတယ်။

ကျန်းမာဘေးကင်းအောင် နေကြမယ်

ကိုယ်ဝန်ရှိချိန်မှာ ကျန်းမာဘေးကင်းအောင် ဘာတွေသိထားရမလဲ

ဒေါက်မြင့်စီးခြင်း

ဒေါက်မြင့် (တစ်ပြေးညီဒေါက်အပါအဝင်) စီးတာက ကိုယ်ဝန်ဆောင်ချိန်မှာ မကောင်းပါဘူး။ အလေးချိန်တက်လာတော့ လမ်းလျှောက်ပုံပြောင်းလာပြီး ဟန်ချက်လည်း သိပ်မကောင်းတော့ပါဘူး။

ခန္ဓာကိုယ်အနေအထားလည်း ပြောင်းလာသလို ဗဟိုချက်လည်း နေရာပြောင်းပါတယ်။ ကိုယ်ဝန်ဆောင်ချိန်မှာ အရွတ်တွေက လျော့ရဲလာပါတယ်။ ဒီတော့ ဟန်ချက်ပျက်တာ၊ ကြွက်သားတောင့်တာတွေ ဖြစ်နိုင်ပါတယ်။

ကိုယ်ဝန်ရှိချိန်မှာ လဲကျတာက မေမေတွေကိုရော သားသားမီးမီးတွေကိုပါ ထိခိုက်စေနိုင်တယ်ဆိုတော့ ဒေါက်မြင့်စီးမယ်ဆို ပြန်စဉ်းစားကြနော်။ ဖိနပ်အပါးနဲ့ ချော်မလဲနိုင်တာတွေပဲ စီးနော်။ ဖက်ရှင်ကျဖို့ထက် သက်သောင့်သက်သာရှိပြီး ဘေးကင်းဖို့ကို အဓိကထားကြပါနော်။

၂၉ ပတ်မြောက်ရောက်ရင် ဆက်တွေ့မယ်နော်။

ရေးသားသူ- Hmwe San Eain