သက်သတ်လွတ်စားသူတိုင်း သတိထားသင့်တဲ့ အချက်တွေ။

ဝိတ်ချချင်လို့ပဲဖြစ်ဖြစ်၊ အသားစားရတာ ငြီးငွေ့လာလို့ပဲဖြစ်ဖြစ်၊ ဘာသာရေးအယူအဆတစ်ခုကြောင့်ဖြစ်ဖြစ် အသီးအရွက်တွေ ချည်းစားနေတဲ့ သက်သတ်လွတ် သမားတွေ ရှိမှာပါ။ သက်သတ်လွတ်စားရင် အသားအရေလှတယ်။ ကိုယ်အလေးချိန်လည်းထိန်းနိုင်တယ်ဆိုပေမယ့် မျှတတဲ့ အာဟာရတစ်ခုကို အသီးအရွက်ချည်းပဲ ရဖို့ခက်ပါတယ်။ အားလုံးသိကြတဲ့အတိုင်း ကျန်းမာတဲ့ ကိုယ်ခန္ဓာတစ်ခုပိုင်ဆိုင်ဖို့ဆို အသားငါး၊ အသီးအရွက်၊ ထမင်းစတဲ့ အုပ်စုကြီးတွေ မျှတအောင် စားဖြစ်ဖို့လိုတယ်လေ။ ဒီတော့ သက်သတ်လွတ် အသီးအရွက်ကြီးပဲ စားနေတဲ့ လူတွေ အတွက် သတိထားစရာ ကျန်းမာရေးပြဿနာလေးတွေ ရှိပါတယ်။

သက်သတ်လွတ်စားသူတိုင်း ဘယ်လိုကျန်းမာရေးပြဿနာတွေကို သတိထားရမလဲ။

( ၁ ) ပဲအစားများခြင်းကနေ လေထိုးလေအောင့်ခြင်းကို ဖြစ်စေတတ်ပါတယ်။

သက်သတ်လွတ်သမားတွေက အသားဓာတ်၊ ပရိုတင်းဓာတ်ရဖို့ ပဲကို အဓိကထား စားရတယ်မလား။ ဒီပဲအမျိုးမျိုးမှာ ပါဝင်တဲ့ lectins နဲ့ phytates ဓာတ်က လေထိုးလေအောင့် လေပွတဲ့ပြဿနာကို အဓိကဖြစ်စေတဲ့ တရားခံတွေပါ။ ဒါပေမယ့် ပဲအမျိုးအစား တစ်ခုနဲ့ တစ်ခု မတူတာကြောင့် ကိုယ်စားလို့ တည့်တယ်။ လေသိပ်မပွဘူးဆိုတာကို ဦးစားပေးစားပါ။

( ၂ ) ပဲပိစပ် Soy protein က ဟော်မုန်းတွေကို အနှောင့်အယှက်ပေးပါတယ်။

သက်သတ်လွတ်သမားတွေ နောက်တစ်မျိုးအားထားတဲ့ Soy protein ပဲပိစပ် ပရိုတင်းဟာ ဟော်မုန်းတွေဖြစ်တဲ့ အီစတိုဂျင်နဲ့ သိုင်းရွိုက်ဟော်မုန်းအပေါ် သွားပြီး သက်ရောက်မှု ရှိပါတယ်။ ပြောင်းလဲလာတဲ့ ဟော်မုန်းတွေကြောင့် ကျန်းမာရေးအခြေအနေတချို့လည်း ပြောင်းလဲသွားပါလိမ့်မယ်။

( ၃ ) အသားမစားတာကြောင့် အသားကနေရတဲ့ သံဓာတ် ချို့တဲ့မှုတွေ များလာပါလိမ့်မယ်။

သံဓာတ်ဆိုတာ သွေးအားကောင်း စေဖို့အတွက် အဓိကလိုအပ်တဲ့ ဓာတ်တစ်ခုပါ။ ဒီသံဓာတ်က အနီရောင်အသားတွေမှာ အများဆုံးပါတာဆိုတော့သက်သတ်လွတ်သမားတွေအတွက် ဒီ သံဓာတ်ချို့တဲ့မှုက ပြဿနာတစ်ခု ဖြစ်လို့နေတာပေ့ါ။ အသီးအရွက်တွေက သံဓာတ်ရတယ်ဆိုပေမယ့် အသားကရတာလောက်တော့ စုပ်ယူမှုမကောင်းပါဘူး။ ဒါ့ကြောင့် သက်သတ်လွတ်သမားတွေ လိုအပ်ရင် သံဓာတ်အားဖြည့် ဖြည့်စွက်ဆေးတွေ သောက်ပေးရပါလိမ့်မယ်။

( ၄ ) အိုမီဂါ ၃ မစားဖြစ်တာကြောင့် စိတ်ကျဝေဒနာခံစားရဖို့ အလားအလာလည်း များပါတယ်။

သက်သတ်လွတ် ဆိုတော့ ငါးလည်းမစားရတာကြောင့် ငါးတွေကနေတစ်ဆင့်ရတဲ့ အိုမီဂါ ၃ ( omega 3 ) ဓာတ် မရတာကတစ်ကြောင်း အစေ့အဆန်တွေ ပိုစားဖြစ်တော့ အိုမီဂါ ၆ ( omega 6 ) အာဟာရဓာတ်တွေ အများကြီးရနေတာက တစ်ကြောင်းနဲ့ သက်သတ်လွတ်သမားတွေက စိတ်ကျဝေဒနာခံစားဖို့ အလားအလာပိုများပါတယ်။

ဒီတော့ အိုမီဂါ ၃ ပြည့်ဝဖို့ ပဲကြီး၊ ချီယာစေ့၊ ရေညှိ၊ နှမ်းကြတ်စေ့တွေကို စားပေးပါ။ လိုအပ်ရင် အားဆေးသောက်ပါ။

( ၅ ) ဗီတာမင် B12 ချို့တဲ့တဲ့ ဒဏ်ကိုလည်းခံစားရနိုင်ပါတယ်

သွေးအားနည်းတာ၊ နုန်းခွေတာနဲ့ အာရုံထွေပြားတာတွေရဲ့ အဓိက တရားခံဖြစ်တဲ့ ဗီတာမင် B12 ချို့တဲ့ခြင်းဟာ သက်သတ်လွတ် သမားတွေ အဖြစ်များတဲ့ ဝေဒနာတစ်ခုပါ။ ဗီတာမင် B12က အသားတွေမှာ အဓိက ပါဝင်တဲ့ဓာတ်တစ်ခု မဟုတ်လား။ အသီးအရွက်တွေမှာ ပါတယ်ဆိုပေမယ့် အင်မတန်နည်းပါတယ်။ သက်သတ်လွတ်စားပေမယ့် နို့သောက်တယ်ဆို နို့ကရနိုင်ပါတယ်။ မဟုတ်ရင်တော့ အားဆေးလိုအပ်နိုင်ပါတယ်။

( ၆ ) ဇင့်ဓာတ်စုပ်ယူမှု အပိုင်းမျာလည်း ထိခိုက်မှု ရှိသွားနိုင်ပါတယ်။

အစေ့အဆန်တွေနဲ့ ကောက်နှံတွေမှာပါတဲ့ phytic acid ဟာ ကိုယ်တွင်း ဇင့်ဓာတ်စုပ်ယူမှုကို တားဆီးလိုက်တာကြောင့် သက်သတ်လွတ်သမားတွေ ဇင့်ဓာတ်ချို့တဲ့တဲ့ ပြဿနာကို ခံစားရနိုင်ပါတယ်။ ဒါပေမယ့် သူက ဇင့်ဓာတ်ကြွယ်ဝတဲ့ အစားအစာတွေနဲ့ တစ်ချိန်တည်းမှာ တွဲစားမိမှ ဖြစ်မှာပါ။

ဒါ့ကြောင့် ဇင့်ဓာတ်ကြွယ်ဝတဲ့ တို့ဖူး၊ ပဲ၊ ချီယာစေ့၊ သီဟိုဠ်စေ့တွေကို သီးသန့်စားပေးပါ။

( ၇ ) အသားမစားဘဲ ထမင်းကြီးပဲ အစားများတာကြောင့် ကာဘိုဟိုက်ဒရိတ်လည်း အဝင်များနေပါလိမ့်မယ်။

အသားမစားဘဲ ထမင်းနဲ့ အသီးအရွက်ချည်းပဲ စားတဲ့အခါ ကာဘိုဟိုက်ဒရိတ်ဓာတ်တွေ အစားများပြီး အဝလွန်တဲ့ပြဿနာ ကိုယ်အလေးချိန်တက်လာတဲ့ ပြဿနာတွေ ကြုံတွေ့ရတတ်ပါတယ်။ ဒါပေမယ့် ဒါက လူတစ်ဦးတစ်ယောက်ချင်းစီနဲ့ပဲ ဆိုင်ပါတယ်။ အသားစားသည်ဖြစ်စေ၊ မစားသည်ဖြစ်စေ ကိုယ်စားတဲ့ပမာဏကို ထိန်းချုပ်ရပါမယ်။

သက်သတ်လွတ် စားတဲ့အခါ အာဟာရချို့တဲ့မှုတွေ ကြုံရနိုင်တယ်ဆိုပေမယ့် ဖြေရှင်းလို့မရတာတော့ မဟုတ်ပါဘူး။ အသီးအရွက်ပဲ စားမယ်ဆို အမျိုးအစားစုံလင်အောင် စားပါ။ ဘာတွေစားနေတယ်ဆိုတာထက် ဘာအာဟာရတွေ ရနိုင်မလဲဆိုတာကို တွက်ချက်စားသောက်ဖို့ လိုပါတယ်။