အားကစားလုပ်ရင်း ဖြစ်နိုင်တဲ့ ထိခိုက်မှုတွေ

အားကစားတစ်ရပ်ရပ်ကို လုပ်ဆောင်တဲ့အခါ အားကစားလုပ်တာကြောင့် ထိခိုက်မှုတွေကို ခံစားရနိုင်ပါတယ်။ အားကစားလုပ်နေသူတွေအနေနဲ့ လေ့ကျင့်ခန်းတွေ ပြင်းပြင်းထန်ထန် လုပ်ရင်းဖြစ်ဖြစ်၊ မတော်တဆပဲဖြစ်ဖြစ် ထိခိုက်မှုတွေကို ခံစားရနိုင်ပါတယ်။

အားကစားလုပ်ရင်း ထိခိုက်မှုတွေ ဘာကြောင့်ဖြစ်

အားကစားလုပ်ရင်း ထိခိုက်မှုတွေ ဖြစ်ရတာက

• ပုံမှန် လှုပ်လှုပ်ရှားရှားမရှိလို့ (လှုပ်ရှားမှုနည်းလို့)
• အားကစား မလုပ်ခင် သွေးပူလေ့ကျင့်ခန်း မလုပ်လို့
• ကိုယ်နေဟန်ထား မမှန်လို့
• မတော်တဆ ထိခိုက်မှုတွေရှိလို့
• လိုအပ်တဲ့ကိရိယာတွေ ပြည့်စုံစွာ မရှိလို့
• နည်းစနစ်မမှန်လို့
• ပြင်းပြင်းထန်ထန် လုပ်လို့ စတဲ့အချက်တွေကြောင့် အားကစားလုပ်ရင်း ထိခိုက်မှုတွေကို ခံစားရနိုင်ပါတယ်။

အားကစားလုပ်ရင်းဖြစ်နိုင်တဲ့ ထိခိုက်မှုတွေက ဘာတွေလဲ။

အားကစားလုပ်ရင်း ထိခိုက်နိုင်တဲ့ ထိခိုက်မှုတွေကတော့ အများကြီးပါ။ ထိခိုက်ဒဏ်ရာအလိုက် လက္ခဏာတွေကလည်း ကွာခြားနိုင်ပါတယ်။ အဖြစ်အများဆုံး အားကစားလုပ်ရင်း ထိခိုက်မိနိုင်တဲ့ ထိခိုက်မှုတွေကတော့

အရွတ်စုတ်ခြင်း – လေ့ကျင့်ခန်းတွေ အပြင်းအထန်လုပ်တာ၊ နာကျင်နေတာကို မနားဘဲ လေ့ကျင့်ခန်းတွေ ဆက်လက်လုပ်ဆောင်တာကြောင့် အရိုးနှစ်ခုကို တွယ်ဆက်ပေးထားတဲ့ အရွတ်တွေ စုတ်ပြဲတာ၊ ထိခိုက် သွားတာမျိုးပါ။

ကြွက်သားနာကျင်ခြင်း – ရေလုံလောက်အောင် မသောက်တာ၊ လေ့ကျင့်ခန်းတွေကို ပြင်းပြင်းထန်ထန်လုပ်ဆောင်မှုတွေကြောင့် ကြွက်သားတွေ နာကျင်တာပါ။ ကြွက်သားမှာ ဒဏ်ဖြစ်တာ၊ စုတ်ပြဲတာမျိုးတွေပါ ခံစားရနိုင်ပါတယ်။

ဒူးနာခြင်း – အားကစားလုပ်တာကြောင့် အများဆုံးထိခိုက်နိုင်တဲ့ အစိတ်အပိုင်းတစ်ခုက ဒူးပါ။ ဒူးနာတာက ဒူးဆစ် ထိခိုက်မိတာကနေစလို့ တစ်ရှူးတွေ၊ အရွတ်နဲ့။ ကြွက်သားတွေ ထိခိုက်မှုအထိ အမျိုးမျိုး ဖြစ်နိုင်ပါတယ်။

ကြွက်သားရောင်ခြင်း – ကြွက်သားရောင်တာက ထိခိုက်မှုတွေကြောင့် ဖြစ်နိုင်သလို ကြွက်သားကို လုံလောက်တဲ့ နားနေမှု မပေးတာ၊ အာဟာရနဲ့ ရေမပြည့်ဝတာတွေကြောင့်ဖြစ်နိုင်ပါတယ်။

ခြေချင်းဝတ်အရွတ်စုတ်ခြင်း – ခြေချင်းဝတ်က အရွတ်က ပါးလွှာပေမယ့် ခိုင်ခန့်ပါတယ်။ လေ့ကျင့်ခန်းတွေ ပြင်းပြင်းထန်ထန် လုပ်တဲ့အခါ အရွတ်စုတ်ပြဲနိုင်သလို ရုတ်တရက် ခြေခေါက်လဲတာကြောင့်လည်း အရွတ်စုတ်ပြဲ နိုင်ပါတယ်။ ဒီအရွတ်စုတ်ပြဲတဲ့အခါ လမ်းလျှောက်ဖို့ ခက်တာ၊ အထိမခံနိုင်အောင် နာကျင်တာမျိုး ခံစားရနိုင်ပါတယ်။

အရိုးကျိုးခြင်း – အရိုးကျိုးတာကတော့ ထိခိုက်မှုတွေကြောင့် ဖြစ်တာများပါတယ်။

အဆစ်လွဲခြင်း – အရိုးတွေ ပုံစံတကျ မရှိတဲ့ အနေအထားမျိုးပါ။ အရေိုးကို အားနဲ့ ထိခိုက်မိတဲ့အခါ အဆစ်လွဲတာမျိုး ဖြစ်နိုင်ပါတယ်။ အဆစ်လွဲတဲ့အခါ အဆစ်လွဲတဲ့နေရာက ရောင်ရမ်းတာ၊ အားပြုဖို့ခက်တာမျိုး ခံစားရနိုင်ပါတယ်။

ဘယ်လို သက်သာအောင်လုပ်ရမလဲ။

အားကစားလုပ်ရင်းဖြစ်တဲ့ ထိခိုက်မှုတွေက ပုံမှန်အားဖြင့် မပြင်းထန်ဘူးဆိုရင် အိမ်တွင်းကုထုံးလေးတွေလုပ်ရင်း သက်သာသွားတာ များပါတယ်။

ထိခိုက်မိပြီး ၄၈ နာရီကနေ ၇၂ နာရီအတွင်းမှာ ထိခိုက်မိတဲ့နေရာကို အနားပေးပါ။

• အရောင်ကျစေဖို့အတွက် ရေခဲကပ်ပါ။
• ရေနွေးဝတ်ကပ်ပါ။
• အကိုက်အခဲပျောက်ဆေး သောက်ပါ။
• ဆေးလိမ်းပါ။
• အာဟာရပြည့်ဝအောင် စားပါ။
• ရေများများသောက်ပါ။

ဒီလိုတွေ လုပ်ပေမယ့် သက်သာလာမရှိဘူး၊ ထိခိုက်တဲ့နေရာက ပိုနာလာမယ်ဆိုရင်တော့ ဆေးခန်းကို အမြန်ဆုံးသွားရောက်ဖို့ ပြောပါရစေ။

ဘယ်လိုကာကွယ်မလဲ။

အားကစားလုပ်ရင်း ထိခိုက်ဒဏ်ရာရတာ ကင်းစေဖို့အတွက်

• လေ့ကျင့်ခန်း မလုပ်ခင်သွေးပူလေ့ကျင့်ခန်း လုပ်ပါ
• လေ့ကျင့်ခန်းကို ဖြည်းဖြည်းမှန်မှန်ပဲ လုပ်ပါ
• အပြင်းအထန် လုပ်တာမျိုးကို ရှောင်ပါ
• အနေအထား မှန်မှန် လုပ်ပါ
• ထိုက်သင့်တဲ့ ကာကွယ်မှုတွေ လုပ်ပါ (ဒူးကာ ဝတ်တာမျိုး၊ အားကစားဖိနပ်စီးတာမျိုးပါ)
• နည်းစနစ် မှန်မှန် လုပ်ပါ။

Takeaways

အားကစားလုပ်တာက ကျန်းမာရေးအတွက် ကောင်းတယ်ဆိုပေမယ့် အားကစားလုပ်ရင်း မတော်တဆ ထိခိုက်တာတွေ မဖြစ်စေဖို့ သေချာလေး ဂရုစိုက်မှုတွေလုပ်သင့်သလို ဖြစ်လာခဲ့ရင်လည်း သေချာလေး သက်သာအောင် လုပ်ဆောင်ပေးပါ။