အော်ရလွန်းလို့ လည်ချောင်းကွဲ ပြီး သွေးထွက်လာရင်

အော်ရလွန်းလို့ အသံတွေ ဝင်နေတယ်၊ အသံတွေ နာနေတယ်ဆို တော်သေး။ ဒီထက်ပိုဆိုးပြီး လည်ချောင်းကွဲ သွေးစတွေပါလာပြီဆိုရင် စိုးရိမ်လာကြပါပြီ။ ကဲ ဘယ်လိုဖြေရှင်းကြမလဲ။ ဒါအရေးပေါ်အခြေအနေလား။

လည်ချောင်းကွဲ ရတဲ့ အကြောင်းရင်း

လည်ချောင်းကွဲတယ်ဆိုပေမယ့် အများထင်ထားသလို လည်ချောင်းကြီး ကွဲထွက်သွားတာ မဟုတ်ပါဘူး။ အော်လွန်းလို့ ဖိအားတွေ များပြီး လည်ချောင်းထဲက သွေးကြောလေးတွေ ပေါက်ကုန်တာပါ။ အော်တဲ့အခါ ရှိုက်ရှူတဲ့ လေကြောင့် လည်ချောင်းခြောက်သွေ့ပြီး သွေးကြောလေးတွေ ပိုပေါက်လွယ်ပါတယ်။

ဘယ်သူတွေ ပိုဖြစ်နိုင်လဲ။

အသံကို အားပြင်းပြင်းသုံးပြီး ကြာကြာအော်တဲ့သူ ဘယ်သူမဆို ဖြစ်နိုင်ပါတယ်။ ဒါပေမယ့်

• နဂိုတည်းက ချောင်းဆိုးနေတဲ့သူတွေ
• ဆေးလိပ်သောက်တဲ့သူတွေ
• ညစ်ညမ်းတဲ့ လေထုကို ရှူရတဲ့သူတွေ
• ပတ်ဝန်းကျင်မှာ မီးခိုးငွေ့တွေ၊ အမှုန်အမွှားတွေ ရှိရင် လည်ချောင်းပိုခြောက်ပြီး ကွဲလွယ်ပါတယ်။

လည်ချောင်းကွဲ တာရဲ့ လက္ခဏာတွေက

အကောင်းကြီးကနေ လည်ချောင်းတန်းကွဲတာထက် ရှေ့မှာ ရှေ့ပြေးလက္ခဏာလေးတွေ ပြပြီးမှ ကွဲတာ များပါတယ်။ ဒီလက္ခဏာတွေကတော့

• လည်ချောင်းနာမယ်။
• ချောင်းဆိုးမယ်။
• လည်ချောင်းထဲမှာ ရှတတဖြစ်မယ်။
• လည်ချောင်းယားမယ်။
• အသံဝင်မယ် စတာတွေပဲ ဖြစ်ပါတယ်။

ဒီလို လက္ခဏာတွေ ဖြစ်လာရင် အသံသုံးတာ၊ အော်တာကို ခဏနားလိုက်ပါ။ ဆက်အော်နေရင် လည်ချောင်းကွဲဖို့ များပါတယ်။

လည်ချောင်းကွဲရင် ဘာတွေ လုပ်သင့်လဲ။

လည်ချောင်းကွဲလို့ သွေးစတွေ ထွက်လာရင် မလန့်ပါနဲ့။ အရင်ဆုံး ရေအေးအေးလေး သောက်ချတာ၊ အာခေါင်ထဲကျင်းတာ လုပ်ပါ။ ပြီးရင် အသံကို လုံးဝမသုံးပါနဲ့တော့။ စကားလည်း မပြောပါနဲ့။ လည်ချောင်းကွဲတာ အများစုက အန္တရာယ်မရှိပါဘူး။ ထပ်အော်ရင်သာ ထပ်ပြီး သွေးထွက်နိုင်ပါတယ်။ သွေးတွေကုန်အောင် လည်ချောင်းကနေလည်း အားနဲ့ မဟပ်ထုတ်ပါနဲ့။

လည်ချောင်းကွဲ တာ သက်သာအောင် ဘာလုပ်သင့်လဲ။

သွေးလည်း ဆက်မထွက်တော့ဘူးဆိုရင် သိပ်မစိုးရိမ်ရတော့ပါဘူး။ အိမ်ရောက်ရင် လုပ်ရမှာတွေက

• ရေများများသောက်ပါ။ စူးရှတဲ့ အအေးတွေ မသောက်ပါနဲ့။ ပူလွန်း၊ အေးလွန်းတာတွေကို ရှောင်ပါ။
• ရေနွေးငွေ့ရှူပါ။ ရေနွေးငွေ့က လည်ချောင်းတစ်လျှောက်ကို စိုစွတ်စေလို့ သွေးကြောမပေါက်အောင် ကာကွယ်ပေးနိုင်ပါတယ်။
• အကိုက်အခဲပျောက်ဆေး သောက်ပါ။ လည်ပင်းတစ်လျှောက် သိပ်ကို နာနေရင် ပါရာစီတမော သောက်ပေးနိုင်ပါတယ်။

လည်ချောင်းနာနေချိန်မှာ ဆောင်ရန် ရှောင်ရန်တွေက 

လည်ချောင်းကွဲတာက တစ်ရက်လောက်နဲ့ သက်သာတာ မဟုတ်ပါဘူး။ တချို့တွေဆို တစ်ပတ်လောက်ထိ ကြာတတ်ပါတယ်။ ဒါကြောင့် မြန်မြန်သက်သာအောင် ဆောင်သင့် ရှောင်သင့်တဲ့ နည်းတွေက

• နောက်ရက်တွေမှာလည်း ရေနွေးငွေ့ရှူဖို့ မမေ့ပါနဲ့။
• စကားများများ မပြောပါနဲ့။ အော်ဖို့ ဟစ်ဖို့ လုံးဝမစဉ်းစားပါနဲ့။
• လေမချွန်ပါနဲ့။ လေချွန်တဲ့အခါ အသံကြိုးအားကို သုံးရတဲ့အတွက် လည်ချောင်းမှာ ဖိအားများပါတယ်။
• ရေများများသောက်ပါ။ ပျားရည်ထဲကို သံပုရာရည်လေး ညှစ်ပြီးလည်း သောက်ပေးနိုင်ပါတယ်။
• ဆားရယ်၊ မုန့်ဖုတ်ဆော်ဒါရယ်၊ ရေနွေးလေးရယ် ရောပြီး အာလုပ်ကျင်းပေးပါ။ ဘာမှမရှိရင် ဆားရည်နွေးနွေးလေးနဲ့ ကျင်းပေးလို့ ရပါတယ်။
• လည်ချောင်းနာတဲ့အခါ သုံးတဲ့ ငုံဆေးလေးတွေ သုံးပေးနိုင်ပါတယ်။
• နှာစေးတဲ့အခါ သောက်တဲ့ ဆေးတွေကိုတော့ ရှောင်ပေးပါ။ သူတို့က လည်ချောင်းကို ပိုခြောက်စေပါတယ်။

ဘယ်အချိန်မှာ ဆေးခန်းပြမလဲ။

• သွေးထွက်တာ များရင်
• တစ်ပတ်လောက်ကြာတောင် လည်ပင်းနာတာ မသက်သာရင်
• နောက်ရက်တွေမှလည်း ချောင်းဆိုးလိုက်တိုင်း ထွက်လာရင်
• ချောင်းဆိုးနေရင် (ချောင်းဆိုးနေရင် သွေးက ဆက်ထွက်နေမှာ ဖြစ်တဲ့အတွက် ချောင်းဆိုးတာကို ကုသဖို့ ) ဆရာဝန်နဲ့ ပြသသင့်ပါတယ်။

အော်ရင်း ဟစ်ရင်း အားတွေ ပါလာတဲ့အခါ လည်ချောင်းကွဲတာ ဖြစ်တတ်ပါတယ်။ မလန့်ဘဲ ခုပြောထားတာတွေကို သေချာလုပ်ပါ။ အသံကို လုံးဝအနားပေးဖို့ အရေးကြီးတယ်ဆိုတာ မမေ့ပါနဲ့။