အစာအိမ်အူလမ်းကြောင်း ကျန်းမာရေးမကောင်းသည့် လက္ခဏာများ

အစာအိမ်အူလမ်းကြောင်း ဟာ အဆင့်မြင့်ရှုပ်ထွေးတဲ့ အင်္ဂါအစိတ်အပိုင်းတစ်ခု ဖြစ်ပါတယ်။ ဒါ့အပြင် အစာအိမ်အူလမ်းကြောင်းဟာ ကိုယ်ခံအား၊ စိတ်ကျန်းမာရေး၊ ဟော်မုန်းဆိုင်ရာ ရောဂါများ၊ အရေပြားပြဿနာ၊ ကင်ဆာ စတဲ့ရောဂါတွေ ဖြစ်ပွားခြင်းနဲ့လည်း ဆက်စပ်နေပါတယ်။

ထူးခြားချက်တစ်ခုကတော့ အစာအိမ်အူလမ်းကြောင်းတလျှောက်မှာ အကျိုးပြုဘက်တီးရီးယားတွေ ရှိနေခြင်းပါပဲ။ လူတစ်ဦးချင်းစီရဲ့ အစာအိမ်အူလမ်းကြောင်းထဲမှာ ဘက်တီးရီးယားမျိုးကွဲပေါင်း ၃၀၀ ကနေ ၅၀၀ အထိ ရှိနေနိုင်ပြီး အများစုဟာ အကျိုးပြုဘက်တီးရီးယား ဖြစ်ပါတယ်။ အနည်းငယ်ကပဲ အန္တရာယ်ပေးနိုင်တဲ့ ပိုးမွှားတွေဖြစ်ပါတယ်။

အစာအိမ်အူလမ်းကြောင်း ကျန်းမာရေးမကောင်းသည့် လက္ခဏာများ

စိတ်ဖိစီးမှုများခြင်း၊ အအိပ်အနေနည်းခြင်း၊ အဆင့်ဆင့်ပြုပြင်ထားပြီး သကြားပါဝင်မှုမြင့်မားသော အစားအစာများ စားသုံးခြင်း၊ ပဋိဇီဝဆေးဝါးအချို့ သုံးစွဲခြင်း စတာတွေဟာ အူလမ်းကြောင်းမှာရှိတဲ့ အကျိုးပြုဘက်တီးရီးယားတွေကို ထိခိုက်စေနိုင်ပါတယ်။ ၎င်းတို့နဲ့ ဆက်နွယ်နေတဲ့ ဦးနှောက်၊ နှလုံး၊ ကိုယ်ခံအား၊ အရေပြား၊ ကိုယ်အလေးချိန်နှင့် ဟော်မုန်း စတဲ့ ကျန်းမာရေးကိစ္စရပ်တွေမှာပါ အကျိုးသက်ရောက်မှု ဖြစ်စေပါတယ်။ အူလမ်းကြောင်း ကျန်းမာရေးမကောင်းတဲ့အခါ အောက်ပါလက္ခဏာများ တွေ့နိုင်ပါတယ်။

အစာအိမ် ပြဿနာများ ဖြစ်ခြင်း

လေပွလေထခြင်း၊ ဝမ်းချုပ်ခြင်း၊ ဝမ်းပျက်ခြင်း၊ အစာမကြေရင်ပူခြင်း စတဲ့ အစာအိမ်ပြဿနာများဟာ အူလမ်းကြောင်းမကောင်းတဲ့ အခြေအနေများပဲ ဖြစ်ပါတယ်။ ကျန်းမာရေး ကောင်းမွန်တဲ့ အူလမ်းကြောင်းဟာ အစာများကို ကောင်းစွာချေဖျက်နိုင်ပြီး အညစ်အကြေးစွန့်တဲ့ အဆင့်အထိ လုပ်ငန်းစဉ် ချောမွေ့ပါတယ်။

စားသောက်ချင်စိတ် မထိန်းနိုင်ဖြစ်ခြင်း

အဆင့်ဆင့်ပြုပြင်ထားတဲ့ အသင့်စား အစားအစာတွေနဲ့ လိုအပ်တာထက် ပိုမိုထည့်သွင်းစီမံထားတဲ့ သကြားဓာတ်တွေဟာ အူလမ်းကြောင်းထဲက အကျိုးပြုဘက်တီးရီးယားတွေကို လျော့နည်းစေပါတယ်။ သကြားဓာတ်ကဲတဲ့ အစားအသောက်တွေကို စားသောက်ချင်စိတ်ကိုလည်း မထိန်းနိုင်ဖြစ်နေပါတယ်။ သကြားဓာတ်တွေထဲမှာမှ ဖရက်တို့စ်သကြားပါဝင်မှုများတဲ့ အစားအစာတွေဟာ ကိုယ်ခန္ဓာအတွင်းက ရောင်ရမ်းခြင်းဖြစ်စဉ်တွေနဲ့ ဆက်နွယ်နေပါတယ်။

ကိုယ်အလေးချိန်မထိန်းနိုင်ခြင်း

စားသောက်ပုံနဲ့ ကိုယ်လက်လေ့ကျင့်ခန်းကို သိသာစွာ ပြောင်းလဲခြင်းမလုပ်ဘဲ ကိုယ်အလေးချိန် ရုတ်ချည်း တိုးလာခြင်း၊ လျော့သွားခြင်း စတာတွေဟာ အူလမ်းကြောင်းမကောင်းခြင်းရဲ့ လက္ခဏာတမျိုးပါပဲ။ ကျန်းမာရေးမကောင်းတဲ့ အူလမ်းကြောင်းဟာ အာဟာရဓာတ်များ စုပ်ယူနိုင်ခြင်း၊ သွေးတွင်းသကြားဓာတ်ကို ထိန်းညှိနိုင်ခြင်း၊ အဆီများကို သိုလှောင်ခြင်း စတဲ့လုပ်ငန်းစဉ်တွေကို ကောင်းစွာလုပ်ဆောင်နိုင်ခြင်း မရှိပါဘူး။

ကိုယ်အလေးချိန် လျော့နည်းသွားခြင်းဟာ အူသိမ်ထဲက ဘက်တီးရီးယားတွေ အလွန်အကျွံပေါက်ပွားခြင်းကြောင့် ဖြစ်နိုင်သလို ကိုယ်အလေးချိန်တက်ခြင်းဟာလည်း အင်ဆူလင်အာနိသင်ကျဆင်းခြင်း၊ အာဟာရဓာတ် စုပ်ယူမှုနည်းခြင်းကြောင့် စားသောက်ချင်စိတ်လွန်ကဲလာခြင်း စတာတွေကြောင့် ဖြစ်နိုင်ပါတယ်။

အိပ်ရေးဆက်တိုက်ပျက်ခြင်း၊ ပင်ပန်းနွမ်းနယ်ခြင်း

အိပ်မပျော်ခြင်း၊ အိပ်ရေးမဝခြင်း စတာတွေဟာ ကျန်းမာရေးမကောင်းတဲ့ အူလမ်းကြောင်းကြောင့် ဖြစ်နိုင်ပါတယ်။ အိပ်ရေးမဝခြင်းကြောင့် ပင်ပန်းနွမ်းနယ်ခြင်းပါ ယှဉ်တွဲနေနိုင်ပါတယ်။ စိတ်အခြေအနေနဲ့ အိပ်စက်ခြင်းအပေါ် လွှမ်းမိုးမှုရှိတဲ့ ဆီရိုတိုနင်ဟော်မုန်းကို အူလမ်းကြောင်းထဲက ထုတ်လုပ်ပါတယ်။ ဒါကြောင့် အူလမ်းကြောင်းမှာ ထိခိုက်မှု တစုံတရာရှိနေရင် အိပ်စက်ခြင်းအပေါ် သက်ရောက်နိုင်ပါတယ်။

အရေပြားပြဿနာများ

အရေပြားပြဿနာတွေ (ဥပမာ နှင်းခူ) ဟာ အူလမ်းကြောင်းထိခိုက်မှုနဲ့ ဆက်စပ်နေပါတယ်။ အာဟာရနည်းပါးခြင်း၊ အစားအစာဓာတ်မတည့်ခြင်း စတာတွေကြောင့် အူလမ်းကြောင်းအတွင်းမှာ ရောင်ရမ်းမှုဖြစ်နေရင် ပရိုတိန်းတချို့ကို ကိုယ်ခန္ဓာထဲ စိမ့်ထွက်သွားစေပါတယ်။ အဆိုပါအခြေအနေမှာ အရေပြားယားယံပြီး နှင်းခူလို ပြဿနာမျိုးတွေ တွေ့နိုင်ပါတယ်။

မိမိကိုယ်ခံအားက ပြန်လည်တိုက်ခိုက်သော ပြဿနာ

အစာအိမ်အူလမ်းကြောင်းနဲ့ ကိုယ်ခံစွမ်းအားဟာ ဆက်စပ်မှု ရှိနေပါတယ်။ အူလမ်းကြောင်းမကောင်းခဲ့ရင် ကိုယ်ခံစွမ်းအားရဲ့ လုပ်ဆောင်ချက်တွေ ကမောက်ကမဖြစ်စေပြိး မိမိကိုယ်ခံအားကနေ မိမိကိုယ်ကို ပြန်လည်တိုက်ခိုက်တဲ့ ရောဂါမျိုးတွေ ဖြစ်စေနိုင်ပါတယ်။

အစားမတည့်ခြင်း

ဒီပြဿနာဟာ ဓာတ်မတည့်ခြင်းနဲ့ မတူပါဘူး။ အစားအစာတချို့ကို မချေဖျက်နိုင်တဲ့ ပြဿနာပဲ ဖြစ်ပါတယ်။ အစာမတည့်ခြင်းပြဿနာဟာ အူလမ်းကြောင်းက ဘက်တီးရီးယားတွေရဲ့ အရည်အသွေး အားနည်းလို့ပဲ ဖြစ်ပါတယ်။ အစာကို မချေဖျက်နိုင်ခြင်းကြောင့် လေပွခြင်း၊ ဝမ်းပျက်ခြင်း၊ ဗိုက်အောင့်ခြင်း၊ ပျို့အန်ခြင်း စတာတွေ ဖြစ်နိုင်ပါတယ်။