ကိုယ်ခံအားစနစ်နဲ့ ပတ်သက်တဲ့ ယုံတမ်းစကားများ

ရေးသားသူ

Update Date အောက်တိုဘာ 31, 2020 . 2 mins read
Share now

ကိုယ်ခံအားစနစ်ဆိုတာ ဘာလဲ။

ရောဂါပိုးမွှားများကို ပြင်ပကနေ ခန္ဓာကိုယ်ထဲ အလွယ်တကူဝင်မလာနိုင်အောင် ထိန်းချုပ်ပေးနိုင်တဲ့၊ ကိုယ်ခန္ဓာထဲမှာ ရောဂါပိုးတွေကို တိုက်ထုတ်ပေးနိုင်ဖို့နှင့် ရောဂါပိုးများ မျိုးပွားခြင်းကို နှေးကွေးစေဖို့ ကူညီပေးနိုင်ပါတယ်။ ဒါကြောင့် လူတစ်ယောက် ကျန်းမာပြီး အသက်ရှည်ရှည် နေထိုင်နိုင်ဖို့ ကိုယ်ခံအားစနစ်ကောင်းမွန်ခြင်းသည် အလွန်အရေးပါတယ်လို့ ဆိုနိုင်ပါတယ်။

ကိုယ်ခံအားစနစ်ကို ဘာတွေက မြှင့်တင်ပေးနိုင်လဲ။

  • တစ်နေ့တာအတွက် လိုအပ်တဲ့ အာဟာရဓာတ်များကို စုံလင်စွာရရှိခြင်း
  • အိပ်ချိန်ပြည့်ဝခြင်း
  • လေ့ကျင့်ခန်းလုပ်ခြင်း
  • ကျန်းမာရေးကို ထိခိုက်စေမယ့် အမူအကျင့်များကို ရှောင်ရှားခြင်း စတဲ့အချက်များဖြင့် ကိုယ်ခံအားကောင်းအောင် မြှင့်တင်ပေးနိုင်ပါတယ်။

ကိုယ်ခံအားနဲ့ ပတ်သက်ပြီး လူတွေ မှားသိထားတဲ့အချက်တွေက ဘာများဖြစ်မလဲ။

၁။ အားဆေးတွေ များများသောက်ရင် ကိုယ်ခံအားပိုကောင်းနိုင်တယ်။

အရာရာတိုင်းမှာ တန်ဆေး၊ လွန်ဘေးဆိုတဲ့ စကားက သက်ရောက်မှုရှိပါတယ်။ ကိုယ်ခံအားကောင်းဖို့ ဗီတာမင်နဲ့ အာဟာရဓာတ်တွေ ပြည့်ဝဖို့လိုတယ်ဆိုပေမယ့် လိုတာထက်ပိုသွားရင်တော့ ခန္ဓာကိုယ်အတွက် အဆိပ်အတောက်ဖြစ်စေနိုင်ပါတယ်။ ဒီအတွက် အစာအာဟာရကို ပြည့်ဝစုံလင်စွာ စားပေးခြင်းက အသင့်လျော်ဆုံးနဲ့ အကောင်းဆုံးသော ကိုယ်ခံအားမြှင့်တင်ခြင်းနည်းလမ်း ဖြစ်တယ်လို့ ဆိုချင်ပါတယ်။

ခု ကိုဗစ်ကာလမှာ လူတွေရောဂါဖြစ်မှာ ကြောက်တဲ့စိတ်နဲ့ရော၊ မဟုတ်မမှန်တဲ့ ကျန်းမာရေးသတင်းတွေကို ဖတ်ရှုနားထောင်ပြီး ဗီတာမင်စီ၊ ဒီ အားဆေးတွေကို အလွန်အကျွံသောက်လာကြတယ်။ ဒါက သင့်ကို ကိုယ်ခံအားတက်စေမှာမဟုတ်ဘဲ ပိုပြီး ဒုက္ခရောက်စေမှာပါနော်။

၂။ လေ့ကျင့်ခန်းလုပ်ခြင်းက ကိုယ်ခံအားကို ကျစေတယ်။

ဒီယုံတမ်းစကားက ဘယ်ကလာတာလဲဆိုတော့ လေ့ကျင့်ခန်းလုပ်ပြီး မောပန်းသွားတဲ့အခါ ခန္ဓာကိုယ်က ချွေးအလွန်အကျွံထွက်ပြီး အားအင်ကုန်ခမ်းရာကနေ စပါတယ်။ လေ့ကျင့်ခန်းလုပ်လို့ အားအင်ကုန်သွားတာကို ကိုယ်ခံအားကျတယ်လို့ ထင်ပြီး လူတွေက လေ့ကျင့်ခန်းလုပ်ရမှာကို ကြောက်လန့်လာကြတာပါ။

တကယ်တမ်းမှာတော့ လုံးဝဆန့်ကျင့်ဘက်ပါပဲ။ လေ့ကျင့်ခန်းလုပ်တဲ့အခါ သွေးလည်ပတ်မှုကောင်းစေသလို သွေးတွင်း အောက်စီဂျင်ပမာဏကိုလည်း မြင့်တက်စေလို့ နှလုံးနဲ့ အဆုတ်ကို အားကောင်းစေတယ်။ ကိုယ်ခံအားစနစ်ကို အနှောင့်အယှက်ပေးနိုင်တဲ့ စိတ်ဖိစီးမှုဟော်မုန်း (ကော်တီစော်ဟော်မုန်း) ထုတ်လုပ်နိုင်မှုပမာဏကိုလည်း လျော့နည်းစေလို့ ကိုယ်ခံအားကိုကောင်းစေမှာပါ။

၃။ မွေးကတည်းက ကိုယ်ခံအားကောင်းတဲ့သူက လုံးဝမဖျားနိုင်တော့ဘူး။

တချို့လူတွေ မွေးကတည်းက သူများထက်ပိုပြီး ကိုယ်ခံအားကောင်းတဲ့အတွက် တော်ရုံမဖျားတာ၊ ကြံ့ခိုင်သန်စွမ်းပြီး ရောဂါဘယကင်းရှင်းတာမျိုး ရှိပါတယ်။ ဒါပေမယ့် လူ့သဘာဝ အသက်အရွယ်ကြီးရင့်လာတာနဲ့အမျှ ကိုယ်တွင်းအင်္ဂါတွေ လုပ်ဆောင်နှုန်း ကျဆင်းလာသလိုပဲ ကိုယ်ခံအားစနစ်ဟာလည်း ဆုတ်ယုတ်လာပါတယ်။ ဒါကြောင့် ငယ်တုန်းမှာ ဘယ်လိုနေနေ မဖျားရင်တောင် အသက်ကြီးလာရင်တော့ ရောဂါဘယထူပြောလာမှာပါ။

၄။ ကာကွယ်ဆေးထိုးထားရင် ဘာရောဂါမှ မရနိုင်တော့ဘူး။

ဒါကတော့ မြန်မာနိုင်ငံမှာ ကျန်းမာရေးနဲ့ ပတ်သက်ပြီး ဗဟုသုတမရှိတဲ့ အခြေခံလူတန်းစားတွေမှာ အပြောများတဲ့ ကိစ္စတစ်ခုပါ။ ရပ်ကွက်ဆေးပေးခန်းကနေ ကာကွယ်ဆေးထိုးရမယ်ဆိုလို့ သွားသာထိုးလိုက်တယ်၊ ဘာရောဂါကို ကာကွယ်ပေးနိုင်တဲ့ဆေးမှန်းလည်း မသိဘူး၊ ဘာဆေးထိုးမှန်းမသိတော့ ဆရာဝန်မေးရင်လည်း တိကျသေချာတဲ့ အဖြေတစ်ခုကို မပြောနိုင်ဘဲ ကာကွယ်ဆေးထိုးထားတယ်လေ ဆိုတာလောက်ပဲ ပြန်ဖြေပေးနိုင်တယ်။

တကယ်တော့ ရောဂါအားလုံးကို ကာကွယ်ပေးနိုင်တဲ့ ကာကွယ်ဆေးဆိုတာ လုံးဝမရှိပါဘူး။ ရောဂါတစ်မျိုးတည်း၊ ဗိုင်းရပ်စ် သို့မဟုတ် ဘက်တီးရီးယားပိုးတစ်မျိုးတည်းကိုသာ ကာကွယ်ပေးနိုင်တဲ့ ဆေးတွေသာ ရှိပါတယ်။ ဥပမာပြောရရင် တုပ်ကွေးကာကွယ်ဆေး၊ ငှက်ဖျားကာကွယ်ဆေး၊ ဘီပိုး၊ စီပိုးကာကွယ်ဆေး၊ ဝက်သက် ကာကွယ်ဆေးဆိုပြီးတော့ပေါ့။ ဒီတော့ ကာကွယ်ဆေးတစ်မျိုး ထိုးထားလို့ ကိုယ်ခံအားက လုံးဝကောင်းသွားပြီ၊ ဘယ်တော့မှ မဖျားနိုင်ဘူးဆိုတာ မရှိပါဘူးနော်။

၅။ ဖျားနေရင်၊ ရောဂါတစ်ခုဖြစ်နေရင် တခြားရောဂါတွေ ထပ်မဖြစ်နိုင်ဘူး။

ကျန်းမာရေးအကြောင်းနဲ့ ပတ်သက်ပြီး လူတွေအလွယ်တကူ နားလည်အောင် ပြောပြ၊ ရှင်းပြတဲ့အခါ ရောဂါပိုးရဲ့ အမည်နာမ၊ မူရင်းဇစ်မြစ်တွေကို ချန်ထားပြီး ရောဂါပိုး သို့မဟုတ် ဗိုင်းရပ်စ်၊ ဘက်တီးရီးယားဆိုပြီးတော့သာ သုံးတာပါ။ တကယ်တမ်းက ဗိုင်းရပ်စ်၊ ဘက်တီးရီးယား၊ မှိုရောဂါပိုးပေါင်း များစွာရှိပြီး ဒီပိုးတစ်မျိုးချင်းစီက ရောဂါတွေအများကြီးကို ဖြစ်စေနိုင်ပါတယ်။ ဒါကြောင့် ကိုယ်ခန္ဓာထဲမှာ ရောဂါပိုးတစ်မျိုးရှိလို့ ဖျားနာနေတယ်ဆိုရင်လည်း နောက်ထပ်ရောဂါအသစ်တွေ ဖြစ်နိုင်ပါတယ်။ ဖျားနာနေချိန်မှာ ကိုယ်ခံအားက နဂို ခန္ဓာကိုယ်ထဲမှာရှိတဲ့ ပိုးမွှားတွေကို တိုက်ထုတ်ဖို့ အားအင်တွေ အသုံးပြုရတဲ့အတွက် နောက်ထပ်ဝင်လာမယ့် ရောဂါပိုးတွေကို နှိမ်နင်းနိုင်ခြင်း၊ ကာကွယ်ပေးနိုင်ခြင်းလည်း နည်းသွားပါတယ်။

ခုလို ကပ်ဘေးကာလမှာ ပြည်သူအားလုံးလည်း ကိုယ့်ရဲ့ကိုယ်ခံအားစနစ်ကို ကောင်းနိုင်သလောက် ကောင်းအောင် ကျန်းမာရေးနဲ့ စားသောက်နေထိုင်မှုပုံစံကို သေချာဂရုစိုက်ဖို့ အရေးကြီးပါတယ်။

Hello ဆရာဝန် ပရိတ်သတ်ကြီးလည်း ကျန်းမာပျော်ရွှင်ပြီး စိတ်ချမ်းသာစရာကောင်းတဲ့ ဘဝနေ့ရက်များကို ပိုင်ဆိုင်ရပါစေလို့ ဆုတောင်းပေးရင်း ဒီမှာပဲ နိဂုံးချုပ်လိုက်ပါတယ်။

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

ဒီဆောင်းပါးက သင့်အတွက် အသုံးဝင်ပါသလား။
happy unhappy

သင်ဒါလည်း နှစ်သက်နိုင်ပါတယ်။

မြန်မာနိုင်ငံကို ရောက်လာနိုင်ခြေအရှိဆုံး COVID-19 ကာကွယ်ဆေး (သို့) Sputnik V

မြန်မာနိုင်ငံကို အစောဆုံးနဲ့ ရောက်လာနိုင်ခြေအရှိဆုံး COVID-19 ကာကွယ်ဆေးဟာ ရုရှားနိုင်ငံက Sputnik V ဆေးဝါးဖြစ်လာဖွယ်ရှိတယ်လို့ သုံးသပ်ရပါတယ်။

ဆေးပညာပိုင်းဆိုင်ရာတည်းဖြတ်သူ Dr. Phyo Wai Lynn
ရေးသားသူ Ye Zon Aung

အစာအိမ်နဲ့ အူလမ်းကြောင်းက အစာတွေကို ဘယ်လိုခြေဖျက်ပေးနေသလဲ။

အစာအိမ်နဲ့ အူလမ်းကြောင်းက အစားအသောက်တွေကို အာဟာရဖြစ်အောင်၊ မလိုတာတွေ အပြင်ရောက်သွားအောင် သက်ဆိုင်ရာ တာဝန်တွေကို ထမ်းဆောင်ပြီး အလုပ်လုပ်ကြပါတယ်။

ဆေးပညာပိုင်းဆိုင်ရာတည်းဖြတ်သူ Dr. Phyo Wai Lynn
ရေးသားသူ Dr. Htet Htet Zaw Win

ဆေးလိပ်ဖြတ်နေတဲ့ သူငယ်ချင်းကို ဘယ်လိုကူညီနိုင်မလဲ

ဆေးလိပ်ကို ကာလကြာရှည်စွာ သောက်နေသူတစ်ယောက်အတွက် ဆေးလိပ်ဖြတ်ဖို့ဆိုတာ လွယ်ကူလှတဲ့ကိစ္စတော့ မဟုတ်ပါဘူး။ ဆေးလိပ်က ဖြတ်ရခက်ပါတယ်။

ဆေးပညာပိုင်းဆိုင်ရာတည်းဖြတ်သူ Dr. Phyo Wai Lynn
ရေးသားသူ Dr. Thiha Phyo Myint

သဘာဝအလျောက် သန္ဓေတားနည်းလမ်းများ

အမျိုးသမီးတို့အနေနဲ့ သန္ဓေတားရာမှာ ဆေးကတ်တွေသောက်ခြင်း၊ သုံးလထိုးဆေး ထိုးခြင်း၊ သားအိမ်အတွင်းသန္ဓေတားပစ္စည်းထည့်ခြင်း နည်းလမ်းတွေကို အသုံးပြုကြပါတယ်။

ဆေးပညာပိုင်းဆိုင်ရာတည်းဖြတ်သူ Dr. Phyo Wai Lynn
ရေးသားသူ Dr. Thiha Phyo Myint

သင့်အတွက် ရွေးချယ်ထားသည်

အသက် ၄၅ နှစ်အထက်တွေမှာ လိင်ကူးစက်ရောဂါတွေ ဖြစ်နိုင်ခြေပိုများ

အသက် ၄၅ နှစ်အထက်တွေမှာ လိင်ကူးစက်ရောဂါတွေ ဖြစ်နိုင်ခြေပိုများ

ဆေးပညာပိုင်းဆိုင်ရာတည်းဖြတ်သူ Dr. Phyo Wai Lynn
ရေးသားသူ Ye Zon Aung
ရေးသား ထုတ်ဝေခဲ့သည် နိုဝင်ဘာ 29, 2020 . 2 mins read
စိတ်ဓာတ်ကျခြင်းရဲ့ ကနဦးလက္ခဏာများ

စိတ်ဓာတ်ကျခြင်းရဲ့ ကနဦးလက္ခဏာများ

ဆေးပညာပိုင်းဆိုင်ရာတည်းဖြတ်သူ Dr. Phyo Wai Lynn
ရေးသားသူ Ye Zon Aung
ရေးသား ထုတ်ဝေခဲ့သည် နိုဝင်ဘာ 29, 2020 . 2 mins read
ဆောင်းတွင်းမှာ အဖျားအနာကင်းအောင် ဘယ်လိုအာဟာရဓာတ်တွေ ဖြည့်စွက်ဖို့ လိုအပ်မလဲ

ဆောင်းတွင်းမှာ အဖျားအနာကင်းအောင် ဘယ်လိုအာဟာရဓာတ်တွေ ဖြည့်စွက်ဖို့ လိုအပ်မလဲ

ဆေးပညာပိုင်းဆိုင်ရာတည်းဖြတ်သူ Dr. Phyo Wai Lynn
ရေးသားသူ Ye Zon Aung
ရေးသား ထုတ်ဝေခဲ့သည် နိုဝင်ဘာ 29, 2020 . 1 min read
တစ်နေ့ ပန်းသီးတစ်လုံးစားရင် သင်ဘယ်လောက်အထိတောင် ကျန်းမာလာမလဲ

တစ်နေ့ ပန်းသီးတစ်လုံးစားရင် သင်ဘယ်လောက်အထိတောင် ကျန်းမာလာမလဲ

ဆေးပညာပိုင်းဆိုင်ရာတည်းဖြတ်သူ Dr. Phyo Wai Lynn
ရေးသားသူ Ye Zon Aung
ရေးသား ထုတ်ဝေခဲ့သည် နိုဝင်ဘာ 29, 2020 . 2 mins read