ဆံသားခြောက် တယ်ဆိုတာ မိန်းကလေးတွေအတွက်တော့ စိတ်ညစ်စရာ ကိစ္စ တစ်ခုပါပဲ။ နေပူထဲ မကြာခဏထွက်တာ၊ ဆေးလိပ်သောက်တာ၊ ခေါင်းမကြာခဏ လျှော်တာကြောင့်ရော၊ ဆံပင်ဖြောင့်၊ ကောက် ခဏခဏ လုပ်နေတဲ့အခါမှာ ဆံသားဟာ ကြမ်းပြီး ခြောက်လာတယ်။ ကျန်းမာရေးပြဿနာ ကြီးကြီးမားမား မရှိပေမဲ့ မိန်းကလေးတွေအတွက်တော့ ကိုယ့်ကိုယ်ကို ယုံကြည်မှုနည်းလာစေတဲ့ ကိစ္စပါပဲ။

ဒါကြောင့် ဆံသားခြောက်လို့ စိတ်ညစ်နေတဲ့ မိန်းကလေးတွေအတွက် အိမ်မှာ အလွယ်တကူ လုပ်ယူပြင်ဆင်လို့ ရမယ့် နည်းလမ်းလေးတွေကို ဝေမျှပေးချင်ပါတယ်။

၁။ ပျက်စီးနေတဲ့ ဆံသားအစလေးတွေကို ညှပ်ပစ်ပါ။

ဆံသားခြောက် ပြီးပျက်စီးနေပြီဆိုရင် အသစ်ပြန်ပြင်ဆင်ဖို့အတွက် ညှပ်ပစ်လိုက်တာ အကောင်းဆုံးပါပဲ။ ပျက်စီးနေတဲ့ ဆံသားတွေကို ညှပ်လိုက်တဲ့အခါမှာ နဂိုကောင်းမွန်တဲ့ ဆံသားတွေ ပြန်ပေါက်လာစေနိုင်ပါတယ်။

၂။ ဖြည့်စွက်စာအားဆေးတွေ သောက်ပေးပါ။

တချို့သော အာဟာရဓာတ်တွေဟာ ခန္ဓာကိုယ်ကို အားဖြစ်စေပြီး ပျက်စီးနေတဲ့ ဆံသားကို အကောင်းအတိုင်း ပြန်လည်ကျန်းမာလာစေနိုင်ပါတယ်။ ဗီတာမင် A ၊ ဗီတာမင် C နဲ့ သံဓာတ်တွေဟာ ကိုယ့်ရဲ့ ဆံသားကို ကျန်းမာလှပစေပြီး ပြန်လည်စိုပြေတောက်ပလာစေနိုင်ပါတယ်။ ဒီအာဟာရဓာတ်တွေ ပါဝင်တဲ့ အစားအစာတွေကို များများစားပေးတာဖြစ်စေ၊ ဖြည့်စွက်အားဆေး သောက်ပေးတာ ဖြစ်စေ ပြုလုပ်ပေးနိုင်ပါတယ်။

၃။ ငါးကြီးဆီ နေ့စဉ်စားပေးပါ။

Omega-3 ငါးကြီးဆီဟာ အသားအရေကို လှပစေတယ်။ ကိုယ်ခန္ဓာကျန်းမာရေးအတွက်လည်း အထောက်အကူ ဖြစ်စေတယ်။ ဆံသားပါးတာ၊ ခြောက်ပြီး ကြမ်းလာတာကို ကာကွယ်ပေးနိုင်ပြီး ပျက်စီးနေတဲ့ ဆံကေသာကိုလည်း အကောင်းအတိုင်းဖြစ်အောင် ပြန်လည်ပြုပြင်ပေးနိုင်ပါတယ်။ ဆော်လ်မွန်ငါး၊ တူနာငါး၊ ငါးကွမ်းရှပ်၊ ပင်လယ်စာတွေမှာ ငါးကြီးဆီ ကြွယ်ဝတဲ့အတွက် နေ့စဉ် မဖြစ်မနေ စားပေးသင့်ပါတယ်။ အခွံမာသီး၊ ပန်းဂေါ်ဖီ၊ ခရမ်းချဉ်သီးတွေမှာ ကိုယ်ခန္ဓာအကျိုးပြု အာဟာရဓါတ်တွေနဲ့ Antioxidant တွေအပြင် ဆံသားကျန်းမာရေးကိုလည်း ကောင်းစေပါတယ်။

၄။ နေ့တိုင်း ခေါင်းလျှော်ပေးဖို့ မလိုပါဘူး။

ခေါင်းလျှော်ရည်ဟာ ဦးရေပြားပေါ်က အညစ်အကြေး၊ ဖုန်မှုန့်၊ ချွေးတွေကို ဖယ်ရှားပေးနိုင်ပေမယ့် တစ်ချိန်ထဲမှာပဲ ဆံသားကို ကျန်းမာစေတဲ့ ဦးရေပြားပေါ်က အဆီတွေကို ဖယ်ရှားပေးလိုက်နိုင်ပါတယ်။ ဒါကြောင့် ခေါင်းကို နေ့တိုင်းလျှော်မယ့်အစား တစ်ရက်ခြား တစ်ခါ လျှော်ပေးတာက အကောင်းဆုံးပါပဲ။

၅။ ဆံပင်အခြောက်ခံစက် အသုံးမပြုပါနဲ့။

ဆံသားခြောက်လာခြင်းရဲ့ အဓိကတရားခံကတော့ ဆံပင်အခြောက်ခံစက်က ထွက်လာတဲ့ အပူငွေ့တွေပါပဲ။ ခေါင်းလျှော်ပြီးတာနဲ့ ဆံပင်အခြောက်ခံစက်နဲ့ အပူပေးလိုက်တဲ့အခါ ဦးရေပြားပေါ်မှာ ကျန်နေတဲ့ အဆီတွေကို ဖယ်လိုက်ပြီး ဆံပင်သားကို ကြမ်းတမ်းခြောက်သွေ့သွားစေနိုင်ပါတယ်။ ဒါကြောင့် အရေးကြီးအပြင်သွားစရာ မရှိဘူးဆိုရင်တော့ ခေါင်းလျှော်ပြီးရင် မျက်နှာသုတ်ပဝါနဲ့ပဲ ဆံပင်ကို ခြောက်အောင် သုတ်ပေးပါ။

၆။ အပူပေးစက်တွေနဲ့ ဆံပင်ပုံသွင်းတာတွေ ရပ်လိုက်ပါတော့။

ဆံပင်ဖြောင့်ဖို့၊ ကောက်ဖို့၊ ပုံသွင်းဖို့အတွက် အပူပေးစက်တွေ အသုံးပြုလိုက်တဲ့အခါမှာ ဆံသားကို ပျက်စီးပြီး ကြမ်းတမ်းခြောက်သွေ့သွားစေနိုင်ပါတယ်။

၇။ ရေအေးနဲ့ ခေါင်းလျှော်ပေးပါ။

ရေပူရေအေးနဲ့ ရေချိုးတဲ့အခါမှာ မတူညီတဲ့ အာနိသင် အကျိုးကျေးဇူးတွေ ရှိပါတယ်။ ရေအေးနဲ့ ခေါင်းလျှော်တဲ့အခါမှာ ဆံသားအမြန်ပေါက်လာစေဖို့ ကူညီပေးတယ်။ ဦးရေပြားကို အေးမြပြီး လန်းဆန်းစေတယ်။ ဆံသားခြောက်တာမျိုး မဖြစ်စေဖို့ ကာကွယ်ပေးနိုင်ပါတယ်။

၈။ ဆီသန့် လိမ်းပေးပါ။

သဘာဝဆီသန့်တွေဟာ ခြောက်သွေ့နေတဲ့ ဆံသားတွေအတွက် အကောင်းဆုံးပါပဲ။ အုန်းဆီ၊ သံလွင်ဆီ၊ လာဗင်ဒါဆီ အစရှိသဖြင့် ဆီတွေဟာ ဆံသားကို ချောမွေ့တောက်ပစေတယ်။ ဦးရေပြားကို ကျန်းမာစေပြီး ပျက်စီးနေတဲ့ ဆံသားကို ပြန်လည်ပြုပြင်ပေးတယ်။ ဆံပင်ကို ပုံမှန်အတိုင်း ပြန်လည်ပေါက်လာစေပါတယ်။

၉။ အပြင်ထွက်ရင် ဦးထုပ်ဆောင်းပါ။

ခရမ်းလွန်ရောင်ခြည်တွေဟာ အသားအရေအတွက်သာမက ဆံသားကို ပျက်စီးကြမ်းတမ်းပြီး ခြောက်တွေ့စေနိုင်ပါတယ်။ ဒါကြောင့် အပြင်ထွက်တဲ့အခါ ဦးထုပ်ဆောင်းပေးပါ။ နေရောင်ခြည်နဲ့ ဆံသားကို တိုက်ရိုက်မထိတွေ့ဖို့ အရေးကြီးပါတယ်။