ဦးရေပြားပြဿနာများအကြောင်းတစေ့တစောင်း

လူတော်တော်မျာများမှာ ဦးရေပြားနဲ့ပတ်သတ်တဲ့၊ ဆံပင်နဲ့ပတ်သတ်တဲ့ ပြဿနာတွေအသီးသီးရှိကြပါလိမ့်မယ်။ ဆံပင်ပါးတာ၊ ဆံပင်ကျွတ်လွယ်တာ၊ ဆံပင်တွေကျိုးပြတ်တာ၊ အရှည်နှေးတာ စသည်ဖြင့်ပေါ့။ ဗောက်ထခြင်းဟာလည်း ရှက်ဖို့ကောင်းပြီး စိတ်ညစ်စရာအခြေအနေတစ်ခုပါပဲ။ ဆံပင်နဲ့ဦးရေပြားပြဿနာတွေဟာ စိတ်ရှုပ်ရပါတယ်။ ဒါပေမယ့် ကျန်းမာရေးပြဿနာကြီးကြီးမားမားတော့ မဖြစ်စေပါဘူး။

ဆံပင်ကျွတ်ခြင်း

ဆံပင်ကျွတ်ခြင်း၊ ဆံပင်ပါးခြင်း ဆံပင်တွေကျိုးကြေခြင်းဟာ ကြုံရလေ့ရှိတဲ့ ဦးရေပြားပြဿနာတစ်ခုတွေပါ။ လူအများစုဟာ တစ်ရက်မှာ ဆံပင် ၅၀ မှ ၁၀၀ ထိဆုံးရှုံးနေကြပါတယ်။

အသက်တွေကြီးလာတဲ့အခါ ဆံပင်တွေတဖြေးဖြေးကျဲပါးလာတယ်။ လူတိုင်းတော့မဟုတ်ပေမယ့်ပေါ့…။ မျိုးရိုးဗီဇအရ ဆံပင်ပါးခြင်း၊ ထိပ်ပြောင်ခြင်းတွေဟာ ဆံပင်ပါးရခြင်းရဲ့ အကြောင်းအရင်းတွေဖြစ်လေ့ရှိပါတယ်။ ထိုဗီဇရှိတဲ့အမျိုးသမီးတွေမှာ ဆံပင်ပါးတတ်ပြီး အမျိုးသားတွေဆိုရင်တော့ လုံးဝကိုထိပ်ပြောင်သွားတော့တာပါပဲ။ ထိုအခြေအနေက ဆယ်ကျော်သက်၊ ၂၀ ဝန်းကျင်၊ ၃၀ ဝန်းကျင်တွေကနေ စတင်နိုင်တယ်။ ဟော်မုန်းတွေပြောင်းလဲမှုကြောင့် ကလေးမွေးပြီး ဒါမှမဟုတ် နို့တိုက်ပြီး ၁လကနေ ၆လအတွင်းမှာလည်း အမျိုးသမီးတွေဆံပင်တွေကျွတ်တတ်ပါတယ်။ ကလေးငယ်လေးတွေမှာလည်း ဆံနုလေးတွေကျွတ်သွားပြီး ပိုရင့်သန်တဲ့လူကြီးဆံပင်တွေပေါက်လာလေ့ရှိပါတယ်။

ဆံပင်အလွန်အမင်းကျွတ်ခြင်း၊ ပါးခြင်း၊ ကျိုးပြတ်ခြင်းတွေအတွက် တခြားသော ဖြစ်နိုင်ချေရှိတဲ့ အကြောင်းအရင်းတွေကတော့-

• ဆံပင်ဆိုးဆေး၊ dryer ၊ဆံပင်ကောက်စက်၊ ဖြောင့်စက်တွေလို အပူပေးစက်များကြောင့် ဆံပင်တွေထိခိုက်နိုင်ပါတယ်။

• ဆံပင်ဆွဲခြင်း၊ လိမ်ခြင်း အကျင့်များကြောင့်…။ ဆိုတာ မိမိဆံပင်၊ မျက်တောင်၊ မျက်ခုံးတွေကနေ ဆွဲဆွဲနှုတ်တတ်တဲ့ စိတ်ပိုင်းဆိုင်ရာအခြေအနေတစ်မျိုး ဖြစ်ပါတယ်။

• ကင်ဆာဆေးသွင်းခြင်း၊ ဓါတ်ကင်ခြင်းများကဲ့သို့ ဆေးကုသမှုတချို့ရဲ့ ဘေးထွက်ဆိုးကျိုးများ။

• လတ်တလေခွဲစိတ်ထားမှု၊ အပြင်းဖျားခြင်း၊ စိတ်ပိုင်းဆိုင်ရာ ဖိအားများခြင်း။ စိတ်ဖိစီးမှုကြောင့် သုံးလေးပတ်အတွင်းမှာ ဆံပင်အများအပြားကျွတ်ခြင်းဖြစ်နိုင်ပါတယ်။ ဒါပေမယ့် ဒီအခြေအနေက လအနည်းငယ်အတွင်း ပျောက်သွားတတ်ပါတယ်။

• အရေပြားရောဂါတချို့နဲ့ သိုင်းရွိုက်အားနည်းတွေကြောင့်လည်း ဆံပင်ကျွတ်နိုင်ပါတယ်။

• သတ္ထုဆိပ်များကြောင့်လည်း ဆံပင်ကျွတ်တတ်ပါတယ်။

• အာဟာရချို့တဲ့ခြင်း- အထူးသဖြင့် အသားဓါတ်နဲ့ သံဓါတ် အားနည်းခြင်းကြောင့်လည်းဖြစ်နိုင်တယ်။

• မီးလောင်ခြင်း ၊ ထိခိုက်ခြင်းတွေကြောင့် ဆံပင်တွေကျွတ်သွားတာလည်း ဖြစ်နိုင်ပါတယ်။

ဦးရေပြားယားယံခြင်း၊ ဗောက်ထခြင်း

ဖြစ်စေတဲ့အချက်တွေကတော့-

• ကလေးငယ်လေးတွေဦးရေပြားမှာ ဒက်ထခြင်းတွေဖြစ်တတ်ပါတယ်။ ဒါဟာမကျန်းမာမှုတစ်ခုခုကြောင့်မဟုတ်ပါဘူး။

• ဗောက်ထခြင်းဟာ ခေါင်း၊ လည်ပင်း၊ ပုခုံးတွေမှာ ဗောက်ဖက်တွေကြွေကျတဲ့ အခြေအနေတွေဖြစ်စေနိုင်တယ်။ ဗောက်ထခြင်းဟာ eczema လို့ခေါ်တဲ့ အရေပြားရောဂါတစ်ခုဖြစ်ပြီး ပုံမှန်ဦးရေပြားဆဲလ်တွေကြွေကျခြင်းဖြစ်ပါတယ်။ မှိုရောဂါတစ်မျိုးကြောင့်လည်းဖြစ်နိုင်ပြီး ဟော်မုန်းနဲ့ ရာသီဥတုအပြောင်းအလဲတွေက ပိုဆိုးစေနိုင်ပါတယ်။

• ခေါင်းသန်းတွေကြောင့်လည်း ဦးရေပြားယားယံနိုင်တယ်။ ကျောင်းနေအရွယ်ကလေးတွေမှာ အဖြစ်များပါတယ်။

• ပွေးပေါက်ခြင်းကဲ့သို့ ဦးရေပြားရောဂါတစ်မျိုး၊ ပွေးကဲ့သို့ အနီရောင်အနားသတ်တွေနဲ့ အဝိုင်းသဏ္ဍာန် အကွက်တွေဖြစ်တယ်။ တခါတရံအနားသတ်တွေပျံ့သွားပြီး လက်စွပ်ပုံစံအဝိုင်းတွေဖြစ်နေတတ်ပါတယ်။

• Psoriasis, seborrhea ကဲ့သို့ နာတာရှည် အရေပြားရောဂါတွေ၊

• Planus လို့ခေါ်တဲ့ ဖြစ်လေ့မရှိပေမယ့် ထပ်တလဲလဲပြန်ဖြစ်တတ်တဲ့ အရေပြားရောဂါတစ်မျိုး၊ ထိုအခြေအနေဟာ စိတ်ဖိစီးမှု၊ စိတ်ပင်ပန်းမှုနဲ့ ဆေးတွေ ဓါတုပစ္စည်းတွေကို ထိတွေ့မှုကြောင့်ဖြစ်တတ်ပါတယ်။

ဦးရေပြားမှာ အနာများ၊ အရည်ကြည်ဖုများ၊ အဖုများပေါက်ခြင်း

ဖြစ်စေတဲ့အကြောင်းတွေကတော့

• ဆံပင်ပေါက်လေးများရောင်ရမ်းခြင်း၊ ဦးရေပြားရောင်ရမ်းခြင်း

• ဓါတ်မတည့်မှုများ

• ရေကျောက်၊ ရေယုန်များကဲ့သို့ ဗိုင်းရပ်စ်ရောဂါများ

• ပြည်ဖုများဖြစ်ပေါ်ခြင်း၊ ထိုပြည်ဖုတွေဟာ ဦးရေပြား၊ နား၊ မျက်နှာ၊ ကျောနဲ့ ကပ်ပယ်အိတ်တဝိုက်မှာ ဖြစ်ပေါ်တတ်ပြီး ရောဂါပိုးဝင်သွားပါက နောက်ထပ်တခြားသောပြဿနာတွေဖြစ်လာနိုင်ပါတယ်။

Hello Health Group သည် ဆေးပညာအကြံပြုချက်များ၊ ရောဂါရှာဖွေမှုများနှင့် ကုသမှုများကို မပြုလုပ်ပေးပါ