မသိလိုက်ဘဲ လုပ်မိနေတဲ့ ဝက်ခြံဖြစ်စေနိုင်တဲ့ အလေ့အကျင့်လေးတွေ

ဝက်ခြံဖြစ်တာက ဟော်မုန်းပြောင်းလဲမှုကြောင့်ပဲလား… အခြားအကြောင်းအရင်းတွေရော ရှိသေးတယ်လို့ထင်လား……….. ဟုတ်ပါတယ်။ ဝက်ခြံဖြစ်ရတာက အစားအသောက်နဲ့ နေ့စဉ်လုပ်မိနေတဲ့ အပြုအမူတွေကြောင့်လည်း ပါပါတယ်။ ဒါဆိုရင် ကိုယ်ဝက်ခြံပေါက်နေရတဲ့ အကြောင်းအရင်းလေးကို အတူတူရှာ ကြည့်​ကြစို့လား။

ဝက်ခြံပေါက်အောင် ကိုယ်လုပ်မိနေတဲ့ အပြုအမူက ဘာလဲ………..

ဝက်ခြံထွက်လာရတဲ့ အကြောင်းအရင်းက ဘာများလဲဆိုတာ တူတူဆန်းစစ်ကြည့်ရအောင်။

• မျက်နှာကို ခဏခဏကိုင်တာ

တစ်ခုခုစိတ်ဝင်စားရင်ဖြစ်ဖြစ်၊ တွေးနေရင်ဖြစ်ဖြစ် မျက်နှာကို ကိုင်တတ်ကုတ်တတ်သူလား။ ဒါဆိုရင်တော့ သင်ဝက်ခြံပေါက်ရတဲ့ အကြောင်းအရင်းက မျက်နှာကို ကိုင်တာကြောင့်ပါ။ လက်ချောင်းမှာ ကပ်နေတဲ့ ဘက်တီးရီးယားလေးတွေက ချွေးပေါက်ထဲဝင်ရောက်ပြီး ဝက်ခြံတွေကိုဖြစ်စေတာပါ။ မျက်နှာကို လက်နဲ့ မထိမိစေဖို့ ကြိုးစားပါ။

• ဝက်ခြံညှစ်တာ

ဝက်ခြံက ညှစ်လိုက်လို့မသက်သာသွားပါဘူး။ ပိုဆိုးသွားမှာပါ။ ဝက်ခြံညှစ်လိုက်တဲ့အခါ ဘက်တီးရီးယားတွေက အရေပြားအောက်ထဲကို အလွယ်တကူဝင်ရောက်သွားပြီး ဝက်ခြံကို ပိုရောင်ရမ်းစေနိုင်သလို အမာရွတ်တွေ ကျန်ခဲ့စေနိုင်ပါတယ်။ ဝက်ခြံမညှစ်ပါနဲ့။

• မျက်နှာကို ပုံမှန် မသန့်စင်တာ

မျက်နှာကို ခဏခဏသန့်စရာမလိုပေမယ့် တစ်နေ့ကို မနက်တစ်ကြိမ် နဲ့ ညအိပ်ရာမဝင်ခင်တစ်ကြိမ်တော့ သန့်ရှင်းဖို့လိုပါမယ်။ ဒါမှ ဝက်ခြံကင်းပြီး အသားအရေကြည်လင်မှာပါ။ အိပ်ရာမဝင်ခင် မျက်နှာကို သန့်စင်တာက မဖြစ်မနေလုပ်သင့်တဲ့ အသားအရေထိန်းသိမ်းမှုတစ်ခုပါ။

• ရေသောက်နည်းတာ

ရေဓာတ်ပြည့်ဝတာက ခန္ဓာကိုယ် ကျန်းမာစေရုံတင်မဟုတ်ပါဘူး။ အသားအရေကိုလည်း ကြည်လင်စေပါတယ်။ ဝက်ခြံကင်းပြီး အသားအရေကျန်းမာစေဖို့ဆိုရင်ရေဓာတ်လုံလောက်ပြည့်ဝအောင် သောက်သုံးဖို့လိုမှာပါ။

• စိတ်ဖိစီးမှု များတာ

စိတ်ဖိစီးမှုများတာကကလည်း အသားအရေကိုထိခိုက်စေနိုင်သလို ဝက်ခြံတွေဖြစ်ပေါ်စေဖို့လည်း အားပေးပါတယ်။ စိတ်ဖိစီးမှုများတဲ့အခါ ဝက်ခြံတွေက ဖြစ်လာစမြဲပါ။ ဒါကြောင့် တစ်နေ့ကို ၁၅ မိနစ်လောက် တရားထိုင်ပြီး ဝက်ခြံ သက်သာအောင်လုပ်ပေးလို့ရပါတယ်။

• အယ်လ်ကိုဟော သောက်သုံးမှုများတာ

အယ်လ်ကိုဟောကို အလွန်အကျွံသောက်သုံးတာ၊ အယ်လ်ကိုဟောပါတဲ့ သောက်စရာတွေကို သောက်သုံးတာကြောင့်လည်း အသားအရေထိခိုက်ပြီး ဝက်ခြံတွေဖြစ်စေနိုင်ပါတယ်။ အယ်လ်ကိုဟော လျှော့ပါ။

• နို့နဲ့နို့ထွက်ပစ္စည်းတွေ စားသုံးမှုများတာ

တစ်နေ့တာစားသုံးမှုမှာ ကယ်လ်ဆီယမ်ပါဝင်ဖို့လိုတယ်ဆိုပေမယ့် နို့နဲ့နို့ထွက်ပစ္စည်းတွေကို အလွန်အကျွံစားသုံးတာက ဝက်ခြံတွေကို ဖြစ်စေနိုင်ပါတယ်။ ဝက်ခြံမဖြစ်စေဖို့ဆိုရင် အကောင်းဆုံးက အဆီထုတ်ထားတဲ့ ဒိန်ချဉ်၊ နွားနို့တွေကို စားသုံးတာပါ။

• ကိုယ်လက်လေ့ကျင့်ခန်း မလုပ်တာ

ဝက်ခြံ သက်သာစေဖို့က အသားအရေထိန်းသိမ်းရုံနဲ့ အဆင်မပြေပါဘူး။ အသားအရေထိန်းသိမ်းမှု၊ အစားအသောက်ဂရုစိုက်မှုအပြင် သင့်တင့်တဲ့ ကိုယ်လက်လှုပ်ရှားမှုကို လုပ်ဖို့လည်း လိုပါမယ်။ ဒါကြောင့် တစ်နေ့တာမှာ အနည်းဆုံး ၁၅ မိနစ်ကနေ နာရီဝက်လောက်အထိ ကိုယ်လက်လေ့ကျင့်ခန်း လုပ်ပေးပါ။

• အိပ်ရေးဝဝအိပ်ပါ

အိပ်ရေးဝတာက အသားအရေကို ကြည်လင်စေပြီး စိတ်လန်းဆန်းစေသလို ရောဂါဘယတွေလည်း ကင်းစေနိုင်ပါတယ်။ ဒါကြောင့် ဝက်ခြံသက်သာချင်တယ်ဆိုရင်ညတိုင်း အိပ်ရေးဝဝအိပ်ဖို့လိုပါမယ်။

ကဲ…ကိုယ်တိုင်လုပ်မိနေတာက ဘယ်အလေ့အကျင့်လေးတွေများလဲ… အခုပဲပြင်လို့ ဝက်ခြံတွေကို မောင်းထုတ်လိုက်စို့နော်။