လေဒီတို့အတွက် စွန့်စားရဆုံးနဲ့ အပျော်ရဆုံး အချိန်က ကိုယ်ဝန်ဆောင်ထားချိန်နော်။ ကိုယ်ချစ်ရတဲ့ ရင်သွေးလေးကို လွယ်ထားရတာက မလွယ်ကူပေမယ့် ချစ်တဲ့စိတ်နဲ့ ပျော်ရွှင်နေမိတာက မေမေတိုင်းလိုလို ဖြစ်မယ် ထင်ပါတယ်နော်။ ဒီလို ပျော်ရွှင်နေချိန်မှာ မေမေက ကျန်းမာရေးကို သေချာလေး ဂရုစိုက်မှ မွေးလာမယ့် ဘေဘီလေးရော မေမေပါ ကျန်းမာမှာပါ။ ဒီတစ်ခေါက်တော့ ကိုယ်ဝန်ဆောင်မေမေ တော်တော်များများမှာ ခံစားရနိုင်တဲ့ ကိုယ်ဝန်ဆောင်ချိန် ခြေထောက်ကြွက်တက်တာကို ဘယ်လို သက်သာအောင် လုပ်ရမလဲ ဆိုတာကို ပြောပြပေးပါရစေ။

ကိုယ်ဝန်ဆောင်ချိန်မေမေ ကြွက်တက်တာက ဖြစ်လေ့ဖြစ်ထရှိလား…

ကိုယ်ဝန်ဆောင်ချိန်မှာ ခြေသလုံးကြွက်တက်တာက ဖြစ်လေ့ဖြစ်ထရှိတဲ့ အခြေအနေ တစ်ခုလို့ပဲ ဆိုပါရစေ။

ဘယ်လိုအချိန်မှာ ပိုဖြစ်နိုင်လဲ…………

ကိုယ်ဝန်ဆောင်ချိန်ရဲ့ ဒုတိယ ၃ လပတ်နဲ့ တတိယ ၃ လပတ်တွေမှာ ခြေသလုံး ကြွက်တက်တာက ပိုအဖြစ်များပြီး ညဘက်တွေမှာ ဖြစ်နိုင်ခြေ ပိုများပါတယ်။

ကိုယ်ဝန်ဆောင်မေမေ ကြွက်တက်ခဲ့ရင်ဘယ်လိုသက်သာအောင်လုပ်မလဲ………

ကိုယ်ဝန်ဆောင်မေမေ ကြွက်တက်ခဲ့ရင် ဘယ်လို သက်သာအောင် လုပ်ပေးလို့ ရမလဲဆိုတဲ့ အချက်လေးတွေကို အတူတူ ဆက်ကြည့်လိုက်ရအောင်လား။ကိုယ်ဝန်ဆောင်ချိန်မှာ ကြွက်တက်တာ သက်သာစေဖို့ဆိုရင် ဒီနည်းလမ်းလေးတွေက အဆင်ပြေစေမှာပါနော်။

ခြေသလုံးကြွက်သားကို အကြောလျှော့ပါ – ကိုယ်ဝန်ဆောင်ချိန်မှာ ညအိပ်ရာမဝင်ခင် ခြေသလုံး ကြွက်သားတွေကို အကြောလျှော့ပေးတာက ကြွက်တက်တာကို သိသိသာသာ သက်သာစေနိုင်မှာပါ။ နံရံကိုမျက်နှာမူပါ။ လက်နှစ်ဖက်ကို နံရံမှာ ထောက်ထားပါ။ ပြီးရင် ညာဘက် ခြေထောက်ကို အရှေ့ဘက်ဆီ ကွေးပါ။ ဘယ်ဘက် ခြေထောက်ကို နောက်ဖက်ကို ဆန့်ထုတ်ပါ။ စက္ကန့် ၃၀ ထားပါ။ တစ်ဖက်ပြီး တစ်ဖက် လုပ်ပေးပါ။ ဖြည်းဖြည်းချင်း တတ်နိုင်သလောက်ပဲ လုပ်ပေးပါ။

ကယ်လ်ဆီယမ်လုံလောက်အောင်စားသုံးပါ – ကိုယ်ဝန်ဆောင်ကာလအတွင်း သွေးတွင်းမှာ ကယ်လ်ဆီယမ် လုံလောက်ပြည့်ဝမှု ရှိတာက ကိုယ်ဝန်ဆောင်စဉ် ခြေသလုံးကြွက်တက်တာမျိုး မဖြစ်အောင် အထိရောက်ဆုံး ကာကွယ်ပေးနိုင်ပါတယ်။ ကိုယ်ဝန်ဆောင်နေချိန်မှာ တစ်နေ့ကို ကယ်လ်ဆီယမ်ပမာဏ ၁၀၀၀ မီလီဂရမ် ပြည့်ဝအောင် စားသုံးပေးဖို့ လိုပါမယ်။ နို့ နဲ့ နို့ထွက်ပစ္စည်းတွေ စားသုံးပေးလို့ ရပါတယ်။

သင့်တော်တဲ့ဖိနပ်ရွေးချယ်ပေးပါ – ဖိနပ်ရွေးချယ်တဲ့အခါ သက်တောင့်သက်သာဖြစ်တာမျိုးကို ရွေးချယ်ပေးပါ။ ဒီလိုရွေးချယ်က ခြေထောက်ကို သက်တောင့်သက်သာဖြစ်စေပြီး ကြွက်မတက်အောင် ကာကွယ်ပေးနိုင်ပါတယ်။ ခုံမြင့်ဖိနပ်တွေကို တတ်နိုင်သမျှ ရှောင်ပါ။ ရှုးဖိနပ် ခပ်ပါးပါးလေးတွေက ကိုယ်ဝန်ဆောင်ချိန်မှာ သက်တောင့်သက်သာရှိနေစေပြီး လမ်းလျှောက်ရတာကိုအဆင်ပြေစေမှာဖြစ်သလို ခြေထောက်ကြွက်မတက်အောင်လည်း ကာကွယ်ပေးနိုင်မှာပါ။

ခြေထောက်ကြွက်တက်လာရင်ရော ဘယ်လိုသက်သာအောင်လုပ်ရမလဲ……………

အပေါ်ကနည်းတွေက ခြေထောက်ကြွက်မတက်အောင် ကာကွယ်ပေးသလို ခြေထောက်ကြွက်တက်တာကိုသက်သာစေဖို့အတွက်လည်း အသုံးပြုပေးလို့ရပါတယ်။ အကယ်လို့များ ခြေထောက်ကြွက်တက်လာတဲ့အခါ သက်သာစေဖို့အတွက်

• လမ်းလျှောက်ပေးပါ
• ရေနွေးနဲ့ရေချိုးပေးပါ
• ခြေထောက်ကိုရေနွေးစိမ်ပေးပါ
• ရေခဲကပ်ပေးပါ
• ခြေသလုံးကြွက်သားကိုနှိပ်နယ်ပေးပါ

ကဲ….ကိုယ်ဝန်ဆောင်ချိန်မှာ ကြွက်တက်နေလို့ စိတ်မပူနဲ့တော့နော်။ ကိုယ်ဝန်ဆောင်မေမေ ကြွက်တက်ခဲ့ရင် ဒီနည်းလေးတွေသုံးပြီး ကြွက်တက်တာကို သက်သာအောင်လုပ်လိုက်ပါနော်။ မေမေရောဘေဘီလေးပါကျန်းမာပါစေကြောင်း…………..