အတက်ရောဂါရှိတဲ့ မေမေကိုယ်ဝန်ဆောင်တဲ့အခါ

ရောဂါတစ်ခုခုခံစားနေရရင် ကိုယ်ဝန်ဆောင်တဲ့အခါ မွေးလာမယ့် ကလေးကို ထိခိုက်မလား၊ ကိုယ်ဝန်ရောဆောင်လို့ရပါ့မလားဆိုပြီး စိတ်ပူတတ်ကြတာ အမျိုးသမီးတိုင်းနီးပါးပါ။ မေမေဖြစ်ချင်ပေမယ့် အတက်ရောဂါရှိနေလို့ မေမေဖြစ်ခွင့်ရပါ့မလားလို့ တွေးနေတဲ့ မေမေတို့အနေနဲ့ ဒီဆောင်းပါးလေးကို ဖတ်ကြည့်စေချင်ပါတယ်။ အတက်ရောဂါရှိတဲ့ မေမေကိုယ်ဝန်ဆောင်တဲ့အခါ ဘာတွေ သိထားဖို့ လိုမလဲဆိုတာကို ကိုယ်တိုင် လေ့လာလိုက်ပါဦးနော်။

အတက်ရောဂါရှိတဲ့ မေမေကိုယ်ဝန်ဆောင်တဲ့အခါ

အတက်ရောဂါရှိတဲ့ မေမေကိုယ်ဝန်ဆောင်တဲ့အခါ သိထားသင့်တာလေးတွေက

အမျိုးသမီးများနဲ့ အတက်ရောဂါ

အတက်ရောဂါက အမျိုးသမီးတွေအနေနဲ့ မပေါ့သင့်တဲ့ ကျန်းမာရေးပြဿနာတစ်ခုပါ။ အတက်ရောဂါကို ခံစားရပုံချင်းက အမျိုးသမီးတစ်ဦးနဲ့ တစ်ဦးမှာလည်း မတူတတ်ကြပြန်ပါဘူး။ တစ်ခါတလေမှာ အတက်ရောဂါက ကိုယ်တွင်းက ဟော်မုန်းပမာဏ၊ ရာသီစက်ဝန်း၊ ကိုယ်ဝန်ဆောင်ကာလ၊ သွေးဆုံးချိန်တွေပေါ်မှာလိုက်ပြီး ကွာခြားနိုင်ပါတယ်။

အတက်ရောဂါရှိသူတွေ ကိုယ်ဝန်ဆောင်လို့ရလား။

အတက်ရောဂါရှိသူ အမျိုးသမီးအများစုက ကိုယ်ဝန်ဆောင်လို့ရပါတယ်။ ဒါပေမယ့် သာမန်အမျိုးသမီးတွေထက်စာရင်တော့ အန္တရာယ်များတာပေါ့။ အတက်ရောဂါကြောင့် မိခင်ကျန်းမာရေးကို ထိခိုက်နိုင်သလို ဘေဘီလေးရဲ့ ကျန်းမာရေးကိုလည်း ထိခိုက်နိုင်ပါတယ်။ ဒီလိုဆိုတာနဲ့ ကိုယ်ဝန်မဆောင်ရတော့ဘူးလားဆိုတော့ မဟုတ်ပါဘူး။ အတက်ရောဂါရှိနေပေမယ့်လည်း ကျန်းမာရေးကို သေချာလေးဂရုစိုက်မယ်ဆိုရင် ကိုယ်ဝန်ဆောင်နိုင်မှာပါ။

မိခင်မှာ အတက်ရောဂါရှိနေပေမယ့် ကျန်းမာတဲ့ ကလေးကို မွေးဖွားနိုင်ပါသေးတယ်။

• အတက်ရောဂါရှိသူ အမျိုးသမီးတွေက မျိုးအောင်နိုင်စွမ်းနည်းစေတဲ့ တခြားရောဂါခံစားရနိုင်ခြေလည်း များပါတယ်။ (ဥပမာ မမျိုးဥအိမ်ရေအိမ်တည်ခြင်းရောဂါစု Polycystic ovary syndrome(PCOS))
• ရာသီသွေးဆင်းမမှန်တာကြောင့် ကိုယ်ဝန်ရရှိဖို့ ခက်ခဲစေနိုင်ပါတယ်။
• မမျိုးဥ ထုတ်လုပ်မှုနည်းတာကြောင့်လည်း အတက်ရောဂါရှိသူတွေမှာ ကိုယ်ဝန်ရရှိဖို့ ခက်ခဲပါတယ်။
• အတက်ရောဂါအတွက် သောက်ရတဲ့ဆေးတွေကြောင့် သားဥအိမ်ရဲ့ ဟော်မုန်းပမာဏကို အပြောင်းအလဲဖြစ်စေပြီး ကလေးရဖို့ခက်စေပါတယ်။
• အတက်ရောဂါရှိသူတွေက ကိုယ်ဝန်ရဖို့ လိုအပ်တဲ့ ကိုယ်တွင်းဟော်မုန်းမမျှတတာလည်း ဖြစ်တတ်ပါတယ်။

အတက်ကျဆေးတွေက ကလေးရဖို့ ခက်စေသလား။

အတက်ကျဆေးတွေက ကလေးရဖို့ တိုက်ရိုက်ခက်ခဲစေတာတော့ မဟုတ်ပါဘူး။ ဒါပေမယ့် ကိုယ်တွင်းမှာ ဟော်မုန်းအပြောင်းအလဲဖြစ်စေပြီး လိင်စိတ်ဆန္ဒနည်းပါးတာကြောင့် ကလေးယူတဲ့အခါ အခက်အခဲ ရှိတတ်ပါတယ်။

အတက်ရောဂါက ကိုယ်ဝန်အပေါ် ဘယ်လိုသက်ရောက်နိုင်လဲ။

ကိုယ်ဝန်ဆောင်မေမေက ကိုယ်ဝန်ဆောင်ချိန်မှာ မကြာခဏတက်မယ်ဆိုရင်

• သန္ဓေသားက နှလုံးခုန်နှုန်းနှေးတာ
• သန္ဓေသားဆီ အောက်ဆီဂျင်ရောက်ရှိမှု နည်းတာ
• သန္ဓေသားမှာ ထိခိုက်မိတာ
• အချိန်မတိုင်ခင် အချင်းကွာကျတာ
• ကိုယ်ဝန်ပျက်ကျတာ
• လမစေ့ဘဲ မွေးဖွားတာ
• ပေါင်မပြည့်ဘဲ မွေးဖွားတာမျိုးတွေ ဖြစ်နိုင်ပါတယ်။

ကိုယ်ဝန်ဆောင်ခြင်းကြောင့် အတက်ရောဂါ ပိုဆိုးတတ်ပါသလား။

များသောအားဖြင့်တော့ ကိုယ်ဝန်ဆောင်ချိန်မှာ အတက်ရောဂါက ပြောင်းလဲမှုမရှိတတ်ပါဘူး။ တချို့သော ကိုယ်ဝန်သည်တွေဆိုရင် တက်တဲ့ အကြိမ်အရေက ကျတောင်ကျသွားတတ်ပါတယ်။ ဒါပေမဲ့ ဆေးကုသမှုပုံမှန်မခံယူသူ သို့မဟုတ် အိပ်ရေး၀၀ မအိပ်သူတွေအတွက်တော့ အကြိမ်အရေအတွက် ပိုများလာပါနိုင်ပါတယ်။

အတက်ကျဆေးတွေက ကိုယ်ဝန်ကို ထိခိုက်နိုင်ပါသလား။

အတက်ကျဆေးတွေက ကလေးတွေမှာ မွေးရာပါချို့ယွင်းချက်တွေဖြစ်တဲ့ ကျောရိုးကွဲတာ၊ နှုတ်ခမ်းကွဲတာ၊ နှလုံးနဲ့ ဦးနှောက်ဖွံ့ဖြိုးမှု မမှန်တာတွေ ဖြစ်တတ်ပါတယ်။ ဒါကြောင့် လိင်ဆက်ဆံမှုပုံမှန်ရှိပြီး အတက်ကျဆေးတွေလည်း သောက်နေရတဲ့ အမျိုးသမီးတွေက တားဆေးသေချာသုံးဖို့ လိုပါတယ်။

တကယ်လို့ ကိုယ်ဝန်ယူမယ်လို့ ဆုံးဖြတ်လိုက်ပြီဆိုရင် တားဆေးမရပ်ခင်မှာ ဆရာဝန်နဲ့ အရင်တိုင်ပင်ပါ။ ဆရာဝန်က ကိုယ်ဝန်အတွက် မထိခိုက်စေတဲ့ အတက်ကျဆေးတွေကို ပြောင်းပေးပြီးမှ ကလေးယူပါ။

ကိုယ်ဝန်ရှိနေရင် အတက်ကျဆေးတွေ ဆက်သောက်လို့ ရပါ့မလား။

ကိုယ်ဝန်ရှိနေပေမယ့်လည်း မိမိရဲ့ အတက်ရောဂါအခြေအနေကို လိုက်ပြီး ဆေးသောက်ဖို့ လိုနိုင်ပါတယ်။ အဲ့ဒီအခါကျရင် ဆရာဝန်က ကလေးကို မထိခိုက်စေတဲ့ အတက်ကျဆေးတွေ ပေးမှာပါ။ ဒါကြောင့် ကိုယ့်သဘောနဲ့ကို ဆေးကို ရပ်တာ၊ လျှော့တာ မလုပ်ဖို့ လိုပါတယ်။

အတက်ကျဆေးသောက်နေတဲ့ မိခင်တွေက ဖောလစ်အက်စစ်တိုးသောက်ဖို့ လိုပါတယ်။ သာမန်မိခင်တွေက ၅မိုက်ခရိုဂရမ်လောက် သောက်ရပေမယ့် အတက်ရောဂါရှိသူ မေမေတွေကတော့ ၅မီလီဂရမ်သောက်ဖို့ လိုပါတယ်။

အတက်ရောဂါရှိတယ်၊ ကိုယ်ဝန်ဆောင်ချင်တယ် ဘယ်လိုပြင်ဆင်ရမလဲ

အတက်ရောဂါရှိပေမယ့် သားသားမီးမီးလေးတွေလည်း လိုချင်တယ်ဆိုရင်တော့ ကိုယ်ဝန်မဆောင်ခင်ကတည်းက ဆရာဝန်နဲ့ သေချာတိုင်ပင်ဆွေးနွေးဖို့ လိုပါမယ်။ မကြာခဏ တက်မယ်ဆိုရင်တော့ ဒီအခြေအနေမသက်သာမချင်း ကလေးမယူသင့်သေးပါဘူး။ ဆေးတွေကို ဆရာဝန်ညွန်ကြားတဲ့အတိုင်းသောက်ပေးပါ။ ကိုယ်သဘောနဲ့ကိုယ်ဆေးတွေကို အတိုးအလျော့မလုပ်ဖို့ ပြောပါရစေ။

အတက်ရောဂါကို မထိန်းချုပ်နိုင်ခင် ကလေးယူတာက မိခင်ရောကလေးအတွက်ပါ ထိခိုက်စေနိုင်ပါတယ်။ ဒါကြောင့် အတက်ရောဂါရှိတယ်။ ဒါပေမယ့် ကလေးယူချင်တယ်ဆိုရင် အတက်ရောဂါကို အရင်သက်သာအောင်လုပ်ဖို့ပြောပါရစေ။ အတက်ရောဂါရှိတဲ့ မေမေအနေနဲ့ ကလေးယူတော့မယ်လို့ စဉ်းစားထားတယ်ဆိုရင်

• ကျန်းမာရေးနဲ့ ညီညွတ်အောင် စားပါ။
• ကိုယ်ဝန်ဆောင် အားဆေးတွေသောက်ပါ။
• အိပ်ရေးဝဝအိပ်ပါ။
• ဆေးလိပ်၊ အရက်နဲ့ မူးယစ်ဆေး၊ ကဖင်းတို့ကိုရှောင်ပါ။
• အတက်ကျဆေး ပုံမှန်သောက်ပါ။
• ကိုယ်ဝန်ယူတော့မယ်ဆို ဆရာဝန်နဲ့ အရင်ပြပါ။