ကိုယ်ဝန်ဆောင်ချိန် ကိုက်ခဲတာကို သက်သာစေဖို့

ကိုယ်ဝန်ဆောင်ကာလက ခက်ခဲတဲ့ အခိုက်အတန့်ပါ။ မိခင်ဖြစ်ရတာ အဖိုးမဖြတ်နိုင်တဲ့ အရာဆိုပေမယ့် မိခင်တစ်ယောက်ဖြစ်ဖို့က မလွယ်ကူပါဘူး။ ကိုယ်ဝန်ဆောင်ချိန်မှာ ပျို့အန်တာ၊ ရင်ပူတာကနေစလို့ ခါးနာတာ၊ ခြေလက်တွေ ကိုက်တာ၊ မအီမသာဖြစ်တာတွေကို ခံစားကြရပါတယ်။

ကိုက်ခဲတာက မိခင်တိုင်းလိုလို ကိုယ်ဝန်ဆောင်ချိန်မှာ ခံစားရတဲ့ ပြဿနာတစ်ခုပါ။ အခြားသူတွေလို အလွယ်တကူ ဆေးသောက်ဖို့လည်း မလွယ်ကူတဲ့ ကိုယ်ဝန်ဆောင် မေမေတို့ နာကျင်ကိုက်ခဲတဲ့အခါ သက်သာစေဖို့ ဘယ်လို လုပ်ဆာင်ရမလဲဆိုတာကို ပြောပြပေးသွားပါမယ်။

ကိုယ်ဝန်ဆောင်ချိန်မှာ ဘာကြောင့် နာကျင်ကိုက်ခဲရတာလဲ………..

ကိုယ်ဝန်ဆောင်ချိန်မှာ ခန္ဓာကိုယ်က ပြောင်းလဲလာမှုတွေက အများကြီးပါ။ ဒီအချက်တွေကြောင့် ကိုက်ခဲတာတွေကို ခံစားရတာပါ။ များသောအားဖြင့်ကတော့

• သွေးစီးဆင်းမှုပြောင်းလဲတာ
• ဟော်မုန်း ပြောင်းလဲတာ
• ရေသောက်နည်းတာ
• ကိုယ်အလေးချိန် တက်လာတာ
• လှုပ်ရှားမှု နည်းတာ
• ကယ်လ်ဆီယမ် နည်းတာ
• မဂ္ဂနီဆီယမ် နည်းတာတွေကြောင့် ကိုက်ခဲနိုင်ပါတယ်။

ကိုယ်ဝန်ဆောင်ချိန် ကိုက်ခဲတာ သက်သာစေဖို့

ကိုယ်ဝန်ဆောင်ချိန်မှာ ကိုက်ခဲတာကို သက်သာစေဖို့ဆိုရင်

အကြောဆန့်ပါ။

မတ်တတ်ရပ်ပြီး နံရံကို မျက်နှာမူပါ။ လက်တွေကို နံရံပေါ်မှာထောက်လို့ ခြေထောက်တွေကို အကြောလျှော့ပေးတာမျိုး၊ ထိုင်နေရင်းနဲ့ လက်တွေကို အကြောလျှော့တာမျိုး လုပ်ပေးလို့ရပါတယ်။

လေ့ကျင့်ခန်း လုပ်ပါ။

ကိုယ်ဝန်ဆောင်ချိန်မှာလည်း လေ့ကျင့်ခန်း လုပ်ပေးလို့ ရပါတယ်။ ဆရာဝန်နဲ့ အရင်ဆုံး တိုင်ပင်ပြီး အသင့်တော်ဆုံးဖြစ်မယ့် လေ့ကျင့်ခန်းကိုတော့ ရွေးချယ်သင့်တာပေါ့။

ကိုယ်ဝန်ဆောင် လေဒီလေးတွေအနေနဲ့ ယောဂလေ့ကျင့်တာ၊ လမ်းလျှောက်တာ၊ ရေကူးတာလိုမျိုး လေ့ကျင့်ခန်းလေးတွေကို လုပ်ပေးလို့ ရပါတယ်။ ဒီလို လုပ်ဆောင်ပေးတာက ကြက်သားတွေကို ပြေလျော့စေပြီး ကိုက်ခဲတာကို သက်သာစေမှာပါ။

လှုပ်လှုပ်ရှားရှားနေပါ။

ကိုယ်ဝန်ဆောင်ချိန်မှာ အပြင်းစား လေ့ကျင့်ခန်းမျိုးတွေ၊ ပြေးတာမျိုးတွေ မလုပ်ရဘူးဆိုပေမယ့် နေ့စဉ် ပုံမှန် လှုပ်ရှားမှုလေးတွေကိုတော့ လုပ်ဆောင်ပေးလို့ရပါတယ်။ မတ်တတ်ရပ်တာ၊ လမ်းလျှောက်တာတွေကို လုပ်ပေးတာက ကိုယ်ဝန်ဆောင်ချိန်မှာ ကိုက်ခဲတာကို သက်သာစေနိုင်ပါတယ်။