အသီးအနှံတွေ ဟင်းသီးဟင်းရွက်တွေ ဆိုတာ ကျန်းမာရေးအတွက် ကောင်းမှန်းလူတိုင်းသိကြပါတယ်။ ဒါပေမယ့် မကြိုက်တဲ့သူတွေကများနေတော့ ခက်သား။ လူကြီးတွေတောင်မှ မကြိုက်ကြတာ ကလေးတွေဆို ပိုဆိုးတာပေါ့။ ထမင်းကိုတောင်မှ မနည်းချော့ကျွေးနေရတဲ့ ကလေးတွေ အသီးအရွက် စားဖို့ဆိုတာ မေမေတို့အတွက်တော့ စိန်ခေါ်မှုကြီးတစ်ရပ်ပါပဲ။

အာဟာရ အုပ်စုကြီး ၃ ခုကလည်း မျှတအောင် အစားအသောက်တွေပြင်ဆင်ပေးရမယ်ဆိုတော့ မေမေတို့ အနေနဲ့ ကိုယ့်ရဲ့ ကလေးတွေကို အသီးအရွက်ကျွေးမှကို ရမှာပါ။ ဒါကြောင့် အစားအသောက်ကြေးများတဲ့ ကလေးတွေ အသီးအရွက်ဆိုစားချင်စိတ်ရှိလာအောင် မေမေတို့အနေနဲ့ ဘယ်လိုဆွဲဆောင်ရမလဲဆိုတာ ပြောပြပေးချင်ပါတယ်။

ဘာကြောင့် ကလေးတွေက ဟင်းသီးဟင်းရွက်တွေ စားဖို့ လိုအပ်တာလဲ။ ။

ကလေးတွေ အနေနဲ့ ကိုယ်ခန္ဓာကြီးထွားစေတဲ့ အစာအစားတွေ၊ အင်အားဖြစ်စေတဲ့ အစားအစာတွေပဲ စားရင်မရဘူးလားလို့ မေးစရာရှိပါတယ်။ ကလေးတစ်ယောက်က ကိုယ်ခန္ဓာကြီးထွားဖွံ့ဖြိုးစေတဲ့ အစာအုပ်စုကို အဓိက ထားစားရမှာ မှန်ပေမယ့် ရောဂါကာကွယ်ပေးတဲ့ အစာအုပ်စုကို မေမေတို့အနေနဲ့ ချန်ခဲ့လို့မရပါဘူး။

ငယ်သေးတဲ့ အချိန်မှာ ကလေးတွေရဲ့ကိုယ်တွင်းခုခံအားစနစ်က လူကြီးတစ်ယောက်လောက် ပြီးပြည့်စုံမနေတာကြောင့် ရောဂါကာကွယ်ပေးတဲ့ အုပ်စုထဲပါတဲ့ အသီးအရွက်တွေ ကျွေးမှကို ရမှာပါ။ အသီးအရွက်တွေမှာကလေးတွေ လိုအပ်တဲ့ ဗီတာမင်နဲ့ သတ္တုဓာတ် အများကြီးပါတဲ့ အပြင် ကလေးအရွယ်မှာ အဖြစ်များတဲ့ ဝမ်းချုပ်တာကိုလည်း အသီးအရွက်တွေမှာပါတဲ့ အမျှင်ဓါတ်က ဖြေရှင်းပေးမှာပါ။ ဒါကြောင့် ကိုယ့်ကလေးတွေ အသီးအရွက်စားအောင် မေမေတို့ အနေနဲ့ ဘယ်လိုတွေလုပ်ကြမလဲ။

၁။ ရှေ့ကဦးဆောင်စားပြပါ။

အသက် ၂နှစ်ကျော်တဲ့ဆိုတာ အရာရာကို သင်ယူချင်စိတ်ရှိနေတဲ့ အရွယ်ပါ။ အဓိက သင်ယူမှာကတော့ အနီးဆုံးမှာရှိနေတဲ့ မိဘတွေဆီကပါ။ ကလေးတစ်ယောက်ရဲ့ အပြုအမူ အပြောအဆိုတွေဆိုတာ မိဘတွေဆီကနေ ဆင်းသက်လာတာပါ။ ဒီအချက်ကို ကြည့်လိုက်ရင် ကလေးရဲ့ စားသောက်မှုပုံစံကလည်း မိဘတွေနဲ့ အများကြီးသက်ဆိုင်နေတယ်ဆိုတာ သွားတွေ့ရပါတယ်။ မိဘဖြစ်တဲ့ ကိုယ်က ရှေ့ ကစားပြမှ ကိုယ့်ကလေးလည်း အသီးအရွက် စားချင်စိတ်တွေဖြစ်လာမှာပါ။

၂။ ကလေးတွေကို ပုံပြင်တွေနဲ့ သိမ်းသွင်းပါ။

ကလေးတစ်ယောက်ဟာ ငယ်တဲ့အချိန်မှာဆို လူကြီးတွေပြောတာအကုန် ယုံတတ်ကြပါတယ်။ ပုံပြင်တွေဆိုလည်းသိပ်ကိုကြိုက်ကြပါတယ်။ ဒါကြောင့် ထမင်းကျွေးနေရင်း အသီးအရွက်စားတဲ့ တိရစ ္ဆာန်လေးတွေ အကြောင်းပုံပြင်လုပ်ပြောပါ။ ဥပမာ၊ ငှက်ပျောသီးကြိုက်တတ်တဲ့ မျောက်ညိုနဲ့ ဦးစိတ်တိုအကြောင်းတို့၊ ကြံကြိုက်တဲ့ ဆင်ကြီးမိုမိုအကြောင်းတို့၊ အရွက်ပဲစားတဲ့ ရေမြင်းအကြောင်းတို့ကို ပုံပြင်တွေလုပ်ပြောပါ။ ဒါမှ သူတို့ချစ်တဲ့ အကောင်လေးတွေ ကြိုက်တဲ့ အသီးအနှံတွေကို သူတို့ပါ လိုက်စားချင်မှာပါ။

၃။ အစားအသောက်ပြင်ဆင်တဲ့ အချိန်သူတို့ကို ပါဝင်ခိုင်းပါ။

ဟင်းချက်တမ်း ကစားရရင်ပျော်ကြတာက ကလေးတို့ သဘာဝလေ။ စူးစမ်းချင်ကြတာကိုး။ မိဘတွေဖြစ်တဲ့ ကိုယ်တွေ ကလေးအရွယ်တုန်းကလည်း ဟင်းချက်တမ်းကစားရတာ အရမ်းကိုပျော်ခဲ့ကြတယ်မဟုတ်လား။ ဒါကြောင့် မေမေတို့အနေနဲ့ ထမင်းပွဲ ပြင်ဆင်တော့မယ်ဆိုရင် ကိုယ့်ကလေးတွေကို ဝင်ပြီးပြင်ခိုင်းပါ။ အသီးအနှံတွေကို ရေဆေးခိုင်းတာ၊ လှီးပြီးသား အသီးအနှံတွေကို ပန်းကန်ထဲစီထည့်ခိုင်းတာမျိုးပေါ့။ စူးစမ်းချင်တဲ့စိတ်ကနေ ဒါလေးက ဘယ်လိုအရသာပါလိမ့်ဆိုတာ ဖြစ်လာပြီး သင့်ကလေးအသီးအနှံတွေ စစားတတ်လာပါလိမ့်မယ်။

၄။ တစ်လုတ်ပဲကျွေးပြီး စားချင်စိတ်ကို ဆွပေးပါ။

ကလေးတွေဆိုတာ မရလေ ပိုလိုချင်လေ၊ မကျွေးလေ ပိုစားချင်လေပါပဲ။ ဒါကြောင့် မေမေတို့အနေနဲ့ ထမင်းကျွေးတဲ့ အချိန်မှာ ကလေးကို အသီးအရွက်တွေ တစ်လုတ်ပဲကျွေးပြီး သူတို့ရှေ့မှာ ကိုယ်က မြိန်ရေယှက်ရေ စားပြပါ။ သူတို့ထပ်တောင်းရင် မကျွေးဘဲအသာထားပါ။ ပြီးမှ ထပ်ကျွေးပါ။ ဒီလိုနည်းနဲ့ သင့်ကလေးရဲ့ အစားစားချင်စိတ်ကို ဆွပေးလို့ရပါတယ်။

၅။ ချီးကျူးပါ။

ကလေးဆိုတာ အမြှောက်ကြိုက်တဲ့ အမျိုးပါ။ အသီးအရွက်စားတဲ့ကလေးတွေဟာ မစားတဲ့ ကလေးတဲ့ ပိုတော်တယ်ဆိုတာ သူတို့သိအောင် ချီးမွမ်းပေးပါ။ သားလေးက အသီးအရွက်တွေစားတယ် လိမ္မာလိုက်တာ၊ တော်လိုက်တာ ဆိုတာမျိုးပေါ့။

၆။ အသီးအရွက်ကကောင်းတယ်ဆိုတာ သူတို့စိတ်ထဲသွင်းပေးပါ။

ကလေးအများစုက ကိုယ်ခန္ဓါကြီးထွားတာကို နှစ်သက်ကြပါတယ်။ ဒါမှ သူငယ်ချင်းတွေနဲ့ ကစားရင် အနိုင်ကျင့်မခံရမှာကိုး။ သန်မာတဲ့ ကိုယ်ခန္ဓါတစ်ခုရဖို့ အသီးအရွက်ကလည်း ကူညီပေးတယ်ဆိုတာ သူတို့သိအောင် အမြဲပြောပေးပါ။ ငှက်ပျောသီးစားရင်အားရှိတယ်၊ ပန်းသီးစားရင်ဉာဏ်ကောင်းတယ်ဆိုတာမျိုးပေါ့။ ဒီလိုမှ ကလေးတွေအနေနဲ့ ဒါလေးစားလိုက်ရင် ငါဒီလိုဖြစ်မှာဆိုတဲ့ အသိရှိသွားပြီး အသီးအနှံစားရတာပျော်နေတော့မှာပါ။

၇။ ကလေးတွေလည်းအလှကြိုက်ပါတယ်။

အရုပ်လှလှလေးတွေပါတဲ့ ထမင်းပန်းကန်၊ ထမင်းဘူးတွေနဲ့ဆို ကလေးတွေ ပိုစားချင်ကြပါတယ်။ ဒါ့အပြင် သူတို့စားရမယ့် ဟင်းသီးဟင်းရွက်တွေ ကို အရုပ်ပုံလေးတွေဖော်ထားပေးရင် ပိုစားချင်ကြပါတယ်။

အိမ်မှာရှိတဲ့ ရေခဲသေတ္တာထဲက သရေစာတွေနေရာမှာ ကွတ်ကီးတွေ အစား အသီးအနှံတွေကို ပုံဖော်ပြီး အရုပ်ပါတဲ့ ဘူးလေးတွေထဲထည့်ထားပေးမယ်ဆိုရင် သင့်ကလေး အသီးအနှံတွေ ပိုစားဖြစ်မှာပါ။

ကလေးတစ်ယောက် ကျန်းမာပြည့်ဖြိုးပြီး အာဟာရပြည့်ဖို့က မေမေတို့နဲ အများကြီးသက်ဆိုင်တာကြောင့် ကလေးတွေအသီးအနှံစားချင်အောင် ခုပြောပြတဲ့ နည်းလေးတွေ စမ်းကြည့်သင့်ပါတယ်။

ကလေးတစ်ယောက်ရဲ့ အမူအကျင့်အားလုံးဟာ အမေတွေ၊ အဖေတွေဆီကနေ သင်ယူတာမို့လို့ ငယ်ငယ်ကတည်းက အကျင့်ကောင်းတွေ တည်ဆောက်ပေးလိုက်ဖို့လိုပါတယ်။ အနာဂတ်မှာ ကျန်းမာသန်စွမ်းတဲ့ကလေးတစ်ယောက်ဖြစ်ဖို့က မိဘတွေဖြစ်တဲ့ သင်တို့ လက်ထဲမှာပဲရှိတာပါ။ ။