ကလေးခန္ဓာကိုယ်ကြီးထွားဖွံ့ဖြိုးမှုအတွက် လိုအပ်သောအာဟာရများနှင့် ၎င်းတို့၏လုပ်ဆောင်မှုများ

ကလေးခန္ဓာကိုယ်ကြီးထွားဖွံ့ဖြိုးမှုအတွက် လိုအပ်သောအာဟာရများနှင့် ၎င်းတို့၏လုပ်ဆောင်မှုများ

ကလေးတွေကို အာဟာရမျှတအောင်ကျွေးမွေးနိုင်စေဖို့အတွက် ကလေးတွေမှာ မဖြစ်မနေလိုအပ်တဲ့ အာဟာရဓာတ်အချို့နဲ့ သူတို့ရဲ့ လုပ်ဆောင်မှုတွေကို ဖော်ပြပေးလိုက်ပါတယ်။

ပရိုတင်း

ကြွက်သားတွေနဲ့ ကလေးရဲ့ကိုယ်ခန္ဓာက အခြားတစ်ရှုးတွေကို တည်ဆောက်ပေးတဲ့အာဟာရဓာတ်ဖြစ်ပါတယ်။ ကိုယ်ခံအားစနစ် တိုးတက်ကောင်းမွန်အောင်လည်း အထောက်အပံ့ပေးပါတယ်။

ပရိုတင်းဓါတ်ပါဝင်တဲ့အစားအစာများ –

• ငါး
• ကြက်သား
• ကြက်ဆင်သား
• အဆီမပါတဲ့အသား
• အခွံမာသီးတွေ
• ဥအမျိုးမျိုး
• နို့အမျိုးမျိုး
• ဒိန်ချဉ်
• ချိစ်
• မြေပဲထောပတ်
• ပဲပိစပ်အစိမ်း

ကာဗိုဟိုက်ဒရိတ်ဓါတ်

-ကာဗိုဟိုက်ဒရိတ်က ခန္ဓာကိုယ်အတွက်အလွန်အရေးပါလှတဲ့ စွမ်းအင်အရင်းအမြစ်တစ်ရပ်ဖြစ်ပါတယ်။ ကာဗိုဟိုက်ဒရိတ်က ကလေးတွေရဲ့ ခန္ဓာကိုယ်တည်ဆောက်ဖို့နဲ့ တစ်ရှုးတွေပြုပြင်ဖို့အတွက် အဆီတွေနဲ့ ပရိုတင်းတွေကို အသုံးပြုရာမှာ အထောက်အကူပေးပါတယ်။

ကာဗိုဟိုက်ဒရိတ်ကို အစားအသောက်အမျိုးမျိုးကနေရရှိနိုင်ပါတယ်။

ကာဗိုဟိုက်ဒရိတ်ရရှိနိုင်တဲ့အစားအသောက်များ –

• ပေါင်မုန့်
• cereals
• ထမင်း
• ခရက်ခ်ကာ
• ပတ်စတာ
• အာလူး

သံဓာတ်

ခန္ဓာကိုယ်အတွက်အောက်ဆီဂျင်တွေကို သယ်ဆောင်ပေးတဲ့သွေးနီဥဆဲလ်တွေဖြစ်ပေါ်အောင် အထောက်အပံ့ပေးပါတယ်။ ကလေးတွေကြီးထွားဖို့အတွက်ထောက်ကူပေးပါတယ်။ သံဓာတ်ချို့တဲ့ရင် ကလေးတွေမှာ သွေးအားနည်းရောဂါဖြစ်ပေါ်ခံစားရနိုင်ပြီး ပင်ပန်းနွမ်းနယ်တာ၊ အားမရှိတာနဲ့ အမြဲစိတ်ဆိုးနေတာမျိုးတွေကိုဖြစ်ပေါ်စေနိုင်ပါတယ်။

သံဓာတ်ရရှိနိုင်တဲ့ အစားအသောက်များ –

• အနီရောင် အသား
• ပဲအမျိုးမျိုး
• အစိမ်းရောင် ဟင်းသီးဟင်းရွက်တွေ
• တူနာငါး
• ဥအမျိုးမျိုး
• သံဓာတ်ဖြည့်စွက်ထားတဲ့cerealတွေ

ကယ်လ်ဆီယမ်

အရိုးနဲ့သွားတွေကို သန်မာစေပြီး အာရုံကြောကျန်းမာသန်စွမ်းမှုကိုတိုးမြှင့်ပေးသလို ကြွက်သားတွေရဲ့လုပ်ဆောင်မှုကို လည်းတိုးမြှင့်ပေးပါတယ်။ သွေးကိုခဲစေပြီး သွေးတိတ်အောင်လုပ်ဆောင်ပေးပါတယ်။

ခန္ဓာကိုယ်က အစားအသောက်တွေကို စွမ်းအင်အဖြစ်ပြောင်းလဲရာမှာလည်း အထောက်အကူပြုပေးပါတယ်။

ကယ်လ်ဆီယမ်ရရှိနိုင်တဲ့ အစားအစာများ –

• နို့အမျိုးမျိုး
• နို့ထွက်ပစ္စည်းတွေ
• ပဲနို့
• တို့ဖူး
• cereal

Essential fatty acids (EFAs)

ဆဲလ်တွေဖြစ်ပေါ်တာ၊ အာရုံကြောစနစ်ကိုထိန်းညှိတာ၊ နှလုံးသွေးကြောစနစ်ကို သန်စွမ်းစေတာ၊ ကိုယ်ခံအားစနစ်ကို တည်ဆောက်တာတွေမှာ အထောက်အပံ့ဖြစ်စေသလို ခန္ဓာကိုယ်ကအာဟာရဓာတ်တွေကို စုပ်ယူရာမျာလည်း အထောက်အပံ့ပေးပါတယ်။

EFAs ကဦးနှောက်ရဲ့လုပ်ငန်းစဉ်တွေကောင်းမွန်စေဖို့နဲ့ အမြင်အာရုံတွေကိုကောင်းမွန်သန်စွမ်းစေဖို့လည်း လိုအပ်ပါတယ်။

EFAs ရရှိနိုင်တဲ့ အစားအစာများ –

• မွေးကင်းစ ကလေးတွေအတွက်ဆို မိခင်နို့
• သံလွင်ဆီ၊safflower ဆီ၊ပြောင်းဖူးဆီ၊ ပဲပိစပ်ဆီ လိုမျိုး ဟင်းသီးဟင်းရွက်ဆီတွေ
• ငါးနဲ့ကြက်သားတွေကနေရရှိတဲ့ ပရိုတင်းဓါတ်တွေ
• ဆယ်လ်မွန်ငါးကနေရရှိတဲ့ ဖက်တီးအက်ဆစ်
• နှမ်းကြတ်စေ့
• သစ်ကြားသီး

အမျှင်ဓာတ်

အမျှင်ဓာတ်က ကလေးကိုဝမ်းမှန်အောင်အထောက်အပံ့ပေးပါတယ်။ နှလုံးရောဂါဖြစ်ပေါ်ခံစားရနိုင်ခြေနဲ့ အသက်ကြီးလာတဲ့အခါ ကင်ဆာရောဂါခံစားရနိုင်ခြေကို လျှော့ချပေးရာမှာလည်း အရေးပါတဲ့ အခန်းကဏ္ဍကနေပါဝင်နေပါတယ်။

အမျှင်ဓာတ်ပါတဲ့ အစားအစာတွေ-

• ကောက်နှံတစ်ခုလုံးပါတဲ့cereal
• ကုလားပဲ
• ပဲနီလေး
• ဗိုလ်စားပဲ
• အစေ့အဆန်တွေ
• အခွံမာသီးတွေ

ဗီတာမင်အေ

အမြင်အာရုံနဲ့အရိုးတွေကြီးထွားဖွံ့ဖြိုးမှုမှာ အရေးပါတဲ့အခန်းကဏ္ဍကနေပါဝင်နေပါတယ်။ ခန္ဓာကိုယ်ကိုရောဂါတွေကူးစက်မခံရအောင်ကာကွယ်ပေးသလို ခန္ဓာကိုယ်ရဲ့ ဆဲလ်တွေနဲ့ တစ်ရှုးတွေ ကျန်းမာဖွံ့ဖြိုးမှုကို တိုးမြှင့်ပေးပါတယ်။

ဗီတာမင်အေ ရရှိနိုင်တဲ့အစားအသောက်များ –

• တိရစ္ဆာန်အသည်း
• ကန်စွန်းဥ
• မုန်လာဥနီ
• ကိုက်လန်
• ထောပတ်
• ကြက်ဥအနှစ်
• အဆီနည်းတဲ့နို့
• ပဲနို့ နဲ့
• လိမ္မော်ရောင်ရှိတဲ့ အသီးအနှံတွေ

ဗီတာမင် စီ

သွေးနီဥဆဲလ်တွေ၊ အရိုးတွေ၊ တစ်ရှုးတွေဖြစ်ပေါ်မှုကို အထောက်အပံ့ပေးပါတယ်။ ကလေးရဲ့ သွားဖုံးကျန်းမာရေးနဲ့ သွေးကြောတွေသန်စွမ်းစေဖို့အထောက်အကူပြုသလို အနာကျက်မြန်စေပြီး ကိုယ်ခံအားစနစ်ကို တိုးမြှင့်ပေးပါတယ်။

ကူးစက်ရောဂါတွေ မဝင်ရောက်နိုင်အောင်လည်း ဟန့်တားပေးပါတယ်။ ခန္ဓာကိုယ်က သံဓာတ်ကြွယ်ဝတဲ့ အစားအစာတွေကနေ သံဓာတ်စုပ်ယူမှုကိုလည်း အထောက်အပံ့ပေးပါတယ်။

ဗီတာမင် စီကြွယ်ဝတဲ့အစားအစာများ –

• လိမ္မော်သီး
• ဘယ်ရီသီးတွေ
• broccoli
• ကီဝီသီး
• ဂေါ်ဖီထုပ်
• ငရုတ်ပွသီးတွေ
• လတ်ဆတ်တဲ့ဖျော်ရည်တွေ

ဗီတာမင် ဒီ

သွားတွေ၊အရိုးတွေ ခိုင်မာစေအောင်အထောက်အပံ့ပေးသလို ခန္ဓာကိုယ်က သတ္တုဓာတ်တွေစုပ်ယူမှုကိုလည်း အကူအညီပေးပါတယ်။ ကလေးတွေ ကိုယ်ခန္ဓာကြီးထွားဖို့နဲ့ အရိုးသိပ်သည်းအားကောင်းစေဖို့အတွက် မရှိမဖြစ်အရေးကြီးပါတယ်။

ကိုယ်ခံအားစနစ်ကောင်းမွန်စေဖို့ ၊ ခန္ဓာကိုယ်က အင်ဆူလင်ထုတ်လုပ်မှုနဲ့ဆဲလ်ကြီးထွားမှု ကဏ္ဍတွေမှာဟော်မုန်းတစ်ရပ်အနေနဲ့လုပ်ဆောင်ပေးပါတယ်။

ဗီတာမင် ဒီက အစားအစာတွေထဲမှာပါခဲပါတယ်။ နို့ထွက်ပစ္စည်းအချို့နဲ့ cereals တွေထဲမှာ တွေ့ရှိရပါတယ်။နေရောင်ခြည်ကနေလည်း ဗီတာမင် ဒီ ကိုရရှိနိုင်ပါတယ်။

နေရောင်ခြည်ကနေ ဗီတာမင် ဒီ ရရှိနိုင်တယ်ဆိုပေမယ့်နေရောင်ခြည်အချိန်ကြာမြင့်စွာထိတွေ့မှုက ကလေးကို အရေပြားကင်ဆာဖြစ်စေနိုင်တာကြောင့်နေရောင်ခြည်နဲ့တအားထိတွေ့စေတာမျိုး မဖြစ်အောင်သတိထားပါ။

ဗီတာမင် အီး

ဆဲလ်တွေကို ထိခိုက်ပျက်စီးစေနိုင်တဲ့ free radicalsတွေ ထုတ်လွှတ်မှုကို ကန့်သတ်ပေးပါတယ်။ ဗီတာမင် အီက ကိုယ်ခံ အားစနစ်၊ ဒီအန်အေပြုပြင်မှုနဲ့ အခြားဇီဝတွင်းဖြစ်ပျက်ပြောင်းလဲမှုဖြစ်စဉ်တွေအတွက် အရေးပါပါတယ်။

ဗီတာမင် အီး ရရှိနိုင်တဲ့အစားအစာများ –

• ထောပတ်သီး
• ဂျုံစေ့အဆန်
• နေကြာစေ့
• ထရောက်ငါး
• သံလွင်ဆီ

မဂ္ဂနီဆီယမ်

အရိုးတွေကိုသန်မာစေပြီး နှလုံးခုန်မှန်စေသလို ကိုယ်ခံအားစနစ်ကိုလည်း အထောက်အပံ့ပေးပါတယ်။ ကြွက်သားတွေကို ထိန်းသိမ်းရာမှာအထောက်အကူပေးသလို အာရုံကြောစနစ်ရဲ့ လုပ်ငန်းစဉ်တွေကိုလည်း တိုးတက်ကောင်းမွန်စေပါတယ်။

မဂ္ဂနီဆီယမ် ပါဝင်တဲ့အစားအစာများ –

• ဟင်းနုနွယ်
• ဖရုံစေ့
• ဒိန်ချဉ်
• အယ်လ်မွန်စေ့
• အနက်ရောင်ချောကလက်
• ငှက်ပျောသီး

ပိုတက်ဆီယမ်

ခန္ဓာကိုယ်ရဲ့ သွေးပေါင်ချိန်ကို ထိန်းညှိရာမှာ အထောက်အကူပြုတဲ့ ရေဓာတ်ကို ထိန်းညှိဖို့ ဆိုဒီယမ်နဲ့အတူ လုပ်ဆောင်ပါတယ်။ ကြွက်သားတွေရဲ့လုပ်ငန်းစဉ်တွေကို ကူညီပေးသလို နှလုံးခုန်နှုန်းကိုလည်းမှန်စေပြီး ကျောက်ကပ်ကျောက်တည်တာနဲ့ အရိုးပွတာမျိုးတွေ ဖြစ်ပေါ်ခံစားရနိုင်ခြေကိုလည်းလျှော့ချပေးပါတယ်။

ပိုတက်ဆီယမ်ပါဝင်တဲ့အစားအစာများ –

• ခရမ်းချဉ်သီး
• ပဲအမျိုးမျိုး
• အမဲသား
• ဝက်သား
• အာလူး
• ပဲတောင့်စိမ်း
• ဟင်းနုနွယ်
• မှို
• ငှက်ပျောသီး
• နွားနို့

ဇင့်

အစာချေဖျက်မှုနဲ့ ဇီဝတွင်းဖြစ်ပျက်ပြောင်းလဲမှုဖြစ်စဉ်တွေကို အကူအညီပေးတဲ့ အင်ဇိုင်းအမျိုးအစား ၇၀ကျော်အတွက်လိုအပ်တဲ့ဓာတ်တစ်မျိုးဖြစ်သလို ကြီးထွားဖွံ့ဖြိုးမှုအတွက်လည်း မရှိမဖြစ်လိုအပ်တဲ့ ဓါတ်တစ်မျိုးဖြစ်ပါတယ်။

ဇင့် ဓါတ်ပါဝင်တဲ့အစားအစာများ –

• ပင်လယ်စာ
• ကမာကောင်တွေ
• ဂျုံစေ့အဆန်
• တိရစ္ဆာန်အသည်း
• ဖရုံစေ့
• ကွာစေ့
• နှမ်း
• အနီရောင်အသားတွေ
• အနက်ရောင်ချောကလက်
• ရေညှိ

Hello Health Group သည်ဆေးပညာအကြံပြုချက်များ၊ ရောဂါရှာဖွေအတည်ပြုချက်များနှင့် ကုသမှုများ မပြုလုပ်ပေးပါ။