ကိုဗစ်ကာကွယ်ဆေးတွေ ကြားက ကွာခြားချက်များ

Novavax

ဒီကာကွယ်ဆေး အမျိုးအစားကတော့ လက်ရှိ ထောက်ခံချက်ရရှိထားတဲ့ ကာကွယ်ဆေးတွေနဲ့ အနည်းငယ် ကွာခြားပါတယ်။ spike protein ပုံစံနဲ့ ကိုယ်ခံအား စနစ်ကို လှုံ့ဆော်ပေးမှာ ဖြစ်ပါတယ်။

ဒီကာကွယ်ဆေးက ဓာတ်ခွဲခန်းမှာ လုပ်တဲ့ ပရိုတင်း အမျိုးအစားကို အသုံးပြုပြီး ကိုယ်ခံအားကို antibody ထွက်အောင် လှုံ့ဆော်ပေးမှာပါ။

ကာကွယ်ဆေးက ၂ ကြိမ် ထိုးရမှာဖြစ်ပြီး ၃ပတ်ခြားပြီး ထိုးရမှာပါ။ မူလ ကိုဗစ်ဗိုင်းရပ်စ်ကို ၈၉ ရာခိုင်နှုန်းအထိ ကာကွယ်ပေးနိုင်ပါတယ်။ မျိုးဗီဇ ပြောင်းလဲလာတဲ့ မျိုးစိတ်တွေကိုတော့ ၆၀ ရာခိုင်နှုန်းအထိ ကာကွယ်ပေးနိုင်ပါတယ်။ ပုံမှန် ရေခဲသေတ္တာမှာ သိမ်းဆည်းလို့ ရပါတယ်။

Janssen

ဒီကာကွယ်ဆေးကတော့ လူသားတွေကို ထိခိုက်မှု မရှိအောင် ထုတ်လုပ်ထားတဲ့ အမျိုးအစားပါ။ ပုံမှန် ဖျားနာမှုကို ဖြစ်စေတဲ့ ဗိုင်းရပ်စ်ကို အခြေခံပြီး ထုတ်လုပ်ထားတာပါ။ ခန္ဓာကိုယ်မှာ ကြီးမားတဲ့ တုံ့ပြန်မှု မဖြစ်စေဘဲ ကိုဗစ်ကို ကာကွယ်နိုင်တဲ့ ကိုယ်ခံအား ထွက်ရှိအောင် လှုံ့ဆော်ပေးမှာ ဖြစ်ပါတယ်။

ကာကွယ်ပေးနိုင်စွမ်းကတော့ ၆၆ ရာခိုင်နှုန်း ရှိပါတယ်။ မျိုးစိတ် အလိုက် ကာကွယ်ပေးနိုင်စွမ်း ကွာခြားတာမျိုးတော့ ရှိပါတယ်။ ပုံမှန် ရေခဲသေတ္တာထဲမှာတင် သိမ်းဆည်းလို့ ရပါတယ်။

Oxford-AstraZeneca

အအေးမိ၊ တုပ်ကွေးဖြစ်စေတဲ့ ဗိုင်းရပ်စ်ကို ပျော့အောင်လုပ်ထားတဲ့ adenovirus ကို အသုံးပြုပြီး ကာကွယ်ဆေး ထုတ်လုပ်ထားတာပါ။

ဒီဗိုင်းရပ်စ်ကို သူ့အလိုလျောက် မျိုးပွားတာမျိုး မလုပ်နိုင်အောင် မျိုးဗီဇ ပြုပြင်ထားမှာ ဖြစ်တဲ့အတွက် ခန္ဓာကိုယ်ထဲမှာ ပိုးပြန့်ပွားမှာကို စိုးရိမ်စရာ မလိုပါဘူး။

ဒီကာကွယ်ဆေးက ကိုဗစ်ဗိုင်းရပ်စ်က ထုတ်လုပ်တဲ့ ပရိုတင်းနဲ့ အသွင်တူအောင် ထုတ်လုပ်ထားတာပြီး ကိုယ်ခံအားစနစ်ကို  T-cell တွေ ထုတ်လုပ်အောင် လှုံ့ဆော်ပေးပြီး ကိုဗစ်ရောဂါဖြစ်စေတဲ့ SARS-CoV-2 virus ကို ခုခံတိုက်ထုတ်နိုင်အောင် လေ့ကျင့်ပေးမှာ ဖြစ်ပါတယ်။

ကာကွယ်ဆေးက ၂ ကြိမ် ထိုးရမှာ ဖြစ်ပြီး ၆၂ ရာခိုင်နှုန်းအထိ ကာကွယ်ပေးနိုင်ပါတယ်။ ပုံမှန် ရေခဲသေတ္တာထဲမှာတင် သိမ်းဆည်းလို့ ရပါတယ်။

Pfizer-BioNTech and Moderna

messenger RNA (mRNA) ကို အသုံးပြုထားတဲ့ ကာကွယ်ဆေးပါ။  ခန္ဓာကိုယ်ထဲကို ဗိုင်းရပ်စ် ဝင်ရောက်လာတဲ့ ပုံစံတူ ဖန်တီးပြီး ခန္ဓာကိုယ်ရဲ့ ကိုယ်ခံအားစနစ် ဖွံ့ဖြိုးလာအောင်လုပ်တဲ့နည်းကို ကျင့်သုံးထားပါတယ်။

ကာကွယ်ဆေးကို ခန္ဓာကိုယ်ထဲ ထိုးသွင်းလိုက်တဲ့အခါ ကိုယ်ထဲမှာ ကိုဗစ်ဗိုင်းရပ်စ်က ထုတ်လုပ်မယ့် ပရိုတင်းနဲ့ တူညီတဲ့ ပရိုတင်း တစ်မျိုး ထွက်လာပါလိမ့်မယ်။ ဒီပရိုတင်းက ရောဂါမဖြစ်စေနိုင်ပါဘူး။

ကိုယ်ခံအားကို antibodies နဲ့ T-cells တွေထွက်ရှိအောင် လှုံ့ဆော်ပေးပြီး ကိုရိုနာဗိုင်းရပ်စ်ကို တိုက်ထုတ်နိုင်စေဖို့ လေ့ကျင့်ပေးမှာပါ။ ကိုယ်ခံအားကို ဗိုင်းရပ်စ်ကို တုံ့ပြန်ဖို့အတွက်ပဲ ကြိုတင်လေ့ကျင့်ပေးထားတဲ့ သဘောပေါ့။

ကာကွယ်ဆေးကို ၂၈ ရက်ခြားပြီး ၂ ကြိမ် ထိုးရမှာပါ။ ကာကွယ်ပေးနိုင်စွမ်းကတော့ ၉၅ ရာခိုင်နှုန်းအထိ ရှိပါတယ်။ သယ်ယူပို့ဆောင်ချိန်မှာ အနုတ် ၇၀ ဒီဂရီဆဲစီးယပ်စ်မှာ ထိန်းသိမ်းရမှာဖြစ်ပါတယ်။ ထိန်းသိမ်းသိုလှောင် ထားချိန်မှာတော့ ပုံမှန် ရေခဲသေတ္တာ အအေးချိန်မှာ ရက် ၃၀၊ အခန်းအပူချိန်မှာ ၁၂ နာရီ အထားခံမှာ ဖြစ်ပါတယ်။

Sinovac

တရုတ်နိုင်ငံက ထုတ်တဲ့ ကာကွယ်ဆေး အမျိုးအစား တစ်ရပ်ပါ။ Oxford vaccine နည်းတူ ကိုယ်ခံအား ပေးနိုင်ပါတယ်။ သေပြီးသား ဗိုင်းရပ်စ်ရဲ့ အပိုင်းအစလေးတွေကို အသုံးပြု ထုတ်လုပ်ထားတာပါ။

ဆေးထိုးလိုက်တဲ့အခါ ခန္ဓာကိုယ်က ဗိုင်းရပ်စ်ကို သိရှိပြီး ကိုယ်ခံအားစနစ်က တုံ့ပြန်နိုင်စေဖို့ လှုံ့ဆော်ပေးပါတယ်။ ပြင်းထန်တဲ့ ဖျားနာမှုမျိုး မဖြစ်စေဖို့ ကာကွယ်ပေးပါတယ်။

ကာကွယ်ဆေးရဲ့ ထိရောက်မှုကတော့ ၇၉ ရာခိုင်နှုန်းပါ။ ၂ ပတ် ကနေ ၄ ပတ်ခြားပြီး ဆေး ၂ ကြိမ် ထိုးရမှာပါ။ ပုံမှန် ရေခဲသေတ္တာ အအေးချိန်မှာ သိမ်းဆည်းထားလို့ ရပါတယ်။

Sinopharm

သူကလည်း အပေါ်က ပြောခဲ့တဲ့ ကာကွယ်ဆေးနဲ့ အတူတူပါပဲ။ Oxford vaccine နည်းတူ ကိုယ်ခံအား ပေးနိုင်ပါတယ်။ သေပြီးသား ဗိုင်းရပ်စ်ရဲ့ အပိုင်းအစလေးတွေကို အသုံးပြု ထုတ်လုပ်ထားတာပါ။

ဆေးထိုးလိုက်တဲ့အခါ ခန္ဓာကိုယ်က ဗိုင်းရပ်စ်ကို သိရှိပြီး ကိုယ်ခံအားစနစ်က တုံ့ပြန်နိုင်စေဖို့ လှုံ့ဆော်ပေးပါတယ်။ ပြင်းထန်တဲ့ ဖျားနာမှုမျိုး မဖြစ်စေဖို့ ကာကွယ်ပေးပါတယ်။

ကာကွယ်ဆေးရဲ့ ထိရောက်မှုကတော့ ၇၉ ရာခိုင်နှုန်းပါ။ ၂ ပတ် ကနေ ၄ ပတ်ခြားပြီး ဆေး ၂ ကြိမ် ထိုးရမှာပါ။ ပုံမှန် ရေခဲသေတ္တာ အအေးချိန်မှာ သိမ်းဆည်းထားလို့ ရပါတယ်။