နာတာရှည် ခြေထောက်သွေးပြန်ကြောရောဂါကြောင့်ဖြစ်လာနိုင်တဲ့ နောက်ဆက်တွဲရောဂါများ

ရောဂါတွေအကြောင်းသိထားမှ ကိုယ့်ကိုကိုယ်ကျန်းမာအောင်နေထိုင်နိုင်မှာပါ။နေ့စဉ်ဝမ်းရေးအတွက် မနားမနေရုန်းကန်နေရသူတွေဆိုရင် ကိုယ်တိုင်ရောဂါ ခံစားနေရတာတောင် မသိလိုက်မိဘဲရောဂါကတော်တော်လေးဆိုးလာမှဆေးရုံဆေးခန်းကို သွားပြမိတာမျိုးတွေရှိတတ်ကြပါတယ်။ အချို့ရောဂါတွေက မမြင်ရတဲ့နေရာမှဖြစ်နေတာမို့ မသိတာကဖြေသာပေမယ့်မြင်သာရက်နဲ့ မသိလိုက်တာကတော်တော်လေးစိတ်မကောင်းဖြစ်စရာပါ။ အခုတစ်ခေါက်တော့ မျက်စိနဲ့ မြင်ရုံနဲ့တင်သိနိုင်တဲ့ရောဂါတစ်ခုအကြောင်းပြောပြပေးမယ်နော်။

နာတာရှည် ခြေထောက်သွေးပြန်ကြောရောဂါ (CVI) ဆိုတာ

နာတာရှည် ခြေထောက်သွေးပြန်ကြောရောဂါ (CVI) ဆိုတာကသွေးပြန်ကြောနံရံ နဲ့ခြေထောက်သွေးပြန်ကြောထဲက တစ်ဖက်ပွင့်အဆို့ရှင်တွေကောင်းကောင်းအလုပ်မလုပ်တော့တဲ့ အနေအထားကြောင့်ဖြစ်လာတဲ့ရောဂါအခြေအနေတစ်ရပ်ပါ။ ဒီလိုအခြေအနေမျိုးမှာခြေထောက်ဆီကသွေးတွေက နှလုံးဆီကိုပြန်လည်ရောက်ရှိဖို့ ခက်ခဲသွားစေနိုင်ပါတယ်။ CVIရောဂါခံစားရတဲ့အခါသွေးပြန်ကြောထဲမှာသွေးတွေစုမိနေတာမျိုး ပိုလျှံနေတာမျိုးဖြစ်နိုင်ပါတယ်။သွေးပြန်ကြောထဲမှာ လိုအပ်တဲ့သွေးပမာဏထက်ပိုများနေတာကိုသွေးပြန်ကြောနာလို့ခေါ်ကြပါတယ်။ခြေထောက်အပေါ်ယံအရေပြားအောက်မှာသွေးကြောလေးတွေ ထုံးနေတာလိုမျိုးလေးတွေမြင်တွေ့ရနိုင်ပါတယ်။

ဒီအချက်တွေကြောင့် နာတာရှည် ခြေထောက်သွေးပြန်ကြောရောဂါ (CVI)ဖြစ်နိုင်ပါတယ်

သွေးပြန်ကြောတွေက ခန္ဓါကိုယ်အစိတ်အပိုင်းတွေဆီကသွေးတွေကို နှလုံးဆီကိုပြန်ပို့ပေးရတာပါ။ နှလုံးဆီကိုသွေးတွေရောက်ရှိစေဖို့ဆိုရင်ခြေထောက်ကသွေးတွေကသွေးပြန်ကြောတွေဆီကနေ ခန္ဓါကိုယ်အထက်ပိုင်းဆီကို စီးဆင်းသွားရပါမယ်။သွေးတွေ ခန္ဓါကိုယ် အထက်ပိုင်းကို စီးဆင်းစေဖို့ဆိုရင်ခြေသလုံးကြွက်သားတွေနဲ့ခြေထောက်မှာရှိနေတဲ့ ကြွက်သားတွေကတဆင့်ချင်းညှစ်ပြီးသွေးပြန်ကြောကနေတဆင့်သွေးတွေကို အထက်ပိုင်းဆီကိုပြန်လည်စီးဆင်းစေပါတယ်။သွေးတွေခန္ဓါကိုယ်အထက်ပိုင်းကို အဆင်ပြေပြေစီးဆင်းသွားပြီး ဘက်ပြန်စီးဆင်းတာမျိုး မဖြစ်ဖို့ဆိုရင်သွေးပြန်ကြောထဲမှာရှိနေတဲ့ တစ်ဖက်ပွင့် အဆို့ရှင်ကကောင်းကောင်းအလုပ်လုပ်ဖို့လိုအပ်မှာပါ။

နာတာရှည် ခြေထောက်သွေးပြန်ကြောရောဂါ (CVI) ခံစားရတဲ့အခါ အဆို့ရှင်ကပျက်စီးသွားပြီးသွေးတွေက ဘက်ပြန်စီးဆင်းမှုဖြစ်လာပါတယ်။

• အသက်အရွယ်ကြီးရင့်လာတာ (အသက် ၅၀ကျော်ဖြစ်လာတာ)
• အထိုင်များတာ
• အချိန်ကြာမြင့်စွာမတ်တတ်ရပ်တာ
• လှုပ်ရှားမှုနည်းတာ
• အတွင်းပိုင်းမှာရှိတဲ့သွေးပြန်ကြောတွေမှာသွေးခဲတဲ့ရောဂါအခံရှိတာ (DVT)
• သွေးကြောကြီးပြီးသွေးကြောထုံးရောဂါ မျိုးရိုးရှိတာ
• အဝလွန်တာ
• ကိုယ်ဝန်ဆောင်နေရတာ
• ဆေးလိပ်သောက်တာ
• အမျိုးသမီးဖြစ်နေတာတွေကြောင့်လည်း နာတာရှည် ခြေထောက်သွေးပြန်ကြောရောဂါ (CVI) ကိုခံစားရနိုင်ပါတယ်။

ရောဂါလက္ခဏာတွေက

များသောအားဖြင့်ကတော့ရောဂါလက္ခဏာတွေကခြေထောက်မှာတွေ့ရတာများပါတယ်။

• ခြေထောက် အထူးသဖြင့်ခြေချင်းဝတ်မှာရောင်ရမ်းနေမယ်
• နာကျင်မယ်
• ယားယံမယ်
• သွေးကြောတွေကြီးပြီးသွေးကြောထုံးတာမျိုးခံစားရမယ်
• အရေပြားက သားရေလိုမျိုးခပ်ထူထူကြီးဖြစ်နေမယ်။

ဒီလိုအခြေအနေမျိုးတွေခံစားနေရပြီဆိုရင်သေချာကုသမှုခံယူတာမျိုးလုပ်ဖို့လိုအပ်ပါမယ်။ တကယ်လို့ သင့်အနေနဲ့ ကုသမှုမခံယူဘဲထားမယ်ဆိုရင်ခြေထောက်မှာရှိတဲ့ ဆံချည်မျှင်သွေးကြောလေးတွေ ပျက်စီးသွားပြီး အရေပြားမှာ အညိုကွက်တွေဖြစ်တာမျိုးခံစားရနိုင်ပါတယ်။ အထူးသဖြင့်ခြေချင်းဝတ်နားမှာ အဖြစ်များပါ။ ဒီလိုကနေတဆင့် အချိန်ကြာလာတာတဲ့အခါခြေထောက်တွေရောင်ရမ်းလာတာ၊ အနြာဖစ်တာမျိုးတွေခံစားရနိုင်ပါတယ်။ ဒီအနာတွေက အနာကျက်ဖို့ခက်ခဲပြီး ပိုးဝင်ကူးစက်နိုင်ခြေကတော်တော်လေးများပါတယ်။နောက်ဆက်တွဲဖြစ်လာနိုင်တဲ့ ပြဿနာတွေကတော်တော်လေးတော့များပါတယ်။ ဒီလိုမျိုးနောက်ဆက်တွဲပြဿနာတွေ ခံစားရမှုကနေ ကာကွယ်နိုင်ဖို့ဆိုရင်သေချာကုသမှုခံယူဖို့လိုအပ်မှာပါ။မြန်မြန်ဆန်ဆန်ကုသမှုခံယူနိုင်လေလေ ထိရောက်မှုရှိလေလေပါ။

နာတာရှည် ခြေထောက်သွေးပြန်ကြောရောဂါ (CVI) ရဲ့ရောဂါလက္ခဏာအဆင့်များ

နာတာရှည် ခြေထောက်သွေးပြန်ကြောရောဂါ (CVI) ခံစားရတဲ့အခါ –

(၁) ခြေထောက်လေးလံခြင်း၊ နာခြင်း၊ ကြွက်တက်ခြင်း

(၂) ပင့်ကူမျှင်သွေးကြောထုံး

(၃) ကောက်ကွေးကြီးမားသောသွေးကြောထုံး

(၄) ဖောရောင်ခြင်း

(၅) ခြေထောက်အညိုအမဲစွဲခြင်း

(၆) အနာကျက်သောခြေထောက်အနာ

(၇) အနာမကျက်သော ဆိုးရွားသည့်သွေးပြန်ကြောအနာ ဆိုပြီး အဆင့်ဆင့်ကွဲပြားနိုင်ပါတယ်။

ဖြစ်လာနိုင်တဲ့နောက်ဆက်တွဲရောဂါတွေက

နာတာရှည် ခြေထောက်သွေးပြန်ကြောရောဂါတွေကို အချိန်ကြာမြင့်စွာမကုသဘဲထားမယ်ဆိုရင် အခုလိုမျိုးနောက်ဆက်တွဲရောဂါတွေခံစားလာရနိုင်ပါတယ်။

သွေးပြန်ကြောထဲမှာသွေးခဲပိတ်ဆို့ခြင်းရောဂါ (Superficial venous thrombophlebitis) – အပေါ်ယံအရေပြားအောက်ဘက်ပိုင်းမှာရှိတဲ့သွေးပြန်ကြောထဲမှာသွေးခဲပိတ်ဆို့တဲ့အခြေအနေမျိုးပါ။ အရမ်းနာကျင်နိုင်သလို အခြားရောဂါလက္ခဏာတွေခံစားရနိုင်ပါတယ်။

သွေးထွက်ခြင်း – ထိခိုက်မှုတစ်ခုခုဖြစ်ဖြစ်တဲ့အခါတော်တော်နဲ့ သွေးမတိတ်တဲ့အနေအထားမျိုးပါ။ အသက်အရွယ်ကြီးရင့်သူတွေမှာ ပိုပြီးဖြစ်နိုင်ခြေများပါတယ်။ အရမ်းပြင်းထန်မယ်ဆိုရင်တော့ အသက်အန္တရာယ်စိုးရိမ်ရနိုင်ပါတယ်။

သွေးပြန်ရည်လမ်းပိတ်ခြင်း (Lymphedema) – အရေပြားအောက်ဘက်က တစ်ရှုးတွေမှာပြန်ရည်တွေစုနေတာမျိုးပါ။

ခြေထောက်ပြည်တည်နာ (Venous ulcers) – နာတာရှည် ခြေထောက်သွေးပြန်ကြောရောဂါရဲ့ အပြင်းထန်ဆုံးသောနောက်ဆက်တွဲရောဂါကသွေးပြန်ကြောကြောင့်ဖြစ်တဲ့ခြေထောက်ပြည်တည်နာ (Venous ulcers) ပါ။ခြေထောက်အောက်ဘက်ပိုင်းတွေ နဲ့ ခြေချင်းဝတ်တွေမှာအဖြစ်များပါတယ်။ နာကျင်နိုင်ပြီးပြည်တွေဖြစ်နေတာမျိုးဖြစ်နိုင်ပါတယ်။ အနာကတော်တော်လေးကြီးနိုင်ပါတယ်။ ဒီဝေဒနာကပြန်ဖြစ်လာနိုင်တဲ့အနေအထားရှိပါတယ်။

ဘယ်လိုကာကွယ်မလဲ

ဒီလိုမျိုးရောဂါတွေမခံစားချင်ဘူးဆိုရင်တော့ အကောင်းဆုံးနည်းလမ်းတစ်ခုရှိပါတယ်။ ကြိုတင်ကာကွယ်တာပါ။

• ကျန်းမာရေးနဲ့ညီညွတ်မျှတအောင်စားသုံးပေးပါ
• ဆေးလိပ်ဖြတ်ပါ
• လေ့ကျင့်ခန်းမှန်မှန်လုပ်ပေးပါ
• အရမ်းကျပ်တဲ့ အဝတ်အစားတွေ စည်းနှောင်သလိုဖြစ်တဲ့ အဝတ်အစားတွေကို မဝတ်ပါနဲ့
• ကိုယ်အလေးချိန်များနေရင်လျှော့ပါ
• အချိန်အကြာကြီး မတ်တတ်ရပ်တာ၊ ထိုင်နေတာမျိုးမလုပ်ပါနဲ့။

ဒီအလေ့အထလေးတွေကိုမွေးမြူပြီး နာတာရှည် ခြေထောက်သွေးပြန်ကြောရောဂါ (CVI) နဲ့ ဒီရောဂါကြောင့်ဖြစ်လာနိုင်တဲ့နောက်ဆက်တွဲရောဂါတွေကို ကာကွယ်လိုက်ပါ။

ကျန်းမာပျော်ရွှင်ရောဂါကင်းတဲ့ဘဝကို ပိုင်ဆိုင်နိုင်ကြပါစေကြောင်း………..

Hello Health Group သည်ဆေးပညာအကြံပြုချက်များ၊ ရောဂါရှာဖွေအတည်ပြုချက်များနှင့် ကုသမှုများ မပြုလုပ်ပေးပါ။

[embed-health-tool-heart-rate]