တက်တူး ထိုးရာမှ ရောဂါပိုးဝင်ခြင်း

တက်တူး ထိုးခြင်းဟာ နောက်ပိုင်းမှာ လူငယ်ပိုင်းရော လူလတ်ပိုင်းမှာပါ စိတ်ဝင်စားလာတဲ့အရာ ဖြစ်ပါတယ်။ ယခင်က တက်တူးထိုးခြင်းဟာ အေအိုင်ဒီအက်စ်ရောဂါအပါအဝင် ရောဂါတချို့ကို ကူးစက်နိုင်ခြေရှိတာကြောင့် လူအများက စိုးရိမ်မှုတွေ ရှိခဲ့ကြပေမယ့် နောက်ပိုင်းမှာ ကျန်းမာရေးနဲ့ညီညွတ်တဲ့ နည်းစနစ်တွေကြောင့် ရောဂါပိုးကူးစက်ဖို့ကို စိတ်ပူစရာ မလိုတော့ပါဘူး။ ကဲ ….. ဒီတစ်ခေါက်တော့ တက်တူး ထိုးရာမှ ရောဂါပိုးဝင်ခြင်း အကြောင်းလေး ပြောပြပေးချင်ပါတယ်။

တက်တူး ထိုးရာမှ ရောဂါပိုးဝင်ခြင်း

အပေါ်မှာပြောခဲ့သလို တက်တူးထိုးတာကို ကျန်းမာရေးနဲ့ ညီညွတ်အောင် ဂရုစိုက်မယ်ဆိုရင် ရောဂါပိုးကူးစက်နိုင်ခြေ နည်းသွားပြီဆိုပေမယ့် တက်တူး ထိုးခြင်းကြောင့် ရောဂါပိုးဝင်ပြီး အနာဖြစ်နိုင်ခြေ ရှိနေတုန်းပါပဲ။ တခါသုံးပစ္စည်းတွေကြောင့် တခြားသူဆီကနေ ရောဂါမကူးစက်တော့ပေမယ့် တက်တူးထိုးတဲ့အပ်ကြောင့် ပတ်ဝန်းကျင်က ရောဂါပိုးများဝင်ရောက်နိုင်ခြေ၊ ရောဂါပိုးဝင်နိုင်ခြေတော့ ရှိပါသေးတယ်။

တက်တူးကနေ ရောဂါပိုးဝင်ရင် ဘယ်လိုသိနိုင်သလဲ

အမြင်သာဆုံးကတော့ တက်တူးတဝိုက်မှာ နီရဲရောင်ရမ်းလာတာပါပဲ။ အပ်နဲ့ထိုးထားတဲ့ နေရာမှာ နာကျင်မှုဟာ တော်တော်နဲ့ မပျောက်ဘဲ ရှိတတ်ပါတယ်။ ရက်အနည်းငယ်လောက်ဆိုရင် နီရဲရောင်ရမ်းခြင်း၊ နာကျင်ခြင်းဟာ ပျောက်သွားသင့်ပါတယ်။ တပတ်လောက်နေလို့မှ မပျောက်ရင်တော့ ဆရာဝန်နဲ့ တိုင်ပင်သင့်ပါတယ်။

ဒါ့အပြင် အောက်ပါလက္ခဏာအချို့ကို တွေ့မြင်ရရင်တော့ ဆရာဝန်နဲ့ ချက်ချင်းပြသသင့်ပါတယ်။

• အဖျားတက်ခြင်း
• ပူလိုက်အေးလိုက်ဖြစ်ခြင်း၊ ချမ်းတုန်ခြင်း
• တက်တူးထိုးထားသည့်နေရာမှာ ဖောင်းလာခြင်း၊ ပြည်ထွက်လာခြင်း
• တက်တူးထိုးထားသည့်နေရာ မာနေခြင်း

ဘယ်လိုရောဂါပိုးတွေ ကူးစက်တတ်သလဲ

များသောအားဖြင့် Staph ဘက်တီးရီးယား ဝင်တတ်ပါတယ်။ အဆိုပါ ဘက်တီးရီးယားပိုးဝင်ခြင်းဟာ ကုသလို့ပျောက်ကင်းနိုင်ပေမယ့် တခါတရံမှာ ပဋိဇီဝဆေးယဉ်ခြင်းကြောင့် ဆေးဝါးများသောက်သုံးရာမှာ မထိရောက်ဘဲ ဖြစ်တတ်ပါတယ်။ ဆေးယဉ်တဲ့ ဘက်တီးရီးယားတွေ သွေးထဲကို ရောက်သွားတဲ့အခါ သွေးဆိပ်တက်ခြင်း၊ အဆစ်ရောင်ခြင်း စတာတွေ ကြုံနိုင်ပါတယ်။

Staph ပိုးဝင်ရာမှာ တွေ့ရများတဲ့ လက္ခဏာအချို့ကတော့

• ရေအလွန်ငတ်ခြင်း
• အရိုးများ၊ ကြွက်သားများ နာကျင်ကိုက်ခဲခြင်း
• အဖျားတက်ခြင်း (၁၀၂ ဒီဂရီဖာရင်ဟိုက်အထက်)
• ရောဂါပိုးဝင်သည့်နေရာ ရောင်ရမ်းနေခြင်း
• ပြည်များ၊ အရည်များ စုနေခြင်း
• အနီဖုများ အကွက်များ ပေါ်လာခြင်း
• ဝမ်းပျက်ခြင်း စတာတွေ ဖြစ်ပါတယ်။

ဘယ်လိုကုသမလဲ

သာမန်အနာဖြစ်တာလောက်ကို သန့်ရှင်းရေးလုပ်ခြင်း၊ ပဋိဇီဝလိမ်းဆေးများ လိမ်းခြင်း၊ ဆေးထည့်ခြင်း စတဲ့ နည်းလမ်းတွေနဲ့ ကုသနိုင်ပါတယ်။ ရောဂါပိုးဝင်တဲ့ လက္ခဏာပေါ်လာပြီး ပြည်တည်နာလို ဖြစ်လာရင်တော့ ဆရာဝန်ပြသဖို့ လိုပါတယ်။

ပဋိဇီဝဆေး သောက်သုံးတာအပြင် အနာကို ဖောက်ထုတ်ပစ်ဖို့ လိုပါတယ်။ အနာ ဝန်းကျင်က တစ်ရှူးများ မကောင်းတော့ရင် လှီးဖြတ်ဖယ်ထုတ်ဖို့ လိုပါတယ်။

တက်တူး နေရာမှာ ဖောင်းပြီး ယားယံနေခြင်းဟာ တော်တော်နဲ့ မပျောက်ရင် မိုင်ကိုဘက်တီးရီးယားကြောင့် ဖြစ်နိုင်ပါတယ်။ ဒါဆိုရင် ပဋီဇီဝဆေးကို အချိန်ကြာကြာ စွဲသောက်ဖို့ လိုနိုင်ပါတယ်။

သင့်အနေနဲ့ တက်တူး ထိုးပြီးချိန်မှာ နီရဲရောင်ရမ်းခြင်း၊ ယားယံခြင်း၊ ဖျားနာခြင်း စတာတွေ ကြုံလာရရင် ရောဂါပိုး ဝင်ခြင်း ဖြစ်နိုင်တာမို့ မိမိဖာသာ မဖြေရှင်းဘဲ ဆရာဝန်နဲ့ ပြသသင့်ပါတယ်။ ပဋိဇီဝဆေးများဟာ ဆရာဝန် ညွှန်ကြားချက်နဲ့ပဲ သုံးစွဲသင့်တဲ့ အပြင် လိုအပ်ရင် အနာကို ဖောက်ထုတ်ခြင်း၊ လှီးထုတ်ခြင်း စတာတွေ ပြုလုပ်သင့်လို့ ဖြစ်ပါတယ်။