ကိုယ်အလေးချိန် တိုးလာတယ်၊ ဝိတ်တက်လာတယ်။ ဝတ်ချင်တာတွေကို မဝတ်ရလို့ စိတ်ညစ်ပြီး ဝိတ်ချဖို့ စဉ်းစားနေတယ်။ ဝိတ်ချနည်းတွေက အမျိုးမျိုးပဲ ဒီအထဲကမှ Yo-Yo Diet နည်းနဲ့ ဝိတ်ချဖို့ ကြိုးစားနေတယ်ဆိုရင် ဝိတ်ချတဲ့ အစီအစဉ် မစခင် ဒီဆောင်းပါးလေး ဖတ်ကြည့်စေချင်ပါတယ်။
Yo-Yo Diet ဆိုတာ ဘာလဲ။
Yo-yo diet ဆိုတာကို ကိုယ်အလေးချိန် တက်လိုက်၊ ကျလိုက်ဖြစ်နေတဲ့ ဖြစ်စဉ်တစ်ခုလို့ပဲ ပြောပါရစေ။ ဒီလိုပြောရတာက Yo-yo diet က ဝိတ်ချတဲ့ ဖြစ်စဉ် တစ်ရပ်ဆိုပေမယ့် စားချင်တဲ့ အစားတွေကို စားလိုက် ကိုယ်အလေးချိန်က တက်လာလိုက်၊ အဝတ်အစားတွေ မတော်တော့ဘူးဆိုပြီး ဝိတ်ချလိုက် ကိုယ်အလေးချိန် ပြန်ကျသွားလိုက် ဖြစ်တဲ့ ဖြစ်စဉ်တစ်ခုပါ။
ကိုယ်အလေးချိန် တက်လာလိုက် ပြန်ချလိုက်၊ ဝိတ်ကျသွားလိုက် ပြန်ကျလိုက်နဲ့ ကိုယ်အလေးချိန်က Yo Yo လိုပဲ အတက်အကျ မြန်နေတာကြောင့် Yo-Yo Diet လို့ အမည်ပေးထားတာပါ။
Yo-Yo Dietကြောင့် ခန္ဓာကိုယ်မှာ ဘာတွေ ထိခိုက်လာနိုင်လဲ
Yo-yo diet ကြောင့် ခန္ဓာကိုယ်မှာ အခုလို ထိခိုက်မှုတွေ ရှိနိုင်ပါတယ်။
အစားစားချင်စိတ်ကို ပိုဖြစ်စေပြီး ကိုယ်အလေးချိန် ပိုတက်လာစေနိုင်တယ်
ပုံမှန်ကတော့ Diet လုပ်နေချိန်မှာ အစားကို လျော့စားဖြစ်ပေမယ့် Diet နားလိုက်ချိန်မှာ အရင်ကထက် ပိုစားတာမျိုးတွေ ဖြစ်လာစေနိုင်တာကြောင့် ဒီ Yo-Yo Diet လုပ်တာက ဝိတ်ကျစေတာထက် အစားပိုစားမိစေပြီး အခန့်မသင့်ရင် ကိုယ်အလေးချိန် ဝိတ်မချခင်ကထက် ပိုတိုးတာမျိုး ဖြစ်စေနိုင်ပါတယ်။
အဆီ ပိုများလာစေနိုင်တယ်
လေ့လာမှုတွေအရ Yo-Yo Diet က ခန္ဓာကိုယ်က အဆီရာခိုင်နှုန်းကို တိုးစေပါတယ်။ Yo-Yo Diet လုပ်တာကြောင့် ဝိတ်တက်တဲ့အချိန် ကြွက်သားထက် အဆီတွေက ပိုဖြစ်နိုင်ပါတယ်။ ဝိတ်ကျချိန်မျာ အဆီရော ကြွက်သားပါ ကျသွားတာဆိုပေမယ့် ဝိတ်တက်ချိန်မှာ ကြွက်သားထက် အဆီက ပိုတက်လွယ်တာကြောင့် ခန္ဓာကိုယ်မှာ အဆီ ပိုများလာနိုင်ပါတယ်။
ဝိတ်ချတဲ့အခါ ခန္ဓာကိုယ်မှာ အဆီနဲ့အတူ ကြွက်သားတွေပါ ဆုံးရှုံးသွားနိုင်ပါတယ်။ ဒါပေမယ့် ဝိတ်ချတဲ့ အစီအစဉ် ပြီးလို့ ပုံမှန်အတိုင်း ပြန်စားတဲ့အခါ အဆီက ကြွက်သားထက် အရင်တက်လာတာရယ် ဝိတ်ချချိန်မှာ ပရိုတင်း လုံလောက်ပြည့်ဝအောင် မစားမိတာတွေရယ်ကြောင့် လှုပ်ရှားမှု မပါဘဲ ဝိတ်ချတဲ့ အစီအစဉ်ပဲ လုပ်မယ်ဆိုရင် ကြွက်သားဆုံးရှုံးတာ ဖြစ်နိုင်ပါတယ်။
ခန္ဓာကိုယ်က အသည်းဆဲလ်တွေထဲမှာ အဆီပိုတွေ စုဆောင်းမိတဲ့အခါ အသည်း အဆီဖုံးတာ ဖြစ်လာနိုင်ပါတယ်။
အဝလွန်တာက အသည်းအဆီဖုံးစေနိုင်တဲ့ အချက်တစ်ခုပါ။ ကိုယ်အလေးချိန် တက်လာတာက အသည်းအဆီဖုံးရောဂါ ခံစားရနိုင်ခြေ တိုးလာတာပါပဲ။
နောက်ထပ် ဖြစ်နိုင်တာတစ်ခုက အသည်းက အဆီ နဲ့
အချိုဓာတ်ကို ချေဖျက်ရများတဲ့ အချိန်မှာလည်း အသည်းအဆီဖုံးတာ ဖြစ်နိုင်ပါတယ်။ ဒီ အချိန်မှာ အသည်း အဆီဖုံးတာနဲ့အတူ ခံစားရနိုင်တာက
အမျိုးအစား (၂) ဆီးချိုရောဂါပါ။ ကိုယ်အလေးချိန်က တက်လိုက် ကျလိုက် ခဏခဏ ဖြစ်နေတာက ရေရှည်မှာ အသည်းကို ထိခိုက်စေနိုင်ပါတယ်။
Yo-yo dieting က အမျိုးအစား (၂) ဆီးချိုရောဂါကို ဖြစ်စေနိုင်တယ်၊ လို့ လေ့လာမှု အထောက်အထားတွေအရ သိရပါတယ်။ ဝိတ်တက်လိုက် ကျလိုက် တလှည့်စီ ဖြစ်နေတာက ဗိုက်၊ လက်မောင်း၊ ခြေထောက် နဲ့ တင်ပါးတို့မှာ အဆီစုတာတွေကို ဖြစ်စေပြီး ကိုယ်တွင်းအဆီကို များစေသလို
အင်ဆူလင်ပမာဏကို မြင့်တက်စေပြီး ဆီးချို အစောပိုင်း လက္ခဏာတွေကို ခံစားရစေနိုင်ပါတယ်။
ဒီဝိတ်ချတဲ့ အစီအစဉ်ကို ရေရှည် စွဲလုပ်မယ်ဆိုရင် အမျိုးအစား (၂) ဆီးချိုရောဂါ ခံစားလာရနိုင်ပါတယ်။
ကိုယ်အလေးချိန် တက်လိုက် ကျလိုက်ဖြစ်နေတာက နှလုံးသွေးကြောတွေကို ကျဉ်းစေပြီး နှလုံးရောဂါ ခံစားရနိုင်ခြေ တိုးလာစေသလို နှလုံးသွေးကြောဆိုင်ရာ ရောဂါတွေ ခံစားရနိုင်ခြေကိုလည်း တိုးစေနိုင်ပါတယ်။ ကိုယ်အလေးချိန် အတက်အကျ ကွာဟချက် များလေလေ နှလုံးရောဂါ ခံစားရနိုင်ခြေက များလာလေလေပါ။
ကိုယ်အလေးချိန် တက်လာလိုက် ပြန်ချလိုက်နဲ့ သံသရာလည်နေတဲ့ yo-yo diet လုပ်တာက သွေးပေါင်ချိန်ကို မြင့်တက်စေပြီး သွေးတိုးရောဂါ ခံစားရစေနိုင်ပါတယ်။ ဝိတ်တက်လာတာနဲ့အတူ သွေးတိုးရောဂါ ဖြစ်နိုင်ခြေ တိုးလာနိုင်ပေမယ့် ဝိတ်ကျသွားတဲ့ အခါမှာတော့ သွေးတိုးရောဂါ ခံစားရနိုင်ခြေက ကျမသွားပါဘူး။
ငယ်စဉ်မှာ မသိသာပေမယ့် yo-yo diet လုပ်ထားဖူးသူတွေဟာ သက်လတ်ပိုင်းနဲ့ သက်ကြီးပိုင်း ရောက်လာတဲ့အခါ သွေးတိုးရောဂါကို ခံစားကြရပါတယ်။
ဒါကြောင့် ပုံမှန် အာဟာရ မျှတအောင် စားမယ်၊ သင့်တင့်တဲ့ ကိုယ်လက်လေ့ကျင့်ခန်း လုပ်ရင်းနဲ့ပဲ ကိုယ်အလေးချိန်ကို ထိန်းညှိဖို့ ပြောပါရစေ။