ဒီလိုလူတွေဟာ အစာငတ်ခံလိုက်တဲ့အခါ ခန္ဓာကိုယ်က ဘယ်လိုတုံ့ပြန်လာမယ်ကို ကြိုတင်ခန့်မှန်း မရနိုင်သလို နဂိုရောဂါ အခြေအနေကို ပိုဆိုးသွားစေနိုင်ပါတယ်။ ဒါကြောင့် လုပ်ချင်ရင်တောင် ဆရာဝန်နဲ့ အရင်တိုင်ပင်ပါဦး။
(၂) အချိန်အခါ ကို ကြည့်ပါ။
Intermittent Fasting လုပ်တဲ့ အချိန်ဟာ ကိုယ့်မှာ စိတ်ဖိစီးစရာတွေ များနေတဲ့ အချိန်ကာလ ဖြစ်နေမယ် ဆိုရင် ပိုပြီး ပင်ပန်းရ၊ ခက်ခဲရပါလိမ့်မယ်။ ဒါ့ကြောင့် ပြေးလွှားလှုပ်ရှားရတာ၊ မနားမနေ အလုပ်များနေရတာမျိုး အချိန်တွေကို ရှောင်ပြီး စိတ်ဖိစီးမှု နည်းတဲ့ အချိန်မှာပဲ Fasting လုပ်ပါလို့ အကြံပြုချင်ပါတယ်။
(၃) နောက်ဆုံးနာရီ မှာ ကပ်ပြီး အပြုံလိုက် စားမချပါနဲ့။
ခဏနေရင် Fasting ဝင်ရတော့မယ်၊ ၁၆ နာရီလောက် မစားဘဲ နေရတော့မယ် ဆိုပြီး စားလို့ရသမျှ အကုန်ပါးစပ်ထဲ ထည့်တာမျိုး၊ နောက်ဆုံးမိနစ်အထိ မရပ်မနား စားနေတာမျိုးက Fasting ရဲ့ထိရောက်မှု ကိုလျော့စေပြီး အစာခြေစနစ်ကိုပါ ဝန်ပိစေပါတယ်။
(၄) အလွန်အကျွံ သစ္စာရှိမနေပါနဲ့။
Fasting လုပ်တဲ့ အခါ အောင်မြင်သွားတာ ရှိမယ်၊ ကိုယ်နဲ့ အဆင်မပြေတာ ရှိရင်ရှိမယ်၊ ကျန်းမာရေးနဲ့ မကိုက်တာ ရှိမယ်၊ ဘေးထွက်ဆိုးကျိုး ရှိနိုင်တယ်၊ ကိုယ့်အနေအထားကို မူတည်ပြီး အကြောင်းအမျိုးမျိုး ရှိလာနိုင်တယ်။
ဒီအချိန်မှာ ခေါင်းမူးတာ၊ အားနည်းတာ၊ အစာအိမ်အောင့်တာ၊ ရင်တုန်ပန်းတုန်ဖြစ်တာ စတဲ့ သိသိသာသာ လက္ခဏာတွေ ဖြစ်လာခဲ့ရင် သစ္စာသိပ်ရှိပြီး ဆက်မလုပ်ပါနဲ့။ အဆင်မပြေတဲ့အကြောင်း ကိုယ့်ခန္ဓာကိုယ်က အချက်ပြလာရင် ချက်ချင်းရပ်ပါ။ မရပ်တန့်ခဲ့ရင် နောက်ဆက်တွဲပြဿနာတွေ အဖတ်တင်ကျန်ရစ် နိုင်ပါတယ်။
(၅) လေ့ကျင့်ခန်း တွေ လုပ်ဦးမလား။
Fasting ဝင်ချိန်မှာ လေ့ကျင့်ခန်းက လုပ်လို့ရပါတယ်။ ဒါပေမယ့် ပေါ့ပေါ့ပါးပါးပဲ လုပ်ပါ။ ကျချင်ဇောနဲ့ Fasting ကို တွဲပြီး အားကစားတွေ တအားမလုပ်လိုက်ပါနဲ့။
အားစိုက်ရတဲ့ ၊ ကယ်လိုရီ သိပ်လောင်ကျွမ်းရတဲ့၊ ပင်ပန်းအားကုန်ရတဲ့ လေ့ကျင့်ခန်း သို့မဟုတ် လှုပ်ရှားမှု ပြင်းပြင်းတွေက Fasting ဝင်နေတဲ့ ခန္ဓာကိုယ်ရဲ့လုပ်ဆောင်နိုင်စွမ်းကို ကုန်ခမ်းသွားစေနိုင်ပါတယ်။
(၆) ရေသောက် မနည်းပါစေနဲ့။
အစာကို ကန့်သတ်ထားချိန်မှာ ရေကို လုံလောက်အောင် သောက်ဖို့ အဓိက အရေးကြီးဆုံးပါ။ ရေ ဝအောင် သောက်ပါ။ ဆီးသွားနည်းသလား၊ ဆီးအရောင် ရင့်သလား စစ်ဆေးပါ။ ဆီးအရောင် ဖျော့နေတာက ကိုယ့်မှာ ရေဓာတ် လုံလောက်နေတဲ့ လက္ခဏာပါ။
Hello ဆရာဝန် ပရိသတ်ကြီးလည်း ဆောင်သင့်တာဆောင်၊ ရှောင်သင့်တာရှောင်လို့ မှန်ကန်တဲ့ နည်းနဲ့ ကိုယ်အလေးချိန် ထိန်းသိမ်းနိုင်ကြပါစေနော်။
မှတ်ချက်များ
သင့်အတွေးများကို ဝေမျှပါ။
သင့်ကျန်းမာရေးအတွေးများကို Hello Sayarwonနဲ့ ဝေမျှလိုက်ပါ။
ဆက်သွယ်ရန် သို့မဟုတ် ဝင်မည်။ နှင့် ဝင်ရောက်ဆွေးနွေးပါမည်။