ဆောင်းရာသီမှာ ရေဓာတ်ပြည့်ဝဖို့ အရေးကြီးပုံ

ဆောင်းလေးအေးလာတော့ ရေသိပ်မသောက်ဖြစ်တော့ဘူးဟုတ်။ ရာသီဥတုအေးတော့ နွေလောက် ရေမသောက်ဖြစ်တာတော့ အမှန်ပဲနော်။ ဒါက ကိုယ်တစ်ယောက်တည်းလားဆိုတော့ မဟုတ်ပြန်ပါဘူး။ လူတိုင်း ဆောင်းရောက်လာရင် ရေသောက်နည်းတာကတော့ ပုံမှန်ပဲလို့ ဆိုရပါမယ်။ ဒီလို ရေသောက်နည်းတာက ဘာဖြစ်လာလဲဆိုရင် ကိုယ်တွင်းမှာ ရေဓာတ်နည်းလာတာပေါ့။ ဒါကြောင့်ပဲ ဆောင်းရာသီမှာ ရေဓာတ်ခမ်းခြောက်ပြီး အသားခြောက်တာ၊ နှုတ်ခမ်းကွဲတာမျိုးတွေ ဖြစ်လာတာပေါ့။ ဒီတစ်ခေါက်တော့ အေးမြတဲ့ ဆောင်းအေးအေးမှာ ရေဓာတ်ပြည့်ဝအောင် ဘယ်လိုနေကြမလဲဆိုတာကို နည်းလမ်းလေးတွေ မျှဝေပေးချင်ပါတယ်။

ဆောင်းတွင်းမှာ ရေဓာတ်မပြည့်ရင် ဘာတွေ ဖြစ်နိုင်လဲ!

ဆောင်းတွင်းမှာ အသားပက်တယ်။ နှုတ်ခမ်းတွေ ခြောက်တယ်ဆိုတာ တကယ်ကတော့ ကိုယ်တွင်းမှာ ရေဓာတ်ဆုံးရှုံးနေတာရဲ့ အမြင်သာဆုံး လက္ခဏာပါပဲ။ ဒါတွေအပြင် ဆောင်းတွင်းမှာ ရေဓာတ်ဆုံးရှုံးတာကြောင့် အခုလို လက္ခဏာတွေလည်း ခံစားရနိုင်ပါတယ်။

• ရေအရမ်းဆာတာ
• ဆီးအရောင်ရင့်တာ
• ချွေးမထွက်တော့တာ
• ဆီးသွားနည်းလာတာ
• ခြေကုန်လက်ပမ်းကျတာ
• ခံတွင်းခြောက်တာ
• အသားခြောက်တာ
• ခေါင်းကိုက်တာ
• အချိုအရမ်းစားချင်တာတွေ ခံစားရနိုင်ပါတယ်။

ဆောင်းတွင်းမှာ ရေဓာတ်ခမ်းခြောက်တာကြောင့် နေ့စဉ်ဘဝမှာရော ကျန်းမာရေးကိုပါ မထိခိုက်စေဖို့အတွက်ဆောင်းတွင်းမှာ ရေဓာတ်ပြည့်ဝအောင် ဘယ်လိုလေး ဂရုစိုက်လို့ ရမလဲဆိုတာကို ပြောပြပေးသွားပါမယ်။

ဆောင်းအေးအေးမှာ ရေဓာတ်ပြည့်ဝအောင် နေကြမယ်

ဆောင်းအေးအေးမှာ ရေဓာတ်ပြည့်ဝအောင် ဆိုရင် ဒီနည်းလမ်းလေးတွေကို လုပ်ဆောင်ပေးဖို့ လိုပါမယ်။

• ရေကို လက်လှမ်းမီတဲ့ နေရာမှာ ထားပေးပါ

အချို့သော အခြေအနေတွေမှာ ရေသောက်နည်းရတာက သောက်ရမယ့် ရေက လက်လှမ်းမီတဲ့ နေရာမှာ မရှိတာကြောင့်လည်း ဖြစ်နိုင်ပါတယ်။ ဒါကြောင့် ကိုယ့်ရဲ့ အလုပ်စားပွဲ၊ ဟင်းချက်နေမယ်ဆိုရင်လည်း မီးဖိုခန်းစတဲ့ ကိုယ်ရှိနေမယ့် နေရာမှာ သောက်ရေကို ဗူးနဲ့ ထည့်ပြီး ထားပေးတာကလည်း နည်းလမ်းကောင်းပါ။ အပြင်သွားမယ်ဆိုရင်လည်း သွားလေရာနေရာကို သောက်ရေဗူးလေး ယူသွားပေးဖို့ အကြံပေးချင်ပါတယ်။

• အရည်များများပါအောင် စားပါ

အစားအစာတွေ စားတဲ့အခါမှာလည်း စွပ်ပြုတ်၊ ဟင်းခါး လိုမျိုး ခန္ဓာကိုယ်ရဲ့ ရေဓာတ် လိုအပ်ချက်ကို ဖြည့်ပေးနိုင်မယ့် အရည်များများပါတဲ့ အစားအစာတွေကို ရွေးချယ်ပေးတာမျိုးပေါ့။ ဆောင်းအေးအေးနဲ့ စွပ်ပြုတ်ပူပူလေး၊ ဟင်းခါးပူပူလေးကလည်း လိုက်ဖက်တဲ့ အတွဲအစပ်ပါ။

• အရည်ရွှမ်းတဲ့ အသီးအနှံလေးတွေ စားပေးပါ

ဆောင်းရာသီမှာ ကိုယ်တွင်းရေဓာတ်လိုအပ်ချက်ကို ဖြည့်ပေးဖို့ ရေသောက်တာပဲ လုပ်လို့ ရတာမဟုတ်ပါဘူး။ ဖရဲသီး၊ လိမ္မော်သီး၊ ဇီးပန်းသီး၊ မာလကာသီးတို့လိုမျိုး အရည်ရွှမ်းတဲ့ အသီးအနှံလေးတွေကို စားပေးပါ။ ကိုယ်ခံအားကို အားဖြည့်ပေးသလို လိုအပ်တဲ့ ရေဓာတ်ကိုလည်း ပြည့်ဝစေဖို့ ထောက်ကူပေးနိုင်မှာပါ။

• အစားစားပြီးတိုင်း ရေသောက်ပါ

အစားတစ်ခုခု စားပြီးချိန်တိုင်းမှာ ​ရေခဲရေ နဲ့ ရေနွေးကြမ်း မဟုတ်တဲ့ ရေတစ်ခွက်လောက် သောက်ပေးပါ။ ဒီလို သောက်ပေးတာက ကိုယ်တွင်းမှာ ရေဓာတ်ပြည့်ဝအောင် ထောက်ကူပေးနိုင်ပါတယ်။

• ဓာတ်ဆားဖြည့်အချိုရည် သောက်ပေးပါ

ဆောင်းတွင်းမှာ ရေဓာတ်ပြည့်အောင် ရေသောက်ရမှာကို ပျင်းတယ်ဆိုရင် အပြောင်းအလဲဖြစ်အောင် ဓာတ်ဆားဖြည့်အချိုရည်လေးသောက်ပေးလို့လည်း ရပါတယ်။ ဓာတ်ဆားဖြည့်အချိုရည် သောက်ပေးတာက ခန္ဓာကိုယ်အတွက် လိုအပ်တဲ့ ရေဓာတ်ရော ဓာတ်ဆားဓာတ်ကိုပါ ဖြည့်ပြီးသားဖြစ်စေမှာပါ။

• သစ်သီးဖျော်ရည်တွေ သောက်ပေးပါ

ဆောင်းရာသီမှာ ရေဓာတ်နဲ့ ဓာတ်ဆားဓာတ် ပြည့်ဝအောင် လုပ်ဆောင်လို့ ရမယ့် နောက်ထပ် နည်းလမ်း တစ်ခုကတော့ အုန်းစိမ်းရည် အပါအဝင် သစ်သီးဖျော်ရည်တွေကို သဘာဝအတိုင်း ဖျော်ထားပြီး သောက်တာပါ။ ဒီလို လုပ်ပေးတာကလည်း အပြောင်းအလဲ ဖြစ်စေမှာပါ။

• ကျန်းမာရေးနဲ့ ညီညွတ်တဲ့ ခပ်နွေးနွေး သောက်စရာလေးတွေ သောက်ပေးပါ

လက်ဖက်စိမ်း ရေနွေးကြမ်း အပါအဝင် ကျန်းမာရေးနဲ့ ညီညွတ်တဲ့ သောက်စရာတွေကို သောက်ပေးတာကလည်း ဆောင်းရာသီမှာ နွေးထွေးမှုကို ရရှိစေသလို ရေဓာတ် ပြည့်ဝစေဖို့လည်း ထောက်ကူပေးနိုင်မှာပါ။

• ရာသီဥတုနဲ့ လိုက်ဖက်ညီအောင် ဝတ်ဆင်ပါ။

ထူလွန်းတာ၊ ပါးလွန်းတာ မဟုတ်ဘဲ အပြင်က အပူချိန်နဲ့ ကိုက်အောင် ဝတ်ဆင်ပါ။ သင့်တင့်အောင် ဝတ်စားတာက ခန္ဓာကိုယ်ရဲ့ အပူချိန်ကို ထိန်းပေးနိုင်ပြီး ခန္ဓာကိုယ်က ရေငွေ့ပျံပြီး ရေဓာတ်ဆုံးရှုံးတာကို ကာကွယ်ပေးနိုင်ပါတယ်။