ဆောင်းရာသီမှာ ဘိုးဘိုးဘွားဘွားတွေ ရေဓာတ်ဆုံးရှုံးမှု ကင်းစေဖို့

ဆောင်းရာသီရောက်ပေမယ့် ခန္ဓာကိုယ်မှာ ရေဓာတ်လိုအပ်ချက်က ရှိနေတုန်းပါပဲ။ ဒါကြောင့် တခြားရာသီတွေလိုမျိုးပဲ ရေဓာတ်ဖြည့်ဖို့ လိုပါတယ်။ အထူးသဖြင့် အသက်ကြီးတဲ့ ဘိုးဘိုးဘွားဘွားတွေအတွက်က ပိုလိုပါတယ်။ ဘာကြောင့်လဲဆိုတော့ အသက်ကြီးလာတာနဲ့အမျှ ခန္ဓာကိုယ်က ရေဓာတ်ဆုံးရှုံးတာ၊ အာဟာရချို့တဲ့တာတွေကို နည်းနည်းမှ ခံနိုင်စွမ်း မရှိတော့လို့ပါပဲ။ ဒါကြောင့် ဆောင်းရာသီမှာ ဘိုးဘိုးဘွားဘွားတွေ ရေဓာတ်ဆုံးရှုံးမှု ကင်းစေဖို့ ဆိုရင် အောက်ပါ အချက်တွေကို လုပ်ပေးဖို့ လိုပါတယ်။

ဆောင်းတွင်းမှာရော ရေဓာတ်ဆုံးရှုံးနိုင်သေးလို့လား

ဆောင်းတွင်းမှာ ချွေးမထွက်လို့ ရေဓာတ်မဆုံးရှုံးဘူးလို့ တွေးလို့ မရပါဘူး။ ခန္ဓာကိုယ်ရဲ့ ဇီဝဖြစ်စဉ်တွေကနေ ရေဓာတ်က ပုံမှန်ဆုံးရှုံးနေသလို ကိုယ်သတိမထားမိတဲ့အချက်တွေကနေလည်း ရေဓာတ်ဆုံးရှုံးနိုင်ပါသေးတယ်။ ဘိုးဘိုးဘွားဘွားတွေဆိုရင်လည်း ဆောင်းတွင်းမှာ ရေဓာတ်ဆုံးရှုံးနိုင်တဲ့ အချက်တွေ အများကြီးပါ။

ဥပမာ ပြောရရင်

• ရာသီဥတု

တောင်ပေါ်ဒေသတွေကလွဲရင် မြန်မာနိုင်ငံရဲ့ ဆောင်းက အရင်ကလို မအေးတော့ပါဘူး။ မနက်အစောပိုင်းနဲ့ ညဦးပိုင်းတွေလောက်ပဲ အေးပြီး ကျန်တဲ့အချိန်တွေက ပူမြဲပူနေဆဲပါပဲ။ နေ့ဘက်မှာ ပူပြီး ညလောက်ပဲ ချမ်းတဲ့ ရာသီဥတု ဖြစ်နေပါပြီ။

ဒါကြောင့် နေ့ဘက်တွေမှာ နွေရာသီလိုပဲ ချွေးထွက်ပါတယ်။ အိုက်စပ်စပ်နဲ့ နေရထိုင်ရခက်ပါတယ်။

• ရှူးထမပေါက်ချင်လို့

ဘိုးဘိုးဘွားဘွားတွေကို ရေသောက်ဖို့ ပြောရင် ညဘက်အေးတယ်၊ ရှူးပေါက်ရလိမ့်မယ်လို့ ပြောတာ ကြားဖူးမှာပါ။ ဒီလိုနဲ့ အိပ်ခါနီးအချိန်တွေမှာတင်မကဘဲ တစ်နေလုံးမှာပါ ရေသောက်တာကို လျှော့လိုက်တော့ နေရင်းထိုင်ရင်း ခန္ဓာကိုယ်မှာ ရေဓာတ်နည်းသွားတာပေါ့။

ဒါ့ပြင် ညဘက်တွေမှာ အေးတော့ ရေသိပ်မဆာသလို ရေသောက်ဖို့လည်း သတိမရကြပါဘူး။ ဒါကလည်း ရေဓာတ်နည်းရတဲ့ အကြောင်းရင်း တစ်ခုပါပဲ။

• မနက်ပိုင်း လေ့ကျင့်ခန်း

ဆောင်းရာသီမနက်ခင်းတွေဆို လူကြီးတွေမှာ သူတို့ အုပ်စုလိုက် ယောဂကျင့်တဲ့အဖွဲ့၊ လမ်းလျှောက်တဲ့အဖွဲ့၊ လေ့ကျင့်ခန်းလုပ်တဲ့အဖွဲ့တွေ ရှိတတ်ပါတယ်။ ‌ချွေးထွက်အောင် ကစားပြီး ရေလုံလုံလောက်လောက် ပြန်မသောက်ရင်လည်း ရေဓာတ်ဆုံးရှုံးနိုင်ပါတယ်။

ဘာကြောင့်လည်းဆိုတော့ အသက်ကြီးလာတဲ့အခါ ခန္ဓာကိုယ်က လူငယ်တွေလောက် ချွေးထွက်ပြီး အပူချိန်ထိန်းတာမျိုး ကောင်းကောင်း မလုပ်နိုင်တဲ့အတွက် နည်းနည်းလှုပ် များများချွေးထွက်တာ ဒါမှမဟုတ် ထင်သလောက် ချွေးမထွက်ဘဲ ခန္ဓာကိုယ်မှာ အပူအောင်းနေတာတွေ ဖြစ်နိုင်ပါတယ်။

• ကဖင်းပါတဲ့ ခပ်ပူပူ သောက်စရာများ

ရာသီဥတုအေးလို့ ဘိုးဘိုးဘွားဘွားတွေက ကော်ဖီ၊ လက်ဖက်ရည်၊ ရေနွေးကြမ်းတွေကို အရင်ကထက် ပိုသောက်မိနိုင်ပါတယ်။ တစ်ရက်ကို ၅ခွက်လောက် သောက်မယ်ဆိုရင်တော့ ဆီးရွှင်ပြီး ရေဓာတ်ဆုံးရှုံးနိုင်ပါတယ်။

• အစားအသောက်ပျက်တာ

အသက်ကြီးလာရင် အစားအသောက်တွေ ပျက်တာ သဘာဝပါ။ အစားအသောက်ပျက်တာအပြင် အသက်ကြီးတဲ့သူတွေက ရေဆာတာကို အာရုံခံနိုင်စွမ်းပါ ကျဆင်းလာပါတယ်။

ခန္ဓာကိုယ်ရဲ့ ရေဓာတ်ကို သောက်တဲ့ရေအပြင် အစားအစာတွေကနေလည်း ရပါတယ်။ အစားအသောက်ပျက်တဲ့အခါကျတော့ အာဟာရချို့တဲ့တာအပြင် ရေဓာတ်ပါ လျော့နည်းသွားပါတယ်။

• နာမကျန်းဖြစ်တာ

ဆောင်းတွင်းမှာ အအေးမိ၊ ဖျားနာတာတွေ တကျော့ပြန် ဖြစ်တတ်ပါတယ်။ ကိုယ်ခံအားနည်းတဲ့ ဘိုးဘိုးဘွားဘွားတွေကတော့ အဓိက ခံရတာပေါ့။ ကိုယ်ပူချိန်တက်လို့ ချွေးထွက်များပြီး ရေနဲ့ ဓာတ်ဆား ဆုံးရှုံးတဲ့အခါ၊ အစားအ‌သောက်မစားချင်တဲ့အခါ ရေဓာတ်နည်းရပြန်ပါတယ်။

• သောက်လက်စ ဆေးဝါးများ

ဆီးဆေးလိုမျိုး သောက်နေရတဲ့ လူကြီးတွေမှာ ဆီးသွားများတာကြောင့် ပုံမှန်ထက် ရေနဲ့ ဓာတ်ဆား ဆုံးရှုံးတတ်ပါတယ်။

သက်ကြီးပိုင်းမှာ ရေဓာတ်ဆုံးရှုံးခြင်းရဲ့ နောက်ဆက်တွဲဆိုးကျိုးများ

ဘိုးဘိုးဘွားဘွားတွေရဲ့ ခန္ဓာကိုယ်က ရေဓာတ်ဆုံးရှုံးတာက လူငယ်တွေနဲ့ မတူပါဘူး။ လူငယ်တွေလောက် ခံနိုင်ရည် မရှိတဲ့အတွက် နောက်ဆက်တွဲပြဿနာတွေ ဖြစ်တတ်ပါတယ်။ ဥပမာ ရေဓာတ်ဆုံးရှုံးပြီး

• ခေါင်းမူးတာ
• သွေးပေါင်ကျပြီး ချော်လဲတာ
• နုံးတာ
• ကြွက်တက်တာ
• သတိမကောင်းတာ
• ဝမ်းချုပ်တာ
• ဆီးပိုးဝင်လွယ်တာတွေ ဖြစ်တတ်ပါတယ်။

ဘိုးဘိုးဘွားဘွားတွေက အသက်ကြီးလာတော့ ရေငတ်တာကို အာရုံခံနိုင်စွမ်းက သိပ်မကောင်းတော့ပါဘူး။ ဒါကြောင့် ရေဆာမှ သောက်မယ်ဆိုတာထက် ကိုယ့်ရဲ့ တစ်နေ့တာ လိုအပ်ချက်ပြည့်အောင် သောက်တာက ပိုကောင်းပါတယ်။ ဒါ့ပြင် ရေဓာတ်ဆုံးရှုံးတဲ့ လက္ခဏာတွေ ဖြစ်တဲ့

• ဆီးအရောင်ရင့်တာ
• ဆီးသွားနည်းတာ
• အာခြောက်တာ
• နုံးတာတွေ ခံစားရတိုင်းမှာ သတိတရနဲ့ ရေသောက်ပေးဖို့ လိုပါတယ်။

ဆောင်းရာသီမှာ ဘိုးဘိုးဘွားဘွားတွေ ရေဓာတ်ဆုံးရှုံးမှု ကင်းစေဖို့

လူကြီးတွေမှာ ရောဂါတစ်ခုခုကြောင့် ရေသောက်ရမယ့် ပမာဏကို ကန့်သတ်ထားတာမျိုး မရှိဘူးဆိုရင် တစ်ရက်ကို ၂လီတာဝန်းကျင်လောက် သောက်လို့ ရပါတယ်။ တကယ်လို့ ရေနဲ့ ဓာတ်ဆားဆုံးရှုံးမှုများတယ်ဆိုရင် ပိုသောက်ပေးလို့ ရပါတယ်။

လူကြီးတွေက မေ့တတ်တာကြောင့် ရေမသောက်ဖြစ်ဘူးဆိုရင် အတူနေမိသားစုက ဘိုးဘိုးဘွားဘွားတို့ ရေသောက်ရလွယ်အောင်၊ ရေဓာတ်ပြည့်ဝအောင် ဂရုစိုက်ပေးဖို့လိုပါတယ်။

ရေဓာတ်ပြည့်ဝဖို့ ရေပဲ သောက်ပေးရမှာ မဟုတ်ပါဘူး။ လူကြီးတွေကလည်း ရေချည်းပဲဆို မသောက်ချင်ကြပါဘူး။ ဒီတော့ တစ်နေ့တာ ရေဓာတ်ပြည့်ဝဖို့ ဒီနည်းလမ်းလေးတွေ အသုံးပြုပေးလို့ ရပါတယ်။

• ရေဗူးကို လက်လှမ်းမီတဲ့နေရာမှာ ထားပေးပါ။

ဘိုးဘိုးဘွားဘွားတွေက အထိုင်အထခက်ပြီး အဆစ်နာရောဂါတွေ ရှိတတ်တာကြောင့် ရေကို တကူးတက ထသောက်ဖြစ်မှာ မဟုတ်ပါဘူး။ ဒါကြောင့် အိပ်ရာနား၊ စာကြည့်စားပွဲနား စသဖြင့် သူတို့ အနေများတဲ့ နေရာတွေမှာ ရေဗူးလေးတွေ ထားပေးပါ။ အပြင်သွားရင်လည်း ရေဗူးသယ်သွားပါ။

• အရည်ရွှမ်းတဲ့ သစ်သီးတွေ ကျွေးပါ။

ဆောင်းတွင်းက အသီးအနှံပေါတဲ့ ရာသီဖြစ်တာကြောင့် အရည်ရွှမ်းတဲ့ အသီးအနှံတွေဖြစ်တဲ့ ဖရဲသီး၊ နာနတ်သီး စတာတွေ ကျွေးပေးပါ။ တစ်ရက်ကို 1-2 portions (160 mg)လောက် ကျွေးနိုင်ပါတယ်။

• ဟင်းရည်ချက်ပေးပါ။

ဟင်းရည်ပူပူနွေးနွေးက ဆောင်းတွင်းအတွက် သင့်တော်သလို ရေဓာတ်လည်း ဖြည့်ပေးနိုင်ပါတယ်။ ကြက်ပေါင်းရည်၊ ပဲဟင်း၊ ကန်စွန်းရွက်ချဉ်ရည်ဟင်း စတာတွေက ရေဓာတ်လည်း ဖြည့်ပေးနိုင်သလို ထမင်းဝါးရခက်တဲ့ လူကြီးတွေအတွက်လည်း အထောက်အကူ ဖြစ်စေပါတယ်။

• ဓာတ်ဆားဖြည့်ဖျော်ရည် တိုက်ပေးပါ။

လေ့ကျင့်ခန်းလုပ်ပြီးစအချိန်၊ ဖျားပြီး ချွေးထွက်တဲ့အချိန်ဆို ရေရော၊ ဓာတ်ဆားပါ ဖြည့်ပေးနိုင်အောင် ဓာတ်ဆားဖြည့်စွက်ထားတဲ့ ဖျော်ရည်တွေ တိုက်ပေးလို့ ရပါတယ်။

• သစ်သီးဖျော်ရည်တွေ တိုက်ပေးပါ။

အုန်းရည်ကစလို့ အသီးအနှံတွေကို လတ်လတ်ဆတ်ဆတ် ဖျော်တိုက်တာက ရေဓာတ်ပြည့်ဝစေသလို ဗီတာမင်နဲ့ သတ္တုဓာတ်တွေပါ ပြည့်ဝစေပါတယ်။

ဒါမှမဟုတ် fruit infused waterတွေ ဖြစ်တဲ့ ရေထဲကို သံပုရာသီးစိတ်လေးတွေ၊ ပူဒီနံ၊ သခွားသီးလေးတွေ ထည့်ပြီး တိုက်လို့ ရပါတယ်။ ရေက အရသာရှိတဲ့အတွက် လူကြီးတွေလည်း ခံတွင်းတွေ့ပြီး ပိုသောက်ဖြစ်ပါတယ်။

သစ်သီးဖျော်ရည်တွေအပြင် နွားနို့၊ ပဲနို့ စတာတွေလည်း တိုက်လို့ ရပါတယ်။

ရေဓာတ်ဖြည့်ပေးတာတင် မပြီးသေးပါဘူး။ ရေဓာတ်ဆုံးရှုံးမှုနည်းအောင် ကဖင်းပါတဲ့ ကော်ဖီ၊ လက်ဖက်ရည်၊ ရေနွေးကြမ်းတွေကို အလွန်အကျွံမသောက်ဖို့၊ အရက်ရှောင်ဖို့ကိုလည်း တိုက်တွန်းရမှာ ဖြစ်ပါတယ်။

ဘိုးဘိုးဘွားဘွားတွေမှာ ရေဓာတ်ဆုံးရှုံးရင် လူငယ်တွေထက် ပိုခံရတာကြောင့် ရေဓာတ်မဆုံးရှုံးဖို့၊ ရေဓာတ်ကို လုံလုံလောက်လောက် ဖြည့်တင်းပေးဖို့ အရေးကြီးပါတယ်။