ဖျားနာ နေမကောင်းလို့ ဆေးထိုးတာပဲ ဖြစ်ဖြစ်၊ ကာကွယ်ဆေးလို ဆေးမျိုး ထိုးနှံတာပဲ ဖြစ်ဖြစ်၊ နာတာရှည်ကျန်းမာရေး အခြေအနေတွေ အတွက် ဆေးဝါး ထိုးနှံနေရတာကြောင့်ပဲ ဖြစ်ဖြစ် ဘယ်လို အခြေအနေမျိုး မှာမဆို ဆေးထိုးရင် များသောအားဖြင့် နာကျင်ခံစားရတတ်ပါတယ်။ ဒီလိုမျိုး ဆေးထိုးရင်နာမှာကြောက်သူတွေ အများကြီးပါ။
ခန္ဓာကိုယ်ထဲကို အပ်ကြီးတစ်ချောင်းလုံး ဝင်သွားတာ မနာပဲ နေမလားနော်။ တချို့တွေဆို နာလို့ အော်ကြတယ်၊ မျက်ရည်ကျကြတာလည်း ရှိတယ်။ အွန်လိုင်းပေါ်မှာ ဆိုရင်လည်း ကလေးတွေကို ကာကွယ်ဆေးထိုးချိန် ငိုနေကြ၊ မဲ့ရွဲ့နေကြတာလေးတွေကို Troll လုပ်ကြတာမျိုးတွေ မကြာခဏ မြင်ရတတ်တယ်။ ဘေးကနေ မြင်ရတာ ရီချင်စရာဆိုပေမယ့် တကယ် ခံစားရတဲ့ သူအတွက်တော့ မသက်သာလှပါဘူး။
ဒါကြောင့်လည်း တချို့တွေက ဆေးထိုးရမှာ သိပ်ကြောက်တတ်ကြပါတယ်။ ဆေးထိုးရင်နာမှာကြောက်သူတွေ ဟာ အဓိကအားဖြင့်တော့ နာမှာကြောက်တာကြောင့်ပါ။
ကိုယ့်ကိုယ်ကို ကိုယ်တိုင် ဆေးထိုးရတာပဲဖြစ်ဖြစ် ဆေးခန်းမှာ ဆရာဝန်နဲ့ ထိုးနှံရာမှာပဲဖြစ်ဖြစ် နာကျင်မှု လျော့ပါးအောင် လုပ်လို့ရတဲ့ နည်းလမ်းလေးတွေ ရှိပါတယ်။
ဆေးထိုးရင်နာမှာကြောက်သူတွေ အတွက် နည်းလမ်းလေးတွေ
အောက်မှာ ဖော်ပြပေးမယ့် နည်းလမ်းတွေက ဆေးထိုးရင်နာမှာကြောက်သူတွေ အတွက် ဆေးထိုးနှံချိန်မှာ နာကျင်မှုကို လျော့ပါးသက်သာစေနိုင်တဲ့ နည်းလမ်းလေးတွေ ဖြစ်ပါတယ်။
- ၁။ ဆေးထိုးမယ့် နေရာကို ကြိုတင်ပြီး ရေခဲ ဒါမှမဟုတ် ရေခဲအိတ် ကပ်တာ၊
- ၂။ အရက်ပြန် သုတ်လိမ်းတာ၊
- ၃။ ခန္ဓာကိုယ် တစ်ခုလုံးမှာရှိတဲ့ ကြွက်သားတွေနဲ့ စိတ်ကို ဖြေလျှော့ထားတာ၊
- ၄။ ဆရာဝန် လမ်းညွှန်တဲ့ လိမ်းဆေး တစ်မျိုးမျိုးကို လိမ်းကျံပြီး ၁၅ မိနစ်လောက် ကြိုတင်ကာ အရေပြားကို ထုံနေအောင် ပြုလုပ်ထားတာ၊
- ၅။ တစ်နေရာတည်းကိုပဲ ခဏခဏ ဆေးထိုးနေတာမျိုးကို ရှောင်ကြဉ်တာ၊
- ၆။ ဆေးထိုးနှံမယ့် နေရာကို ကြိုတင် နှိပ်နယ်ပေးတာ၊
- ၇။ ဆေးထိုးတဲ့ အမြန်နှုန်းကို လိုအပ်သလို ချိန်ညှိ ထိုးနှံတာမျိုးတွေပါပဲ။
ဒီ နည်းလမ်းတွေဟာ ဆေးထိုးရမှာကို ကြောက်ရွံ့သူတွေ အတွက်ရော နာကျင်မှာကို စိုးထိတ်သူတွေ အတွက်ပါ အသုံးတည့်စေမှာ ဖြစ်ပြီးတော့ နာကျင်မှုဝေဒနာကို သိသိသာသာ လျှော့ချပေးနိုင်ပါလိမ့်မယ်။
ဒါတင်သာမကပါဘူး နောက်ထပ် ထူးခြားတဲ့ နည်းလမ်း တစ်ခုလည်း ရှိပါသေးတယ်။ ဒါကတော့ ဆေးထိုးနေချိန်မှာ ပြုံးတဲ့နည်းလမ်း ဖြစ်ပါတယ်။
ဟုတ်ပါတယ်။ ဆေးထိုးနေချိန်မှာ ပြုံးတာက ဆေးထိုးအပ်ကြောင့် ရလာမယ့် နာကျင်မှုကို လျော့ပါးစေနိုင်တယ်လို့ University of California က လေ့လာသူတွေက ဆိုထားပါတယ်။ စမ်းသပ်ကြည့်သင့်တဲ့ နည်းလမ်း တစ်မျိုး ဖြစ်ပါတယ်။
ပြုံးတယ်ဆိုတာက ပင်ပန်းလှတဲ့ ကိစ္စမဟုတ်သလို ငွေကုန်လူပန်း ကိစ္စလည်း မဟုတ်ဘူး မဟုတ်လား။ ဒီတော့ ဒီတစ်ခါဆေးထိုးခါနီးရင် အပေါ်မှာ ပြောခဲ့တဲ့နည်းလမ်းတွေကို အသုံးချနိုင်သလို ဆေးထိုးချိန်မှာလည်း ပြုံးပြုံးလေးနေကြည့်နော်။ နာကျင်မှုသက်သာလျော့ပါးသွားမှာပါ။
ဆေးထိုးရင် နာတယ်ဆိုပေပမယ့် ဒါတွေက လိုအပ်လို့ ထိုးတဲ့ဆေးတွေ၊ ရောဂါကာကွယ်ဖို့ ထိုးတဲ့ ဆေးတွေ ဖြစ်တာကြောင့် နာကျင်မှု သက်သာစေမယ့် နည်းတွေကို သုံးပြီး ကာကွယ်ကုသမှု ခံယူလိုက်ပါ။
[embed-health-tool-bmi]
