Enervon-C (အန်နာဗွန် စီ)

Enervon-C (အန်နာဗွန် စီ) ကို ခန္ဓာကိုယ်မှာ အင်အားတိုးပွားစေဖို့၊ ကိုယ်ခံအား ကောင်းစေဖို့ အသုံးပြုကြတာ များပါတယ်။ ဒါ့ပြင် ဗီတာမင် B အုပ်စု ချို့တဲ့တာကြောင့် ဖြစ်တတ်တဲ့ ကျန်းမာရေးပြဿနာ (ဥပမာ – သွေးအားနည်းရောဂါ) နဲ့ ဗီတာမင် C ချို့တဲ့မှုကို သက်သာစေဖို့ အသုံးပြုကြပါတယ်။

အသုံးပြုပုံများ

Enervon-C (အန်နာဗွန် စီ)ကို ဘယ်လိုသောက်သုံးသင့်သလဲ

Enervon-C ကို ခန္ဓာကိုယ်က ဆေးအာနိသင်ကို ပြည့်ပြည့်ဝဝ စုပ်ယူနိုင်စေဖို့အတွက် အစာနဲ့ တွဲဖက်သောက်သုံးတာ ပိုကောင်းပါတယ်။ အစာခြေစနစ် မအီမသာဖြစ်တတ်တယ်ဆိုရင်လည်း အစာနဲ့ တွဲသောက်သင့်ပါတယ်။ ဒီအားဆေးက နေ့စဉ်အစားအစာနေရာမှာ အစားထိုးတာမျိုး မဟုတ်ပါဘူး။ သင့်တော်တဲ့ အစားအစာကို စားသုံးရင်းနဲ့ ဆေးကိုလည်း ပုံမှန် သောက်သုံးပေးလို့ ရပါတယ်။

Enervon-C (အန်နာဗွန် စီ)ကို ဘယ်လိုသိမ်းဆည်းရမလဲ

ဆေးထုတ်လုပ်တဲ့ ကုမ္ပဏီကွဲပြားမှုပေါ်မူတည်ပြီး သိမ်းဆည်းတဲ့ပုံစံ ကွဲပြားခြားနားမှုရှိနိုင်ပါတယ်။ ဒီအတွက် ဆေးဘူးအခွံမှာပါတဲ့ သိုလှောင်သိမ်းဆည်းမှုညွှန်ကြားချက်ကို ကြည့်ရှုစစ်ဆေးတာမျိုး ဒါမှမဟုတ် ဆေးဝါးကျွမ်းကျင်ပညာရှင်ကို မေးမြန်းတာမျိုး အမြဲလုပ်ပါ။ လုံခြုံစိတ်ချရဖို့အတွက် ဆေးဝါးတွေအကုန်လုံးကို ကလေးတွေ၊ အိမ်မွေးတိရိစ္ဆာန်တွေနဲ့ ဝေးရာမှာထားပါ။

ကြိုတင်သတိပြုရန်များနှင့် အသိပေးချက်များ

Enervon-C ကို အသုံးမပြုခင် ဘာတွေသိသင့်သလဲ

ကိုယ်ဝန်ဆောင်နေချိန် ဒါမှမဟုတ် ကလေးနို့တိုက်နေချိန်မှာ Enervon-C (အန်နာဗွန် စီ)ကို သုံးစွဲဖို့ စိတ်ချရပါသလား

ဒီဆေးကို ကိုယ်ဝန်ဆောင်နေချိန် ဒါမှမဟုတ် ကလေးနို့တိုက်နေချိန်တွင် သောက်တဲ့အခါ ဆိုးကျိုးများရှိ၊ မရှိအတွက် လုံလောက်တဲ့ လေ့လာစမ်းသပ်ချက်တွေ မရှိသေးပါ။ ယေဘုယျအားဖြင့်တော့ စိတ်ချရပါတယ်။ ဒါပေမယ့် ဆေးအသုံးမပြုခင်မှာ ဖြစ်နိုင်တဲ့ ကောင်းကျိုး၊ ဆိုးကျိုး ချိန်ဆနိုင်ဖို့ ဆရာဝန်နဲ့ တိုင်ပင်ပါ။

ဘေးထွက်ဆိုးကျိုးများ

Enervon-C (အန်နာဗွန် စီ) ကို အသုံးပြုခြင်းဖြင့် ဘယ်လိုဘေးထွက်ဆိုးကျိုးတွေဖြစ်နိုင်သလဲ

ဒီဆေးက ဘေးထွက်ဆိုးကျိုး ဖြစ်ခဲပါတယ်။ ဆေးပမာဏ အများကြီး သောက်မိတာ၊ ကာလရှည်ကြာ စွဲသောက်တာတွေကြောင့်တော့ ဘေးထွက်ဆိုးကျိုးတွေ ရှိနိုင်ပါတယ်။

• ခြေဖျားလက်ဖျားတွေမှာ ပူစပ်ပူလောင်ဖြစ်သလို ခံစားရတာ
• အထိမခံနိုင်ဖြစ်တာ
• အရိုးနာတာ
• ကြွက်သားအားနည်းတာ
• အကြောလိုက်တာ
• ထုံကျဉ်တာ
• ဓာတ်မတည့်တာမျိုးတွေ ခံစားရနိုင်ပါတယ်။

ဆေးဓာတ်ပြုမှုများ

ဘယ်ဆေးတွေက Enervon-C (အန်နာဗွန် စီ) နဲ့ ဓာတ်ပြုနိုင်သလဲ

Enervon-Cက လောလောဆယ် သောက်သုံးနေတဲ့ တခြားဆေးဝါးတွေနဲ့ ဓာတ်ပြုမှုတွေဖြစ်နိုင်ပြီး ဆေးဝါးတွေရဲ့ အာနိသင်ပြောင်းလဲတာ၊ ဘေးထွက်ဆိုးကျိုးတွေ ပိုခံစားရတာတွေ ဖြစ်နိုင်ပါတယ်။

အစားအသောက်တွေနဲ့ အရက်က Enervon-C နဲ့ ဓာတ်ပြုနိုင်သလား

Enervon-Cက အစားအသောက် ဒါမှမဟုတ် အရက်သေစာနဲ့ ဓာတ်ပြုမှုတွေဖြစ်ပြီး ဆေးဝါး အာနိသင်ပြောင်းတာနဲ့ ဘေးထွက်ဆိုးကျိုးတွေ ဖြစ်လာနိုင်ပါတယ်။ အစားအစာတွေက ခန္ဓာကိုယ်အနေနဲ့ Enervon-C ကို ပိုမို စုပ်ယူနိုင်စေဖို့ ထောက်ကူပေးနိုင်ပါတယ်။ ဒါကြောင့် ဆေးကို အစားတစ်ခုခုနဲ့ တွဲသောက်ပေးပါ။ မလိုလားအပ်တဲ့ ဓာတ်ပြုမှုတွေ မဖြစ်လာအောင်လို့ အစားအသောက်၊ အရက်သေစာတွေနဲ့ ဓာတ်ပြုနိုင်ခြေ ရှိ၊ မရှိကို ဆရာဝန် ဒါမှမဟုတ် ဆေးဝါးကျွမ်းကျင်ပညာရှင်နဲ့ မေးမြန်းတိုင်ပင်ပါ။

ဘယ်ရောဂါအခြေအနေတွေက Enervon-Cနဲ့ ဓာတ်ပြုနိုင်သလဲ

Enervon-C (အန်နာဗွန် စီ)က သင့်ရဲ့ နဂိုကျန်းမာရေးအခြေအနေတွေအပေါ် သက်ရောက်မှုတွေ ရှိနိုင်ပါတယ်။ သင့်ရဲ့ ကျန်းမာရေးအခြေအနေကို ပိုဆိုးသွားစေတာ ဒါမှမဟုတ် ဆေးအာနိသင် ပြောင်းလဲသွားတာတွေ ဖြစ်နိုင်ပါတယ်။ ဒါ့ကြောင့် သင့်ရဲ့ကျန်းမာရေးအခြေအနေအကုန်လုံးကို သင့်ရဲ့ဆရာဝန် ဒါမှမဟုတ် ဆေးဝါးကျွမ်းကျင်ပညာရှင်ကို ကြိုတင်အသိပေးဖို့ အရေးကြီးပါတယ်။ အထူးသဖြင့်

• သွေးခဲတာ
• အရေပြားတွေ နီရဲရောင်ရမ်းတာ
• သွေးနီဥဆဲလ် အရေအတွက် များနေတာ
• ဗီတာမင် B12နဲ့ ဓာတ်မတည့်တာမျိုးတွေ ရှိရင်ပါ။

ဆေးသုံးရန်အညွှန်း

အခုအချက်အလက်များမှာ ဆေးပညာအကြံပေးမှုကို အစားထိုးရန်အတွက်မဟုတ်ပါ။ ဆေးဝါးများကို အသုံးမပြုခင် ဆရာဝန် သို့မဟုတ် ဆေးဝါးပညာရှင်နဲ့ အမြဲတမ်းတိုင်ပင်ဆွေးနွေးသင့်ပါတယ်။

အရွယ်ရောက်ပြီးသူတွေအတွက် အသုံးပြုရမယ့်ပမာဏ

• သောက်ဆေး – တစ်နေ့ တစ်လုံး ဒါမှမဟုတ် ဆရာဝန် ညွှန်ကြားတဲ့အတိုင်း သောက်ပါ။

ကလေးတွေအတွက် အသုံးပြုရမယ့်ပမာဏ

• ကလေး အသက် ၁ နှစ် ကနေ ၃ နှစ်အတွင်း: သောက်ဆေးရည် တစ်နေ့ကို 2.5-5 ml ကို အစာနဲ့ တွဲသောက်ပါ။
• အသက် ၄ နှစ် ကနေ ၁၂ နှစ်အတွင်း : သောက်ဆေးရည် တစ်နေ့ကို 5 ml ကို အစာနဲ့ တွဲသောက်ပါ။

Enervon-C (အန်နာဗွန် စီ) ကို ဘယ်လိုရရှိနိုင်သလဲ

Enervon-Cကို အောက်ဖော်ပြပါ ဆေးဝါးပုံစံများနှင့် အချိုးအစားများဖြင့် ရရှိနိုင်ပါတယ်။

• ဆေးတောင့်: ဗီတာမင် B1 50mg, ဗီတာမင် B2 20mg, ဗီတာမင် B6 5mg, ဗီတာမင် B12 mcg, ဗီတာမင် B3 niacinamide 50 mg, Ca pantothenate 20 mg, ဗီတာမင် C 500 mg.
• ဆေးရည်: 60 mL, 120 mL, 250 mL, 500 mL နဲ့ ရရှိနိုင်ပါတယ်။

အရေးပေါ်အခြေအနေတွေ၊ ဆေးပမာဏလွန်သွားတဲ့ အခြေအနေတွေမှာ ဘာလုပ်သင့်သလဲ။

အရေးပေါ်အခြေအနေ သို့မဟုတ် ဆေးပမာဏလွန်သွားတဲ့ အခြေအနေတွေမှာ အရေးပေါ်ဆေးရုံဆေးခန်းများမှာ သွားရောက်ကုသမှုခံယူပါ။

ဆေးသောက်ဖို့ လွတ်သွားခဲ့ရင် (မေ့သွားခဲ့ရင်) ဘာလုပ်ရမလဲ။

Enervon-Cကို သုံးဖို့ လွတ်သွားခဲ့ပါက (မေ့ခဲ့ပါက) သတိရတဲ့အချိန်မှာ အမြန်ဆုံးသုံးပါ။ ဒါပေမယ့် နောက်တစ်ကြိမ်မှ သတိရတယ်ဆိုရင်တော့ လွတ်သွားတဲ့ဆေးကို ထားလိုက်ပါ။ ပုံမှန်အတိုင်းပဲ ဆက်သုံးပါ။ ဆေးနှစ်ကြိမ် သုံးတာမျိုး မလုပ်ပါနဲ့။