ဝမ်းချုပ်တာကို သက်သာစေဖို့ ကိုယ်လက်လေ့ကျင့်ခန်း လုပ်ကြစို့

ဝမ်းချုပ်တာက တော်တော်လေးကို နေရခက်တဲ့ အစာခြေစနစ် ပြဿနာ ဖြစ်သလို ကလေးကစလို့ လူကြီးအထိ အရွယ်မရွေး ခံစားရနိုင်ပါတယ်။ ဝမ်းချုပ်တာက နေထိုင်စားသောက်မှုပုံစံတွေကြောင့် ဖြစ်နိုင်သလို တစ်ခါတလေမှာ သောက်သုံးနေရတဲ့ ဆေးဝါးတွေကြောင့်လည်း ဖြစ်နိုင်ပါတယ်။ ဝမ်းချုပ်တာကြောင့် စိတ်ညစ်ရတာမျိုး မဖြစ်ချင်ဘူးဆိုရင်တော့ ဝမ်းချုပ်တာကို သက်သာစေဖို့ ကိုယ်လက်လေ့ကျင့်ခန်း လုပ်ကြစို့ နော်။

ဘယ်လို အခြေအနေဆိုရင် ဝမ်းချုပ်တယ်လို့ ဆိုနိုင်မလဲ!

နေ့တိုင်း ဝမ်းမသွားတာကို ဝမ်းချုပ်တယ်လို့ မဆိုနိုင်ပါဘူး။ တစ်နေ့ကို ဝမ်းတစ်ကြိမ် ဒါမှမဟုတ် ၂ ကြိမ်သွားတာမျိုးလည်း ရှိသလို ၁ရက်ခြား၊ ၂ရက်ခြား သွားကြသူတွေလည်း ရှိပါတယ်။ ကိုယ့်အကျင့်နဲ့ ကိုယ်ပါပဲ။

ဒါပေမဲ့ လူတစ်ယောက်ဟာ ၁ ပတ်တာကို ၃ ကြိမ်အောက်ပဲ ဝမ်းသွားမယ်။ ဝမ်းက မာကျစ်နေမယ်။ ဝမ်းသွားတဲ့အခါ ဝမ်းမာတာကြောင့် သွားရခက်တာမျိုးဖြစ်စနေမယ်ဆိုရင် ဝမ်းချုပ်တယ်လို့ ပြောနိုင်ပါတယ်။

ဘာတွေကြောင့် ဝမ်းချုပ်နိုင်လဲ!

အခုလို အခြေအနေတွေကြောင့် ဝမ်းချုပ်နိုင်ပါတယ်။

• အမျှင်ဓာတ် လုံလောက်အောင် မစားတာ
• ရေလုံလောက်အောင် မသောက်တာ
• ကိုယ်လက်လှုပ်ရှားမှု နည်းနေတာ
• ခရီးသွားတာ၊ အိပ်ရာဝင်ချိန် ပြောင်းတာလိုမျိုး တစ်နေ့တာရဲ့ ပုံမှန် ဟန်ချက် ပျက်သွားတာ
• နို့၊ ဒိန်ခဲ စတာတွေကို အများကြီး စားမိတာ
• စိတ်ဖိစီးမှု များနေတာ
• ဝမ်းသွားချင်တာကို အောင့်ထားတာ
• ဆေးဝါးတွေ သောက်သုံးနေရတာတွေက ဝမ်းချုပ်စေနိုင်ပါတယ်။

ဝမ်းချုပ်တဲ့အခါ အထိုင်မများစေနဲ့။ လှုပ်လှုပ်ရှားရှားနေ၊ လေ့ကျင့်ခန်းလုပ်လို့ အကြံပေးလေ့ရှိပါတယ်။ ဘာကြောင့် ဒီလို ပြောရတာလဲဆိုတာကိုတော့ ကိုယ်တိုင်လေ့လာကြည့်လိုက်ပါနော်။

ဝမ်းချုပ်တာကို သက်သာစေဖို့ ကိုယ်လက်လေ့ကျင့်ခန်း လုပ်ကြစို့

ဝမ်းချုပ်တာကို သက်သာစေဖို့ ကိုယ်လက်လေ့ကျင့်ခန်း လုပ်ကြစို့ ဆိုရာမှာ ဘယ်လို ကိုယ်လက်လှုပ်ရှားမှုတွေ ဖြစ်မလဲ ဆိုတော့

• အပြေးလေ့ကျင့်ပါ

အပြေးလေ့ကျင့်တာက နှလုံး ကျန်းမာစေနိုင်သလို အစာခြေစနစ်ကိုလည်း လှုပ်ရှားမှု ကောင်းစေပါတယ်။ ဒါကြောင့် ဝမ်းချုပ်နေရင်ဖြစ်ဖြစ်၊ ဝမ်းချုပ်တာကို ကာကွယ်ချင်ရင် ဖြစ်ဖြစ် တစ်နေ့တာကို ၁၅ မိနစ် ကနေ နာရီဝက်လောက် ပုံမှန်လေး ပြေးပေးပါ။ မပြေးခင်မှာ ကြွက်သားဒဏ် ဖြစ်တာ ကင်းစေဖို့အတွက် အကြောလျှော့ဖို့တော့ မမေ့ပါနဲ့။

• ​ယောဂ လေ့ကျင့်ပါ

ယောဂ လေ့ကျင့်တာက အကြောအခြင်တွေကို ပြေလျော့စေပြီး သွေးလည်ပတ်မှု ကောင်းစေသလို ကိုယ်တွင်းက အဆိပ်အတောက်တွေကိုလည်း ဖယ်ရှားပေးပါတယ်။ ယောဂပုံမှန် ကစားပေးတာက စိတ်ရောကိုယ်ပါ လန်းဆန်းစေသလို အစာခြေစနစ် ကျန်းမာစေပြီး ဝမ်းမှန်စေဖို့ ထောက်ကူပေးပါတယ်။

• လမ်းလျှောက်ပါ

လမ်းလျှောက်တာက တော်တော်များများ နေ့စဉ် လုပ်ဖြစ်နိုင်တဲ့ လေ့ကျင့်ခန်း ၁ ခုပါ။ အချိန် သီးသန့်ပေးစရာ မလိုအောင် အလုပ်သွား အလုပ်ပြန်မှာ ၁ မှတ်တိုင် ၂ မှတ်တိုင်လောက် လမ်းလျှောက်ပေးပါ။ အချိန်အားဖြင့် တစ်နေ့တာကို ၁၅ မိနစ် ကနေ နာရီဝက်လောက် လမ်းလျှောက်ပေးတာက ဝမ်းမှန်စေဖို့ ထိထိရောက်ရောက် ထောက်ကူပေးနိုင်မှာပါ။

• အသက်ရှူ လေ့ကျင့်ခန်း လုပ်ပါ

အသက်ကို ခပ်ဝဝလေး ရှူပေးတာက အဆုတ်ကိုတင် ကျန်းမာစေတာ မဟုတ်ဘဲ အစာခြေစနစ်ကိုလည်း ကျန်းမာစေပါတယ်။ နောက်တစ်ချက်က ကိုယ်တွင်း အောက်ဆီဂျင်ပမာဏကို မြင့်တက်စေပြီး စိတ်ဖိစီးမှုတွေကို ပြေလျော့စေနိုင်ပါတယ်။ ဒါကြောင့် ဝမ်းမှန်ချင်တယ်ဆိုရင် မနက်တိုင်းမှာ အသက်ရှူလေ့ကျင့်ခန်းကို ၁၅ မိနစ်လောက် အနည်းဆုံး လုပ်ဖြစ်အောင် လုပ်ပါ။

အခုပြောပြခဲ့တဲ့ လေ့ကျင့်ခန်းလေးတွေကို ပုံမှန် လုပ်ပေးတာက အစာခြေစနစ်ကို ကျန်းမာစေသလို ကိုယ်တွင်းမှာ အဆိပ်အတောက်တွေ ကင်းစေပြီး ဝမ်းမှန်စေဖို့လည်း ထောက်ကူပေးနိုင်မှာပါ။