ကိုဗစ်ကာလမှာ ဝိတ်ချသင့်သလား

ကိုဗစ်ကာလ မှာ Stay homeကြောင့် အိမ်မှာနေနေရတာ လပိုင်းလောက်ရှိနေပါပြီ။ အိမ်မှာပဲနေ၊ အိမ်ကနေပဲ အလုပ်လုပ်ကြတာဆိုတော့ စားလိုက်၊ အိပ်လိုက်၊ ဖုန်းလေးသုံးလိုက်နဲ့ ကိုယ်အလေးချိန်လေးက မသိမသာလေး တက်တက်လာပါတယ်။ ဒါဆို ဝိတ်ချဖို့ စဉ်းစားသင့်နေပြီလား။

ကိုဗစ်ကူးစက်ခံရရင် အသက်အန္တရာယ်ရှိနိုင်တဲ့ အုပ်စုတွေထဲမှာ အဝလွန်တဲ့ သူတွေလည်း ပါနေတယ်ပြောတယ်။ ဒါဆို ဝိတ်ချသင့်တာပေါ့။ ဒါပေမယ့် ဝိတ်ချလိုက်လို့ ပိန်သွားရင် ရောဂါတွေ ဝင်လာမှာလား။ ဝိတ်ချလို့ အာဟာရပြတ်သွားပြီး ခုခံအားကျလာရင် ဘယ်လိုလုပ်မလဲ။ အင်း စဉ်းစားစရာတွေတော့ ဖြစ်ကုန်ပါပြီ။

ကိုဗစ်ကာလအတွင်းမှာ တကယ်ပဲ ဝလာကြသလား။

ကိုဗစ်ကာလမှာ အရင်ကထက် ပိုပြီး ဝလာတာကို Quarantine 15ရယ်လို့ လူမှုစာမျက်နှာတွေမှာ အပြောင်အပျက်သဘောအနေနဲ့တောင် တင်လာကြပါတယ်။ ဆိုလိုတာကတော့ တကယ်ပဲ ဝလာကြတာပါ။ ဘာကြောင့်များပါလိမ့်။

• ပျင်းလာတာ – တစ်နေကုန် အိမ်ထဲမှာပဲနေ၊ အလုပ်လုပ်လည်း အိမ်ကနေလုပ်ဆိုတော့ ကြာတော့ ပျင်းလာပါတယ်။ ခုလိုအချိန်မှာ ပျင်းရင် လုပ်လို့အကောင်းဆုံးကတော့ ပါးစပ်ထဲမှာ တစ်ခုခုဝါးနေတာပါပဲ။ ဒါကြောင့် ချက်စားချင်စားမယ်။ အပြင်ကနေ deliveryနဲ့ မှာစားချင်စားမယ်။ တစ်နေ့တစ်မျိုး မရိုးအောင် စားမှာပါ။
• စိတ်ဖိစီးမှုများလာတာ – စိတ်ဖိစီးနေတဲ့အတွက် hunger eating တကယ်ဆာလို့ စားတာထက်စာရင် emotional eating စိတ်ညစ်လို့ စားတာက ပိုများပါတယ်။
• အိပ်ရေးပျက်လာတာ – ညဘက်တွေဆို ညဉ့်နက်တဲ့ထိ နေလာတဲ့အတွက် အချိန်မတော် ဗိုက်ထဆာပါတယ်။ အချိန်မတော်ဆိုတော့ စားစရာကလည်း အသင့်စားအစားအစာတွေပဲ ရှိပါတယ်။ ခေါက်ဆွဲလေးပြုတ်သောက်လိုက်၊ အာလူးကြော်လေး ဝါးလိုက်နဲ့ပေါ့။ အိပ်ရေးပျက်တာရော စားတာတွေရော စုဆုံပြီး ဝိတ်တက်လာပါတယ်။
• လေ့ကျင့်ခန်း မလုပ်ဖြစ်တော့တာ – Gymတွေလည်း ပိတ်၊ အပြင်လည်း မထွက်ရတဲ့အခါကျတော့ တော်ရုံ လေ့ကျင့်ခန်း မလုပ်ဖြစ်တော့ပါဘူး။ ဒါ့ပြင် အထိုင်လည်း ပိုများလာပါတယ်။

ဒါ့ပြင် ကိုဗစ်ကာလမှာ ခုခံအားမကျအောင် များများစားရမယ်လို့ ကြုံးဝါးပြီး တကယ်တမ်း ကျန်းမာရေးနဲ့ မညီညွတ်တာတွေဘဲ ဝါးနေမိတဲ့အခါ ခုခံအားမတက်ဘဲ ကိုယ်အလေးချိန်ပဲ တက်လာပါတော့တယ်။

ဒါဆို ဝိတ်ချရတော့မှာပေါ့။

အဝလွန်နေရင်တော့ ချရမှာပေါ့။ အဝလွန်နေလား သိချင်ရင် BMIတွက်ရပါတယ်။ ဒီမှာ တွက်ပါ။ အဝလွန်နေရင် ချကြတာပေါ့။ အဝမလွန်သေးရင်တော့ ရှိတဲ့ ပေါင်ချိန်ထက် ပိုမများလာအောင် ထိန်းရမှာပါ။

ဝိတ်ချလိုက်လို့ ကိုယ်ခံအားကျသွားရင်ရော

ဒါပေါ့။ ဒါသိပ်ကို အရေးကြီးတဲ့အချက်ပါပဲ။ ဝိတ်လည်း ကျရမယ်။ ကိုယ်ခံအားတော့ မကျရဘူး။ ဒီနှစ်ခုရဲ့ အလယ်ရောက်အောင် ဘယ်လိုများ ကြိုးစားမလဲဆိုတာ နည်းလမ်းကောင်းလေးတွေ မျှဝေပေးချင်ပါတယ်။

• အလွန်အကျွံမချပါနဲ့။

အဝလွန်နေလို့ တစ်ပတ်ကို ၁၀ပေါင်လောက် ချလိုက်မယ်လို့ မတွေးပါနဲ့။ ဒါဆိုရင်တော့ ကိုယ်ခံအားပါကျသွားမှာပါ။ တစ်ပတ်ကို တစ်ပေါင်ထက် ပိုမချပါနဲ့။

• အစားတွေ အတင်းမလျှော့ပါနဲ့။

ဒီချိန်မှာ အစာဖြတ်ပြီး ဝိတ်ချတာကို လုံးဝအားမပေးပါဘူး။ အနပ်မှန်အောင်၊ အချိန်မှန်အောင် စားပါ။ စားတဲ့ အနပ်တွေကို ဘယ်လိုမျိုး ကျန်းမာရေးနဲ့ ညီညွတ်အောင် ပြင်ဆင်မလဲဆိုတာ စဉ်းစားပါ။

• အာဟာရမျှတအောင်စားပါ။

ကာဘိုဟိုက်ဒရိတ်၊ ပရိုတိန်း၊ အဆီ အားလုံး တစ်နေ့တာလိုအပ်ချက် ပြည့်မီအောင် စားပါ။ လိုအပ်ချက် ပြည့်မီရင် ရပါပြီ။ ပိုစားတာ၊ လျှော့စားတာကိုသာ ရှောင်ပါ။ ကီတိုdietကိုလည်း ဒီချိန်မှာ ခဏနားထားပါ။ Keto flu ဝင်လာရင် ခုခံအား ထိုးကျသွားမှာပါ။ အစာအုပ်စုတွေကိုသာ မျှမျှတတစားပေးပါ။

• ရေများများသောက်ပါ။

ရေသောက်တာက အစာစားချင်စိတ်ကို ပြေပျောက်စေတာကြောင့် ခဏခဏ မစားမိအောင် တားပေးနိုင်မှာပါ။

• ခဏခဏ မcheatပါနဲ့။

ဝိတ်ချတဲ့သူတွေရဲ့ လက်သုံးစကားပါ။ တစ်ပတ်လုံးလုံး လျှော့ထားရတာ ဒီနေ့တော့ cheatလိုက်မယ်ပေါ့။ Deliveryနဲ့ အဝမှာစားလိုက်မယ်။ အဲ့ဒီလို မcheat စေချင်လို့ အစကတည်းက အစားမရှောင်ဘဲ လိုသလောက် မျှမျှတတစားခိုင်းထားပါ။ ရှောင်လိုက် cheatလိုက်ဆို အလုပ်မဖြစ်ပါဘူး။

• ဆိုရှယ်မီဒီယာက အစားအစာပေ့ချ်တွေကို သတိထားပါ။

ဒီချိန်မှာ စားတာအပြင် တခြားလုပ်စရာ မရှိတဲ့အတွက် စားသောက်ဆိုင်တွေက အပြိုင်အဆိုင် ပရိုမိုးရှင်းတွေ ချမှာပါ။ ပရိုမိုးရှင်းတိုင်းကို အားပေးနေမိပြီဆိုရင်တော့ သင်ကိုယ်အလေးချိန်ကျဖို့ ဝေးနေဦးမှာပါ။

• ကျန်းမာရေးနဲ့ ညီညွတ်တာတွေပဲ အိမ်မှာထားပါ။

တစ်ပတ်စာ မုန့်ဝယ်တဲ့အခါ အာလူးကြော်တွေ၊ ခေါက်ဆွဲခြောက်ထုပ်တွေပဲ ဝယ်မိနေရင် နည်းနည်းလျှော့လိုက်ပါ။ အဲ့ဒီအစား အသီးတွေ၊ အစေ့အဆန်တွေကို ပိုဝယ်ပေးပါ။ ဗိုက်ဆာတဲ့အချိန်မှာ မြင်တာကို စားမှာဆိုတော့ ကိုယ်နဲ့ တည့်တာကို စားဖြစ်အောင်လို့ပါ။ ပြီးတော့ ဒီအသီးအနှံတွေက  ဗီတာမင်နဲ့ သတ္တုဓာတ်တွေ ဖြည့်ပေးတဲ့အပြင် ဝိတ်လည်းမတက်စေပါဘူး။

• အိပ်ရေးဝဝအိပ်ပါ။

စောစောအိပ်တဲ့အခါ ညသန်းခေါင် ဗိုက်မဆာတော့တဲ့အတွက် ထမစားဖြစ်ပါဘူး။ နောက်ပြီး  အိပ်ရေးဝတဲ့သူက ဝိတ်ချရပိုလွယ်ပါတယ်။

• လေ့ကျင့်ခန်းလုပ်ပါ။

အိမ်မှာပဲ တစ်နေ့ကို မိနစ်၃၀လောက်နဲ့ တစ်ပတ်ကို ၅ရက် လေ့ကျင့်ခန်းလုပ်ပါ။ လေ့ကျင့်ခန်း မလုပ်ချင်တဲ့ရက်ဆို အစားထိုးအနေနဲ့ အိမ်အလုပ်တွေ လုပ်လိုက်ပါ။ အထိုင်မများဖို့က အဓိကပါပဲ။ နုံးချိသွားလောက်အောင် လေ့ကျင့်ခန်းလုပ်တာမျိုးကိုတော့ ရှောင်ပါ။ ကိုယ်ခံအားကျတတ်ပါတယ်။

အချုပ်ပြောရရင် အဝလွန်နေတဲ့ သူက ဝိတ်လျှော့ပါ။ မဝတဲ့သူကလည်း ကိုယ်အလေးချိန်မတက်အောင် ထိန်းထားပါ။ ကိုယ်အလေးချိန်ချတဲ့နေရာမှာ ခုခံအားတော့ ထိခိုက်လို့ မဖြစ်ပါဘူး။ ဒါကြောင့် ခုပြောထားတဲ့ နည်းလမ်းတွေကို လိုက်နာဖို့ အကြံပြုချင်ပါတယ်။

[covid_19]