လေဒီလေးတို့အတွက် အီစထရိုဂျင်ဟော်မုန်း

လေဒီလေးတွေ ကျန်းမာစေဖို့ လုပ်ဆောင်ပေးနေတဲ့ အရာလေး တစ်ခုရှိပါတယ်။ ဒါကတော့ လေဒီလေးတွေကို အမျိုးသမီးတစ်ယောက်ရဲ့ သွင်ပြင်လက္ခဏာတွေနဲ့ ပြည့်စုံစေပြီး ကျန်းမာစေဖို့ အမျိုးသမီးတွေရဲ့ ဇာတ်လိုက်ဟော်မုန်းလေး ဖြစ်တဲ့ အီစထရိုဂျင်ဟော်မုန်းပါ။ ဒီတစ်ခေါက်တော့ လေဒီလေးတို့အတွက် အီစထရိုဂျင်ဟော်မုန်း က ဘာတွေလုပ်ပေးလဲဆိုတာကို အတူတူ ကြည့်လိုက်ရအောင်နေတယ်။

ကြားဖူးနေနိုင်တဲ့ အီစထရိုဂျင် အကြောင်း

ကိုယ်တွင်းမှာ အီစထရိုဂျင် နည်းတဲ့အခါ ပူစပ်ပူလောင်ဖြစ်တာ၊ ကိုယ်အလေးချိန် တက်တာ နဲ့ မိန်းမကိုယ်ခြောက်သွေ့တာလိုမျိုး ကျန်းမာရေးပြဿနာတွေ ခံစားရနိုင်တယ်လို့ ကြားဖူးနေနိုင်ပါတယ်။ အီစထရိုဂျင်ဟော်မုန်းက အမြဲပဲ နည်းနေတာလားဆိုတော့ မဟုတ်ပါဘူး။ သွေးမဆုံးမီကာလနဲ့ သွေးဆုံးပြီးချိန်တွေမှာ ကိုယ်တွင်းက အီစထရိုဂျင်ပမာဏက လျော့ကျသွားတာမျိုးပါ။

ဒီလိုတွေဖြစ်စေတာက အီဟထရိုဂျင်ကြောင့်ဆိုပြီး အီစထရိုဂျင်ကို အဆိုးမမြင်လိုက်ပါနဲ့ဦး။ အီစထရိုဂျင်ဟော်မုန်းက လေဒီလေးတွေ ကျန်းမာရေးအတွက် အထောက်အကူပြုပေးနေတာတွေ ရှိပါသေးတယ်။ ဘယ်လိုတွေများ အထောက်အကူပြုပေးလဲဆိုတာကို အတူတူ ကြည့်လိုက်ရအောင်နော်။

အီစထရိုဂျင် ဆိုတာ

အီစထရိုဂျင် ဆိုတာ ခန္ဓာကိုယ်က လုပ်ငန်းဆောင်တာ များစွာအတွက် တာဝန်ရှိတဲ့ ဟော်မုန်း တစ်မျိုးပါ။ လေဒီလေးတွေ မွေးဖွားချိန်ကတည်းက ခန္ဓာကိုယ်ထဲမှာ ပါလာခဲ့တာပါ။ မျိုးပွားစနစ်ကျန်းမာစေဖို့၊ ရင်သားတွေ ဖွံ့ဖြိုးစေဖို့နဲ့ ဆီးခုံမွေးတွေ ဖြစ်ပေါ်စေဖို့ လုပ်ဆောင်ပေးပါတယ်။

အီစထရိုဂျင် ဟော်မုန်းကို မမျိုးဥအိမ်တွေကနေ ထုတ်လုပ်ပါတယ်။ မျိုးပွားနိုင်တဲ့ အရွယ်ရောက်လာချိန်မှာ ဒီဟော်မုန်းတွေက ရာသီစက်ဝန်းကို ထိန်းညှိပေးပါတယ်။

အီစထရိုဂျင်ရဲ့ တာဝန်

လေဒီလေးတွေ အပျိုဖော်ဝင်ချိန်မှာ ကိုယ်တွင်းက အီစထရိုဂျင် ပမာဏက မြင့်တက်လာပါတယ်။ ဒီလိုကနေ လစဉ် အီစထရိုဂျင်ပမာဏ မြင့်တက်လာပါတယ်။ အထူးသဖြင့် သားဥကြွေဖို့၊ မျိုးအောင်နိုင်ဖို့ ကြိုးစားနေချိန်မှာပေါ့။ ဒါပေမယ့် ရာသီသွေး စဆင်းလာရင်တော့ ကိုယ်တွင်းမှာ အီစထရိုဂျင် ပမာဏ ကျဆင်းသွားပါတယ်။ နောက်ပြီးရင် သားဥကြွေဖို့ တစ်ခါ ပြန်တက်လာပါတယ်။

အသက်ရလာပြီး သွေးဆုံးချိန် နီးလာချိန်မှာတော့ ကိုယ်တွင်းက အီစထရိုဂျင်ပမာဏက တဖြည်းဖြည်း ကျဆင်းလာပါတယ်။

အသက်ကြီးလာလေလေ မမျိုးဥအိမ်တွေရဲ့ လုပ်ဆောင်နိုင်စွမ်းက ကျလာလေလေပါ။ ဒါက သွေးဆုံးတော့မယ်ဆိုတဲ့ လက္ခဏာဆိုလည်း ဟုတ်ပါတယ်။ ကိုယ်တွင်းမှာ အီစထရိုဂျင် ဟော်မုန်း ကျဆင်းလာတာက သာမန် အသက်ကြီးမှု ဖြစ်စဉ် တစ်ရပ်ပါ။

လေဒီလေးတို့အတွက် အီစထရိုဂျင်ဟော်မုန်း

ဒီ အီစထရိုဂျင်ဟော်မုန်းလေးက မျိုးပွားမှုစနစ်ကို ထောက်ကူပေးတယ်ဆိုတာကိုတော့ အားလုံးက သိထားပြီး ဖြစ်မှာပါ။ အခုပြောပြပေးမှာကတော့ လေဒီလေးတို့အတွက် အီစထရိုဂျင်ဟော်မုန်း က မျိုးပွားအင်္ဂါတင် မကဘဲ ဘယ်လိုအင်္ဂါစနစ်တွေကိုပါ ထောက်ကူပေးသေးလဲဆိုတာကို ပြောပြပေးချင်တာပါ။

ကဲ …. အတူတူ ကြည့်လိုက်ရအောင်နော်။

• နှလုံး ကျန်းမာစေတယ်

အီစထရိုဂျင်က နှလုံးသွေးကြော တစ်ရှူးတွေကို ကျန်းမာစေခြင်းအားဖြင့် နှလုံးကို ကျန်းမာသန်စွမ်းစေဖို့ ထောက်ကူပေးပါတယ်။ သွေးပေါင်ချိန်ကို ထိန်းညှိပေးဖို့ ထောက်ကူပေးပါတယ်။

ကိုယ်တွင်းမှာ အီစထရိုဂျင်ဟော်မုန်း များလာတဲ့အခါ သွေးတွင်းအဆီဓာတ် ကျဆင်းစေဖို့ ထောက်ကူပေးနိုင်ပါတယ်။ သွေးထဲမှာ အကျိုးပြု ကိုလက်စထရော များစေပြီး အကျိုးမပြု ကိုလက်စထရောကို ကျဆင်းစေနိုင်ပါတယ်။

အီစထရိုဂျင်ဟော်မုန်း နဲ့ နှလုံးကျန်းမာရေးကြားက ဆက်စပ်မှုကိုတော့ လေ့လာနေဆဲပါ။ လေ့လာမှုတွေအရ သွေးဆုံးချိန် မတိုင်ခင်မှာ သားဥအိမ် ၂ ခုစလုံး ဖယ်လိုက်တာက နှလုံးရောဂါ ခံစားရနိုင်ခြေကို တိုးစေနိုင်တယ်လို့ တွေ့ရပါတယ်။

• ဦးနှောက်ကျန်းမာစေတယ်

အီစထရိုဂျင် ဟော်မုန်းက ဦးနှောက်ထဲကို သွေးစီးဆင်းမှု ကောင်းစေဖို့ ထောက်ကူပေးရင်း ဦးနှောက်ကျန်းမာစေဖို့ အားဖြည့်ပေးပါတယ်။ ရောင်ရမ်းမှုနဲ့ ရောဂါတွေ မဖြစ်အောင်လည်း ကာကွယ်ပေးပါတယ်။ မှတ်မိနိုင်စွမ်း ကောင်းစေပြီး လှုပ်ရှားမှု စွမ်းရည် ကောင်းစေဖို့ ထောက်ကူပေးပါတယ်။

အီစထရိုဂျင် နည်းတဲ့အခါ အာရုံစိုက်နိုင်စွမ်း ကျဆင်းတာမျိုး ခံစားရနိုင်ပါတယ်။ အီစထရိုဂျင်ဟော်မုန်းပမာဏ များတဲ့သူတွေက အသက်အရွယ် ရလာတဲ့အထိ ဦးနှောက်စွမ်းဆောင်ရည် ကောင်းမွန်ကြတယ်လို့ လေ့လာမှု တွေအရ သိရပါတယ်။

• ကြွက်သားထုထည်နဲ့ အရိုးသိပ်သည်းဆ တိုးစေနိုင်တယ်

အီစထရိုဂျင် ဟော်မုန်းက အရိုး သိပ်သည်းဆ ကောင်းစေဖို့တဲ့ ကြွက်သားထုတည် ကောင်းစေဖို့ ထောက်ကူပေးရာမှာ အရေးပါတဲ့ အခန်းကဏ္ဍကနေ ပါဝင်နေပါတယ်။

အရိုးမပွအောင် ကာကွယ်ပေးပြီး အရိုးအားနည်းတာ၊ အရိုးကြွပ်ဆတ်တာတွေ မဖြစ်အောင် တစ်ရှူးဆုံးရှုံးတာမျိုး မဖြစ်အောင် ကာကွယ်ပေးပါတယ်။

• စိတ်ခံစားမှု ကောင်းစေတယ်

ရာသီလာချိန်မတိုင်ခင် အစောပိုင်းကာလတွေမှာ အီစထရိုဂျင် ပမာဏ ပြောင်းလဲမှုတွေကြောင့် စိတ်ခံစားမှု ပြောင်းလဲတာမျိုးတွေ ရှိနိုင်ပါတယ်။ အီစထရိုဂျင် ဟော်မုန်းတွေက စိတ်ခံစားမှု ကောင်းစေတဲ့ ဆီရိုတိုနင် ပမာဏကို ထိန်းညှိပေးသလို အာရုံကြောတွေ ကျန်းမာစေဖို့လည်း ထောက်ကူပေးပါတယ်။

အီစထရိုဂျင် ပမာဏ ကျဆင်းသွားရင် ဘာကြောင့် စိတ်ခံစားမှုအပေါ် သက်ရောက်မှု ရှိစေတာလဲဆိုတာကိုတော့ လေ့လာနေဆဲပါ။

• လိင်မှုရေးရာ ကောင်းမွန်စေတယ်

အီစထရိုဂျင်က လိင်မှုဘဝ ပျော်ရွှင်စေဖို့ အတော်လေး အရေးပါပါတယ်။ ဒီဟော်မုန်းက မိန်းမကိုယ်မှာ ချောဆီထွက်စေပြီး သာယာကြည်နူးဖွယ် ဆက်ဆံရေးဖြစ်စေဖို့ ထောက်ကူပေးနိုင်ပါတယ်။ ဒါကြောင့်လည်း သွေးဆုံးပြီးချိန်မှာ မိန်းမကိုယ် ခြောက်သွေ့တာ၊ အတူနေချိန်မှာ နာကျင်တာမျိုးတွေ ခံစားရတာပါ။