လစ်တာနဲ့ လက်သည်းလေးတွေ ကိုက်နေတတ်တာ ဘယ်သူတွေရှိလဲ။ ပျင်းလို့ပဲဖြစ်ဖြစ်၊ စိတ်ညစ်လို့ပဲဖြစ်ဖြစ်၊ အတွေးတွေများနေတုန်းပဲဖြစ်ဖြစ် လက်သည်းကိုက် နေရရင် ကျေနပ်နေတာမျိုး။ ဘာတဲ့..လက်ကို စင်အောင်ဆေးပြီး ကိုက်ရင် ဘာပိုးမှမဝင်နိုင်ဘူးဆိုတဲ့ ဆင်ခြေကလည်းပြောကြသေးတယ်။

သေချာပြီလား ဘာဆိုးကျိုးမှမဖြစ်နိုင်ဘူးဆိုတာ…

လက်သည်းကိုက် ခြင်းရဲ့ ဆိုးကျိုးတွေ ကြောက်စရာကောင်းတာ သင်သိရဲ့လား

လက်သည်းကိုက်ရာကနေ ဒါတွေဖြစ်နိုင်တယ်နော် –

လက်သည်းပိုးဝင်တာ

လက်သည်းကိုက်ရင် လက်သည်းပဲ့မှာပဲ။ လက်က ဘယ်လောက်သန့်တယ်ဆိုဆို ပိုးတွေက ရှိနေတုန်းပါပဲ။ လက်သည်းအပြင် လက်သည်းပတ်လည်က အရေပြားမှာပါ ပိုးတွေ ရှိနေနိုင်ပါတယ်။

နောက်ပြီး လက်သည်းကိုက်ခါနီးတိုင်း သွားတိုက်၊ ပါးစပ်ဆေးပါသလား။ လက်သည်းရဲ့အောက်က အရေပြားနုလေးပေါ်လာရင် ပါးစပ်ထဲက ဘက်တီးရီးယားတွေ၊ ရောဂါပိုးတွေနဲ့ ထိတွေ့နိုင်တယ်။ ခံတွင်းဆိုတာ စားကြွင်းစားကျန်တွေ ကပ်ငြိနေတတ်တဲ့ ဘက်တီးရီးယား အသိုက်ကြီး တစ်ခုဆိုတာ မသိလေရော့သလား။

လက်သည်းကို ပိုးဝင်ရာကနေ ရုပ်ပျက်တဲ့ အနာတွေ၊ ပြည်တည်တာတွေ၊ သွေးတစိုစို ဖြစ်လာတာ၊ အနာရင်းပြီး လက်ထိပ်တွေ ပျက်စီးရတာတွေ အထိ ဖြစ်လာနိုင်တယ်။ လက်သည်း ထိပ်တွေ နီရဲ၊ ရောင်ရမ်းလာတာ၊ နာကျင်ရတာ၊ ပြည်တွေ တည်တာ ဖြစ်လာနိုင်ပါတယ်။

ရောင်ရမ်းတာ

တံတွေးရဲ့ ဓာတုပစ္စည်း ပါဝင်မှုကြောင့် အဆီနဲ့ တခြား အစားအစာ မော်လီကျူးတွေကို ဖြိုခွဲပေးနိုင်တာ ဖြစ်ပါတယ်။ ဒီလုပ်ဆောင်ချက်က အစာခြေစနစ်ကို အကူအညီပေးတယ် ဆိုပေမယ့် လက်ကို ပါးစပ်ထဲ ထည့်ထည့်ထားမယ် ဆိုရင် လက်ချောင်းထိပ် အရေပြားကို ထိခိုက်ရောင်ရမ်းစေနိုင်တယ်။

ဥပမာပြရရင် နှုတ်ခမ်းကို လျှာနဲ့တံတွေး ဆွတ်တာက နှုတ်ခမ်းခြောက်ပြီး ကွဲစေနိုင်တာ သိကြတယ်မလား။ တံတွေးက အရေပြားကို ဆိုရင် တိုက်စားသွားနိုင်တယ်လို့ ပညာရှင်တွေကပြောပါတယ်။

နေမကောင်းဖြစ်လွယ်တာ

လက်မှာပါတဲ့ ဘက်တီးရီးယားတွေ ပါးစပ်ထဲ ရောက်သွားတာက တကယ်ဆိုးပါတယ်။ လက်သည်း ကြားက မမြင်ရတဲ့ရောဂါပိုးမွှားတွေ ပါးစပ်ထဲကတဆင့် ဗိုက်ထဲရောက်မှာ ဘယ်လောက်ကြောက်ဖို့ကောင်းလိုက်သလဲ။

လက်သည်း မကိုက်ခင် လက်ဆေးတယ်ဆိုတာ ဆယ်ကြိမ်မှာ တစ်ကြိမ်လောက်ပဲ ဖြစ်နိုင်မှာပါ။ ဘယ်သူမှ ရည်ရွယ်ပြီး လက်သည်းကိုက် တာမဟုတ်၊ အမှတ်တမဲ့ လက်သည်း ကိုက်မိကြတာပဲလေ။ အဲဒီထဲမှာ ဘာပိုးမှန်း၊ ဘာဘက်တီးရီးယားမှန်းမသိ အစုံအလင်ကို တစ်ချီတည်း ရသွားနိုင်တော့ ဝမ်းပျက်မလား၊ ဝမ်းကိုက်မလား၊ ဖျားမလား ကြိုက်ရာဖြစ်လို့ ရပြီလေ။

လက်စွယ်ငုတ်တာ

လက်သည်းမှာ matrix လို့ခေါ်တဲ့ လက်သည်းအိမ်အလွှာရှိပါတယ်။ လက်သည်းကိုက် တဲ့အကျင့်က ဒီအလွှာကို ထိခိုက်ပျက်စီးစေ၊ ပိုးဝင်စေပြီး လက်စွယ်ငုတ်တာ၊ လက်သည်း ပိုးဝင်တာ၊ လက်သည်းပုံ ပျက်ယွင်းတာ၊ အနာရင်းတာတွေ ဖြစ်လာနိုင်ပါတယ်။ ဒီအကျင့်ကြောင့် ရုပ်ပျက်ဆင်းပျက် လက်သည်း ပျက်စီးလာရင် ဘယ်လိုလုပ်ရပါ့မလဲ။

ရေယုန်

Herpetic whitlow လို့ခေါ်တဲ့ လက်ချောင်းမှာဖြစ်တဲ့ ရေယုန်ဗိုင်းရပ်စ်ဟာ လက်သည်း ပန်းကုံးကနေ ပိုးဝင်တာဖြစ်ပါတယ်။ နှုတ်ခမ်းမှာ ရေယုန်ဖြစ်တယ်ဆိုရင် ၄၀ ရာခိုင်နှုန်းလောက်က လက်ချောင်းကို ဒီဗိုင်းရပ်စ်ကူးစက်နိုင်ပါတယ်။

သွားပြဿနာ

ကာလတာရှည် လက်သည်းကိုက်ခြင်းကြောင့် သွားရဲ့အမြစ်တွေကို ပုံစံပျက်ယွင်းစေနိုင်၊ ပျက်စီးစေနိုင်လို့ သွားတွေကို ယိုင်နဲ့စေနိုင်ပါတယ်။ လက်သည်း ကိုက်ခြင်းကြောင့် သွားတွေကို ကျိုးပဲ့တာတွေဖြစ်စေနိုင်ပြီး သွားဖုံးရောဂါတွေလည်းဖြစ်စေနိုင်တယ်။

လက်သည်း ကိုက်ခြင်းရဲ့ ဆိုးကျိုးတွေ ကြောက်စရာကောင်းတာ သိလောက်ပြီ ထင်ပါတယ်။ ဒီတော့ လက်သည်းကိုက်တတ်တဲ့ အကျင့်လေးကို ဖျောက်ဖို့ ကြိုးစားစေချင်ပါတယ်။