မနေနိုင် မထိုင်နိုင်အောင် ခေါင်းယားရတာ ဘာကြောင့်လဲ ။ ။

ခေါင်းယားတယ်၊ ခေါင်းယားတယ် ဆိုတာ တကယ်ကို ခံစားရခက်ပြီး စိတ်ရှုပ်ရတဲ့ အရာ တစ်ခုပါ။ ကုတ်လေ ယားလေနဲ့ ကုတ်လေ ယားလေနဲ့ သံသရာ လည်နေတော့တာပါပဲ ။ လူတိုင်းက ခေါင်းယားတယ် ဆိုတာနဲ့ ဗောက်ထတာကိုပဲ ပြေးမြင်တတ်ကြပါတယ်။ တကယ်တော့ ဗောက်ထတာ အပြင် ခေါင်းယားစေတဲ့ အခြား အကြောင်း အရင်းများစွာ ရှိပါတယ်။ မနေနိုင် မထိုင်နိုင်အောင် ခေါင်းယားရတာ ဘာကြောင့်လဲ ဆိုတာကို ကြည့်လိုက်ရအောင်နော်။

မနေနိုင် မထိုင်နိုင်အောင် ခေါင်းယားရတာ ဘာကြောင့်လဲ

မနေနိုင် မထိုင်နိုင်အောင် ခေါင်းယားရတာက –

• ဗောက်ထခြင်း ။ ။

ဗောက်ထခြင်းဟာ ဦးရေပြား ယားယံခြင်းကို ဖြစ်စေတဲ့ အဖြစ် အများဆုံး အကြောင်းအရင်း တစ်ခုပါ။ ကုတ်လိုက်ရင် ပဲဖြစ်ဖြစ် ဒီအတိုင်းနေရင်ပဲဖြစ်ဖြစ် ဆံပင် မည်းမည်းလေးတွေ ပေါ်မှာ ကပ်နေတဲ့ အဖြူဖပ်တွေကြောင့် သင့်ကို နှုတ်ခေါင်း ရှုံ့ကြမယ့် သူတွေ အများကြီးပါ။

• ဦးရေပြား ခြောက်သွေ့ခြင်း ။ ။

ခြောက်သွေ့နေတဲ့ အရေပြား တစ်ခုဟာ ယားယံခြင်းကို ဖြစ်စေတယ် ဆိုတာ အားလုံး အသိပါ။ ဦးရေပြားဟာလည်း အရေပြား တစ်မျိုး ဖြစ်တဲ့အတွက် ခြောက်သွေ့တဲ့ ဦးရေပြားဟာ သင့်ကို ခေါင်းယားစေမှာပါ ။

• သန်းတွယ်ခြင်း ။ ။

ခေါင်းမှာ သန်းတွယ်ပြီ ဆိုတာနဲ့ နေလို့ ထိုင်လို့ မရအောင် ယားယံခြင်း ဝေဒနာကို ခံစားရတတ်ပါတယ်။ သန်းတွေ ဆိုတာ မျိုးပွားနှုန်းလည်း အင်မတန် မြန်ပြီး ဦးရေပြားက သွေးကို စုပ်ပြီး အသက်ရှင်ကြတာကြောင့် တစ်ကောင်မှ မကျန်အောင် သတ်ရတာ အင်မတန် ခက်ခဲပါတယ်။

• Psoriasis (ဆိုရီရေးစစ်)

ခုခံအားနဲ့ သက်ဆိုင်တဲ့ ရောဂါ တစ်ခု ဖြစ်တဲ့ Psoriasis ဟာ သင့်အရေပြားကိုရော ဦးရောပြားကိုရော အနီကွက်တွေ ဖြစ်စေပြီး ခြောက်သွေ့စေတဲ့ အတွက် ယားယံခြင်းကို ဖြစ်စေပါတယ်။

• ဓာတ်မတည့်ခြင်း ။ ။

ဆံပင်ဆိုးဆေး၊ ခေါင်းလျှော်ရည်နဲ့ ဦးရေပြားမှာအသုံးပြုတဲ့ ပစ္စည်းတွေကြောင့် ဓာတ်မတည့်မှုတွေ ဖြစ်ပြီး ဦးရေပြား ယားယံတတ် ပါတယ်။

ဘယ်အချိန်ဆို စပြီး စိုးရိမ်သင့်တာလဲ ။ ။

လူတိုင်း ခေါင်းယားတတ်ကြလို့ ခေါင်းယားတာဟာ သာမန် ဆိုရင်တော့ အရမ်းကြီး စိုးရိမ်စရာ မရှိတဲ့ ကိစ္စတစ်ခုပါ။ ဒါပေမယ့် ခုပြောပြတဲ့ အချက်တွေ သင့်မှာ ရှိနေပြီ ဆိုရင်တော့ ခေါင်းယားတာဟာ စိုးရိမ်ရတဲ့ အနေအထား တစ်ခု ဖြစ်လာပါပြီ။ ။

• ဗောက်ပျောက်စေတဲ့ ခေါင်းလျှော်ရည် တွေ သုံးနေပေမယ့် မသက်သာလာတာ။
• ခုနလေးတင် ခေါင်းလျှော်လိုက်ပေမယ့် ခဏနေ ခေါင်းပြန်ယားတာ
• ခေါင်းယားတာကြောင့် ညဘက် အိပ်ပျက်တာ၊ အလုပ်မှာ အာရုံမစိုက်နိုင်တော့တာ
• ခေါင်းမှာ သန်းတွေကို မြင်နေရတာ
• အချိန်ပြည့် ခေါင်းယားနေတာ
• ယားနေတဲ့ နေရာက ထိလိုက်ရင် အောင့်နေတာ၊ ဖုနေတာ မျိုးတွေ ဖြစ်ပြီဆို သာမာန် ဗောက်ထတာမျိုး မဟုတ်တော့ပါဘူး။ ဒီလို အချက်တွေ ရှိနေပြီ ဆိုရင်တော့ ပေါ့ဆ မနေဘဲ အရေပြား ဆရာဝန်ဆီ သွားပြတာကသာ အကောင်းဆုံးပါ။