23 ပတ်

23 ပတ် မြောက်မှာ ကလေးလေး ဘယ်လိုဖွံ့ဖြိုးလာမှာလဲ

သားသားမီးမီးလေးက ဘယ်လိုကြီးလာတာပါလိမ့်

23 ပတ် ကျတော့ ကလေးက သရက်သီးအလုံးလောက် ရှိလာမှာဖြစ်ပြီး ၄၅၃ ဂရမ် ၂၈.၉၅ စင်တီမီတာရှိမှာပါ။

ကလေးလေးကိုယ်မှာ အဆီတွေပေါ်လာပေမယ့် အရေပြားကတော့ လျော့ရဲပြီး အရေးအကြောင်းတွေတော့ ရှိတုန်းပါ။ ကလေးလေးရဲ့ နေစဉ်လှုပ်ရှားမှုမှာ ခြေချောင်းလက်ချောင်းတွေ လက်မောင်းတွေ ခြေထောက်တွေရဲ့လှုပ်ရှားမှုတွေ ပါပါတယ်။ လှုပ်ရှားတာ ပိုပြင်းလာတာ သတိထားမိကြလားမေမေတို့ရေ။

ခန္ဓာကိုယ်နဲ့ အနေအထိုင်အပြောင်းအလဲလေးများ

ခန္ဓာကိုယ်မှာရော ဘာတွေဆက်ပြောင်းလဲဦးမှာပါလိမ့်

မွေးခါနီးလေ အိပ်ရခက်လာလေပါ။ ခဏခဏဆီးသွားတာ၊ စိုးရိမ်စိတ်တွေများတာ၊ မအီမသာဖြစ်တာ၊ ခြေထောက်နာတာ၊ စိတ်မသက်မသာဖြစ်တာတွေက ကိုယ်ဝန်ဆောင်တွေအတွက် အိပ်လို့မရစေတဲ့ အဓိကအကြောင်းအရာတွေပါ။

ဒါပေမယ့် ကလေးလေးရဲ့ကျန်းမာရေးက မေမေတို့ အနားယူချိန်လုံလောက်မှုရှိမရှိပေါ် မူတည်နေတော့ ရေနွေးနွေးလေးနဲ့ချိုးတာ၊ သီချင်းအေးအေးလေးတွေ နားထောင်တာ၊ စာအုပ်ဖတ်တာ၊ နို့ပူပူလေးတစ်ခွက်လောက် သောက်ပြီးတော့ဖြစ်ဖြစ် အိပ်လို့လွယ်အောင် ကြိုးစားကြည့်လိုက်ရအောင်နော်။

ဆရာဝန်တွေညွှန်ကြားချက်အရတော့ ကိုယ်ဝန်ဆောင်တွေ တစ်ခြမ်းစောင်းပြီးအိပ်တာ (အထူးသဖြင့် ဘယ်ဘက်) က အချင်းဆီသွေးစီးဆင်းမှု ကောင်းစေပါတယ်။ တကယ်လို့ သက်သောင့်သက်သာမရှိရင် တစ်ခြမ်းစောင်းအိပ်တဲ့အခါ ကိုယ်အလေးချိန် မပိရအောင် ဒူးခေါင်းကြား ခေါင်အုံးတစ်လုံး ညှပ်ထားပါ။

23 ပတ် မြောက်မှာ သိသင့်သိထိုက်တာလေးတွေ

ညဘက် ခြေထောက်ကြွက်တက်သလိုဖြစ်ပြီး လန့်နိုးလာတတ်ပါတယ်။ ကိုယ်ဝန် ၆ လလောက်မှာ ခြေသလုံးကြွက်သားတွေ ကျုံ့ကျုံ့ပြီး နာတတ်တာ သဘာဝပါ။

ဘာလို့ဖြစ်မှန်း သေချာမသိကြပေမယ့် ကာကွယ်နိုင်တဲ့ နည်းတွေတော့ ရှိပါတယ်။

• ကြွက်တက်ရင် ခြေထောက်ကို ဆန့်ထားပြီး ခြေချင်းဝတ်နဲ့ ခြေချောင်းတွေကို အပေါ်ကို တဖြည်းဖြည်းချင်းကော့ချလိုက်ပါ။ မကြာခင်သက်သာသွားပါလိမ့်မယ်။
• အကြောလျှော့လေ့ကျင့်ခန်းတွေ ပုံမှန်လုပ်ပေးပါ။
• ခြေထောက်ကို ဝန်မပိရအောင် ခဏခဏအပေါ်ကို မြှောက်ထားပေးပါ။ နေ့ခင်းဘက်တွေမှာ အသားကပ်ဘောင်းဘီတွေ ဝတ်ပေးနိုင်သလို ခြေထောက်ကိုလည်း မကြာမကြာကွေးလိုက် ဆန့်လိုက် လုပ်ပေးပါ။
• မတ်တပ်အကြာကြီး ရပ်တာကို ရှောင်ပါ။
• နာတာသက်သာအောင် နှိပ်နယ်ပေးတာ၊ ရေနွေး ကပ်ပေးတာလုပ်လို့ရပါတယ်။ ရေများများသောက်ဖို့လည်း မမေ့ပါနဲ့။

ဆရာဝန်ဆီ သွားပြရအောင်

ဆရာဝန်နဲ့ ဘာတွေတိုင်ပင်ကြမလဲ

ခြေလက်တွေ ဖောလာတာ၊ သွေးတိုးတာ၊ အမြင်အာရုံ ဝေဝါးလာတာ၊ ခေါင်းကိုက်တာတွေရှိရင် ဆရာဝန်နဲ့ မြန်မြန်ပြသဖို့ လိုပါတယ်။ ကိုယ်ဝန်ဆိပ်တက်တာ ဖြစ်နိုင်တာကြောင့်ပါ။ ကိုယ်ဝန်ဆိပ်တက်ခြင်းရဲ့ အရေးပေါ် လက္ခဏာတွေကိုလည်း ဆရာဝန်ကို ကြိုမေးထားဖို့ လိုပါတယ်။

လက်ချောင်းလေးတွေ ထုံပြီး နာလာရင်တော့ လက်ကောက်ဝတ်ကို ပတ်ထားတဲ့ အရွတ်မှာ ဒဏ်ဖြစ်နေတာပါ။ Carpal tunnel syndrome လို့ခေါ်ပါတယ်။ ကိုယ်ဝန်ဆောင်ချိန်မှာ ဖြစ်တတ်တဲ့ အာရုံကြောပြဿနာပါ၊ ဒီအရွတ်က အချိန်မရွေးနာလာနိုင်ပေမယ့် ညဘက်ဆိုပိုနာပါတယ်။ လက်ကိုဖိအိပ်ရင် ပိုဆိုးစေနိုင်လို့ ညဘက် အိပ်တဲ့အခါ ခေါင်းအုံးပေါ်ကိုပဲ ခေါင်းချပြီးအိပ်ပါ။ ထုံလာရင် လက်ကို ဖြည်းဖြည်းလေးခါပါ။ ထုံတာ သက်သာစေပါတယ်။ အိပ်လို့မရအောင် ကိုဆိုးလာပြီဆို ဆရာဝန်နဲ့တိုင်ပင်ကြည့်ပါ။

ဘယ်လိုစစ်ဆေးမှုတွေ ထပ်လိုဦးမလဲဆက်လေ့လာရအောင်

ဆရာဝန်ဆီသွားပြရတာ အကျင့်တစ်ခု ဖြစ်နေလောက်ပါပြီ။ လိုအပ်တာပေါ်မူတည်ပြီး အောက်ပါစစ်ဆေးမှုကိုလုပ်ပါလိမ့်မယ်။

• ကိုယ်အလေးချိန်၊ သွေးပေါင် တိုင်းခြင်း
• ဂလူးကိုးစ်နဲ့ ပရိုတင်းအတွက် ဆီးစစ်ခြင်း
• သန္ဓေသားနှလုံးခုန်နှုန်းစစ်ခြင်း
• မွေးမယ့်အချိန်တွက်ဖို့ သားအိမ်အခြေအနေကို အပြင်ဘက်ကနေ စစ်ဆေးခြင်း
• သားအိမ်ထိပ် အမြင့်တိုင်းခြင်း
• ခြေလက်ရောင်မရောင်၊ သွေးပြန်ကြောတွေ ဖောင်းနေလားစစ်ခြင်း

ကျန်းမာဘေးကင်းအောင်နေကြမယ်

ကိုယ်ဝန်ရှိချိန်မှာ ကျန်းမာဘေးကင်းအောင် ဘာတွေသိထားရမလဲ

ကျပ်တိုက်ထားတဲ့ အသားတွေ၊ အသားခြောက်တွေပါတဲ့ အသင့်စားအစားအစာတွေ( ဝက်ပေါင်ခြောက်၊ ဟော့ဒေါ့) မှာ ဘက်တီးရီးယားတွေ၊ မမြင်ရတဲ့ ရောဂါပိုးတွေ ပါနေနိုင်ပါတယ်။ အရမ်းမြင့်တဲ့ အပူချိန်ကမှ ဒီပိုးတွေကို ဖျက်စီးနိုင်မှာပါ။ ဒီတော့ ကိုယ်ဝန်ရှိနေချိန်မှာ ဒီအစာတွေကို စားမယ်ဆိုရင်တော့ သေချာကျက်အောင် ချက်ထားတာမျိုးမှ အဆင်ပြေမှာပါ။

ကိုယ်ဝန်ရှိနေရင် ကိုယ်ခံအားက ပုံမှန်မဟုတ်တော့ ရောဂါဖြစ်လွယ်ပါတယ်။ ပြီးတော့ ရောဂါပိုးတွေက အချင်းကိုဖြတ်ပြီး ကလေးဆီကို ရောက်လာနိုင်ပါတယ်။ ကလေးရဲ့ ကိုယ်ခံအားက ဒီအချိန်မှာ ပြန်တိုက်နိုင်လောက်အောင် မဖွံ့ဖြိုးသေးပါဘူး။

၂၄ ပတ်မြောက်ရောက်ရင် ဆက်တွေ့မယ်နော်။

ရေးသားသူ- Hmwe San Eain