ဉာဏ်ကောင်းပျော်ရွှင်တဲ့ ကလေးတစ်ယောက်အဖြစ်ကြီးပြင်းလာစေဖို့

ကိုယ်ရဲ့ရင်သွေးလေးကို ဉာဏ်ကောင်းပျော်ရွှင်တဲ့ကလေးတစ်ယောက်အဖြစ်ကြီးပြင်းလာစေချင်တဲ့ ဆန္ဒမိဘတိုင်းမှာရှိမှာပါ။ ဒီလိုဖြစ်စေဖို့က မိဘတွေအနေနဲ့ သေချာလေးပျိုးထောင်ပေးဖို့လည်း လိုပါမယ်။ ဒီတော့ ကလေးကို ဉာဏ်ကောင်းပျော် ရွှင်စေဖို့ ဘယ်အချက်လေးတွေကို လုပ်ဆောင်ပေးသင့်လဲဆိုတာကို ဒီဆောင်းပါးလေးထဲမှာ ပြောပြပေးပါရစေ။

ကလေးတစ်ယောက် ဉာဏ်ကောင်းပျော်ရွှင်စွာကြီးပြင်းစေဖို့

ကိုးလလွယ်လို့ ဆယ်လဖွားထားရတဲ့ ကိုယ့်ရင်သွေးလေးကို ဉာဏ်ကောင်းပျော်ရွှင်စွာကြီးပြင်းစေဖို့ဆိုရင် အစားအသောက်ကိုဂရုစိုက်ဖို့လိုသလို နေ့စဉ်လုပ်ဆောင်မှုလေးတွေကိုပါ သေချာလေးဂရုစိုက်ပေးဖို့လိုပါမယ်။

ဘာတွေလုပ်ဆောင်ပေးရမလဲ…..

ကိုယ်လက်လှုပ်ရှားမှုလုပ်စေပါ – ကလေးကို ကိုယ်လက်လှုပ်ရှားမှုလုပ်စေတာက ကိုယ်ခံအားကောင်းစေနိုင်သလို အကောင်းဆုံးကြီးထွားဖွံ့ဖြိုးစေပြီး ဦးနှောက်နဲ့ ဉာဏ်ရည်ဖွံ့ဖြိုးတိုးတက်စေဖို့လည်း အကောင်းဆုံးထောက်ပံ့ပေးနိုင်မှာပါ။

ကလေးကို အလေးထားဆက်ဆံပေးပါ – ကလေးကို ငယ်စဉ်မှာကတည်းက အလေးထားဆက်ဆံပေးတာက ကိုယ့်ကိုယ်ကို ယုံကြည်ချက်ပြည့်ဝပြီး ဉာဏ်ရည်ဉာဏ်သွေးထက်မြက်တဲ့ ကလေးတစ်ယောက်အဖြစ်ကြီးပြင်းလာစေမှာပါ။

ကလေးကို ကိုယ်ပိုင်အချိန်လေးပေးပါ – လူကြီးတွေပဲ တစ်ယောက်တည်းတွေးနေဖို့ အချိန်လိုအပ်တာမဟုတ်ပါဘူး။ ဘေဘီလေးတွေမှာလည်း သူတို့ရဲ့ စိတ်ကူးအတွေးတွေကို ဖြန့်ကြတ်ဖို့နဲ့ စိတ်ဝင်စားရာတွေကို လုပ်ဆောင်နိုင်စေဖို့ ကိုယ်ပိုင်ချိန်လေးလိုအပ်ပါတယ်။ ဒါကြောင့် ကလေးက ဦးနှောက်ကို အလုပ်ပေးပြီး တွေးတောနိုင်စေဖို့ ကလေးကို ကိုယ်ပိုင်အချိန်လေးပေးလိုက်ပါ။

ပြည့်ဝတဲ့ အိပ်စက်ချိန်ထားရှိပါ – ဦးနှောက်ရော ခန္ဓာကိုယ်ပါကြီးထွားဖွံ့ဖြိုးဖို့ အရှိန်ယူနေတဲ့ ဘေဘီလေး တစ်ယောက်အဖို့ ပြည့်ဝတဲ့ အိပ်စက်ချိန်လိုအပ်မယ်ဆိုတာ ပြောနေစရာတောင်မလိုအောင်ပါ။ ဒါကြောင့် ကလေးကို အနည်းဆုံးတစ်နေ့ကို ၈ နာရီ အိပ်စက်ချိန်ထားပေးပါ။

ဝါသနာပါရာကို လုပ်ခွင့်ပေးပါ -လူတိုင်းက ဝါသနာပါရာကို လုပ်ခွင့်ရတဲ့အခါ အကောင်းဆုံးလုပ်ဆောင်နိုင်ကြပါတယ်။ ဒီလိုပါပဲ ကလေးတွေမှာလည်း ငယ်စဉ်ကတည်း သူတို့ဝါသနာပါရာကို ပေးလုပ်ပါ။ ဒါမှ ဉာဏ်ရည်ဉာဏ်သွေးထက်မြက်တဲ့ ဘေဘီလေးအဖြစ်ကြီးပြင်းလာမှာပါ။

ကလေးနဲ့ အတူတူကစားပေးပါ – ဒီအချက်ကလည်း မေ့ထားလို့မဖြစ်ပါဘူး။ ကလေးရဲ့ ဦးနှောက်ဖွံ့ဖြိုးစေဖို့နဲ့ ပျော်ရွှင်ထက်မြက်တဲ့ ကလေးတစ်ယောက်အဖြစ် အရွယ်ရောက်ကြီးပြင်းလာစေဖို့ ကလေးနဲ့ အတူတူအချိန်ပေးကစားပေးပါ။

စာဖတ်ဖို့အားပေးပါ -ခန္ဓာကိုယ်အတွက် အာဟာရပြည့်အောင်စားရသလို စိတ်ကျန်းမာစေဖို့ကလည်း စာဖတ်ဖို့လိုပါမယ်။ ဒါကြောင့် ကလေးကို ဉာဏ်ကောင်းပျော်ရွှင်စေချင်တယ်ဆိုရင် ငယ်စဉ်ကတည်းက စာအုပ်ဖတ်ဖို့ အားပေးပါ။ ကိုယ်တိုင်လည်း သူနဲ့အတူစာဖတ်ပေးပါ။

ဘာတွေကျွေးရမလဲ…….

ထမင်း– မြန်မာလူမျိုးတွေအတွက် အဓိကအစားအစာတစ်ခုပါ။ ကလေးရဲ့ နေ့စဉ်စားသုံးမှုမှာ ထမင်းကို သင့်တင့်မျှတအောင် ထည့်သွင်းလို့ အာဟာရပြည့်ဝအောင်ကျွေးမွေးပေးပါ။ ထမင်းက ကစီဓာတ်အပြင် ခန္ဓာကိုယ်အတွက်လိုအပ်တဲ့ အာဟာရဓာတ်တွေ ပြည့်ပြည့်ဝဝရရှိစေမှာပါ။

ကြက်သား – အာဟာရပြည့်ဝပြီး ခန္ဓာကိုယ်ကျန်းမာဖွံံဖြိုးဖို့ လိုအပ်တဲ့ အာဟာရတွေကို အကောင်းဆုံး ထောက်ပံ့ပေးနိုင်မယ့်အစားအစာတစ်ခုပါ။ ကလေးကို ကြက်သား​ကြော်ကျွေးတာ၊ ကြက်စွပ်ပြုတ်လုပ်တိုက်တာ၊ ကြက်သာဟင်းချက်ကျွေးတာမျိုးတွေ လုပ်ပေးလို့ရပါတယ်။

ပဲအမျိုးမျိုး – ပဲအမျိုးမျိုးမှာ ပရိုတင်းကြွယ်ဝစွာပါဝင်နေသလို ကလေးတွေရဲ့ကြီးထွားဖွံ့ဖြိုးမှုအတွက်အရေးပါတဲ့ အစာခြေစနစ်ကကျန်းမာရေးကို အကောင်းဆုံးထောက်ပံ့ပေးနိုင်တဲ့ အမျှင်ဓာတ်ကြွယ်ဝစွာပါဝင်နေပါတယ်။ ကာဗိုဟိုက်ဒရိတ်နဲ့ ဗီတာမင် B တို့ ကြွယ်ဝစွာပါဝင်နေမှုကလည်း ကလေးရဲ့ ကြီးထွားဖွံ့ဖြိုးမှုအတွက် အကောင်းဆုံးထောက်ပံ့ပေးနိုင်မှာပါ။

ဥအမျိုးမျိုး– ဥအမျိုးမျိုးမှာ ကလေးတွေအတွက် မရှိမဖြစ်လိုအပ်တဲ့ အာဟာရဓာတ်တွေဖြစ်တဲ့ ပရိုတင်း၊ ဗီတာမင် D၊ ဗီတာမင် B12၊ သံဓာတ် အပြင် ကလေးတွေရဲ့ ဦးနှောက်ဖွံ့ဖြိုးမှုအတွက် အရေးပါတဲ့ omega-3 fatty acids ပါဝင်နေပါတယ်။

ဆယ်လ်မွန်ငါး – ခန္ဓာကိုယ်ကြီးထွားဖွံ့ဖြိုးဖို့အတွက်ရော ဉာဏ်ရည်ထက်မြက်ဖို့အတွက်ပါအရေးပါတဲ့ omega-3 fatty acids အပြင် ကိုယ်ခံအားကောင်းစေနိုင်တဲ့ ဗီတာမင် A နဲ့ ဗီတာမင် D တို့လည်း ပါဝင်နေပါတယ်။

ကန်စွန်းဥ – ခန္ဓာကိုယ်အတွက်လိုအပ်တဲ့ အာဟာရဓာတ်တွေကို အကောင်းဆုံးဖြည့်တင်းပေးပြီး နှလုံးကျန်းမာစေနိုင်တဲ့ ပိုတက်ဆီယမ်၊ ကိုယ်ခံအားကောင်းစေတဲ့ ဗီတာမင် A နဲ့ အစာခြေစနစ်အတွက်အရေးပါတဲ့ အမျှင်ဓာတ်တို့ပါဝင်နေပါတယ်။

နို့၊ မုယောအားဖြည့်နို့ – အရိုးတွေကိုသန်မာစေနိုင်တဲ့ ကယ်လ်ဆီယမ်နဲ့ဗီတာမင် D တို့ဝင်နေသလို ဖော့စဖရိတ်၊ ဗီတာမင် B12၊ ပိုတက်ဆီယမ် နဲ့ ပရိုတင်းတို့ပါဝင်ပါတယ်။ ကလေးရဲ့ ရုပ်ပိုင်းဆိုင်ရာ ကြီးထွားဖွံ့ဖြိုးဖို့အတွက်ရော ဉာဏ်ရည်ဉာဏ်သွေးကောင်းမွန်စေဖို့အတွက်ပါ အရေးပါပါတယ်။ ဒါကြောင့် ကလေးကိုနေ့စဉ်နို့တိုက်ပေးသင့်ပါတယ်။

ဒိန်ချဉ် – ကလေးတိုင်းကြိုက်တဲ့ အစားအစာတစ်ခုပါ။ သစ်သီးတွေနဲ့တွဲစားရင်လည်း အရသာရှိတဲအချိုပွဲလေးဖြစ်တာကြောင့် ကလေးကိုကျွေးရတာလည်း အဆင်ပြေမှာပါ။ ဒိန်ချဉ်မှာ ပရိုတင်းဓာတ်ပါသလို အစာခြေစနစ်အတွက် အကျိုးပြုဘက်တီးရီးယား probiotics တွေလည်းပါဝင်နေပါတယ်။

အစေ့အဆန်တွေ – ကလေးကို omega-3 fatty acids ကြွယ်ဝတဲ့ သစ်ကြားသီး၊ အယ်လ်မွန်စေ့တို့အပါအဝင် အစေ့အဆန်တွေကျွေးပေးတာက ကျန်းမာစေနိုင်သလို ဓာတ်မတည့်မှုဖြစ်နိုင်ခြေကိုလည်း နည်းစေနိုင်မှာပါ။

အခုပြောခဲ့တဲ့နည်းလမ်းလေးတွေအတိုင်း လိုက်လုပ်ကြည့်လို့ ရင်သွေးလေးကို ဉာဏ်ကောင်းပျော်ရွှင်တဲ့ ကလေးတစ်ယောက်ဖြစ်အောင် ပျိုးထောင်လိုက်ရအောင်လား မေမေဖေဖေတို့ရေ………………….