အထိုင်များလို့ ခါးနာ၊ ကျောနာ ဖြစ်နေပြီလား။

အခုနောက်ပိုင်း နည်းပညာတိုးတက်လာမှုတွေကြောင့် အလုပ်တော်တော်များများကို ထိုင်ရာကမထဘဲ လူအများနဲ့ ချိတ်ဆက်ပြီး လုပ်ဆောင်နိုင်နေပါပြီ။ ဒီလို တိုးတက်လာမှုက တစ်ဖက်မှာ ကောင်းသလို တစ်ဖက်မှာလည်း ဆိုးကျိုးရှိနေပါတယ်။

ဒီလိုပြောရတာက လူသားတွေဟာ အရင်က လမ်းလျှောက်တာ အပါအဝင် သင့်တင့်လျောက်ပတ်တဲ့ လှုပ်ရှားသွားမှု ရှိတဲ့ နေ့စဉ်ဘဝရော အလုပ်ခွင်ကိုပါ ပိုင်ဆိုင်ထားပေမယ့် တိုးတက်လာတဲ့ ဒီဘက်ခေတ်ကြီးမှာတော့ လှုပ်ရှားမှုတွေက တော်တော်လေး နည်းလာပါတယ်။

အရင်က ဓာတ်လှေကားတွေ၊ စက်လှေကားတွေ တွင်တွင်ကျယ်ကျယ် မပေါ်ခင်က လှေကားတက်ရတာလိုမျိုး လှုပ်ရှားမှုကို လုပ်ဆောင်မိပေမယ့် အခုခေတ်မှာတော့ ရုံးတွေ၊ အိမ်တွေက အထပ် ဘယ်လောက်မြင့်မြင့် ချွေးတစ်စက် မထွက်ဘဲ မတ်တတ်လေးရပ်ရင်း ဓာတ်လှေကားပြီး ရောက်သွားကြတာလေ။

အလုပ်ခွင်မှာဆိုလည်း အွန်လိုင်း app တွေကို သုံးပြီး ထိုင်ရာကမထဘဲ တစ်စားပွဲခြားလောက်ကိုတောင် လမ်းမလျှောက်ဖြစ်တော့ဘူးလေ။ ဒီတော့ တိုးတက်လာတဲ့ ဒီဘက်ခေတ်မှာ လူတိုင်း လိုလိုက အထိုင်များတဲ့ နေထိုင်မှုပုံစံကို ကိုယ်တိုင်တောင် မသိလိုက်ဘဲ ပိုင်ဆိုင်နေကြပါတယ်။

အထိုင်များတော့ ဘာဖြစ်လာသလဲ။

တစ်နေ့တာမှာ အထိုင်များတော့ ရေရှည်မှာ

• အဝလွန်တာ၊
• ဆီးချို၊
• သွေးတိုးရောဂါတွေလိုမျိုး နာတာရှည် ကျန်းမာရေး ပြဿနာတွေကို ခံစားရပါတယ်။

လောလောလတ်လတ်မှာတော့ အထိုင်များတာကြောင့်

• ခါးနာတာ
• နောက်ကျောတွေ အောင့်တာ
• ခြေထောက်တွေ ကိုက်ခဲတာ
• ကြွက်သားတွေ နာကျင် ကိုက်ခဲတာ
• ဇက်ကြောတက်တာ
• ဗိုက်အဆီတက်တာလိုမျိုး ကျန်းမာရေး ပြဿနာတွေကို ခံစားကြရပါတယ်။

အထိုင်များလို့ အဖြစ်အများဆုံး ကျန်းမာရေးပြဿနာ

အထိုင်များတာကြောင့် အများဆုံး ခံစားရတဲ့ ကျန်းမာရေး ပြဿနာကတော့ ခါးနာတာပါ။ တစ်နေ့တာလုံးမှာ အချိန်တော်တော်များများ ထိုင်နေရပြီး ထိုင်တာက ပုံစံ မမှန်တဲ့အခါ ခါးတဝိုက်က ကြွက်သားတွေနဲ့ ခါးဆစ်တွေမှာ ဝန်ပိပြီး ခါးနာတာ နောက်ကျောနာတာတွေကို ခံစားရတာပါ။

ခါးနာတာက ပြင်းထန်တဲ့ ကျန်းမာရေး ပြဿနာလို့ မယူဆကြပေမယ့် တကယ်ကတော့ ပေါ့ဆလို့ မကောင်းတဲ့ ကျန်းမာရေးပြဿနာပါ။ ခါးက တစ်နေ့တာ လှုပ်ရှားသွားလာမှုတွေကို ဟန်ချက်ညီအောင် ထိန်းပေးတဲ့ အရေးပါတဲ့ အစိတ်အပိုင်းပါ။

ခါးနာတဲ့အခါ ကောင်းကောင်းထိုင်ပြီး အလုပ်လုပ်နိုင်ဖို့ ခက်သလို လမ်းလျှောက်တာအပါအဝင် နေ့စဉ်လှုပ်ရှားမှုတွေကို လုပ်ဆောင်ဖို့ ခက်သွားပါမယ်။

အထိုင်များတာကြောင့် ခါးနာတာကို သက်သာစေဖို့

တစ်နေ့တာမှာ ထိုင်ရာကမထဘဲ အလုပ်လုပ်ရင်း အထိုင်များတာကြောင့် ခါးနာလာပြီဆိုရင် သက်သာစေဖို့ ဒီနည်းလမ်းလေးတွေကို လုပ်ဆောင်ပေးလို့ ရပါတယ်။

ပုံစံ မှန်မှန် ထိုင်ပေးပါ။

အလုပ်စားပွဲမှာ ထိုင်တဲ့အခါ ခါးကို မတ်မတ်လေး ဆန့်ထားပြီး ပုံစံ မှန်မှန်လေး ထိုင်တာက ခါးနာတာကို သက်သာစေနိုင်သလို ခါးကို ဝန်မပိစေဖို့လည်း ထောက်ကူပေးပါတယ်။

ဒါကြောင့် အလုပ်လုပ်ဖို့ ထိုင်တဲ့အခါ ပုံစံမှန်မှန်လေး ထိုင်ပေးပါ။

အနေအထားကို မကြာခဏ ပြင်ပေးပါ။

အထိုင်များလို့ ခါးနာတာ သက်သာစေဖို့ဆိုရင် ၁၅ မိနစ် တစ်ခါ နာရီဝက် တစ်ခါလောက် ခန္ဓာကိုယ်အနေအထားကို ပြင်ဖို့ လိုပါမယ်။ ထိုင်နေရင်းက မတ်တတ် ထရပ်တာမျိုး၊ လမ်းလျှောက်တာမျိုး လုပ်ပေးတာက ကြွက်သားတွေကို လှုပ်ရှားမှု ဖြစ်စေပြီး သွေးစီးဆင်းမှု ကောင်းစေတာကြောင့် ကြွက်သားနာတာကို ကာကွယ်ပေးနိုင်မှာပါ။

အကြောလျှော့ပါ။

တစ်နေ့တာလုံးမှာ ထိုင်နေရမယ်ဆိုရင် ကြွက်သားတွေဆီ သွေးစီးဆင်းရောက်ရှိမှု နည်းသလို ကြွက်သားတွေ၊ အရိုးအဆစ်တွေ တောင့်တင်းတာမျိုး ဖြစ်နိုင်ပါတယ်။ ဒီလို ဖြစ်တာတွေကြောင့် ခါးနာတာမျိုး မဖြစ်စေဖို့ဆိုရင် အကြောလျှော့ပေးဖို့ လိုပါမယ်။

ရေခဲ ကပ်ပါ။

ခါးနာတာကို သက်သာစေမယ့် နောက်ထပ် နည်းလမ်းတစ်ခုက ရေခဲကပ်တာပါ။ ခါးနာလာပြီဆိုရင် သက်သောင့်သက်သာ အနေအထား နေပြီး ရေခဲကပ်ပေးတာကလည်း ခါးနာတာကို သက်သာစေနိုင်မယ့် နည်းလမ်း တစ်ရပ်ပါ။

ရေနွေးဝတ် ကပ်ပါ။

ရေနွေးဝတ် ကပ်တာက ကြွက်သားတွေဆီ သွေးစီးဆင်းရောက်ရှိမှု ကောင်းစေတာကြောင့် ခါးနာတာကို သိသိသာသာ သက်သာစေမယ့် နည်းလမ်း တစ်ရပ်ပါ။ ဒါကြောင့် ခါးနာလာရင် ရေနွေးဝတ် ကပ်ပေးတာမျိုး၊ ရေနွေးနဲ့ ရေစိမ်ချိုးတာမျိုး လုပ်ပေးလို့ ရပါတယ်။

အကိုက်အခဲ ပျောက်ဆေး သောက်ပါ။

ခါးနာတာက နေ့စဉ် လုပ်ငန်းဆောင်တာတွေပေါ်မှာ အတော်လေး ထိခိုက်စေနိုင်ပါတယ်။ ဒါကြောင့် ခါးနာတာ သက်သာစေဖို့ ဆေးညွှန်း မလိုတဲ့ အကိုက်အခဲ ပျောက်ဆေးတွေကို ဆေးညွှန်းအတိုင်း သောက်ပေးတာကလည်း နည်းလမ်းကောင်း တစ်ရပ်ပါ။

အထိုင်များလို့ နာလာတဲ့ ခါးနဲ့ နောက်ကျောတွေကို အခုပြောပြခဲ့တဲ့ နည်းလမ်းလေးတွေ သုံးပြီး ဖြေရှင်းလိုက်တော့နော်။