နွေပူညတွေမှာ ကောင်းကောင်း အိပ်ပျော်နိုင်စေဖို့

နွေအပူဒဏ်ကို အခုချိန်မှာ လူတိုင်းလိုလို အလူးအလဲ ခံနေကြရပါတယ်။ ဒီလိုမျိုး နေပူနေချိန်မှာ အပူဒဏ်ကြောင့် နေရထိုင်ရ မသက်မသာဖြစ်သလို အနေအထိုင်လည်း မကောင်း၊ အစားအသောက်တွေလည်း ပျက်ကြပါတယ်။ အပူဒဏ်ကြောင့် ခံစားရတဲ့ ပြဿနာက ဒီလောက်နဲ့ မပြီးသေးပါဘူး။ အပူချိန်က ညဘက်တွေမှာ ကောင်းကောင်းအိပ်ပျော်ဖို့ ခက်အောင်လည်း လုပ်ဆောင်ပါသေးတယ်။ ဒီတော့ နွေပူညတွေမှာ ကောင်းကောင်း အိပ်ပျော်နိုင်စေဖို့ နည်းလမ်းကောင်းလေးတွေကို မျှဝေပေးလိုက်ပါတယ်။

နွေပူညတွေက အိပ်ပျော်ရခက်စေပါတယ်

နွေရာသီရဲ့ ပူပြင်းမှုက ညဘက်တွေမှာ အိပ်ရေးပျက်စေလောက်တဲ့အထိ နှောင့်ယှက်နိုင်ပါတယ်။ ဒီလိုနဲ့ နွေမနက်ခင်းတွေမှာ ညီးစီစီ ဖြစ်တာ၊ အားမရှိသလို ခံစားရတာတွေကို ခံစားရတာပါ။ နွေရာသီမှာ အိပ်ပျော်ရခက်စေတာက ပတ်ဝန်းကျင်မှာ အပူရှိန်တွေ မြင့်တက်နေတာကတစ်ကြောင်း ခန္ဓာကိုယ်မှာ အပူချိန် မြင့်တက်နေတာကလည်း တစ်ကြောင်းပါ။ လေထုထဲမှာ စိုထိုင်းဆ များလေလေ နွေညတွေမှာ အပူချိန် များလေလေပါ။

ဒီလို အပူချိန် မြင့်တက်မှုကြောင့် နွေညတွေမှာ အပူချိန် မြင့်တက်ပြီး အိပ်ပျော်ဖို့ ခက်ရတာပါ။ ဒီတစ်ခေါက်တော့ နွေပူနေတဲ့ ညတွေမှာ ကောင်းကောင်း အိပ်ပျော်နိုင်စေမယ့် နည်းလမ်းလေးတွေကို ဖော်ပြပေးလိုက်ပါတယ်။

နွေပူညတွေမှာ ကောင်းကောင်း အိပ်ပျော်နိုင်စေဖို့

နွေပူညတွေမှာ ကောင်းကောင်း အိပ်ပျော်နိုင်စေဖို့ ဆိုရင်တော့ ဒီနည်းလမ်းလေးတွေက အသုံးတည့်မှာပါ။

• ပြတင်းပေါက်တွေ ဖွင့်ထားပါ

အခန်းတွင်းက အပြင်ကထက် ပိုပူနွေးနေမှာ အသေအချာပါ။ ဒါကြောင့် ညဘက်မှာ လေအေးလေးတွေ အခန်းထဲ ဝင်လာပြီး နွေအပူချိန် သက်သာစေဖို့ဆိုရင် ညဘက်အိပ်တဲ့အခါ ပြတင်းပေါက်လေးကို ဖွင့်ထားပေးပါ။ ပြတင်းပေါက်တိုင်းကို ဖွင့်ထားဖို့တော့ မလိုပါဘူး။ အိပ်ခန်းထဲက ပြတင်းပေါက်လောက်ပဲ ဖွင့်ထားရင်ကို အဆင်ပြေပါတယ်။ ကိုယ်အိပ်မယ့်နေရာနဲ့ အနီးဆုံးမှာ ရှိတဲ့ ပြတင်းပေါက်မျိုးပါ။

• ပန်ကာဖွင့်ထားပါ

ပန်ကာက ဈေးသက်သာပြီး ညဘက်တွေမှာလည်း အေးမြမှုကို ပေးပါတယ်။ ပန်ကာက အခန်းတွင်းက လေပူတွေကို အပြင်ကို ထွက်စေပြီး အခန်းတွင်းမှာ အေးမြတဲ့လေကို ဖြစ်ပေါ်စေပါတယ်။ တစ်ညတာလုံး အရှိန် သိပ်မပြင်းတဲ့ အနေအထားတဲ့ ပန်ကာလေး ဖွင့်ထားပေးတာက ညဘက်မှာ ကောင်းကောင်း အိပ်ပျော်စေမှာပါ။

• ရေများများ သောက်ပါ

ညဘက် မအိပ်ခင် နာရီပိုင်းလောက်အလိုမှာ ခန္ဓာကိုယ် အေးမြပြီး ရေဓာတ် ပြည့်ဝစေဖို့အတွက် ရေအေးအေး တစ်ခွက်လောက် သောက်ပေးပါ။ ရေများများ သောက်ပေးတာက ချွေးထွက်တာကြောင့် ဆုံးရှုံးသွားတဲ့ ရေဓာတ်ကို ပြန်လည် ပြည့်ဝစေဖို့ အားဖြည့်ပေးနိုင်မှာပါ။

• မအိပ်ခင်မှာ ရေကျက်သီးနွေးနဲ့ ရေချိုးပါ

ညဘက်မှာ အပူချိန်ကြောင့် ကောင်းကောင်း အိပ်မပျော်တာမျိုး မဖြစ်စေဖို့ဆိုရင်တော့ ညဘက် အိပ်ရာမဝင်ခင်မှာ နာရီပိုင်းအလိုမှာ ရေကျက်သီးနွေးနဲ့ ရေချိုးပေးပါ။ ဒီလို လုပ်ပေးတာက အရေပြားမှာ သွေးစီးဆင်းမှု ကောင်းစေပြီး ခန္ဓာကိုယ်မှာ အပူချိန် လျော့ကျစေဖို့ ထောက်ကူပေးပါတယ်။

• ရေခဲဗူး ထားအိပ်ပါ

အိပ်ရာထဲမှာ ဖြစ်ဖြစ် အိပ်ရာဘေးမှာ ဖြစ်ဖြစ် ရေခဲရေဗူး ဒါမှမဟုတ် ရေခဲဗူးလေး ထားပေးပါ။ ဒီလို ထားအိပ်တာက အိပ်ရာနားက အပူရှိန်ကို သက်သာစေပြီး နွေပူညမှာ ကောင်းကောင်း အိပ်ပျော်စေမှာပါ။

• အခန်းထဲမှာ မီးအရောင် မှိန်မှိန်ပဲ ထွန်းပါ

မီးလုံးတွေက အပူရှိန်ကို မြင့်တက်စေနိုင်ပါတယ်။ ဒါကြောင့် နွေညတွေမှာ ကောင်းကောင်း အိပ်ပျော်စေဖို့ဆိုရင် မီးလုံးတွေကို ပိတ်ထားပါ။ မီးတွေကို မလိုဘဲ မထွန်းပါနဲ့။ အခန်းကို အမှောင်ချထားလေလေ အပူ သက်သာလေလေပါ။

• လျှပ်စစ် ပစ္စည်းတွေကို ပိတ်ထားပါ

မီးလုံးတွေလိုပဲ လျှပ်စစ်ပစ္စည်းတွေကလည်း အပူချိန်ကို မြင့်တက်စေနိုင်ပါတယ်။ ဒါကြောင့် အခန်းထဲမှာ ညဘက် အပူချိန် မြင့်တာမျိုး မဖြစ်စေဖို့ဆိုရင်တော့ လျှပ်စစ်ပစ္စည်းတွေကို အိပ်ရာနဲ့ ဝေးဝေးမှာ ထားပေးပါ။ မဟုတ်ရင်လည်း မလိုတဲ့ လျှပ်စစ်ပစ္စည်းတွေကို ပိတ်ထားပေးပါ။

• ချည်သား အိပ်ရာခင်းတွေကို သုံးပါ

ညအပူရှိန်ကြောင့် အိပ်ရေးပျက်တာမျိုး မဖြစ်စေဖို့ဆိုရင် ချည်သားစစ်စစ်နဲ့ ချုပ်လုပ်ထားတဲ့ ခေါင်းအုံးစွပ်၊ ပေါင်တင်စွပ် နဲ့ အိပ်ရာခင်းတွေကို အသုံးပြုပေးပါ။ ဒီလို လုပ်ပေးတာက အေးမြပြီး ကောင်းကောင်း အိပ်ပျော်စေဖို့ ထောက်ကူပေးနိုင်မှာပါ။

ဒီနည်းလမ်းလေးတွေက နွေပူညတွေမှာ ကောင်းကောင်းအိပ်ပျော်စေဖို့ ထောက်ကူပေးနိုင်မှာပါ။