ဘိုးဘိုးဘွားဘွားတို့ ညဘက်မှာ ကောင်းကောင်းအိပ်ပျော်စေဖို့

အသက်ကြီးလာတဲ့ ဖေဖေမေမေ ဘိုးဘိုးဘွားဘွားတွေဆီက အများဆုံး ကြားရတဲ့ စကားတစ်ခုက ညဘက် ကောင်းကောင်း အိပ်လို့ မပျော်ဘူးဆိုတာပါ။ ဒီလိုမျိုး ညဘက်တွေမှာ ကောင်းကောင်း အိပ်မပျော်မှုကို ဘယ်လို ဖြေရှင်းပေးရမလဲလို့ တွေးမိနေပြီလား။ ဒါဆိုရင်တော့ ဆောင်းပါးလေးကို ဖတ်ကြည့်လိုက်ပါ။ ဆောင်းပါးလေးထဲမှာ ဘိုးဘိုးဘွားဘွားတို့ ညဘက်မှာ ကောင်းကောင်းအိပ်ပျော်စေဖို့ နည်းလမ်းလေးတွေကို ဖော်ပြပေးထားပါတယ်။

အသက်ကြီးသူတွေမှာ အရေးပါတဲ့ အိပ်စက်ခြင်း

လူတိုင်း အသက်အရွယ်တိုင်းမှာ အိပ်စက်မှုက အရေးပါပါတယ်။ ပြည့်ဝတဲ့ အိပ်စက်ချိန် မရရှိခြင်းက ကျန်းမာရေးကို ထိခိုက်စေနိုင်ပါတယ်။

အသက်အရွယ်အလိုက် အိပ်ချိန် လိုအပ်ချက်က ကွာခြားနိုင်ပါတယ်။ ကလေးငယ်တွေ နဲ့ အသက်အရွယ်ကြီးရင့်သူတွေဟာ လူလတ်ပိုင်းတွေထက် အိပ်ချိန်က ပိုမို လိုအပ်ပါတယ်။ အရွယ်ရလာသူတွေ အနေနဲ့ တစ်ညတာမှာ အိပ်ချိန် ၇ နာရီကနေ ၉ နာရီကြား ရရှိဖို့ လိုအပ်ပါတယ်။ ဒါပေမယ့် အသက်ရလာလေလေ အိပ်ပျော်ဖို့က ခက်လာလေလေပါပဲ။

ဒီလို အိပ်စက်မှု နည်းလာတာကြောင့် လူကြီးတွေမှာ မှတ်မိနိုင်စွမ်း ကျဆင်းတာလိုမျိုး ကျန်းမာရေးပြဿနာကို ရင်ဆိုင်ရတာပါ။ ဒီတော့ ဘိုးဘိုးဘွားဘွားတွေအနေနဲ့ လိုအပ်တဲ့ အိပ်စက်ချိန်ကို ပြည့်ပြည့်ဝဝ ရရှိစေဖို့ လိုက်နာသင့်တဲ့ နည်းလမ်းလေးတွေကို ပြောပြပေးချင်ပါတယ်။

ဘိုးဘိုးဘွားဘွားတို့ ညဘက်မှာ ကောင်းကောင်းအိပ်ပျော်စေဖို့

ဘိုးဘိုးဘွားဘွားတို့ ညဘက်မှာ ကောင်းကောင်းအိပ်ပျော်စေဖို့ လိုက်နာရမယ့် နည်းလမ်းလေးတွေကတော့

• အိပ်ချိန် သတ်သတ်မှတ်မှတ် ထားပါ

ခန္ဓာကိုယ်မှာ ဇီဝနာရီရှိတဲ့အတွက် အိပ်ချိန်၊ ထချိန်က ပုံမှန် ဖြစ်နေတာပေါ့။ ပိတ်ရက်ပါဆိုမှ စောစောနိုးနေတယ်ဆိုတာ ဒီအချက်တွေကြောင့်ပါ။

ဒီတော့ ဘိုးဘိုးဘွားဘွားတွေ အနေနဲ့ ညဘက်အိပ်မရတာ ကင်းပြီး အိပ်ပျော်စေဖို့ ဆိုရင်တော့ အိပ်ရာဝင်ချိန်ကို ပုံမှန်လေး သတ်မှတ်ထားပါ။

• နေ့လယ်ခင်း အိပ်ချိန် လျှော့ပါ

နေ့လယ်ခင်း အိပ်တာက ညဘက် အိပ်ပျော်ဖို့ ခက်ပါတယ်။ ဒါကြောင့် ညဘက် အိပ်ပျော်စေဖို့ ဆိုရင် နေ့လယ်ခင်း အချိန်အကြာကြီး အိပ်တာမျိုး မလုပ်ပါနဲ့။ မိနစ် ၂၀၊ နာရီဝက်လောက်ပဲ မှေးပေးပါ။

• ကဖင်း လျှော့ပါ

ကဖင်းပါဝင်နေတဲ့ စားစရာ သောက်စရာတွေ ဖြစ်ကြတဲ့ ကော်ဖီ၊ လက်ဖက်ရည်၊ ချောကလက်၊ လက်ဖက်သုပ်၊ ကိုလာ၊ စွမ်းအားဖြည့် အချိုရည်တွေက ညဘက် အိပ်ပျော်စေဖို့ ခက်ပါတယ်။ ဒါကြောင့် ဒါတွေကို အိပ်ရာမဝင်ခင် ၄ နာရီ ကနေ ၆ နာရီအလိုမှာ ကဖင်းပါတဲ့ အရာတွေကို မစားသောက်ပါနဲ့။

• အိပ်ရာမဝင်ခင် နားနားနေနေ နေပါ

အိပ်ရာထဲ ဝင်ပေမယ့် အိပ်မပျော်ဘူး ဖြစ်နေတာက မိနစ် ၂၀ ကြာပြီဆိုရင်တော့ ဆက်အိပ်မနေတော့ဘဲ စာဖတ်တာ၊ သီချင်းနားထောင်တာ၊ တရားထိုင်တာမျိုးတွေ လုပ်ဆောင်ပေးပါ။ အိပ်ချင်စိတ် ဖြစ်လာတဲ့အထိ စာဖတ်တာ၊ သီချင်းနားထောင်တာမျိုး လုပ်ပေးပါ။

• အိပ်ရာမဝင်ခင် ရေနွေးနွေးနဲ့ ချိုးပါ

ညဘက်မှာ ကောင်းကောင်း အိပ်ပျော်စေဖို့ ဆိုရင် ညဘက် အိပ်ရာမဝင်ခင်မှာ ရေနွေးနွေးလေးနဲ့ ရေချိုးပေးပါ။ ပြီးရင်တော့ သက်သောင့် သက်သာဖြစ်စေမယ့် အဝတ်အစားတွေကို ဝတ်ဆင်ပြီး အိပ်ပေးပါ။

• အစားအများကြီး မစားပါနဲ့

အိပ်ရာဝင်ချိန်နဲ့ နီးနီး အစား အများကြီး စားတာက ညဘက်မှာ ကောင်းကောင်း အိပ်ပျော်စေဖို့ ခက်ပါတယ်။ ဒါကြောင့် အိပ်မပျော်တာမျိုး မဖြစ်စေဖို့ ဆိုရင် အိပ်ရာဝင်ခါနီးမှာ အစားတွေ အများကြီး မစားပါနဲ့။

• အရည်တွေ လျှော့သောက်ပါ

ညနေစောင်းလောက်ကစပြီး ရေအပါအဝင် အရည်မှန်သမျှကို တတ်နိုင်သမျှ လျှော့သောက်ပါ။ ညနေဘက်မှာ အရည်တွေ အများကြီး သောက်တာ ဆီးအိမ်တင်းပြီး ညဘက်တွေမှာ ဆီးခဏခဏ ထသွားရပါတယ်။ ဒါကလည်း ကောင်းကောင်း အိပ်ပျော်ဖို့ ခက်ပါတယ်။

• ညနေဘက်မှာ လေ့ကျင့်ခန်း ပြင်းပြင်းထန်ထန် မလုပ်ပါနဲ့

လေ့ကျင့်ခန်း လုပ်တာက ကောင်းကောင်း အိပ်ပျော်စေဖို့ ခက်တယ်ဆိုပေမယ့် ညနေဘက်မှာ လေ့ကျင့်ခန်း ပြင်းပြင်းထန်ထန် လုပ်တာက အိပ်စက်မှုကို အနှောင့်အယှက် ဖြစ်စေနိုင်ပါတယ်။

ဒီနည်းလမ်းလေးတွေကို လုပ်ကြည့်ပေမယ့် အိပ်ပျော်ဖို့ ခက်နေမယ်ဆိုရင် ဆရာဝန်နဲ့ ပြသဖို့ အကြံပြုလိုက်ပါရစေ။