ရုံးမှာ အမြဲထိတွေ့နေရတဲ့ ရောဂါပိုးမွှားအများဆုံး အရာတွေ

လက်ဆေးပါ၊ လက်ဆေးပါ ဆိုတဲ့အမှာစကားတွေက အလကားမဟုတ်ဘူးနော်။ မနက်အိပ်ရာထတည်းကစောင်ကိုခွာမယ်၊ခြင်ထောင်ကိုမမယ်၊ မျက်လုံးကိုပွတ်မယ်၊ ဒီလက်နှစ်ဖက်နဲ့ပဲမလား။ ဘာလုပ်လုပ် ဘာကိုင်ကိုင် ဒီလက်ချောင်းတွေ၊လက်ဖဝါးတွေနဲ့ မထိတွေ့ဘဲ မပြီးပါဘူး။ တစ်နေ့တာမှာ ဒီလောက်ထိတွေ့မှုများတဲ့အစိတ်အပိုင်းကို ဘာလို့များသန့်တယ်ထင်နေရတာလဲ။ အမယ် လာသေးတယ်…ငါ့လက်ကဆေးပြီးသားတဲ့။ ဘယ်တုန်းကလဲဆိုရေချိုးတုန်းကလေ ဆိုတာမျိုး။

အခုပြောချင်တာက ကိုယ့်အိမ်မှာထက်တောင်နေရချိန်ပိုများနေတဲ့ လုပ်ငန်းခွင်ရုံးခန်းမှာ သန့်ရှင်းမှုဂရုစိုက်မိဖို့ပါ။ မနက်စောစော ရုံးကိုပြေးလာမယ်၊ အချိန်မရလို့ မနက်စာကိုအပြေးအလွှားစားမယ်၊ ရောက်တာနဲ့ အလုပ်တွေဝင်လုပ်မယ်။ ဒါတော်တော်များများလုပ်နေကြ ပရိုစီဂျာပဲ။ မနက်မိုးလင်းကနေ ညမှောင်တဲ့အထိ ရှိနေခဲ့တဲ့ ရုံးမှာ လက်ဘယ်နှကြိမ်ဆေးခဲ့သလဲ။ရောဂါဘယကင်းစေဖို့အတွက် သန့်ရှင်းမှုကိုဂရုစိုက်ဖို့ ဘာလို့အရေးကြီးတာလဲ ဆက်ဖတ်ကြည့်နော်။ရောဂါပိုးမွှားတွေအများဆုံးရှိနိုင်တဲ့ ရုံးကနေရာတွေကို သိရင် ယူတို့ လက်မဆေးဘဲ မနေနိုင်တော့လောက်ပါဘူး။

ဓါတ်လှေကားခလုတ်

အပေါ်တက်မယ်၊အောက်ဆင်းမယ်နဲ့ ဓါတ်လှေကားခလုတ်လေးတွေကနေ့တိုင်းအလုပ်လုပ်ရပါတယ်။ အထပ်တိုင်းမှာ လူရှိ၊ရုံးခန်းတွေရှိနေတော့ ခလုတ်တိုင်းကို ထိတွေ့သူအများကြီးပေါ့။ မမြင်ရပေမယ့် ဒီခလုတ်တွေမှာရောဂါပိုးမွှားတွေလည်း အများကြီးရှိနေမှာပါ။

တံခါးလက်ကိုင်

အလုပ်လာတက်တဲ့လူတိုင်း ရုံးခန်းထဲဝင်ချင်ရင် တံခါးလက်ကိုင်ကို ထိရကိုင်ရမှာပဲ။ လူတွေများလေရောဂါပိုးမွှား၊ ဘက်တီးရီးယားတွေက တစ်ယောက်လက်ကနေ တစ်ယောက် ကူးပြောင်းနိုင်လေပေါ့။ ဒါ့ကြောင့် ကိုယ့်လက်ကို သန့်ရှင်းပါ၊ လက်ကိုင်ကိုပါ နေ့တိုင်းသန့်စင်ပေးဖို့ သန့်ရှင်းရေးတာဝန်ယူထားသူကိုသေချာမှာထားပါ။

ကီးဘုတ်၊မောက်စ်

ကွန်ပျူတာရှေ့ထိုင်နေရင်း နှာချေမယ်၊ အစားစားမယ်၊ အမှုန်တွေကျမယ်၊ ဖုန်တွေကပ်မယ်။ပြီးရင် ကိုယ့်လက်ချောင်းတွေ ဆယ်ချောင်းလုံးနဲ့ ထိပြီးစာရိုက်မယ်။ အမြဲနော်။ပြီးရင် ကိုယ့်ပါးစပ်ထဲတခုခုထည့်တဲ့အခါ လက်ထဆေးဖြစ်လား။ ဥပမာဆေးလိပ်ထသောက်မယ်၊ဘေးနားက စားစရာတစ်ခုခုကိုယူစားမယ်၊ စားရင်းလည်း အရေးကြီးလို့ စာပြန်ရိုက်မယ်။ပြီးရောပဲ ကီးဘုတ်မှာကပ်နေသမျှ အမှုန်အမွှား၊ ဘက်တီးရီးယားတွေ ပါးစပ်ထဲအကုန်ရောက်ရော။

ဖုန်း

ရုံးကအထိုင်ဖုန်းဆို ခလုတ်တွေနှိပ်နှိပ်ပြီး ဆက်မယ်။ ကိုယ့်ရဲ့စမတ်ဖုန်းလေးကိုလည်း touch screen နဲ့ သုံးမယ်။မြင်ရတဲ့ ဖုန်တွေသာ သုတ်ထားတာ မမြင်ရတဲ့ဘက်တီးရီးယားတွေကျ ကပ်ကျန်ခဲ့မှာပဲ။

ရုံးသုံးစက်ပစ္စည်း

ရုံးမှာရှိတဲ့ ပရင့်တာတွေ၊ မိတ္တူကူးစက်၊ ဖက်စ် စတာတွေမှာအပြင် တခြားအသုံးအဆောင်တွေမှာပါ ပိုးမွှားလေးတွေရှိနေနိုင်တာပဲ။ ဖုန်သုတ်ရုံနဲ့မလုံလောက်ပါဘူး။ဖြစ်နိုင်ရင် ပိုးသတ်နိုင်တဲ့sanitizing wipesလေးတွေနဲ့ ခလုတ်ကို ကိုယ်သုံးခါနီး သန့်စင်ပေးပါ။

Water-cooler

ရေနွေးဖြစ်ဖြစ်၊ ရေအေးဖြစ်ဖြစ် ရေသောက်တိုင်း watercooler ခလုတ်နှိပ်ရမှာပဲ။ အထူးသဖြင့် အအေးမိ၊တုပ်ကွေးရာသီမှာရောဂါပိုးမပြန့်ပွားစေဖို့ သန့်ရှင်းမှုပိုဂရုစိုက်ပါ။

ဘေစင်

အိမ်မှာလိုပါပဲ လက်ပေါင်းစုံ၊ အစားအစာအကြွင်းအကျန်ပေါင်းစုံနဲ့ထိတွေ့နေတဲ့ ဘက်တီးရီးယားပိုးမွှားအသိုက်တစ်ခုဖြစ်နေပါတယ်။ရေဘုံဘိုင်ခေါင်းကို ထိကိုင်တာနဲ့တင်လုံလောက်နေပါပြီ။ရေဘားကိုဆေးကြောသူကလည်း နည်းပါတယ်။

ပန်းကန်ဆေးရေမြှုပ်

ရေလည်းစိုနေတယ်၊ရေလည်းစုပ်ယူထားနိုင်တယ်ဆိုတော့ ရသမျှအကုန် စုဆောင်းမွေးမြူထားတာရေမြှုပ်ပါပဲ။ အများစုမှာ ရှိနိုင်တာကE. coliနဲ့ salmonella ဘက်တီးရီးယားတွေပါ။ ဒါ့ကြောင့်ရေမြှုပ်တစ်ခုကို ရက်အကြာကြီးမသုံးသင့်ပါဘူး။နောက်တစ်နည်းကရေမြှုပ်ကိုရေနွေးနဲ့လောင်းစိမ်တာ ဒါမှမဟုတ် မိုက်ခရိုဝေ့ဖ်ထဲခဏထည့်တာ ပိုးသေစေနိုင်တယ်။ နှစ်ပတ်တစ်ကြိမ်တော့ အသစ်လဲပါ။

အိမ်သာ

လူတိုင်းမဝင်ဘဲမနေနိုင်တာ ရုံးက သန့်စင်ခန်းပေါ့။ အိမ်သာတက်ပြီး လက်ကိုဆပ်ပြာနဲ့ဆေးတယ်ပဲထား။ အိမ်သာတံခါးလက်ကိုင်ကိုရော ဘယ်နှကြိမ်သန့်စင်ထားဖူးသလဲ စဉ်းစားနော်။ရေဆွဲခလုတ်တွေ၊ရေပိုက်ခေါင်းတွေကိုလည်းဆေးကြောသန့်စင်ပါ။

ဒါတွေဖတ်ပြီး ရုံးကိုလက်အိတ်ကြီးစွပ်ပြီးလည်းမလာနဲ့ဦးနော်။ ဒီအချက်တွေကိုသိထားတယ်ဆိုရင် သန့်ရှင်းရေးလုပ်ဖို့မေ့လျော့ကျန်နေတတ်တဲ့နေရာတွေကို ပိုဂရုစိုက်လို့ရတာပေါ့။ဖြစ်နိုင်ရင်ရေမလိုလက်သန့်ဆေးရည်လေးတွေ၊ sanitizing wipesလေးတွေဆောင်ထားပါ။ လက်ခဏခဏဆေးပြီး အသားအရေမထိခိုက်ရအောင် hand gelလေးတွေလည်း ရုံးမှာ ထားထားပေါ့။

Hello Sayarwon Panel မှ အချက်အလက်များ စစ်ဆေးထားပါသည်။ Dr. Htet Htet Zaw Win မှ ရေးသားသည်။ နောက်ဆုံးအသစ်ပြင်ဆင်သည့်ရက်စွဲမှာ 28/10/2021 ဖြစ်ပါသည်။