ကိုယ်အလေးချိန်ကို မြန်မြန်ဆန်ဆန် လျှော့ချနိုင်မယ့် နည်းလမ်းတွေ များစွာ ရှိပါတယ်။ ဒါပေမယ့် နည်းလမ်းအများစုဟာတော့ ဆာလောင်ခြင်း၊ မတင်းတိမ်ခြင်း စတာတွေကို ကြုံတွေ့စေပါတယ်။ ခိုင်မာတဲ့ စိတ်ဓာတ်မရှိရင် ဆာလောင်မှုဒဏ်ကို မခံနိုင်ဘဲ ကိုယ်အလေးချိန် လျှော့ချတဲ့ အစီအစဉ်တွေကို ကျောခိုင်းသွားတတ်ပါတယ်။
ကိုယ်အလေးချိန်လျှော့ချရာမှာ အဓိကစဉ်းစားရမယ့် အချက်တွေဟာ အောက်ပါအတိုင်း ဖြစ်ပါတယ်။
– အစားအသောက်ကို သိသာစွာ လျှော့ချခြင်း
– ဆာလောင်မှုမရှိစေဘဲ မြန်ဆန်စွာ လျှော့ချခြင်း
– တစ်ချိန်တည်းမှာ ဇီဝဖြစ်ပျက်မှုဖြစ်စဉ်ကို တိုးတက်ကောင်းမွန်စေခြင်း
စတာတွေပဲ ဖြစ်ပါတယ်။
အခုဆက်လက်ဖော်ပြမှာကတော့ ကိုယ်အလေးချိန်ကို မြန်မြန်ဆန်ဆန်နဲ့ ဘယ်လိုလျှော့ချသင့်လဲ ဆိုတဲ့ အဆင့်သုံးဆင့် ဖြစ်ပါတယ်။
၁။ သကြားဓာတ်၊ ကစီဓာတ်ကို လျှော့ချပါ။
ကိုယ်အလေးချိန်လျှော့ချရာမှာ အရေးကြီးဆုံးအချက်ကတော့ သကြားနဲ့ ကစီဓာတ်ကို လျှော့ချဖို့ပါပဲ။ အဲဒီအခါ ကယ်လိုရီလည်း လျော့နည်းသွားမှာ ဖြစ်ပါတယ်။ ကိုယ်ခန္ဓာရဲ့ စွမ်းအင်အတွက် လောင်ကျွမ်းဖို့ ကစီဓာတ်မရှိရင် သိုလှောင်ထားတဲ့ အဆီဓာတ်တွေကို လောင်ကျွမ်းစေမှာဖြစ်ပါတယ်။
ကစီဓာတ်ကို လျှော့ချခြင်းအားဖြင့် ရရှိနိုင်တဲ့ အကျိုးကျေးဇူးကတော့ အင်ဆူလင်ပမာဏကို လျော့နည်းသွားစေခြင်း ဖြစ်ပါတယ်။ အဲဒီအခါ ကျောက်ကပ်ကနေ ဆိုဒီယမ်များကိုထွက်လာစေပြီး ရေကိုပါ စွန့်ထုတ်ပါတယ်။ ဒီနည်းနဲ့ လိုတာထက်ပိုနေတဲ့ ရေကြောင့် တက်နေတဲ့ ကိုယ်အလေးချိန် တစိတ်တပိုင်းကို လျော့ကျစေပါတယ်။
အဆိုပါအနေအထားနဲ့ ကိုယ်အလေးချိန်လျှော့မယ်ဆိုရင် တပတ်အတွင်းမှာတင် အဆီနဲ့ ရေဓာတ်တွေကြောင့် ပိုနေတဲ့ ကိုယ်အလေးချိန်များကို လျှော့ချပေးနိုင်ပါတယ်။ ကစီဓာတ်ပါဝင်မှုနည်းတဲ့ အစားအစာတွေကိုပဲ ဗိုက်ဝတဲ့အထိ ရွေးချယ်စားသောက်သင့်ပါတယ်။ စစချင်းမှာ ဆာလောင်မှုဒဏ်ကို ကြုံတွေ့နိုင်ပေမယ့် နောက်ပိုင်းမှာ ကယ်လိုရီနည်းတဲ့ စားစရာတွေကို ရွေးချယ်စားသုံးရာကနေ အကျင့်ဖြစ်သွားပါလိမ့်မယ်။
၂။ ပရိုတိန်း၊ အဆီဓာတ်နှင့် အသီးအရွက်များကို မျှတစွာ စားသုံးပါ။
တစ်နပ်စာစားသုံးတိုင်းမှာ ပရိုတိန်းရရှိစေတဲ့ ရင်းမြစ်၊ အဆီဓာတ်ရစေတဲ့ ရင်းမြစ်နဲ့ ကစီဓာတ်နည်းတဲ့ အသီးအရွက်တွေကို မျှတစွာ စားသုံးရမှာ ဖြစ်ပါတယ်။ နေ့စဉ် စားသုံးရာမှာ ကစီဓာတ်ကို ၂၀-၅၀ ဂရမ်နှုန်းနဲ့ ကိုက်ညီအောင် စားသုံးသင့်ပါတယ်။ ပရိုတိန်းဓာတ်ရရှိစေတဲ့ ရင်းမြစ်တွေကတော့ အောက်ပါအတိုင်း ဖြစ်ပါတယ်။
- အသား။ အမဲသား၊ ကြက်၊ ဝက်၊ ဆိတ်
- ငါးအမျိုးမျိုး/ပင်လယ်စာ။ ဆော်လမွန်ငါး၊ ထရောက်ငါး၊ ပုစွန်အမျိုးမျိုး
- ဥအမျိုးမျိုး (အနှစ်လည်းပါတဲ့ ဥတစ်ခုလုံးကို စားသုံးတာ ပိုကောင်းပါတယ်)
ပရိုတိန်းပါဝင်မှုမြင့်မားတဲ့ စားသောက်မှုပုံစံဟာ အစားကို မွတ်သိပ်တောင့်တစွာ စားသောက်ချင်စိတ်ကို လျှော့ချပေးနိုင်ပါတယ်။ ညဖက်တွေမှာ သရေစာစားချင်စိတ်ကို ထက်ဝက်လောက် လျှော့ချပေးပါတယ်။ တစ်နေ့တာ အစားအစာမှာ ပရိုတိန်းဓာတ် ထည့်သွင်းခြင်းကြောင့် ကယ်လိုရီလည်း နည်းသွားပါလိမ့်မယ်။
ကစီဓာတ်နည်းတဲ့ အစားအစာတွေကတော့ ပန်းပွင့်စိမ်း၊ ပန်းဂေါ်ဖီ၊ ဟင်းနုနွယ်၊ ခရမ်းချဉ်သီး၊ ကိုက်လန်၊ ဘရပ်ဆဲပန်းပွင့်၊ ဂေါ်ဖီထုပ်၊ မုန်ညင်း၊ သခွားသီး စတာတွေ ဖြစ်ပါတယ်။
အဆိုပါ ကစီဓာတ်နည်းတဲ့ အသီးအရွက်တွေကို ပိုမိုစားသောက်သင့်ပါတယ်။ တစ်ရက်မှာ ကစီဓာတ်ကို ၂၀ မှ ၅၀ ထက် မပိုစေဘဲ ရရှိစေနိုင်ပါတယ်။ အသီးအရွက်တွေမှာ အမျှင်ဓာတ်၊ ဗီတာမင်နဲ့ သတ္တုဓာတ်တွေ ပါဝင်စေတာမို့ ကျန်းမာရေးအတွက် အထူးကောင်းမွန်စေပါတယ်။
အဆီဓာတ်ရရှိစေတဲ့ ရင်းမြစ်တွေကတော့
– သံလွင်ဆီ၊
– အုန်းဆီ၊
– ထောပတ်သီးဆီ
– ထောပတ် စတာတွေပဲ ဖြစ်ပါတယ်။
၃။ လေ့ကျင့်ခန်းလုပ်ပါ (အလေးမ ပါ)
လေ့ကျင့်ခန်းပုံမှန်လုပ်ခြင်းဟာ ကိုယ်အလေးချိန် လျှော့ချရာမှာ အထောက်အကူပြုပါတယ်။ အကောင်းဆုံးကတော့ တစ်ပတ်မှာ ၃-၄ ကြိမ်ခန့် Gym သွားဆော့ဖို့ပါပဲ။ အားကစားခန်းမမှာ အလေးမ လေ့ကျင့်ခန်းကို အပေါ့စားလောက်ကနေ စတင်လေ့ကျင့်သင့်ပါတယ်။ အလေးမခြင်းဟာ ကယ်လိုရီအများအပြား လောင်ကျွမ်းစေဖို့နဲ့ ဇီဝဖြစ်ပျက်မှုကို နှေးမသွားစေဖို့ အထောက်အကူ ပြုပါတယ်။
အလေးမခြင်း မလုပ်ချင်ရင် လမ်းလျှောက်ခြင်း၊ လမ်းအမြန်လျှောက်ခြင်း၊ ပြေးခြင်း၊ စက်ဘီးစီးခြင်း၊ ရေကူးခြင်း စတာတွေ ပြုလုပ်နိုင်ပါတယ်။ အရေးကြီးတာက ပုံမှန် ပြုလုပ်ဖို့ပါပဲ။
[embed-health-tool-bmi]
