ဗီတာမင် စီ အကြောင်းဘာတွေသိထားလဲ

ကျွန်တော် လူတော်တော် များများကို ဗီတာမင် စီ ကဘာအတွက်ကောင်းလဲ မေးရင် တော်တော်များများ ပြန်ဖြေတာကတော့ ဝိတ်ကျစေတယ်လို့ပဲ ဖြေတာများပါတယ်။ အခုထိ လေ့လာတွေ့ရှိချက်များ အရ ဗီတာမင် စီ က ကိုလက်စထရော ကျစေတယ်လို့ပဲ စာတမ်းတွေ ရှိပါသေးတယ်။ ဝိတ်ကျတယ်လို့တော့ အခုထိရှာမတွေ့သေးပါဘူး။

တခြားသော လူသိပ်မသိကြသေးတဲ့ ဗီတာမင် စီ ရဲ့ကောင်းကျိုးလေးတွေ ရှိပါသေးတယ်။

• အသားအရေကို တင်းရင်းစေခြင်း
• အရိုးဖွဲ့စည်းတည်ဆောက်မှုကို အားပေးခြင်း
• အနာကျက်လွယ်စေခြင်း
• ခန္ဓါကိုယ်အတွင်းရှိ ကိုလက်စထရောများကို အဆီချေဖျက်ရာတွင် အသုံးလိုတဲ့သည်းခြေရည်ြဖစ်အောင် ပြောင်းလဲပေးနိုင်ခြင်း။
• လူတွေရဲ့စိတ်ကို ပျော်အောင်၊ စိတ်ပူပန်ေအာင်၊ စိတ်ဓါတ်ကျအောင်စတာတွေကို ထိန်းချုပ်ပေးနေတဲ့ ဆီရိုတိုနင် (Serotonin) လို့ခေါ်တဲ့ ဓါတ်တစ်မျိုးထွက်အောင်လည်း အားပေးပါတယ်။ အကြမ်းဖျင်းအားဖြင့် Serotonin (ဆီရိုတိုနင်) နည်းရင် စိတ်ဓါတ်ကျဝေဒနာခံစားရတတ်ပါတယ်။
• ဓါတ်တိုးဆန့်ကျင်သတ္တိရှိတဲ့ အတွက် ကင်ဆာရောဂါ ဖြစ်ပွားမှုကို လျှော့ကျစေနိုင်ခြင်း။

ကိုယ်ခံစွမ်းအား မြှင့်တင်ပေးတဲ့အတွက် ရာသီပေါ်တုပ်ကွေးရောဂါ နှင့် အခြားသော ဘတ်တီးရီးယား၊ ဗိုင်းရပ်စ် ရောဂါပိုးမွှားများကိုလည်း ကာကွယ်ပေးပါတယ်။

• နှလုံးသွေးကြောကျဉ်းရောဂါကို ကာကွယ်ပေးခြင်း
• ဆီးချိုရောဂါကို ကာကွယ်ပေးခြင်း
• ဦးနှောက်နှင့် အာရုံကြောဆိုင်ရာ ရောဂါများ(Neurodegenerative diseases) ကိုကာကွယ်ပေးခြင်း။

ဗီတာမင် စီ ကဘာတွေစားရင် ရမလဲ

အများစု သိထားကြတဲ့အတိုင်း ချဉ်တဲ့အသီးတွေဆို ဗီတာမင် စီ ကြွယ်ဝ ပါတယ်။ တခြားကျွန်တော်တို့ မထင်မှတ်ထားတဲ့ အစားအစာမှာလည်း ဗီတာမင် C ကြွယ်ဝကြပါတယ်။ ဥပမာ-

• ငရုတ်ပွ အနီ/အစိမ်း
• စတော်ဘယ်ရီ
• လိမ္မော်၊ သံပုရာ
• ခရမ်းချဉ်သီး
• ပန်းဂေါ်ဖီစိမ်း
• ဇီးဖြူသီး
• ကိုက်လန်
• မာလကာသီး
• ဂရိတ်ဖရုသီး စတာတွေ စားပေးလို့ရပါတယ်။

လူ့ခန္ဓါကိုယ်မှာ ပုံမှန် ဘယ်လောက် ရှိလဲ

သွေးထဲမှာ 60-100 mmol/dl ရှိပါတယ်။

ဗီတာမင် C အများကြီးစားရင် ဘာတွေဖြစ်တတ်လဲ

အဓိက ပြဿနာကတော့ ဗိုက်အောင့် ဗိုက်နာဖြစ်ပြီး ဝမ်းခဏခဏသွားတာမျိုးဖြစ်တတ်ပါတယ်။ ဒီလိုမျိုးကလည်း ဗီတာမင် စီ အားဆေးတွေကို လိုတာထက်ပိုသောက်နေတဲ့ လူတော်တော်များများမှာဖြစ်လေ့ရှိပါတယ်။ အဲ့ဒီလိုဖြစ်လာရင်တော့ ဆေးသောက်တာကို ရပ်လိုက်သင့်ပါတယ်။ သောက်တာ ရပ်ပြီး ၂ရက်၊ ၃ ရက်နေတာနဲ့ ပုံမှန် ပြန်ဖြစ်သွားပါ လိမ့်မယ်။

ဘယ်လို လူတွေ မှာ ဗီတာမင် C ချို့တဲ့လေ့ရှိလဲ

• အရက် အလွန်အကျွံသောက်သုံးသူများ
• ဆေးလိပ်သောက်သူများ
• နာမကျန်းဖြစ်နေသူများ
• ပိုးသတ်ဆေး သောက်နေသူများ
• အနာသက်သာဆေးသောက်နေသူများ
• ဓါတ်ဆီ၊ ရေနံဆီတွေ နှင့် အမြဲထိတွေ့ကိုင်တွယ်နေရသူများ
• သတ္တုတွင်း၊ သတ္တုပစ္စည်းများ နှင့် ထိတွေ့ကိုင်တွယ်နေရသူများ။

အထက်ဖော်ပြပါ ဗီတာမင် စီ ချို့တဲ့နိုင်တဲ့ သူများအနေနဲ့ သာမန်လူထက် ဗီတာမင်စီ ကြွယ်ဝတဲ့အစားအစာများ ပိုစားပေးဖို့လိုပါတယ်။ လိုအပ်မှသာဆေးဝါး အကူအညီကို ဆရာဝန် နှင့် သေချာဆွေးနွေးတိုင်ပင်ပြီးမှသာ သောက်ဖို့ အကြံပြုချင်ပါတယ်။

လေးစားစွာဖြင့်

ဒေါက်တာ ညီညီကျော်

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။