သင်္ဘောစေ့ရဲ့ အကျိုးပြုအာနိသင် (၅) မျိုး

ရာသီဥတုပူတဲ့အချိန် အသီးအနှံချိုချိုလေးနဲ့မှ ရင်အေးကြတာနော်။ သင်္ဘောသီးက ချိုလည်းချို ဝမ်းလည်းမှန်စေတယ်။အမျှင်ဓါတ်၊ကယ်လ်စီယမ်၊သံဓါတ်နဲ့ ဗီတာမင်တွေများစွာပါဝင်တဲ့အတွက် အကျိုးကျေးဇူးများလှတဲ့ အသီးတစ်မျိုးဖြစ်ပါတယ်။ သူ့ရဲ့ထင်ရှားတဲ့အာနိသင်ကတော့ အူတွင်းလုပ်ဆောင်ချက်ကောင်းစေတယ်(ဝမ်းမှန်စေတယ်)၊ကိုယ်ခံအားကောင်းစေတယ်။

အသီးက ချိုမြပြီးရင်အေးစေလို့ အချိုပွဲတွေ၊ အချိုရည်တွေအဖြစ် စားသုံး၊သောက်သုံးကြပေမယ့် သင်္ဘောစေ့ကိုတော့ သန်ကျစေတယ်လို့ယုံကြည်ပြီးစားသုံးသူအနည်းငယ်သာရှိပါတယ်။ အများစု ကတော့ သူ့ရဲ့အကျိုးကျေးဇူးတွေကိုမသိကြတဲ့အတွက်၊ အရသာမရှိတဲ့အတွက်၊ စားလို့မရဘူးထင်တဲ့အတွက် စွန့်ပစ်ကြတာဖြစ်ပါတယ်။

သင်္ဘောစေ့ရဲ့ ဆေးဖက်ဝင်အာနိသင် (၅) မျိုး

(၁) ကျောက်ကပ်ကို ကာကွယ်ပေးတယ်

သင်္ဘောစေ့ကိုစားခြင်းအားဖြင့် ကျောက်ကပ်နဲ့သက်ဆိုင်တဲ့ပြဿနာတွေကို ကာကွယ်ပေးပြီး ကျောက်ကပ်ရောဂါခံစားနေရသူတွေအတွက်လည်း ကုသမှုမှာအထောက်အကူပေးပါတယ်။ တစ်နေ့ကို ၇ စေ့လောက်ဝါးစားပေးရုံနဲ့လုံလောက်ပါတယ်။

(၂) အသည်းကိုသန့်စင်ပေးတယ်

အသည်းရဲ့တာဝန်က ခန္ဓါကိုယ်ထဲက အဆိပ်အတောက်ဓါတ်တွေကို စစ်ထုတ်ပေးပြီး ရောဂါတွေရန်က ကာကွယ်ပေးရတဲ့ အရေးကြီးအစိတ်အပိုင်းဖြစ်ပါတယ်။ အဲသည်အသည်းက မကောင်းတဲ့အခါ နာတာရှည်ရောဂါတွေဖြစ်လာစေနိုင်ပါတယ်။ ဒါ့ကြောင့်ပဲ အသည်းသန့်စင်ဖို့က အရေးကြီးတာပါ။ သင်္ဘောစေ့က အသည်းပြဿနာ၊ အထူးသဖြင့် အသည်းခြောက်ခြင်းတို့မှာ အရမ်းကိုအကျိုးပြုတဲ့အာနိသင်ရှိပါတယ်။ သင်္ဘောစေ့ ၅ စေ့ကိုကြိတ်ပြီး သံပရာရည်တစ်ဇွန်းကိုရော၊ တစ်နေ့နှစ်ကြိမ် တစ်လကြာအောင်သောက်ပေးနိုင်ပါတယ်။

(၃) အူကျန်းမာရေးကို ကောင်းစေတယ်

ကပ်ပါးပိုးမွှားတွေကိုသေစေတဲ့အင်ဇိုင်းတွေ ပါဝင်မှုများတဲ့အတွက် အူကျန်းမာရေးကိုကောင်းမွန်စေပါတယ်တဲ့။ carpaine လို့ခေါ်တဲ့ anthelmintic alkaloid ကြောင့် အူတွင်းက ကပ်ပါးပိုးတွေကို ရှင်းလင်းပေးနိုင်ပါတယ်။ ဒါ့ကြောင့်ပဲ သန်ကောင်၊တုတ်ကောင်တွေကို ကျစေနိုင်တယ်လို့ သိထားကြတာဖြစ်ပါတယ်။ သင်္ဘောစေ့ကိုအခြောက်ခံပြီးထောင်းကြိတ်ပါ။ ရလာတဲ့အမှုန့်တစ်ဇွန်းကို ရေနဲ့ဖျော်ပြီးဆူအောင်တည်ပါ။ ပြုတ်ရည်ကို အအေးခံပြီး ပျားရည်ထည့်ပြီးဖြစ်ဖြစ်၊ မထည့်ဘဲဖြစ်ဖြစ် တစ်နေ့ နှစ်ကြိမ်မှ သုံးကြိမ်သောက်သုံးနိုင်ပါတယ်။

(၄) အစာချေစနစ်ကို အကာအကွယ်ပေးတယ်

သင်္ဘောစေ့ဟာ ဘက်တီးရီးယားကိုသေစေပြီး ရောင်ရမ်းမှုကိုလျော့ကျစေတဲ့အာနိသင်တွေကြောင့် အစာချေစနစ်ကိုကောင်းမွန်စေပါတယ်။ သင်္ဘောစေ့က အစာအဆိပ်သင့်စေတဲ့ ဘက်တီးရီးယားတွေနဲ့ ရောဂါပိုးတွေကို ခုခံတိုက်ဖျက်နိုင်တယ်လို့ သုတေသနတွေကတွေ့ရှိထားပါတယ်။ တစ်နေ့ကို ၇ စေ့ သုံးကြိမ် စားသုံးနိုင်ပါတယ်။

(၅) အဆီပိုတွေနဲ့ သကြားဓါတ်တွေကို စုပ်ယူပေးတယ်

သင်္ဘောစေ့က ခန္ဓါကိုယ်မှာ အဆီကိုလောင်ကျွမ်းစေနိုင်တဲ့အာနိသင်လည်းရှိပါတယ်။ အစာချေဖျက်မှုကို မြန်ဆန်စေတဲ့အတွက် အဆီပိုတွေနဲ့သကြားဓါတ်တွေကို ခန္ဓါကိုယ်က စုပ်ယူမှုနည်းပါးစေလို့ ဝိတ်လည်းကျစေပါတယ်။

သင်္ဘောစေ့နဲ့ ဝိတ်ချနည်း

သင်္ဘောစေ့နဲ့ပတ်သက်ပြီး သိပ်မသိကြတဲ့ အသုံးဝင်ပုံတစ်မျိုးကတော့ ကိုယ်အလေးချိန်လျှော့ချဖို့ အထောက်အကူပေးတာပဲဖြစ်ပါတယ်။ အချိန်ပေးပြီး စိတ်ရှည်ရှည်နဲ့လုပ်ဖို့တော့လိုပါလိမ့်မယ်။ ဒါ့အပြင် အစားဆင်ခြင်စားပြီး လေ့ကျင့်ခန်းလည်း မကြာမကြာလုပ်ပေးရပါမယ်။

ဂရိတ်ဖရုဖျော်ရည်တစ်ခွက်ထဲမှာ သင်္ဘောစေ့ ၁၅ စေ့ထည့်ပြီး အစာမရှိခင်သောက်ပါ။ အစေ့တွေကို ဆေးလိုမျိုချပါ။ ဒီဖျော်ရည်က အဆီပိုတွေကိုဖယ်ရှားပေးပြီး အစာချေဖျက်မှုမြန်စေပါလိမ့်မယ်။