backup og meta

အသက်အရွယ်​ကြောင့် ကြွက်သားဆုံးရှုံးမှုကို ကာကွယ်ဖို့ စားပေးသင့်တာလေးများ

အသက်အရွယ်ရလာချိန်မှာ ကြွက်သားတွေကလည်း ပြောင်းလဲလာပါတယ်။ အသက်အရွယ်ရလာချိန်မှာ တစ်နှစ်ကို ကြွက်သားထုထည်က ½ to 1% လောက် ဆုံးရှုံးနေကြပါတယ်။  ဒီလို ဆုံးရှုံးမှုက အသက် ၃၀ မတိုင်ခင်မှာ စတင်ဖြစ်ပွားနေတာပါ။ အသက် ၃၀ နောက်ပိုင်း ရောက်လာချိန်မှာ ၁၀နှစ်ကို ကြွက်သားဆုံးရှုံးမှု က 3% ကနေ 8% အထိ ရှိလာမှာပါ။

လေ့လာမှု တစ်ရပ်အရ အသက် ၃၀ အရွယ် လူတစ်ဦးဟာ ထိခိုက်မှုကြောင့်ဖြစ်ဖြစ် ကျန်းမာရေး အခြေအနေကြောင့်ဖြစ်ဖြစ် တစ်လလောက် အိပ်ရာထဲမှာ မလှုပ်မရှားဘဲ နေမယ်ဆိုရင် ကြွက်သားပမာဏ ၁ ပေါင်လောက် ဆုံးရှုံးရတာကို တွေ့ရပါတယ်။

ကြွက်သားတွေ ဆုံးရှုံးလာတယ်ဆိုတာက ခန္ဓာကိုယ်ရဲ့ သန်စွမ်းမှု ကျဆင်းလာတာပါ။ အဆီုထည်လည်း တိုးပွားလာတာပါ။ ဒီအခြေနေက ချော်ကျတာ၊ ဟန်ချက်ပျက်ပြီး ချော်လဲတာလိုမျိုး အခြေအနေတွေကို ရင်ဆိုင်ရနိုင်ပါတယ်။

ကြွက်သားဆုံးရှုံးမှုကို ကာကွယ်ဖို့ လေ့ကျင့်ခန်း လုပ်လို့ ရတယ်ဆိုပေမယ့် အသက်အရွယ်ရလာချိန်မှာတော့ လေ့ကျင့်ခန်းတွေကို ပြင်းပြင်းထန်ထန် မလုပ်ဆောင်နိုင်တော့တာကြောင့် အစာအာဟာရကို အားကိုးဖို့ လိုအပ်လာမှာပါ။ ဒီတော့ ချစ်ရတဲ့ ဖေဖေမေမေ ဖိုးဖိုးဖွားဖွားတို့ကို အသက်အရွယ်​ကြောင့် ကြွက်သားဆုံးရှုံးမှုကို ကာကွယ်ဖို့ ဘာလေးတွေ ပြင်ဆင်ပေးရမလဲဆိုတာ ပြောပြပေးသွားပါမယ်။

အသက်အရွယ်​ကြောင့် ကြွက်သားဆုံးရှုံးမှုကို ကာကွယ်ဖို့ စားပေးသင့်တာလေးများ

အသက်အရွယ်​ကြောင့် ကြွက်သားဆုံးရှုံးမှုကို ကာကွယ်ဖို့ စားပေးသင့်တာလေးများ ကတော့

  • အသား 

အသားတွေက ပရိုတင်း ပါဝင်မှု အများဆုံး အစားအစာ တစ်မျိုးပါ။ သက်ကြီးရွယ်အိုတွေအတွက် မရှိမဖြစ် လိုအပ်တဲ့ အာဟာရတွေ ပါဝင်နေပါတယ်။ အသား တစ်အောင်စကနေ ပရိုတင်းပမာဏ ၇ ဂရမ် အထိ ရရှိတာပါ။ အနီရောင်အသားတွေ နဲ့ ကြက်သားလိုမျိုး အသားတွေက ပရိုတင်းကြွယ်ဝပေမယ့် အသားကမာတာကြောင့် ဝါးဖို့ ခက်တာမျိုး ဖြစ်နိုင်ပါတယ်။ ဒါကြောင့် အရွယ်တော်လေး တုံးပြီး သေချာ နူးနေအောင် ချက်ပေးတာ၊ အသားကို စဉ်းကောလုပ်ပေးတာ လိုမျိုး ပြင်ဆင်ပေးဖို့ မမေ့ပါနဲ့။

  • ပင်လယ်ငါး

အဆီများတဲ့ ပင်လယ်ငါးတွေမှာ ပရိုတင်း ကြွယ်ဝစွာ ပါသလို နှလုံး ကျန်းမာစေဖို့ ထောက်ကူပေးတဲ့ omega-3 fatty acid လည်း ပါဝင်နေပါတယ်။ ဝါးစားရတာလည်း လွယ်ကူပါတယ်။ ငါးကို ချက်တာမျိုး မကြိုက်တတ်ဘူးဆိုရင် ကင်ပေးတာ ပေါင်းပေးတာတွေကလည်း နည်းလမ်းကောင်းပါ။

တယ်လ်မွန်ငါး၊ တူနာငါး၊ မက်ကာရယ်စတာတွေကို အသီးအရွက်လေးတွေနဲ့ ပြင်ဆင်ပေးတာက လိုအပ်တဲ့ အာဟာရကို ပြည့်ပြည့်ဝဝ ရရှိစေမှာပါ။

  • ပဲကနေ ရရှိတဲ့ အစားအစာတွေ

အသားမကြိုက်တဲ့ ဖိုးဖိုးဖွားဖွားတို့ အတွက်ကတော့ အပင်ကနေရတဲ့ ပရိုတင်း ပြည့်ဝအောင် ဖြည့်ပေးတာက နည်းလမ်းကောင်းပါ။ တို့ဟူး၊ ပဲပြား၊ ပဲနှပ်၊ ပဲနို့၊ ပဲရေပွ စတာတွေ ပြင်ဆင်ပေးလို့ ရပါတယ်။ ပဲပြားလေးကို ကြော်ပြီး အသုပ်လို သုပ်ပေးတာ၊ ခရမ်းချဉ်သီးလေးနဲ့ ချက်ပေးတာ၊  တို့ဟူး သုပ်ပေးတာတွေ လုပ်ပေးလို့ ရပါတယ်။ ပဲနို့ကို အချိုမပါတာမျိုး တိုက်ပေးလို့လည်း ရပါတယ်။ အဆာပြေ စားစရာအနေနဲ့လည်း ပြင်ဆင်ပေးလို့ ရပါတယ်။

  • ကြက်ဥ

ကြက်ဥမှာ ပရိုတင်း ကြွယ်ဝစွာပါဝင်သလို အာဟာရလည်း ပြည့်ဝစွာ ပါဝင်နေပါတယ်။ ကျန်းမာရေးနဲ့ ညီညွတ်ပြီး ကိုယ်တွင်းမှာ အာဟာရ ပြည့်ဝစေဖိုပ ထောက်ကူပေးပါတယ်။ ကြက်ဥကြီးကြီး တစ်လုံးက ပရိုတင်း ၆ ဂရမ် နဲ့ အရေးပါတဲ့ အမိုင်နိုအက်ဆစ် ပါဝင်နေပါတယ်။

ကြက်ဥကို ပြုတ်ကျွေးတာ၊ ပေါင်မုန့် ကြက်ဥကြော်ပေးတာ၊ ကြက်ဥကို ကြက်သွန်နီလေး ဆီလေးနဲ့ သုပ်ပေးတာကလည်း နည်းလမ်းကောင်းပါ။

  • နို့

နို့သောက်တာက လုံလောက်တဲ့ ပရိုတင်း ရရှိစေနိုင်သလို အရိုးနဲ့ ကြွက်သားတွေ သန်မာစေဖို့ အားဖြည့်ပေးတဲ့ ကယ်လ်ဆီယမ်လည်း ရရှိစေနိုင်ပါတယ်။ နို့တစ်ခွက်က ပရိုတင်း ၈ ဂရမ်အထိ ပါဝင်နေပါတယ်။ နို့ကို ထောပတ်သီး၊ စတော်ဘယ်ရီသီးတွေနဲ့ ဖျော်ပေးလို့ ရပါတယ်။ အုတ်ဂျုံကို နို့ပူပူလေူနဲ့ စိမ်ကျွေးတာကလည်း အာဟာရ ပြည့်ဝတဲ့ မနက်စာ တစ်မျိုးပါ။

  • ချိစ်

လူကြီးတွေကို ပရိုတင်း ပြည့်ပြည့်ဝဝ ရရှိစေမယ့် နောက်ထပ် အစားအစာတစ်ခုကတော့ ချိစ်ပါ။ ချိစ်က ပရိုတင်း ကြွယ်ဝတာကြောင့် ကြွက်သားတွေကို အားဖြည့်ပေးနိုင်ပါတယ်။ ပေါင်မုန့်နဲ့ တွဲစားလို့ ရသလို အိမ်လုပ်ပီဇာ၊ အာလူးထောင်း စတာတွေနဲ့လည်း စားပေးလို့ ရပါတယ်။ အခြား ဟင်းသီးဟင်းရွက်တွေနဲ့လည်း တွဲစားပေးလို့ ရပါတယ်။

  • ဒိန်ချဉ်

ကြွက်သားဆုံးရှုံးမှု ကာကွယ်ပေးမယ့် နောက်တစ်ခုကတော့ ဒိန်ချဉ်ပါ။ ဒိန်ချဉ်ကလည်း နို့ထွက်ပစ္စည်း တစ်မျိုးဖြစ်ပြီး ပရိုတင်း ကြွယ်ဝစွာ ပါဝင်နေပါတယ်။  ကြွက်သားတွေကို အားဖြည့်ပေးပါတယ်။ ဒိန်ချဉ်ကို သစ်သီးလေးတွေနဲ့ တွဲစားပေးလို့ ရပါတယ်။ သစ်သီးခြောက်လေးတွေနဲ့ တွဲစားပေးတာကလည်း အာဟာရပြည့်ဝစေဖို့ ထောက်ကူပေးမှာပါ။

  • ပဲအမျိုးမျိုး

ပဲအမျိုးမျိုးက ပရိုတင်းရော အမျှင်ဓာတ်ပါ ကြွယ်ဝတဲ့ ကျန်းမာရေးနဲ့ ညီညွတ်တဲ့ စားစရာ တစ်မျိုးပါ။ ကြွက်သားတွေ သန်မာစေသလို အစာခြေစနစ် ကျန်းမာစေပါတယ်။ ကြွက်သားဆုံးရှုံးမှု မဖြစ်အောင် ကာကွယ်ပေးသလို ဝမ်းချုပ်တာလိုမျိုး လူကြီးတွမှာ အဖြစ်များတဲ့ ကျန်းမာရေးပြဿနာ မဖြစ်အောင်လည်း ကာကွယ်ပေးပါတယ်။ သတ္တုဓာတ်တွေ ပါဝင်နေတာကလည်း ကျန်းမာသန်စွမ်းစေဖို့ ထောက်ကူပေးနိုင်ပါတယ်။

  • အခွံမာသီးတွေ

အယ်လ်မွန်စေ့၊ သစ်ကြားသီး၊ မက်ကာဒေးမီးယားစတဲ့ အခွံမာသီးတွေက ကျန်းမာရေးနဲ့ ညီညွတ်တဲ့ အဆီကိုရော ပရိုတင်းကိုပါ ဖြည့်တင်းပေးနိုင်တာကြောင့် ဖိုးဖိုးဖွားဖွားတို့မှာ ကြွက်သားဆုံးရှုံးမှု မဖြစ်အောင် ကူညီပေးပါတယ်။ အဆာပြေစားစရာအနေနဲ့ စားပေးလို့ ရသလို ဆန်ပြုတ်ထဲထည့်သောက်တာမျိုး လုပ်ပေးလို့လည်း ရပါတယ်။

[embed-health-tool-bmi]

မသက်ဆိုင်ကြောင်း ရှင်းလင်းချက်

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

How Can You Avoid Muscle Loss as You Age? https://health.clevelandclinic.org/how-can-you-avoid-muscle-loss-as-you-age/ Accessed Date 21 October 2022

Five Ways to Maintain Muscle Mass as You Age https://www.landmarkhealth.org/resource/five-ways-to-maintain-muscle-mass-as-you-age/ Accessed Date 21 October 2022

Preserve your muscle mass https://www.health.harvard.edu/staying-healthy/preserve-your-muscle-mass Accessed Date 21 October 2022

ယခုပုံစံ

25/10/2022

Aye Thi Mon မှ ရေးသားသည်။

မှ အချက်အလက် စစ်ဆေးထားပါသည်။ Aye Thi Mon

Dr. Htet Htet Zaw Win မှ ပြင်ဆင်ခဲ့ပါသည်။


ဆက်စပ် အကြောင်းအရာများ

ဖိုးဖိုးဖွားဖွားတို့ ဝမ်းမချုပ်စေဖို့ သတိပြုစေချင်

ကျောက်ကပ်ဆေးနေရတဲ့ ဖိုးဖိုးဖွားဖွားတွေကို ဘာတွေ ပြင်ဆင်ပေးမလဲ ။


Hello Sayarwon Panel မှ အချက်အလက်များ စစ်ဆေးထားပါသည်။ Aye Thi Mon မှ ရေးသားသည်။ နောက်ဆုံးအသစ်ပြင်ဆင်သည့်ရက်စွဲမှာ 25/10/2022 ဖြစ်ပါသည်။

ad iconadvertisement

ဤဆောင်းပါးက အကူအညီဖြစ်ပါသလား။

ad iconadvertisement
ad iconadvertisement