ရာသီစက်ဝန်းအလိုက် လေ့ကျင့်ခန်း ဘယ်လိုလုပ်မလဲ

‌လေ့ကျင့်ခန်း လုပ်တာက ကျန်းမာရေးအတွက် ကောင်းတဲ့အကျင့်ပါ။ အမျိုးသမီးတွေအတွက်ဆိုရင် လေ့ကျင့်ခန်း လုပ်တာက ရာသီစက်ဝန်းနဲ့ ရာသီလာချိန်မှာ ခံစားရတတ်တဲ့ ဝေဒနာတွေအပေါ်မှာပါ သက်ရောက်မှု ရှိပါတယ်။ အမျိုးသမီးတွေက တစ်လလုံးလုံး ဟော်မုန်းအတက်အကျတွေ ဖြစ်နေတာကြောင့် ဒီတိုင်းလေ့ကျင့်ခန်း လုပ်တာထက်စာရင် ရာသီစက်ဝန်းအလိုက် လေ့ကျင့်ခန်း လုပ်တာက ခန္ဓာကိုယ်နဲ့ ပိုပြီး လိုက်လျောညီထွေ ရှိစေပါတယ်။

ဘယ်သူတွေက ရာသီစက်ဝန်းနဲ့ ညှိပြီး လေ့ကျင့်ခန်း လုပ်သင့်သလဲ

အမျိုးသမီးတိုင်းက လုပ်သင့်ပါတယ်။ လက်ရှိမှာလေ့ကျင့်ခန်း လုပ်လက်စသူတွေရော၊ ခုမှလေ့ကျင့်ခန်း စလုပ်မဲ့သူတွေရော လုပ်နိုင်ပါတယ်။ ပိုပြီး လုပ်သင့်တဲ့သူတွေကတော့

ရာသီစက်ဝန်းအလိုက် လေ့ကျင့်ခန်း လုပ်ခြင်းရဲ့ အကျိုးကျေးဇူး

ရာသီစက်ဝန်းနဲ့ ညှိပြီး လေ့ကျင့်ခန်း လုပ်မယ်ဆိုရင်

• ရာသီလာချိန်မှာ ဖြစ်တတ်တဲ့ ကိုက်ခဲနာကျင်မှုတွေ သက်သာစေပါတယ်
• စိတ်အခြေအနေကို ကောင်းစေပါတယ်
• စိတ်ဖိစီးမှု နည်းစေပါတယ်
• ရာသီမလာခင် ခံစားရတဲ့ ဝေဒနာတွေကို သက်သာစေပါတယ်။

ရာသီစက်ဝန်း ဘယ်လိုလည်

ရာသီစက်ဝန်းနဲ့ ညှိပြီး လေ့ကျင့်ခန်း မလုပ်ခင် ရာသီစက်ဝန်းဘယ်လိုလည်သလဲဆိုတာကို အရင်သိထားဖို့ လိုပါတယ်။ အမျိုးသမီးအများစုက ၂၈ရက်တစ်ခါ ရာသီလာပါတယ်။ တချို့ကလည်း ဒီထက်စော ဒါမှမဟုတ် ဒီထက် နောက်ကျတာတွေ ရှိပါတယ်။

၂၈ရက်ကြာတဲ့ ရာသီစက်ဝန်းကို ရက်တွေ ခွဲကြည့်မယ်ဆိုရင်

(၁) Menstrual phase (ရာသီသွေးဆင်းနေတဲ့ရက်)

စလာတဲ့ရက်ကို Day 1လို့ မှတ်လိုက်ပါ။ အများစုက ၅ရက်လောက် လာတတ်တော့ Day 1- Day 5ဖြစ်ပါတယ်။ ရာသီလာနေတဲ့အချိန်မှာ အီစထရိုဂျင်နဲ့ ပရိုဂျက်စတုန်း ဟော်မုန်းတွေက နည်းနေပါတယ်။ သားအိမ်ကနေ အလွှာလေးတွေ ကွာကျပြီး ရာသီသွေးအနေနဲ့ ဆင်းနေပါတယ်။

(၂) Follicular phase

ရာသီပြီးလို့ Day 6-Day 14အထိပါ။ အလွယ်ပြောရရင် ရာသီသွေးဆင်းပြီးကနေ သားဥကြွေတဲ့ရက်ကြား ဖြစ်ပါတယ်။ အဲ့အချိန်မှာ အီစထရိုဂျင်နဲ့ ပရိုဂျက်စတုန်းက တက်လာပါပြီ။

(၃) Ovulation phase

သားဥကြွေတဲ့ ရက်တွေပါ။ Day 15-Day 17 တစ်ရက်ရက်မှာ သားဥကြွေပါလိမ့်မယ်။ ကြွေတဲ့သားဥကလည်း ၂၄နာရီပဲ ခံပါတယ်။ ဒီအချိန်မှာ အီစထရိုဂျင်ကတော့ အမြင့်ဆုံးပါ။ ပရိုဂျက်စတုန်းနဲ့ တက်စတိုစတီရုန်းကလည်း မြင့်နေပါသေးတယ်။

(၄) Luteal phase

သားဥကြွေတဲ့ရက်ကနေ နောက်တစ်ခေါက် ရာသီမလာခင်စပ်ကြား ရက်တွေပါ။ Day 18-Day 28ထိဖြစ်ပါတယ်။ အီစထရိုဂျင်နဲ့ ပရိုဂျက်စတုန်းက စစချင်းမှာတော့ တက်နေပေမဲ့ သားဥလေးက မျိုးမအောင်ဘူးဆိုရင် တဖြည်းဖြည်း ပြန်ကျလာပြီး ရာသီလာပါလိမ့်မယ်။

ရာသီစက်ဝန်းအလိုက် လေ့ကျင့်ခန်း ဘယ်လိုလုပ်မလဲ

ရာသီစက်ဝန်းအလိုက် လေ့ကျင့်ခန်း လုပ်တာကို Cycle syncingလို့ ခေါ်ပါတယ်။ ရာသီစက်ဝန်းနဲ့ ဟော်မုန်းအပြောင်းအလဲအလိုက် လုပ်သင့်တဲ့ လေ့ကျင့်ခန်းတွေကတော့

(၁) Menstrual phase (ရာသီသွေးဆင်းနေတဲ့ရက်)

ရာသီလာနေတဲ့အချိန်မှာလည်း လေ့ကျင့်ခန်းလုပ်လို့ ရပါတယ်။ ဒီရက်တွေမှာ အားနည်းပြီး သက်သောင့်သက်သာ မဖြစ်တဲ့အတွက် ပေါ့ပေါ့ပါးပါး လေ့ကျင့်ခန်းတွေကိုပဲ လုပ်သင့်ပါတယ်။

ဥပမာ လမ်းလျှောက်တာ၊ အကြောလျှော့တာ၊ ယောဂ၊ pilates စသဖြင့်။ ဒီလိုလုပ်ပေးတာတာက ကိုက်ခဲနာကျင်မှုတွေကို သက်သာစေပါတယ်။ တကယ်လို့ ပင်ပန်းလွန်းလို့ မလုပ်နိုင်ရင်လည်း ပြဿနာမရှိပါဘူး။ ဒီရက်တွေမှာ နားနားနေနေ နေလို့ ရပါတယ်။

(၂) Follicular phase (Day 6-Day 14)

ရှေ့ရက်တွေကထက်စာရင် အားလည်းပြည့်လာသလို ဟော်မုန်းတွေလည်း ပြန်တက်လာပါပြီ။ ဒါကြောင့် အားသုံးရတဲ့ လေ့ကျင့်ခန်းတွေကို စပြီး လုပ်လို့ ရပါပြီ။

ဥပမာ Cardio အပေါ့စား၊ အေရိုးဗစ်၊ ပြေးတာ၊ ရေကူးတာ၊ အပေါ့စား အလေးတွေမတာတွေ လုပ်လို့ ရပါပြီ။

(၃) Ovulation phase (Day 15-Day 17)

ဟော်မုန်းတွေ အတက်ဆုံးအချိန်ဖြစ်တာကြောင့် အားလည်း အရှိဆုံးပါ။ ပြင်းထန်ပြီး အားသုံးရတဲ့ လေ့ကျင့်ခန်းတွေ လုပ်နိုင်ပါတယ်။

ဥပမာ HIIT၊ လက်ဝှေ့ထိုးတာ၊ အလေးမတာ စတာတွေ လုပ်လို့ ရပါတယ်။

(၄) Luteal phase (Day 18-Day 28)

ဟော်မုန်းတွေက အကျဘက်ကို ပြန်ရောက်လာတာကြောင့် အားသိပ်မသုံးရတဲ့ လေ့ကျင့်ခန်းတွေလောက်ပဲ လုပ်ပါ။ မကြာခင်မှာလည်း ရာသီပြန်လာ‌တော့မှာဆိုတော့ အားမွေးထားဖို့ လိုပါတယ်။

Cardio အလယ်အလတ်စား၊ သိပ်မလေးတဲ့ အလေးတွေမတာ၊ ကြွက်သားတက်စေမဲ့ လေ့ကျင့်ခန်းတွေ လုပ်ပေးနိုင်ပါတယ်။