အိပ်ရေးဝပါလျက် မျက်ကွင်းညိုနေရတာ ဘာကြောင့်လဲ!

ညဘက်တွေကိုလည်း အိပ်ချိန် ၈ နာရီ ကနေ ၉ နာရီ ရှိပါတယ်။ အိပ်ရေးလည်း ဝပါတယ်။ ဒါပေမယ့် အိပ်ရာနိုးလာချိန်မှာတော့ မျက်လုံးတွေက ပင်ပန်းနေပြီး မျက်အိတ်ကလည်း ဖောင်း မျက်ကွင်းကလည်း ညိုနေတယ်။ ဒီလိုမျိုး အိပ်ရေးဝပါလျက် မျက်ကွင်းညိုနေရတာ ဘာကြောင့်လဲ ဆိုတာကို သိချင်နေပြီလား ….. ဒါဆိုရင်တော့ ဆောင်းပါးလေးထဲမှာ ကိုယ်တိုင် ဖတ်ကြည့်လိုက်ပါ။

အိပ်ရေးဝပါလျက် မျက်ကွင်းညိုနေရတာ ဘာကြောင့်လဲ!

မျက်ကွင်းညိုတာက တစ်ခါတလေမှာ အိပ်ရေးမဝတာကြောင့် မဟုတ်ပါဘူး။ စိတ်ဖိစီးတာ၊ စိတ်ရှုပ်ထွေးတာတွေ အပါအဝင် အမျိုးမျိုးသော အကြောင်းအရင်းတွေကြောင့်လည်း မျက်ကွင်းတွေ ညိုတာမျိုး ဖြစ်စေနိုင်ပါတယ်။ ဒီတော့ အိပ်ရေးဝပါလျက် မျက်ကွင်းညိုနေရတာ ဘာကြောင့်လဲ ဆိုတာကို အတူတူ ဆက်ကြည့်လိုက်ရအောင်နော်။

• ဓာတ်မတည့်တာ

မျက်လုံး ဓာတ်မတည့်မှုကလည်း မျက်လုံးတွေကို ပင်ပန်းပြီး မျက်အိတ်ဖောင်းတာတွေကို ဖြစ်စေနိုင်ပါတယ်။ မျက်လုံးထဲကို ဝတ်မှုန် အပါအဝင် အမှုန်လေးတွေ ဝင်တာ၊ ကြောင်မွေးတွေနဲ့ ထိတွေ့မိတာတွေကြောင့်လည်း ခန္ဓာကိုယ်မှာ histamine လို့ခေါ်တဲ့ ဓာတုပစ္စည်း ထွက်ရှိစေပြီး မျက်လုံးအောက်က သွေးကြောလေးတွေထဲမှာ သွေးစီးဆင်းမှု တိုးစေပြီး ရောင်ရမ်းတာကို ဖြစ်စေနိုင်ပါတယ်။

• ရေဓာတ်ခမ်းခြောက်တာ

ခန္ဓာကိုယ်မှာ ရေဓာတ်ခမ်းခြောက်တာက ခန္ဓာကိုယ်ကို ပင်ပန်းစေပြီး မျက်လုံးတွေကို ရောင်ရမ်းတာ၊ မျက်ကွင်းညိုတာတွေကို ဖြစ်စေနိုင်ပါတယ်။ အကြောင်းကတော့ မျက်စိတဝိုက်က အသားအရေက ထိခိုက်လွယ်တာကြောင့် ရေဓာတ်ခမ်းခြောက်တဲ့အခါ မျက်ကွင်းညိုတာကို ခံစားရနိုင်ပါတယ်။ ဒါကြောင့် တစ်နေ့ကို ၇ နာရီ ကနေ ၈ နာရီအထိ အိပ်စက်ပြီး ရေအပါအဝင် ရေဓာတ်ပြည့်ဝစေမယ့် သောက်စရာတွေကို များများ သောက်ပေးပါ။

• အရက်တွေ အလွန်အကျွံ သောက်တာ

အရက်တွေ၊ အယ်လ်ကိုဟော ပါတဲ့ သောက်စရာတွေကို အလွန်အကျွံ သောက်တာကလည်း ကိုယ်တွင်းမှာ ရေဓာတ် ခမ်းခြောက်မှုကို ဖြစ်စေပြီး မျက်ကွင်းညိုတာကို ဖြစ်စေနိုင်ပါတယ်။

• မျိုးဗီဇ

တချို့‌တွေက ခုပြောခဲ့တဲ့ အချက်တွေ ဘာမှမရှိပါဘဲနဲ့ မျက်ကွင်းညိုနေတာပါ။ Eye creamတွေ လိမ်းလည်း မသက်သာကြပါဘူး။ ဒါဆိုရင်တော့ မျိုးဗီဇကြောင့် ဖြစ်နိုင်ပြီး ဒါကတော့ ဘာမှလုပ်လို့ မရပါဘူး။

အခုလောက်ဆိုရင် အိပ်ရေးပျက်တာအပြင် ဘယ်လိုအချက်တွေက မျက်ကွင်းညိုစေနိုင်လဲဆိုတာကို သိသွားပြီ ဟုတ် …..