ရတနာစိန်ကျောက်မဟုတ်တဲ့ ကိုယ်တွင်းကျောက်များ

လည်ချောင်း

အာသီးဆိုတာရောဂါပိုးမွှားတွေကိုစစ်ထုတ်ဖယ်ရှားဖို့ကူညီပေးတဲ့ လည်ချောင်းအနောက်ဘက်က တစ်ရှူးအစုနှစ်ခုဖြစ်ပါတယ်။ အစားအစာတွေ၊ အရေပြားဆဲလ်သေတွေ၊ တခြားအစအနတွေ အဲဒီမှာကပ်ကျန်နေနိုင်ပြီးtonsilloliths လို့ခေါ်တဲ့ကျောက်တွေဖြစ်လာတတ်ပါတယ်။ ဒါဆို လည်ချောင်းနာတယ်၊ ခံတွင်းနံ့ဆိုးတယ်၊ အာသီးရောင်တယ် ဆိုတဲ့ လက္ခဏာတွေခံစားရနိုင်တယ်။ ဒီကျောက်တွေကို သွားပွတ်တံနဲ့ ဒါမှမဟုတ် ဂွမ်းစလေးနဲ့အသာအယာဖယ်ရှားနိုင်တယ်၊ ဆားရည်နဲ့ပလုပ်ကျင်းလို့ရတယ်။ မရရင်တော့ ဆရာဝန်ပြသင့်ပါတယ်။

ဆီးအိမ်

ဆီးကောင်းကောင်းမသွားနိုင်တဲ့အခါ ဆီးကျောက်တည်လာနိုင်ပါတယ်။ ဒါမှမဟုတ် ဆီးထဲမှာ သတ္တုဓါတ်တွေများနေပြီး တခြားဓါတ်တွေနည်းနေလို့လည်းဖြစ်နိုင်တယ်။ ဒီကျောက်တွေက သူ့အလိုလိုဖြစ်လာတတ်တယ် ဒါမှမဟုတ်ကျောက်ကပ်ကျောက်လေးတွေက ဆီးအိမ်ဆီကို ကျလာပြီး ကြီးလာတာမျိုးလည်းဖြစ်နိုင်တယ်။ ဆီးကနောက်နေတာ၊ သွေးပါနေတာ ဒါမမဟုတ် ဆီးသွားရင် ဗိုက်အောက်ပိုင်းကအောင့်တာတွေဖြစ်နိုင်တယ်။ သောက်ဆေး၊ လေဆာ သို့မဟုတ် ခွဲစိတ်မှုနဲ့ ဆေးကုသမှုခံယူသင့်ပါတယ်။

သည်းခြေအိတ်

ဝမ်းဗိုက်ညာဘက်အပေါ်ပိုင်းမှာရှိတဲ့ သည်းခြေအိတ်လေးမှာ အစာချေဖျက်တဲ့သည်းခြေရည်တွေကိုသိုလှောင်ထားပေးပါတယ်။ သည်းခြေရည်မှာပါတဲ့bilirubin ဆိုတဲ့ဒြပ်ပေါင်းရယ်၊ကိုလက်စထရောတွေရယ်ကနေကျောက်တည်စေနိုင်ပါတယ်။ ဒီကျောက်တွေကသေးငယ်လွန်းလို့ နာကျင်မှုတွေ၊ ကုသမှုလိုတာတွေ သိပ်မရှိတတ်ပါဘူး။ နာကျင်လာပြီဆိုရင်တော့ ခွဲစိတ်ကုသမှုခံယူဖို့လိုအပ်လာနိုင်ပါတယ်။

ခံတွင်း

အကြောင်းရင်းအတိအကျမသိရပေမယ့် ခံတွင်းမှာလည်းကျောက်တည်နိုင်ပါတယ်။ နာကျင်စေနိုင်တယ်၊ရောင်ရမ်းစေနိုင်တယ်။ အစာစားလိုက်တဲ့အခါ တံတွေးထုတ်ပေးတဲ့ပြွန်တွေကို ပိတ်ဆို့စေနိုင်တယ်။ လျှာအောက်မှာ အဖြူရောင်ကျောက်တည်တာလည်းတွေ့ရနိုင်တယ်။ ပုံမှန်အားဖြင့်တော့မပြင်းထန်တတ်ဘဲရေပိုသောက်ပေးရင်၊ အချဉ်ကိုစုပ်ပြီးစားပေးရင်လျော့ပါးပျောက်ကင်းစေနိုင်ပါတယ်။

ပန်ကရိယ

သည်းခြေအိတ်ကနေကျောက်တွေက ပန်ကရိယဆီရောက်လာပြီးရောင်ရမ်းစေတဲ့အခါ ကိုယ်ပူမယ်၊သွေးခုန်နှုန်းမြန်မယ်၊ မအီမသာဖြစ်မယ်၊ ဗိုက်အောင့်မယ်၊ အစားစားပြီးရင်ပိုဆိုးမယ်။ကျောက်တည်တာနဲ့ပတ်သက်ရင် ဆရာဝန်ပြပြီး ကုသမှုခံယူဖို့လိုပါတယ်။

ဗိုက်

ဖြစ်ခဲတယ်ဆိုပေမယ့် အစာခြေစနစ်ထဲမှာလည်းကျောက်တည်နိုင်ပါတယ်။diverticulitis သို့မဟုတ်inflammatory bowel disease တို့လို အူရောင်ရောဂါတွေကြောင့်ဖြစ်စေနိုင်ပါတယ်။ ရောဂါကြောင့်၊ မျိုးဗီဇကြောင့် ဒါမှမဟုတ် ခွဲစိတ်ကုသမှုခံယူဖူးတာကြောင့် အစာအိမ်နဲ့အူထဲမှာ အပြောင်းအလဲတွေဖြစ်စေနိုင်ပါတယ်။ ဒါဆိုရင် ခွဲစိတ်ကုသမှုခံယူရနိုင်ပါတယ်။

ဒီလိုအကျိုးမပေးတဲ့ ကိုယ်တွင်းကျောက်တွေကလည်း သူ့ဟာသူဆို တန်ဖိုးမရှိပေမယ့်ဆေးကုသစရိတ်တန်ဖိုးတော့မနည်းဘူးနော့။ တန်ဖိုးကြီးကြီးပေးရတဲ့ ကုသမှုတွေလိုအပ်မှာဆိုတော့ ဒါတွေဖြစ်မလာစေဖို့ ကျန်းမာရေးနဲ့ညီအောင် အစားအသောက်၊အနေအထိုင်၊ လှုပ်ရှားမှုတွေကို ဂရုစိုက်သင့်ပါတယ်။