နေ့စဉ် စားသုံးမှုကို အရသာ ပြည့်ပြည့်စုံစုံ စားသုံးလိုက်တဲ့အခါ ကိုယ်တွင်းကို အချို၊ အဖန်၊ အငန်၊ အစပ်၊ အခါး၊ အချဉ်၊ အဆိမ့် ဆိုပြီး အရသာ အမျိုးမျိုး ဝင်ရောက်သွားပါတယ်။ ဒီလို ဝင်ရောက်သွားတဲ့ အရသာ တစ်ခုချင်းစီက အလွန်အကျွံ ဖြစ်လာမယ် ဆိုရင်တော့ ကျောက်ကပ် နဲ့ ဆီးလမ်းကြောင်း ကျန်းမာရေးကို ထိခိုက်စေနိုင်ပါတယ်။
နေ့စဉ် စားသုံးမှုမှာ ဆိုဒီယမ်လို့ ခေါ်တဲ့ ဆားတွေ အများအပြား စားသုံးတာက ကျောက်ကပ်ရဲ့ ရေဓာတ်၊ ဆားဓာတ်၊ သတ္တုဓာတ်တွေ ဟန်ချက်ညီအောင် ထိန်းသိမ်းနိုင်မှုကို အနှောင့်အယှက် ဖြစ်စေနိုင်ပါတယ်။ ဆိုဒီယမ်ကို လိုအပ်သလောက်ပဲ စားတာ အကောင်းဆုံးပါ။
ဆိုဒီယမ်ဆိုလို့ ဆားကိုပဲ ပြောတာ မဟုတ်ပါဘူး။ ငါးပိ၊ ငါးခြောက်၊ ငံပြာရည်ကစလို့ အချိုမှုန့်၊ အသားမှုန့်တွေကိုလည်း အများကြီး စားတာမျိုး မလုပ်မိဖို့ လိုပါမယ်။
အငန် အစားများတာက သွေးတိုးစေပြီး ရေရှည်မှာ ကျောက်ကပ် ထိခိုက်စေနိုင်ပါတယ်။ အငန် အစားများတာက ကျောက်ကပ် ကျောက်တည်တာ ဖြစ်စေနိုင်ပါတယ်။
ကယ်လ်ဆီယမ်က အရိုး နဲ့ သွားတွေကို ကျန်းမာ ကြံ့ခိုင်စေတယ်ဆိုပေမယ့် ကယ်လ်ဆီယမ် အလွန်အကျွံ စားသုံးတာကလည်း ကျောက်ကပ် ကျောက်တည်စေနိုင်ပါတယ်။
ကယ်လ်ဆီယမ်ကို လိုအပ်သလောက်ပဲ စားသုံးဖို့ လိုပါမယ်။ ဒီလိုမှ အရိုးပွတာ၊ အရိုးပါးတာတွေကို ကာကွယ်ရာ ရောက်မှာပါ။ ကယ်လ်ဆီယမ် ကြွယ်ဝတဲ့ အစားအစာတွေ ဖြစ်တဲ့ နို့နဲ့ နို့ထွက်ပစ္စည်းတွေကို ထိုက်သင့်တဲ့ ပမာဏလောက်ပဲ စားပေးပါ။
နောက်တစ်ချက် အနေနဲ့ သတိထားစေချင်တာက အသင့်စား၊ အမြန်စားနဲ့ ပြုပြင်ထားတဲ့ အစားအစာတွေပါ။ ဒီအစားအစာတွေက အငန်ကဲသလို တာရှည်ခံအောင် ပြုပြင်ထားတာတွေကြောင့် ရေရှည်မှာ ကျောက်ကပ် ထိခိုက်စေနိုင်ပါတယ်။
ကဖင်းက အတန်အသင့်ဆိုရင် လန်းဆန်းစေတယ်။ စိတ်ခံစားမှု ကောင်းစေတာမှန်ပေမယ့် အလွန်အကျွံ စားသုံးတာက ရေဓာတ်ခမ်းခြောက်စေနိုင်ပါတယ်။ ခန္ဓာကိုယ်မှာ ရေဓာတ်ခမ်းခြောက်တာက ကျောက်ကပ် ကျောက်တည်တာ၊ ဆီးအိမ် ပိုးဝင်တာလိုမျိုး ကျန်းမာရေး ပြဿနာတွေကို ဖြစ်စေနိုင်ပါတယ်။ ဆီးလမ်းကြောင်း ပိုးဝင်တာမျိုးလည်း ဖြစ်စေနိုင်ပါတယ်။
ဒါကြောင့် ကဖင်းပါတဲ့ ကော်ဖီ၊ လက်ဖက်ရည်၊ ရေနွေးကြမ်း၊ လက်ဖက်၊ ချောကလက်၊ ကိုလာနဲ့ အားဖြည့်အချိုရည်တွေ အပါအဝင် ကဖင်းပါတဲ့ သောက်စရာ စားစရာတွေကို အလွန်အကျွံ မစားဖို့ သတိပေးပါရစေ။
ပရိုတင်းက ကိုယ်ခံအား ကောင်းစေပြီး အရိုးတွေကို သန်မာစေတယ်။ ကြွက်သားတွေ ဖြစ်ပေါ်စေသလို ပရိုတင်းက တစ်ရှူး အသစ်တွေ ဖြစ်ပေါ်စေနိုင်တယ် ဆိုပေမယ့် ပရိုတင်းတွေကို အလွန်အကျွံ စားသုံးတာက ကျောက်ကပ်ကို ဝန်ပိစေပြီး ရေရှည်မှာ ကျောက်ကပ်ကို ထိခိုက်စေနိုင်ပါတယ်။ ကျောက်ကပ် ပျက်စီးတာမျိုး ဖြစ်စေနိုင်ပါတယ်။
အသားတွေ အထူးသဖြင့် အနီရောင် အသားတွေ၊ ဥအမျိုးမျိုး၊ နို့ နဲ့ နို့ထွက်ပစ္စည်း စတာတွေကို အလွန်အကျွံစားသုံးတာမျိုး မလုပ်ပါနဲ့။
ရေသောက်နည်းတာက ရေဓာတ်ခမ်းခြောက်မှုကို ဖြစ်စေနိုင်ပြီး ရေရှည်မှာ ကျောက်ကပ် ထိခိုက်တာမျိုး ဖြစ်စေနိုင်ပါတယ်။ ရေများများ သောက်မှ ကျောက်ကပ်က အဆိပ်အတောက်တွေကို ဖယ်ရှားပေးပြီး ကျောက်ကပ်ကျန်းမာစေဖို့ ထောက်ကူပေးနိုင်မှာပါ။
ရေများများသောက်တာက ကျောက်ကပ်နဲ့ ဆီးလမ်းကြောင်းကို ပိုးဝင်တာမျိုး မဖြစ်စေဖို့ ကာကွယ်ပေးသလို ကိုယ်ခံအား ကောင်းစေပြီး အသားအရေကို ကျန်းမာစေမှာပါ။
နေ့စဉ် စားသုံးလိုက်တဲ့ အရာတွေက ကျောက်ကပ် နဲ့ ဆီးလမ်းကြောင်းအပေါ် အခုလို သက်ရောက်မှုတွေ ရှိနေတယ်ဆိုတာ သတိပြုစေချင်ပါတယ်။ ဒါကြောင့် နေ့စဉ် စားသုံးမှုမှာ အသီးအရွက်တွေ များများ ပါဝင်အောင် စားသုံးပေးပါ။ အသီးအရွက်ဆိုတဲ့ နေရာမှာလည်း ကျောက်ကပ် နဲ့ ဆီးလမ်းကြောင်း ကျန်းမာရေးကို ထိခိုက်စေနိုင်တဲ့ ဓညင်းသီးလိုမျိုးအရာကိုတော့ ရှောင်ဖို့ ပြောပါရစေ။
ဒါတွေက ကျောက်ကပ် နဲ့ ဆီးလမ်းကြောင်း ကျန်းမာရေးကို ထိခိုက်စေနိုင်ပါတယ်။
ကျောက်ကပ် နဲ့ ဆီးလမ်းကြောင်း
ကျန်းမာရေးကို ထိခိုက်စေနိုင်ပါတယ်။
- အငန် အစားများရင် /ဆိုဒီယမ် များရင်
- ကယ်လ်ဆီယမ် အစားများရင်
- ကဖင်း များရင်
- ပရိုတင်း များရင်
- ရေသောက်နည်းရင်
မှတ်ချက်များ
သင့်အတွေးများကို ဝေမျှပါ။
သင့်ကျန်းမာရေးအတွေးများကို Hello Sayarwonနဲ့ ဝေမျှလိုက်ပါ။
ဆက်သွယ်ရန် သို့မဟုတ် ဝင်မည်။ နှင့် ဝင်ရောက်ဆွေးနွေးပါမည်။