ကလေးလေး ဘယ်လိုဖွံ့ဖြိုးလာမှာလဲ
သားသားမီးမီးလေးက ဘယ်လိုကြီးလာတာပါလိမ့်
ကြီးထွားနှုန်းကမြန်လာပါပြီ။ အခုဆို ဘလူးဘယ်ရီသီးအရွယ် ၁.၂၇စင်တီမီတာလောက်ရှိနေပါပြီ။
သန္ဓေသားလေးက လိုက်လျောညီထွေမှုရှိအောင် စပြီးကြိုးစားနေပါပြီ။ ဒီအပတ်မှာ မိခင်နဲ့သန္ဓေသားကို ဆက်ပေးတဲ့ချက်ကြိုးစပေါ်ပါပြီ။ ချက်ကြိုးက မေမေတွေရဲ့ခန္ဓါကိုယ်ကသွေးတွေနဲ့ သန္ဓေသားလေးကို အောက်ဆီဂျင်နဲ့အာဟာရ အထောက်အပံ့ပေးပါတယ်။ ကလေးလေးဆီက အညစ်အကြေးတွေလည်း ဖယ်ပေးပါတယ်။ အဆုတ်၊ ကျောက်ကပ်၊ အစာအိမ်အူလမ်းကြောင်းတွေက ဆက်ပြီး ဖွံ့ဖြိုးနေပါတယ်။ မျက်နှာပုံလည်း စပေါ်နေပြီနော်။ မေမေ၊ဖေဖေတွေနဲ့တူမယ့် မျက်လုံး၊ နှာခေါင်း၊ ပါးစပ်၊ နားရွက်လေးတွေလည်း စဖြစ်နေပါပြီ။ သားသားမီးမီးတွေ ဘယ်သူနဲ့တူတယ်ဆိုတာ သိချင်နေလောက်ပြီပေါ့နော်။ နောက်လတွေအများကြီးလိုသေးတယ်ဆိုပေမယ့် သားသားမီးမီးတွေကို တွေ့ရတော့မှာပါ။
ခန္ဓါကိုယ်နဲ့ အနေအထိုင်အပြောင်းအလဲလေးများ
ခန္ဓါကိုယ်မှာရော ဘာတွေဆက်ပြောင်းလဲဦးမှာပါလိမ့်
ရင်သားပုံပြောင်းလာတာကို သတိထားမိကြရောပေါ့။ ကိုယ်ဝန်ဆောင်ချိန်ထွက်တဲ့ ဟော်မုန်းက ရင်သားကိုယောင်ပြီး တင်းလာစေလို့ပါ။ ရင်သားတစ်ဝိုက်မှာ သွေးစီးမှုကောင်းလာပြီး အဆီစစုလာလို့ပါ။ နို့သီးခေါင်းက ပိုပြူထွက်လာပြီး ညိုမဲနေတဲ့နေရာတစ်ဝိုက်ဆို အရောင်ပိုနက်ပိုကြီးလာပါမယ်။ ကိုယ်ဝန်ဆောင်ချိန်တစ်လျှောက် ဆက်ကြီးပြီး အရောင်လည်း ထပ်နက်လာဦးမှာပါ။ ဒီပြောင်းလဲမှုတွေက နို့တိုက်နိုင်ဖို့ဖြစ်လာတာတွေပါ။
သိသင့်သိထိုက်တာလေးတွေ
အခုထိတော့ ကိုယ်ဝန်ဆောင်ကာလ ၃ပိုင်းရဲ့ပထမပိုင်းမှာပဲ ရှိနေတုန်းပါ။ တစ်ခြားသူတွေကိုပြောပြဖို့တောင် စောနေပါသေးတယ်။ လျှို့ဝှက်ထားချင်တယ်ဆိုလည်း ရပါသေးတယ်။ သားအိမ်ကြီးလာလို့ဗိုက်ကအရှေ့ကို ထွက်ချင်မှထွက်ဦးမှာပါ။ တစ်ခါ ကိုယ်ဝန်ဆောင်ထားဖူးရင်တော့ အရင်ကဗိုက်ထက် ပိုကြီးမှာပါ။ ဒါပုံမှန်ပါပဲ။ ဗိုက်ကအရွတ်နဲ့ ကြွက်သားတွေက တစ်ခါ ဆွဲဆန့်ခံထားရပြီးသားမို့ ဆန့်အောင်လုပ်ဖို့ ပိုလွယ်သွားပါပြီ။ ဒါပေမယ့် ခါးနဲ့တင်ပါးနာတာကိုတော့ စောစောခံစားရတာပေါ့။ လျှို့ဝှက်ချက်ကို ဆက်ထိန်းထားချင်သေးရင်တော့ ချောင်ချောင်ချိချိရှိတဲ့ အင်္ကျီတွေဝတ်ကြပါနော်။ အဆင်သင်ဖြစ်တဲ့အခါမှ ပြောလည်းရပါတယ်။ လောစရာမလိုပါဘူး။
ဆရာဝန်ဆီသွားပြရအောင်
ဆရာဝန်နဲ့ ဘာတွေတိုင်ပင်ကြမလဲ
ကိုယ်ဝန်ရှိတဲ့လက္ခဏာ တစ်ခုခုများပိုဆိုးလာရင် ဆရာဝန်ဆီ ပြကြပါနော်။ တစ်ချို့စားစရာတွေနဲ့ အနံ့တွေက အန်ချင်စိတ်ကိုပိုဖြစ်စေတာကို သတိထားမိမှာပါနော်။ ဒါက ကိုယ်ဝန်ဆောင်ချိန်မှာဖြစ်တတ်တဲ့ အစာအပြောင်းအလဲပါ။ ဆရာဝန်က သက်သာစေမယ့်နည်းလမ်းတွေ ပြောပြပါလိမ့်မယ်။
ဘယ်လိုစစ်ဆေးမှုတွေ ထပ်လိုဦးမလဲ ဆက်လေ့လာရအောင်
အခုထိ ဆေးခန်းသွားမပြရသေးတဲ့သူတွေလည်း ရှိဦးမှာပေါ့။ သွားပြမယ်ဆိုလည်း ပုံမှန်စစ်နေကျအလေးချိန်တိုင်းတာ၊ သွေးဖိအားတိုင်းတာတွေပဲလုပ်မှာပါ။ သကြားဓါတ်မြင့်နေလား သိအောင်ဆီးတိုင်းတာမျိုးလည်း လုပ်နိုင်ပါတယ်။
ကျန်းမာဘေးကင်းအောင်နေကြမယ်
ကိုယ်ဝန်ရှိချိန်မှာ ကျန်းမာဘေးကင်းအောင် ဘာတွေသိထားရမလဲ
မေမေနဲ့ သားသားမီးမီးလေး ကျန်းမာဘေးကင်းဖို့အတော်လေး ပူပန်စရာတွေ များနေလောက်ရောပေါ့။ အောက်မှာ သတိထားစရာလေးတွေပါ။
ကွန်ပျူတာအသုံးများခြင်း
တစ်နေ့လုံး ကွန်ပျူတာရှေ့အလုပ်လုပ်နေရမယ့်အခါမျိုးဆို ကလေးရောအမေပါ ဘာတွေထိခိုက်နိုင်မလဲ။ ကွန်ပျူတာသုံးတဲ့မိခင်နဲ့ကိုယ်ဝန်ပျက်ကျမှု ဆက်စပ်တဲ့အကြောင်းအရာ ယုံတမ်းစကားတွေ အများကြီး ကြားဖူးပါလိမ့်မယ်။ ဒါတွေက အမှန်မဟုတ်ပါဘူး။ ဒီဆက်စပ်မှုကို သက်သေပြနိုင်ဖို့အများကြီးလိုပါသေးတယ်။ သက်သေပြပြီးသား အချက်ကတော့ အချိန်အကြာကြီးထိုင်နေရင် သွေးလည်ပတ်မှုကို အားနည်းစေပါတယ်။ တစ်နာရီခြားတစ်ခါလောက် ကွန်ပျူတာဆီကခွာပြီး လမ်းလျှောက်ပေးဖို့ အကြံပေးပါရစေ။ သွေးအားပြန်ကောင်းအောင် အကြောဆန့်တာ၊ လမ်းလျှောက်တာ၊ လှေကားဆင်းတာတို့ လုပ်ပေးလို့ရပါတယ်။
ဆေးလိပ်ငွေ့ရှုခြင်း
စိတ်ချရဖို့ဆိုရင်တော့ ဆေးလိပ်သောက်ဖို့ သတ်မှတ်ထားတဲ့နေရာကိုရှောင်တာ ပိုကောင်းပါတယ်။ စားသောက်ဆိုင်တွေသွားရင် ဆေးလိပ်သောက်ခွင့်မပြုတဲ့နေရာတွေမှာ ထိုင်ပါ။ ဆေးလိပ်ငွေ့တွေက အချင်းနဲ့ သက်ဆိုင်နေပါတယ်။ ပေါင်မပြည့်ဘဲမွေးတာ၊ ကျပ်မပြည့်တာမျိုးဖြစ်တတ်ပါတယ်။ ဒီအချက်ကို သက်သေမပြထားရသေးပေမယ့် တတ်နိုင်ရင်တော့ မရှုမိတာ အကောင်းဆုံးပါပဲ။ ဆေးလိပ်ငွေ့တွေက ကလေးအတွက်ရော လူကြီးအတွက်ပါ အန္တရာယ်ရှိတယ်ဆိုတာ သိထားပြီးသားဖြစ်မှာပါ။
၈ပတ်မြောက်မှာ ပြန်တွေ့မယ်နော်။ ကလေးလေးနဲ့ မေမေတွေရဲ့အပြောင်းအလဲကို ရင်ခုန်နေမယ်နော်။
Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။
