နို့တိုက်နေတဲ့ မိခင်တစ်ယောက်ဟာ ကော်ဖီသောက်လို့ရလား ။ ။

ကော်ဖီကိုကြိုက်နေတဲ့ လူတစ်ယောက်အဖို့ တစ်နေ့မှ ကော်ဖီတစ်ခွက်လောက်မသောက်ရရင် နေမထိ ထိုင်မသာဖြစ်စေမှာ အမှန်ပါ။ ဒါပေမယ့် ကိုယ့်အကြိုက်ကိုမေ့ပြီးကိုယ့်ရင်သွေးလေးကို ဦးစားပေးရတဲ့ အခိုက်အတန့်တွေဖြစ်တဲ့ ကိုယ်ဝန်ဆောင်ချိန်တို့ နို့တိုက်ချိန်တို့ဆို ကော်ဖီသောက်လိုက်ရင် ကလေးကိုများထိခိုက်မိမလားဆိုပြီး ကော်ဖီ မသောက်ဘဲ နေကြတယ်ဟုတ်။ သောက်တော့သောက်ချင်တယ်၊ သောက်ရမှာလည်း စိတ်တထင့်ထင့်ဖြစ်နေတဲ့ မေမေတို့ ဒီဆောင်းပါးလေးကို ဖတ်ကြည့်စေချင်ပါတယ်။

နို့တိုက်နေတဲ့ မိခင်တစ်ယောက် ကောက်ဖီသောက်လို့ရလား။ ။

ဝမ်းသာစရာပါပဲ။ ကလေးနို့တိုက်နေလို့ ကောက်ဖီ ကိုဖြတ်ထားစရာ မလိုပါဘူး။ တစ်နေ့ကို ၂ ခွက်ကနေ ၃ ခွက်လောက်အထိသောက်လို့ရပါတယ်။ အကောင်းဆုံးကတော့ တစ်နေ့တစ်ခွက်သောက်တာပဲပေါ့ ။ ။ တစ်နေ့ကို ကဖင်းဓာတ် ၂၀၀ ကနေ ၃၀၀ မီလီဂရမ်လောက်သောက်တာ အကောင်းဆုံးပါ။ တစ်ခုသိထားရမှာက ကဖင်းဓာတ်ပါဝင်မှုဟာ သုံးထားတဲ့ ကော်ဖီစေ့နဲ့ နှပ်ထားတဲ့ အချိန်တွေပေါ် မူတည်ပြီး ပြောင်းလဲသွားတယ်ဆိုတာပါ။

ကဖင်းဓာတ်နဲ့ မိခင်နို့။ ။

ကော်ဖီသောက်ပြီး ၁ နာရီ လောက်အကြာဟာ နို့ထဲမှာ ကဖင်းဓာတ် အမြင့်ဆုံးရှိနေတဲ့အချိန်ပါ။ အမြင့်ဆုံး ရှိနေတယ်ဆိုပေမယ့် နို့ထဲကနေ ကလေးဆီကို ပမာဏ အနည်းငယ်လောက်ကပဲ ဖြတ်သွားနိုင်ပါတယ်။ တစ်ခုသိထားရမှာက ကဖင်းဓာတ်ကို ကော်ဖီဆီကတင်မဟုတ်ဘဲ အခြား လက်ဖက်ရည်၊ ချောကလက်၊ အားဖြည့်အချိုရည်နဲ့ ဆိုဒါတို့ကနေလည်း ရတဲ့အတွက် နို့တိုက်နေတဲ့ မေမေတို့တစ်နေ့တာ ကဖင်းဓာတ်ကို တွက်ရင် အဲဒီ အစားအစာတွေကိုပါထည့်တွက်ဖို့လိုတယ်နော် ။ ။

မိခင်သောက်လိုက်တဲ့ ကော်ဖီထဲပါတဲ့ ကဖင်းဓာတ်က ကလေးကို ဘယ်လိုသက်ရောက်မှုရှိလဲ ။ ။

ပုံမှန်သောက်နေကျ ၁ ခွက် ၂ ခွက်လောက်ဆို ကိစ္စ မရှိပေမယ့် ဒီထက်ပိုများမယ်ဆိုရင်တော့ ကလေးဆီကို ဆိုးကျိုးတွေ အများကြီးဖြစ်သွားနိုင်ပါတယ်။ ကလေးအပေါ် ကဖင်းဓာတ်ရဲ့ သက်ရောက်မှုတွေကတော့

• ကလေးက ဂနာမငြိမ်ဖြစ်နေမယ်
• ကလေးက ကတုန်ကယင်ဖြစ်နေမယ်
• ကောင်းကောင်းလည်း မအိပ်ဘူး
• ကြောင်တောင်တောင်လေး ဖြစ်နေတတ်ပါတယ်။

နေ့မစေ့ လမစေ့မွေးတဲ့ ကလေးတွေနဲ့ မွေးကင်းစကလေးတွေဆို ကဖင်းဓာတ်ကို ချေဖျက်ချိန်ကြာတာကြောင့် မိခင်က ကော်ဖီနည်းနည်းလေးသောက်လိုက်တာနဲ့တင် သူ့တိုအပေါ် ကဖင်းဓာတ်သက်ရောက်မှု ပြင်းထန်တတ်ပါတယ်။

ကော်ဖီက နို့တိုက်နေတဲ့ မေမေတို့ အပေါ်မှာရော ဘယ်လိုသက်ရောက်မှုရှိလဲ ။ ။

တစ်နေ့ကို ကော်ဖီ ၄ ခွက်ထက်ပိုသောက်ခဲ့ရင် ကော်ဖီထဲပါတဲ့ ကဖင်းဓာတ်က ကလေးဆီကို အများကြီးရောက်နိုင်ရုံမက သောက်တဲ့ မိခင်ကိုပါ ထိခိုက်နိုင်ပါသေးတယ်။

• ဖြစ်နေကျ ကတုန်ကယင်ဖြစ်တာ၊ ရင်တုန်တာ၊ အိပ်မပျော်တာတွေအပြင်
• ဆီးခဏခဏ သွားချင်မယ်
• အစာအိမ်အောင့်တာတွေဖြစ်မယ်
• နှလုံးခုန်မြန်မယ်
• ကြွက်သားတွေ တဆတ်ဆတ်တုန်တာမျိုးတွေ ပါထပ်ဖြစ်နိုင်ပါသေးတယ်။

ကော်ဖီက မိခင်ရဲ့နို့ထွက်မှု အပေါ်မှာတော့ သက်ရောက်မှု မရှိပါဘူး။ အရေးကြီးဆုံးကတော့ နို့တိုက်နေတဲ့ မေမေတို့ ကော်ဖီကို လုံးဝ မဖြတ်နိုင်ဘူးဆိုရင် တစ်နေ့ကို ၁ခွက်လောက်ပဲ သောက်ပေးဖို့ပါ။ ဖြတ်ထားနိုင်တယ်ဆိုရင်တော့ ကလေး နည်းနည်းကြီးတဲ့ ဖြည့်စွက်စာစားချိန်လောက်ရောက်မှ ကော်ဖီပြန်သောက်ပါလို့ အကြံပေးချင်ပါတယ် ။ ။