လက်ချောင်းများ တောင့်တင်းသူများတွင် ပြုလုပ်သင့်သော လေ့ကျင့်ခန်း ၅ မျိုး

    လက်ချောင်းများ တောင့်တင်းသူများတွင်  ပြုလုပ်သင့်သော လေ့ကျင့်ခန်း ၅ မျိုး

    သင့်လက်ချောင်းများသည် အကွေးအဆန့် ပြုလုပ်နိုင်ပါသည်။ ထို့ကြောင့် လက်ချောင်းများကို အသုံးပြုပြီး စာရိုက်ခြင်း၊ အသီးများအခွံနွှာခြင်း၊ အလှဆင်ခြင်းနှင့် ပန်းခူးခြင်းကဲ့သို့သော အလုပ်များ လုပ်နိုင်ခြင်းဖြစ်ပါသည်။ ထိုလက်ချောင်းလေးများ တောင့်တင်းနေသောအခါ နေ့စဉ်အလုပ်များ ထိခိုက်လာနိုင်ပါသည်။ ထိုအခါ ကုသမှုများခံယူရန် လိုအပ်သလို ရိုးရှင်းသောလေ့ကျင့်ခန်းများက သင့်ကို အထောက် အကူဖြစ်စေပါလိမ့်မည်။

    လက်ချောင်းထိပ်များကို တလှည့်စီထိခြင်း

    ထိုလေ့ကျင့်ခန်းသည် အဆစ်များနှင့် အရွတ်များကို ဆန့်ထုတ်ပေးသော လေ့ကျင့်ခန်းဖြစ်ပါသည်။ လက်ချောင်းများကို အလွန်တရာ ဆုပ်နယ်ခြင်း မပြုရပါ။

    ထိုလေ့ကျင့်ခန်းကို ပြုလုပ်ရန် လက်ချောင်းများကို ဆန့်ကားထားပြီး လက်ကောက်ဝတ်နှင့် လက်ဖဝါးနှစ်ခုကို ရေပြင်ညီတွင် ပက်လက်လန်ထားပါ။

    • လက်ချောင်းများဖြင့် OK ပုံစံ ပြုလုပ်ပါ။ ထိုအချိန်တွင် လက်ညှိုးနှင့် လက်မထိပ်ကို ထိထားရမည်ဖြစ်ပြီး အခြားလက်ချောင်းများသည် အရှေ့ဘက်ကို ဦးတည့်ထားရမည် ဖြစ်ပါသည်။
    • ထို့နောက် လက်ညှိုးပြီးလျှင် အခြားသော လက်ခလယ်၊ လက်သကြွယ်၊ လက်သန်းတို့ဖြင့် တလှည့်စီ ပြုလုပ်ပါ။ ထိုအချိန်တွင် အခြားလက်ချောင်းများသည် အရှေ့ဘက်ကို ဦးတည့်ထားရမည် ဖြစ်ပါသည်။
    • လက် ၁ ဖက် ကို ၁၀ ကြိမ်စီ ပြန်လုပ်ပါ။

    လက်/ လက်ချောင်း အရွတ်လေ့ကျင့်ခန်း

    ထိုလေ့ကျင့်ခန်းကို စလုပ်ရန်အတွက် လက်ချောင်းလေးများကို စုထားပြီး ဖြန့်ထားပါ။

    • လက်ချောင်းထိပ်လေးများကို ကွေးလိုက်ပါ။ ထိုအချိန်တွင် လက်ထိပ်လေးများသည် လက်ဖဝါးကို ထိနေရမည်ဖြစ်ပါသည်။
    • မူလအနေအထားသို့ ပြန်သွားပါ။
    • လက်သီးအပြည့် ဆုပ်ပါ။ ထိုအချိန်တွင် လက်ချောင်းတစ်ခုလုံး လက်ဖဝါးမျက်နှာပြင်ကို ထိနေရမည်ဖြစ်ပါသည်။ လက်သည်းများကို မမြင်ရသည်အထိ ကျစ်ကျစ်ပါအောင် ဆုပ်ထားပါ။
    • မူလအနေအထားသို့ ပြန်သွားပါ။
    • ထို့နောက် လက်သည်းများကို မြင်ရသည့် အနေအထားရောက်အောင် လက်သီးဆုပ်ခြင်းကို လက်ဆစ်လေးများ၏ ဒုတိယအဆင့် အထိ ပြုလုပ်ပါ။
    • မူလအနေအထားသို့ ပြန်သွားပါ။

    လက်မကို ကွေးခြင်း၊ ဆန့်ခြင်း

    ထိုလေ့ကျင့်ခန်းကို စလုပ်ရန်အတွက် လက်မကို အပြင်ဘက်သို့ ထောင်ထားပါ။

    • လက်မကို လက်ဖဝါးဆီသို့ ဖြေးဖြေးချင်းရွှေ့ပါ။
    • မူလအနေအထားသို့ ပြန်သွားပါ။
    • လက်မ တစ်ဖက် ကို ၁၀ ခါ ပြန်လုပ်ပါ။

    လက်ချောင်းများကို ဆန့်ထုတ်ခြင်း

    ထိုလေ့ကျင့်ခန်းသည် လက်ချောင်းလေးများ တောင့်တင်းမှုကို လျော့ကျစေပြီး လှုပ်ရှားမှုများကို ကောင်းမွန်စေပါသည်။

    • ထိုလေ့ကျင့်ခန်းကို စလုပ်ရန်အတွက် သင့်လက်နှစ်ဖက်ကို စားပွဲပေါ်တွင်ထားပြီး လက်ဝါးထောင်ပြီး လက်ချောင်းများကို အပြင်ဘက်သို့ မျက်နှာမူထားပါ။ လက်များကို စားပွဲနှင့် တက်နိုင်သမျှ ကပ်ထားပါ။
    • ထိုအနေအထားအတိုင်း စက္ကန့် ၃၀ နေပါ။
    • လက်ချောင်းများကို ဖြေလျော့ပြီး မူလအနေအထားသို့ ပြန်သွားပါ။
    • လက်တစ်ဖက် ကို ၅ ခါ ပြန်လုပ်ပါ။

    လက်သည်းကုပ်ခြင်း၊ ဆန့်ခြင်း

    ထိုလေ့ကျင့်ခန်းသည်လည်း လက်ချောင်းလေးများ တောင့်တင်းမှုကို လျော့ကျစေပြီး လှုပ်ရှားမှုများကို ကောင်းမွန်စေပါသည်။

    • လေ့ကျင့်ခန်းစလုပ်ရန် လက်ဖဝါးများကို မှောက်ခုံထားပါ။
    • လက်ချောင်းလေးများ ကို အတွင်းဆုံးအထိ ကွေးလိုက်ပါ။
    • ထိုအနေအထားအတိုင်း စက္ကန့် ၃၀ နေပါ။
    • လက်ချောင်းများကို ဖြေလျော့ပြီး မူလအနေအထားသို့ ပြန်သွားပါ။
    • လက်တစ်ဖက် ကို ၅ ခါ ပြန်လုပ်ပါ။

    အချုပ်ဆိုရသော် အထက်ပါလေ့ကျင့်ခန်း ၅ မျိုးသည် လက်ချောင်းများတောင့်တင်းလျှင် အသုံးဝင်စေပါသည်။ ထိုလေ့ကျင့်ခန်းများသည် လက်ဆစ်များကို ပြေလျော့စေသည့်အပြင် လှုပ်ရှားမှုများကိုလည်း ကောင်းမွန်စေပါသည်။ သို့သော် လက်ချောင်းများတောင့်တင်းနေခြင်းသည် အရိုးများ၊ အရွတ်နှင့် တွယ်ဆက်အရွတ်များတွင် ဖြစ်သော ပြသနာများကြောင့် ဖြစ်လျှင် လေ့ကျင့်ခန်းသာမက ဆေးကုသမှုများလည်း ခံယူသင့်ပါသည်။

    Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

    ရင်းမြစ်များ
    1. Slideshow: 10 Ways to Exercise Hands and Fingers. http://www.webmd.com/osteoarthritis/ss/slideshow-hand-finger-exercises. Accessed April 3, 2017.
    2. 5 exercises to improve hand mobility. http://www.health.harvard.edu/pain/5-exercises-to-improve-hand-mobility-and-reduce-pain. Accessed April 3, 2017.
    3. Yang G, McGlinn EP, Chung KC. Management of the Stiff Finger: Evidence and Outcomes. Clinics in plastic surgery. 2014;41(3):501-512. doi:10.1016/j.cps.2014.03.011.

    Hand exercises for arthritis.http://www.webmd.com/osteoarthritis/hand-exercises-for-osteoarthritis. Accessed April 3, 2017.

    စာရေးသူ ဓာတ်ပုံbadge
    Dr. K Zin Thwe မှ ရေးသားသည်။ 07/01/2022 တွင် ပြန်လည်ပြင်ဆင်ခဲ့သည်။
    Hello Sayarwon Panel မှ အချက်အလက် စစ်ဆေးထားပါသည်။