တက်စတိုစထရုန်းဟော်မုန်းကို သဘာဝအတိုင်း မြှင့်တင်ဖို့

တက်စတိုစထရုန်းဟာ အမျိုးသားတွေရဲ့ ကျန်းမာရေးအတွက် အရေးကြီးပါတယ်။ အမျိုးသားများ ကြွက်သားထုထည် တောင့်တင်းစေဖို့၊ အရိုးများသိပ်သည်းဆ ကောင်းစေဖို့အပြင် လိင်စိတ်ဆန္ဒကို စေ့ဆောင်မောင်းနှင်ဖို့ အဓိကနေရာက ပါဝင်ပါတယ်။ အရွယ်ရောက်ခါစမှာ တက်စတိုစထရုန်းဟော်မုန်း ထုတ်လုပ်မှုဟာ အမြင့်ဆုံးကို ရောက်လာပြီး နောက်ပိုင်းမှာ တဖြည်းဖြည်း လျော့ကျသွားပါတယ်။

ယခုဆောင်းပါးမှာ ဆက်လက်ဖော်ပြမှာကတော့ တက်စတိုစထရုန်းဟော်မုန်းကို ဘယ်လိုမြှင့်တင်ရမလဲ ဆိုတာပါပဲ။

အိပ်ရေး၀၀အိပ်ပါ

တက်စတိုစထရုန်းမြှင့်တင်ရာမှာ နှစ်ခြိုက်စွာအိပ်ခြင်းလောက် သဘာဝကျတဲ့နည်းလမ်းမရှိပါဘူး။ အမေရိကန်ဆေးပညာဂျာနယ်ရဲ့ ဖော်ပြချက်အရ အိပ်ရေးပျက်ခြင်းဟာ ကျန်းမာပြီး ငယ်ရွယ်တဲ့ ယောကျ်ားလေးများရဲ့ တက်စတိုစထရုန်းကိုပမာဏကိုတောင် ကျဆင်းစေနိုင်တယ်လို့ ဆိုပါတယ်။ တပတ်နလောက် ဆက်တိုက်အိပ်ရေးပျက်ရင် သိသာလာပါတယ်။

တနေ့ကို ဘယ်လောက်အိပ်ရမလဲဆိုတာ အခြေအနေမျိုးစုံပေါ် မူတည်ပါတယ်။ အရွယ်ရောက်ပြီးသူများအနေနဲ့ ပျမ်းမျှအားဖြင့် တညကို အနည်းဆုံး ၇ နာရီကနေ အများဆုံး ၉နာရီထိ အိပ်သင့်ကြောင်း သုတေသနတွေအရ သိရပါတယ်။ ဒါမှသာ ကိုယ်ခန္ဓာရဲ့ ပုံမှန်လုပ်ငန်းဆောင်တာတွေကို ကောင်းစွာဆောင်ရွက်ပြီး တက်စတိုစထရုန်းပမာဏကိုလည်း ကောင်းကောင်းထိန်းသိမ်းထားနိုင်မှာ ဖြစ်ပါတယ်။

ကိုယ်အလေးချိန်လျှော့ချပါ

ကိုယ်အလေးချိန် ရှိသင့်တာထက်များနေတဲ့ သက်လတ်ပိုင်းအရွယ်အမျိုးသားတွေမှာ တက်စတိုစထရုန်းပမာဏ ကျဆင်းနေတတ်ပါတယ်။ ဟော်မုန်းဆိုင်ရာဂျာနယ်တစောင်မှာ ဖော်ပြချက်အရ တက်စတိုစထရုန်းနည်းပါးခြင်းနဲ့ ဆီးချိုဖြစ်ခြင်းတို့ဟာ ဆက်စပ်နေပါတယ်။ ကိုယ်အလေးချိန်ပုံမှန်ထိန်းသိမ်းထားခြင်းဟာ ဆီးချိုဖြစ်နိုင်ခြေကို လျော့စေသလို တက်စတိုစထရုန်းပမာဏကိုလည်း ပုံမှန်ထိန်းနိုင်စေပါတယ်။

ဥရောပဟော်မုန်းဆိုင်ရာဂျာနယ်တစောင်ရဲ့ဖော်ပြချက်အရ ကိုယ်အလေးချိန် ပုံမှန်ရှိခြင်းဟာ တက်စတိုစထရုန်းမြင့်မားဖို့ အထောက်အကူပြုတယ်လို့ သိရပါတယ်။ ဒီလိုထိန်းသိမ်းနိုင်ဖို့အတွက် အစားအသောက်ကို အတင်းအကြပ်လျှော့ချစရာတော့ မလိုပါဘူး။ အကောင်းဆုံးနည်းလမ်းကတော့ ကျန်းမာရေးနဲ့ ညီညွတ်အောင်စားသောက်ပြီး လေ့ကျင့်ခန်း ပုံမှန်ပြုလုပ်ပေးဖို့ ဖြစ်ပါတယ်။

ဇင့် သုံးစွဲပါ

တက်စတိုစထရုန်းနည်းပါးတဲ့ အမျိုးသားတွေမှာ ဇင့်ဓာတ်နည်းပါးနေတာကို တွေ့ရပါတယ်။ သုတေသနတချို့အရ ကျန်းမာရေးကောင်းတဲ့ အမျိုးသားများရဲ့ သွေးအတွင်းတက်စတိုစထရုန်းပမာဏကို ထိန်းသိမ်းပေးရာမှာ ဇင့်ဓာတ်ဟာ အဓိကကျပါတယ်။

ဇင့်ဓာတ်များတဲ့ အစားအသောက်တွေဖြစ်တဲ့ ခရုကမာ၊ အသား(Red meat)၊ ကြက်ဘဲ စတာတွေကို ပုံမှန်စားသောက်သင့်ပါတယ်။ ပဲအမျိုးမျိုး၊ အခွံမာသီးများ၊ ဂဏန်း၊ ပုစွန်ထုပ်၊ မပြုပြင်ရသေးတဲ့ အစေ့အဆန်များ စတာတွေမှာလည်း ဇင့်ဓာတ် ကောင်းကောင်းပါဝင်ပါတယ်။ အရွယ်ရောက်ပြီး အမျိုးသားတယောက်အနေနဲ့ တနေ့တာမှာ ဇင့်ဓာတ် ၁၁မီလီဂရမ် လိုအပ်ပါတယ်။

သကြားလျှော့ပါ

သုတေသနစာစောင်တခုမှာ ဖော်ပြချက်အရ ဂလူးကို့စ်ဓာတ် (သကြား) မြင့်တက်ခြင်းဟာ သွေးထဲမှာ တက်စတိုစထရုန်းပမာဏကို ၂၅ရာခိုင်နှုန်း ကျဆင်းစေတယ်လို့ သိရပါတယ်။ ဒါကြောင့် ဆီးချိုဖြစ်ပွားနေသူများမှာ တက်စတိုစထရုန်းနည်းပါးတတ်ပါတယ်။

လေ့ကျင့်ခန်းပြုလုပ်ပါ

လေ့ကျင့်ခန်းပုံမှန်ပြုလုပ်ဖို့တိုက်တွန်းခြင်းဟာ နည်းလမ်းဟောင်းကြီးဖြစ်ပေမယ့် ရေရှည်ပုံမှန် ပြုလုပ်နိုင်ရင် အကျိုးရှိပါတယ်။ အထူးသဖြင့် ဆွဲအားတွန်းအားသုံးပြီး လုပ်ရတဲ့ resistance training လေ့ကျင့်ခန်းတွေဖြစ်တဲ့ အလေးမခြင်း၊ သားရေပြားဆွဲခြင်း၊ ဒိုက်ထိုးခြင်း စတာတွေဟာ အထောက်အကူပြုပါတယ်။

အဆိုပါလေ့ကျင့်ခန်းများဟာ စိတ်အခြေအနေကို ကောင်းမွန်စေပြီး ဦးနှောက်ထဲက ဓာတ်ပစ္စည်းတွေကို လှုံ့ဆော်ပေးတာကြောင့် ပျော်ရွှင်မှု၊ မိမိကိုယ်ကိုယုံကြည်မှုတွေ ဖြစ်စေပါတယ်။ ညအခါ ကောင်းစွာ အိပ်ပျော်စေပါတယ်။ ကျွမ်းကျင်သူများရဲ့ အဆိုအရ တနေ့ကို မိနစ်သုံးဆယ်ခန့် လေ့ကျင့်ခန်း ပြုလုပ်သင့်ပါတယ်။

တက်စတိုစထရုန်းနည်းပါးနေခြင်းကို ဘယ်လိုသိနိုင်သလဲ

တက်စတိုစထရုန်းနည်းပါးရင် လိင်စိတ်ဆန္ဒ ကျဆင်းနေတတ်ပါတယ်။ ပန်းညှိုးတတ်ပါတယ်။ အရိုးများ ကျိုးပဲ့လွယ်ပြီး တခြားကျန်းမာရေးပြဿနာတွေ ရှိလာနိုင်ပါတယ်။ အဆိုပါ ပြဿနာတွေရှိလာရင် ဆရာဝန်နဲ့ ပြသပြီး လိုအပ်တဲ့ စစ်ဆေးမှုတွေ ပြုလုပ်နိုင်ပါတယ်။ တက်စတိုစထရုန်းနည်းပါးခြင်းဟာ လိင်မှုကိစ္စအပြင် တကိုယ်ရေကျန်းမာရေးနဲ့ လူနေမှုပုံစံကိုပါ ထိခိုက်စေနိုင်တာကြောင့် ဂရုပြုသင့်ပါတယ်။

Hello Health Group သည်ဆေးပညာအကြံပြုချက်များ၊ ရောဂါရှာဖွေအတည်ပြုချက်များနှင့် ကုသမှုများ မပြုလုပ်ပေးပါ။