လိင်တံပျော့ခြင်းရောဂါကို ဖြေရှင်းပေးနိုင်တဲ့ အစားအစာများ

ဆေးတွေ၊ လိင်တံပြွန်တွေ၊ ခွဲစိတ်မှုတွေက အမျိုးသားလိင်တံပျော့ခြင်းကို အထိုက်အလျောက် သက်သာစေနိုင်တယ်ဆိုတာ စာဖတ်သူတို့ သိကြမှာပါ။ ဒါဖြင့်ရင် အစားအစာတွေကရော အမျိုးသားလိင်တံပျော့ခြင်း အပေါ် သက်ရောက်မှုရှိသလား။ အဖြေကိုပြောရမယ်ဆိုရင်တော့ အစားအစာတွေကလည်း လိင်တံပျော့ခြင်းဆိုင်ရာ ပြဿနာ Erectile dysfunction (ED) ကို သက်သာစေနိုင်ပါတယ်။ အခုဒီဆောင်းပါးမှာတော့ Hello ဆရာဝန် ပရိတ်သတ်ကြီးအတွက် လိင်တံ ပျော့ခြင်းရောဂါကို ဖြေရှင်းပေးနိုင်တဲ့ အစားအစာများ ကို ဖော်ပြလိုက်ပါတယ်။

လိင်တံပျော့ခြင်းရောဂါကို ဖြေရှင်းပေးနိုင်တဲ့ အစားအစာများ

လိင်တံပျော့ခြင်းရောဂါကို ဖြေရှင်းပေးနိုင်တဲ့ အစားအစာများ ကတော့

၁။ ဖရဲသီး

လိင်တံပျော့ခြင်းကို ကုသပေးနေတဲ့ ဆေးတွေမှာ ပါဝင်တဲ့ ဒြပ်ပေါင်းက ဖရဲသီးတွေမှာလည်း ပါဝင်ပါတယ်။ ဒါ့အပြင် ဖရဲသီးဟာ အမျိုးသားတွေရဲ့ လိင်စိတ်ဆန္ဒပြင်းပြခြင်းကို အရှိန်မြှင့်တင်ပေးနိုင်တယ်လို့ လေ့လာချက်တွေက ဆိုပါတယ်။ ဖရဲသီးမှာ ရေဓာတ်အများဆုံးပါဝင်တဲ့အပြင် lycopene လို့ခေါ်တဲ့ အနီရောင်ခြယ်ပစ္စည်းဟာ နှလုံး၊ ပရော့စတိတ် (သုက်ရည်ဂလင်း) နဲ့ အရေပြားတို့အတွက် ကောင်းကျိုးဖြစ်စေပါတယ်။

၂။ ကမာကောင်

အခွံမာ ရေနေသတ္တဝါတစ်မျိုးဖြစ်တဲ့ ကမာကောင်တွေဟာ သင့်ရဲ့ တက်စတိုစတီရုန်း (testosterone) ဟော်မုန်းပမာဏကို မြှင့်တက်စေနိုင်ပြီး လိင်စိတ်ဆန္ဒကို တိုးမြှင့်စေပါတယ်။ ဒါ့အပြင် ကမာကောင်တွေမှာ ခန္ဓာကိုယ်အတွက် လိုအပ်တဲ့ Zinc ဓာတ်လည်း ပါဝင်ပါသေးတယ်။

၃။ ကော်ဖီ

မနက်ခင်းမှာ ကော်ဖီတစ်ခွက် သောက်သုံးလိုက်ခြင်းဟာ စိတ်ကျေနပ်ဖွယ်ကောင်းရုံသာမကဘဲ သင့်ရဲ့ လိင်ပိုင်းဆိုင်ရာ လုပ်ဆောင်ချက်တွေကိုလည်း အရှိန်မြှင့်တင်စေနိုင်ပါတယ်။ တစ်နေ့ကို ကော်ဖီ ၂ ခွက်ကနေ ၃ ခွက် ကြားသောက်သုံးတဲ့ အမျိုးသားတွေဟာ လိင်တံပျော့ခြင်းပြဿနာ (Erectile dysfunction (ED)) ဖြစ်ခြင်း နည်းပါးတယ်လို့ လေ့လာချက်တစ်ခုက ဆိုပါတယ်။ ဒါဟာ ဘာကြောင့်လဲဆိုတော့ ကဖင်းဓာတ်က သွေးလည်ပတ်မှုနှုန်းကို အားကောင်းစေတဲ့ အတွက်ဖြစ်ပါတယ်။

၄။ ချောကလက် အနက်

တစ်ပတ်ကို ချောကလက် အောင်စ အနည်းငယ်စားသုံးပေးခြင်းက သင့်ရဲ့ နှလုံးနဲ့ တခြားခန္ဓာကိုယ် အစိတ်အပိုင်းတွေရဲ့ ကျန်းမာရေးကို ကောင်းမွန်စေပါတယ်။ ချောကလက်မှာပါဝင်တဲ့ ဖလေဗန်နောလ် (Flavanol)က သွေးကြော ကျန်းမာရေးကို ကောင်းမွန်စေပြီး သွေးဖိအားကိုလည်း လျော့ကျစေပါတယ်။

ဒါ့အပြင် ဒီ ဖလေဗန်နောလ် (Flavanol)ဟာ လိင်တံထောင်မတ်ခြင်းကို ဖြစ်စေနိုင်တဲ့ နိုက်ထရစ်အောက်ဆိုဒ် ဓာတ်ပေါင်း ထွက်ရှိဖို့လည်း ကူညီပေးနိုင်ပါတယ်။

၅။ အခွံမာသီး

အခွံမာသီး အမျိုးအစားတွေထဲမှာ ဟေဇဲလ်သီး၊ သစ်ကြားသီး၊ မြေပဲနဲ့ ဝက်သစ်ချသီးတို့ပါဝင်ပါတယ်။ အခွံမာသီးတွေမှာ arginine လို့ခေါ်တဲ့ နိုက်ထရစ် အောက်ဆိုဒ်ထွက်ရှိစေဖို့ ကူညီပေးနိုင်တဲ့ အမိုင်နို အက်ဆစ်တွေပါဝင်ပါတယ်။

ဒါ့အပြင် အခွံမာသီးတွေမှာ ဗီတာမင် E၊ ဗီတာမင် B အုပ်စုဝင် ဖောလစ် အက်ဆစ်နဲ့ အမျှင်ဓာတ်တို့ ကြွယ်ဝစွာပါဝင်ပါတယ်။ ဒါပေမဲ့ အခွံမာသီးတွေမှာ ကယ်လိုရီဓာတ်တွေ ကြွယ်ဝစွာပါဝင်တဲ့အတွက် တရားလွန် မစားသုံးသင့်ပါဘူး။

၆။ စပျစ်သီးဝိုင်

သင်ဟာ စပျစ်ဝိုင် ကို နဂိုကတည်းက ကြိုက်နှစ်သက်သူတစ်ယောက်ဖြစ်ရင်တော့ ဒါက သတင်းကောင်းတစ်ခုပါ။ စပျစ်ဝိုင်မှာ ပါဝင်တဲ့ အာဟာရဓာတ်တွေဟာ သင့်ခန္ဓာကိုယ်တွင်း နိုက်ထရစ်အောက်ဆိုဒ် ပမာဏ ကိုတိုးမြှင့်ပေးနိုင်ပါတယ်။

စပျစ်ဝိုင်ကို မကြိုက်နှစ်သက်ဘူးဆိုရင်လည်း စပျစ်သီးနဲ့ ပါဝင်ပစ္စည်းတွေ တူညီတဲ့ သလဲသီးဖျော်ရည်ကို သောက်သုံးနိုင်ပါတယ်။

၇။ ကြက်သွန်ဖြူ

အနံ့ပြင်းလွန်းတဲ့ ကြက်သွန်ဖြူတွေဟာ သင့်ရဲ့ သွေးကြောအတွက် အဓိက အထောက်အပံ့ဖြစ်စေတဲ့ အရာတစ်ခုပါ။ သွေးလွှတ်ကြောတွေမှာ ချိုးများ ဖြစ်ပေါ်တဲ့အခါ သွေးစီးဆင်းမှုကို ပိတ်ဆို့စေနိုင်ပါတယ်။ ဒီလို သွေးကြော ကောင်းကောင်းမစီးဆင်းတဲ့အခါ သင့်ရဲ့ လိင်မှုကိစ္စ ကိုလည်း ထိခိုက်နိုင်ပါတယ်။ ဒါပေမဲ့ ကြက်သွန်ဖြူကို စားသုံးပေးမယ်ဆိုရင် သင့်ရဲ့ သွေးလွှတ်ကြောတွေရဲ့ ကျန်းမာရေးကို ကောင်းမွန်စေပြီး သွေးစီးဆင်းမှု အားကောင်းစေပါတယ်။

၈။ ငါး

ဆယ်လမွန်နဲ့ တခြားသော အဆီကြွယ်ဝတဲ့ ငါးတွေဟာ အိုမီဂါ ၃ အက်ဆစ်တွေ အများအပြားဝင်တဲ့ ငါးတွေပါ။ အိုမီဂါ ၃ အက်ဆစ်ဟာ သင့်ခန္ဓာကိုယ်တွင်း နိုက်ထရစ် အောက်ဆိုဒ်ဓာတ်ထုတ်လုပ်မှုကို တိုးမြှင့်ပေးနိုင်ပါတယ်။ ဒါ့အပြင် ဒီအက်ဆစ်တွေဟာ သွေးဖိအားကို လျော့ကျစေပြီး နှလုံးဖောက်ပြန်မှုနဲ့ သွေးကြောခဲခြင်းများကိုလည်း ကာကွယ်ပေးပါတယ်။

ကျန်းမာလိုသူတစ်ယောက်အနေနဲ့ တစ်ပတ်ကို ဆယ်လမွန်ငါး ၈ အောင်စခန့်စားသုံးပေးသင့်ပါတယ်။ ဆယ်လမွန်ငါး စားသုံးဖို့ မလွယ်ကူဘူးဆိုရင်လည်း ငါးသေတ္တာငါး၊ တူနာငါး နဲ့ မက်ကရယ်ငါးတို့ စားသုံးပေးနိုင်ပါတယ်။

၉။ ဟင်းသီး သစ်ရွက်များ

ကိုက်လန်လို အရွက်မျိုးဟာ နိုက်ထရစ် အောက်ဆိုဒ်ပမာဏကို များပြားစေနိုင်ပါတယ်။ ကိုယ့်ရဲ့ လိင်မှု ကျန်းမာရေး ကောင်းမွန်ရုံသာ မကဘဲ ခန္ဓာကိုယ်အတွက် အရေးပါ အာဟာရဓာတ်တွေ ဖြစ်တဲ့ ဗီတာမင်တွေ၊ သတ္တုဓာတ်တွေနဲ့ အိုမီဂါ ၃ အက်ဆစ်တို့ပါ ဖြည့်စွက်ပေးနိုင်ပါတယ်။

၁၀။ ငရုတ်သီးများ

ငရုတ်သီးတောင့်များဟာ သင့်ရဲ့ လိင်မှုကိစ္စပိုင်းဆိုင်ရာ စွမ်းအားကို မြှင့်တင်ပေးနိုင်ပါတယ်။ ငရုတ်သီးအမျိုးအစားအမျိုးမျိုးမှာ ပါဝင်တဲ့ အပူဓာတ်ဟာ သွေးလည်ပတ်မှု ကောင်းစေပါတယ်။ ဒါကြောင့် နှလုံးနဲ့ တခြားအင်္ဂါတွေဖြစ်တဲ့ လိင်အင်္ဂါတို့ ထံသို့ သွေးကြောများ လွယ်ကူစွာ စီးဆင်းစေပါတယ်။ ဒါ့အပြင် ငရုတ်သီးတွေဟာ သွေးဖိအားနဲ့ ကိုလက်စထရော ပမာဏကို ကျဆင်းစေပြီး သွေးခဲခြင်းကို ကာကွယ်ပေးနိုင်ပါတယ်။

၁၁။ သံလွင်ဆီ

သံလွင်ဆီတွေဟာ သင့်ရဲ့ ခန္ဓာကိုယ်ကို တက်စတို စတီရုန်း (testosterone) ဟော်မုန်းတွေ ပိုထွက်စေပါတယ်။ ဒါ့အပြင် သံလွင်ဆီနဲ့ အခွံမာသီးတွေမှာပါဝင်တဲ့ monounsaturated အဆီဟာ မကောင်းတဲ့ ကိုလက်စထရောတွေကို ရှင်းလင်းပေးနိုင်ပါတယ်။ ဓာတုပစ္စည်းတွေနဲ့ မထုတ်လုပ်ထားတဲ့ သံလွင်ဆီတွေမှာမှ ကျန်းမာရေးအတွက်ကောင်းမွန်တဲ့ အန်တီအောက်ဆီဒန့် (antioxidants) ဓာတ်တွေ အပြည့်အဝ ပါဝင်တာ ဖြစ်ပါတယ်။