လူ့ခန္ဓာကိုယ်မှာ လက်ချောင်း၊ခြေချောင်းလေးတွေကနေစလို့ ဒူး၊ လည်ပင်းနဲ့ အစိတ်အပိုင်းတွေကိုကောင်းစွာလှုပ်ရှားနိုင်စေဖို့ အဆစ်တွေနဲ့ဖွဲ့စည်းထားတာပါ။ ဒီအဆစ်တွေကို ညောင်းတဲ့အခါမှာ ဂျွတ်ခနဲ မြည်အောင်ချိုးတတ်ကြတယ်နော်။ ဒီအလေ့အထကို လူတော်တော်များများ ၁၀၀ မှာဆိုရင် ၄၅ ရာခိုင်နှုန်းလောက် အလေ့အထတစ်ခုလိုကို လုပ်နေတတ်ကြပါတယ်။ ဒီလိုအဆစ်တွေကို အညောင်းပြေအောင်ဆိုပြီး ချိုးတတ်တဲ့ အကျင့်က အဆစ်ရောင်ဝေဒနာကိုဖြစ်စေနိုင်တယ်ဆိုတဲ့ပြောစကားကိုကြားဖူးကြမယ်ထင်ပါတယ်။ ဒါက ယုံတမ်းစကားလား၊ တကယ်လား ဆိုတာကို ဒီဆောင်းပါးလေးကနေတဆင့်ပြောပြပေးပါရစေ။
Hello Sayarwon မှ ထွက်မည်။
ထွက်မှာ သေချာပြီလား။
အဆစ်တွေချိုးတဲ့အကျင့်နဲ့ ပတ်သက်လို့
အဆစ်တွေက ဒီလိုဖွဲ့စည်းထားတာပါ
အဆစ်တွေတော်တော်များများထဲမှာ ခန္ဓာကိုယ်အစိတ်အပိုင်းတွေကို အကောင်းဆုံးလှုပ်ရှားနိုင်စေဖို့အတွက် လုပ်ဆောင်ပေးတဲ့ချောဆီတွေဖြည့်ထားတဲ့ အိတ်ငယ်လေးတွေရှိနေပါတယ်။ စက်ပစ္စည်းတွေလည်ပတ်မှုကောင်းအောင် အမဲဆီ၊ချောဆီတွေက လုပ်ဆောင်ပေးသလိုမျိုးပေါ့။ ဒီအရည်တွေက အဆစ်တွေလှုပ်ရှားတိုင်းမှာ အဆင်ပြေပြေလှုပ်ရှားနိုင်ဖို့လုပ်ဆောင်ပေးပါတယ်။
အဆစ်တွေကိုဆွဲလိုက်တဲ့အခါမှာဖြစ်ဖြစ် ချိုးလိုက်တဲ့အခါမှာဖြစ်ဖြစ် အရိုးတွေတစ်ခုနဲ့ တစ်ခုကြားမှာရှိတဲ့နေရာလွတ်လေးက ဟသွားပြီး အသံတွေထွက်လာတာပါ။ ဒါက တကယ်တော့အဆစ်တွေအပေါ်မှာ မကောင်းတဲ့ဖိအားတွေသက်ရောက်စေတာပါ။ အဆစ်တွေချိုးတာက တကယ်တော့ကောင်းတာထက် ဆိုးတာကပိုများစေတယ်လို့ပြောရပါမယ်။ အဆစ်တွေချိုးတာကို နေ့စဉ်အလေ့အထတစ်ခုလို လုပ်နေမယ်ဆိုရင်တော့ အာရုံကြောတွေထိခိုက်စေနိုင်ပါတယ်။ အချို့ကတော့ ဒီလိုချိုးလိုက်မှာနေသာထိုင်သာရှိသွားတယ်လို့ဆိုပါတယ်။
အဆစ်ချိုးတာနဲ့ ပတ်သက်လို့သိထားသင့်တဲ့အချက်တွေ
အဆစ်တွေကိုချိုးတဲ့အခါ
အဆစ်တစ်ခုနဲ့တစ်ခုကြားမှာနေရာလပ်တိုးသွားနိုင်ပါတယ်။ ဒီလိုလုပ်ဆောင်မှုက အဆစ်တွေကြားက ချောဆီအဖြစ်လုပ်ဆောင်ပေးတဲ့ အရည်တွေကို ထိခိုက်စေနိုင်ပါတယ်။ ဒီအနေအထားက ဘာနဲ့တူသလဲဆိုရင်လေပူဖောင်းတစ်ခုကို လေတင်းနေအောင်ဖြည့်ပြီး မပေါက်မချင်းနံရံနဲ့ဖိပြီးဖောက်သလိုဖြစ်သွားနိုင်ပါတယ်။
အဆစ်တွေချိုးတာက ကြီးကြီးမားမားပြဿနာမရှိပေမယ့် အခန့်မသင့်တဲ့အခါ အဆစ်လွဲသွားတာ၊ အရွတ်တွေထိခိုက်တာမျိုးဖြစ်နိုင်ပါတယ်။ ဒီလိုအဆစ်ချိုးတာက အချိန်ကြာလာတာနဲ့အမျှ အဆစ်တွေမှာ ထိခိုက်မှုတွေများလာပြီး အဆစ်တွေအားနည်းလာတာမျိုးအထိဖြစ်စေနိုင်ပါတယ်။ အဆစ်တွေချိုးတာက တစ်ရှူးပျော့တွေကိုရောင်ရမ်းထိခိုက်စေနိုင်ပါတယ်။
အဆစ်ချိုးတဲ့အခါ ထွက်လာတဲ့အသံက အရွတ်တွေတင်းနေတာကြောင့်လည်းဖြစ်နိုင်ပါတယ်။ တစ်ခါတလေအရမ်းတောင့်တင်းနေချိန်မှာ အဆစ်တွေကို ချိုးလိုက်မိမယ်ဆိုရင် အရွတ်ရောင်သွားတာ၊ အဆစ်လွဲသွားတာ၊အကြောညပ်သွားတာလိုမျိုး အရိုးအကြောဆိုင်ရာပြဿနာတွေဖြစ်နိုင်ပါတယ်။
အဆစ်တွေချိုးတာက တကယ်ပဲနေလို့ကောင်းသွားစေသလား
အဆစ်တွေချိုးလိုက်တဲ့အခါ အခုမှပဲပေါ့သွားတယ်လို့ပြောတတ်ကြတယ်နော်။ တကယ်ပဲ အရမ်းကို သက်သောင့်သက်သာဖြစ်သွားစေတာလား။ အမှန်ကတော့ အဆစ်တွေကိုချိုးတာကကောင်းတယ်ဆိုတာထက် အခန့်မသင့်ရင်ဖြစ်သွားနိုင်တာတွေကတော်တော်လေးများပါတယ်။ အဆစ်တွေချိုးလိုက်တဲ့အခါ အရိုးတစ်ခုနဲ့တစ်ခု ထိခိုက်တာမျိုးမဖြစ်စေဖို့ ကြားထဲက ကာထားပေးတဲ့ အရွတ်တွေနဲ့ အရိုးနုတွေ၊ အကြောတွေအပေါ်မှာ ဖိအားသောက်ရောက်တာမျိုးဖြစ်စေပြီး မတော်တဆ ထိခိုက်တာမျိုးတွေဖြစ်စေနိုင်ပါတယ်။
ခြေထောက်တွေကိုလှုပ်ရှားတိုင်းမှာလည်း ဒူးဆစ်ထဲကနေ အသံတွေထွက်လာနိုင်ပါတယ်။ ဒါကလှုပ်ရှားမှုတိုင်းကို အဆင်ပြေပြေလှုပ်ရှားနိုင်စေဖို့အတွက် အရွတ်တွေက အလိုက်သင့်လှုပ်ရှားပေးပါတယ်။ အဆစ်တွေကို အရှေ့အနောက်နဲ့ လိုအပ်တဲ့ဘက်ကို လိုသလိုလှုပ်ရှားနိုင်စေဖို့ အဆစ်တွေနားမှာရှိနေတဲ့ အရွတ်တွေ၊အကြောတွေကလုပ်ဆောင်ပေးတာပါ။
အဆစ်တွေကိုချိုးလိုက်တဲ့အခါ အဆစ်တွေကြားထဲက ချောဆီအဖြစ်လုပ်ဆောင်ပေးနေတဲ့အရည်တွေကို ထိခိုက်စေနိုင်သလို အရွတ်တွေ၊ တစ်ရှူးပျော့တွေ နဲ့ အကြောတွေကို ထိခိုက်စေနိုင်ပါတယ်။ ဒါကြောင့် ခန္ဓာကိုယ်အတွက်အရေးပါတဲ့ အဆစ်တွေကိုရေရှည်ကျန်းမာနေစေဖို့အတွက် အပျင်းပြေသဘောနဲ့ဖြစ်ဖြစ် အလေ့အထတစ်ခုအနေနဲ့ဖြစ်ဖြစ်ချိုးတာမျိုးမလုပ်ပါနဲ့။ ခဏတာနေလို့ကောင်းသွားရင်တောင် ရေရှည်မှာထိခိုက်လာနိုင်တာတွေရှိနေပါတယ်။ ဒါကြောင့် အကောင်းဆုံးအကြံပေးချင်တာက အကြောတွေတင်းနေမယ်ဆိုရင် အဆစ်ချိုးတာထက်နေ့စဉ်ပုံမှန် အကြောလျော့လေ့ကျင့်ခန်းလေးလုပ်ပေးပါ။
နိဂုံးချုပ်အနေနဲ့ပြောရမယ်ဆိုရင်တော့အဆစ်တွေချိုးတာကြောင့် အဆစ်ရောင်ဝေဒနာမဖြစ်စေနိုင်ပေမယ့် အဆစ်တဝိုက်မှာရှိတဲ့ အရွတ်၊တစ်ရှူးပျော့တွေနဲ့ အကြောတွေကိုရောင်ရမ်းနာကျင်စေနိုင်သလို အရမ်းပြင်းထန်မယ်ဆိုရင် အာရုံကြောတွေကို ထိခိုက်စေနိုင်ပါတယ်။
Verifying...
Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။
ရင်းမြစ်များ
Is Cracking Your Knuckles Bad for You?http://time.com/3529225/cracking-knuckles-is-it-bad-for-you/ Accessed Date 16 January 2019
Love Cracking Your Knuckles? Here’s The Good And Bad About Ithttps://www.techtimes.com/articles/46593/20150416/love-cracking-your-knuckles-heres-the-good-and-bad-about-it.htm Accessed Date 16 January 2019
Knuckle cracking: Annoying and harmful, or just annoying?https://www.health.harvard.edu/blog/knuckle-cracking-annoying-and-harmful-or-just-annoying-2018051413797 Accessed Date 16 January 2019
Does cracking your knuckles cause arthritis?https://www.medicalnewstoday.com/articles/259603.php Accessed Date 16 January 2019
Share